1 ဇဝ်ဖြာ ဘော ဝီ ဘျ ဒီ အုဝ်၊ တဲး အုဝ် ယိုဝ် ခွန် ဘ့လေ ဒီပူ အာ ခွန် ပဲ့ ဟဲ့ ဘ့လေး အုန် အန် နာ အာတ့် ဟုဝ် ဇဝ်ဖြာ။ ဒေါ အန် တီ အာနေဘူခတ်နေစာ အီ မုး ခုန်ဒီခမ် မိူင် ဘာဘဲ ဟဲ့ ဟွတ့် မှေတ့် ဟာဝ် အာယေခေါနီ အီ မုး ဂွန် အာယောယာခိမ် အီ မုး ခုန်ဒီခမ် ဒူအီ အာယူဒါ။ အန် ဟဲ့ မှေတ့် ဟာဝ် ဘော ဂေ အာမူ အာမာတ် ခဲင် မိူင် ယူဒါ ဘော ဂေ လက်ဆာမာ အီ နပ် ဒီ လိုဝ် ဟေ ဘော အီ နပ် ဒီ စိုမ် ဟိန် ဂေ အီ ကွယ် ခဲင် မိူင် ယေရူဆာလဲမ်၊ တဲး ဂေ ဝီ ဟာဝ် ကွယ် ခဲင် မိူင် ဘာဘဲ။ 2 အာဒါ အူ ခွန် န့ ဘော မုး ဘ့လေ ဒီပူ အီ မွှိုမ် ကာဆဝ်၊ န့ ဘော ပီ ဘ့လေ ဒင် ဒီလူယ်။ အာဒါ ပေါ အူ ခွန်၊ န့ ယီ တူ မွှိုမ် မာဆေ၊ န့ ကော ဟူ ပွိုန် ဟူမ်။

3 ဇဝ်ဖြာ ဝီ ဒီမွှတ် အုဝ် တဝ်း၊ “အိုယ် အာယေရေမီ၊ မာဆေ ပီ ယိုဝ် မဲ။း” အုဝ် မိူဝ် ဝီ တဝ်း၊ ‘အုဝ် ယိုဝ် ဘ့လေ ဒီပူ။ ဘ့လေ ဒီပူ အီ မွှိုမ်၊ န့ ဘော မွှိုမ် ကာဆဝ်။ ဘ့လေ ဒီပူ အီ တူ မွှိုမ်၊ န့ တူ မွှိုမ် မာဆေ၊ ကော ဟူ ပွိုန် ဟူမ်။’”

4 ဟဲ့ ဟွတ့်၊ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ အူ ဇေန့် တဝ်း၊ 5 “ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ ဟဲ့ ကာလာင်၊ ‘အုဝ် ဒီ မာတ် ဂေ ဒူအီ အာယူဒါ အီ ဟဲ့ ခမ် ဒီ ဘဲန် ပီ မှေတ့် ဟာဝ် အီ ဟဝ်၊ တဲး ဂေ ပီ ဘ့လေ အီ မွှိုမ် တွိုန်။ အုဝ် မိူဝ် ဟဲ့ တဲး ဂေ လေး ဒီ နီ၊ တဲး ဂေ ဝီ ဟာဝ် ကွယ် ခဲင် မိူင် ဘာဘဲ။ 6 အုဝ် ဒီ ဘော ယွတ် မဲန် ဂေ ဘော လိုမ်လာ ဂေ၊ ဘူင် တဲး န့ ဘဲန် အာဂျိုဝ် ဒီ ဂေ။ အုဝ် ပီ ဒီ ဝီ ဒိုဝ်း တး ဂေ ဒီ နီ။ ဝါယ် အန် တီ အုဝ် မိူဝ် အာဝ် ဟူ ပျာတ့် ဂေ။ န့ ပီ အုဝ် ဒီ ဝီ မ့ပြာယ် ဂေ၊ အာဝ် ဟူ ရိုတ့် ဝဲန် ဂေ။ အုဝ် ဒီ ဝီ ဆမ် ဂေ။ 7 အုဝ် ဒီ ဝီ ဒွါ နဝ်း ဖွိုမ် အီ တဲး ဂေ နပ် အုဝ် မုး ဇဝ်ဖြာ ပီ ကြိုပ် ဂေ။ ဂေ မိူဝ် ဒီ ဘဲန် ဒူအီ ပီ အိုပ် အုဝ်။ အုဝ် မိူဝ် ဒီ ဘဲန် ဇဝ်ဖြာ ပီ ကြိုပ် ဂေ။ ဂေ ဒီ ဒိုဝ်း ဘော နဝ်း ဘော ဖွိုမ် ဂေ ဘော တူတ့် ဝီ တး ဒူင် ကွယ် အုဝ်။’”

8 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “မာလဲ၊ ဘ့လေ ဒီပူ အီ တူ မွှိုမ် အီ တူ ပွိုန် ဟူမ်၊ ဂေ ဘော ပီ အာဇေဒေကီ အီ မုး ခုန်ဒီခမ် အီ အိုပ် မိူင် ယူဒါ ဘော ဂေ အာမူ အာမာတ် အန် ဘော ဂေ ဒူအီ ခဲင် မိူင် ယေရူဆာလဲမ် အီ ဆီ ဂိူတ် ဆီ ကွယ် ခဲင် မိူင် နီ ဘော ဂေ ဒူအီ အီ ကွယ် ခဲင် မိူင် အဲဂိုပ်။ 9 အုဝ် ဒီ ဘူင် တဲး ဂေ ဘဲန် ပီ ဇွင့် အီ ဟဝ်၊ တဲး ဒူအီ ဒွန် မာန် ဒွန် မိူင် နဲန ဂေ၊ တဲး ဂေ ဘဲန် ပီ အေး ပီ ဒိူင် အီ ဟဝ်၊ တဲး ဂေ ကော ကာလတ့် ဒွန် နာ ဒွန် ပ့လုဝ့် ခဲင် မိူင် ဒူင် ဟဲ့ ဟုဝ် တဝ် အုဝ် ဒီ ဂေ။ 10 အုဝ် ဒီ တဲး ဂေ ခမ် ဒုက် ဒီ မာပွါ့ လာင် ဂေ ဘ့လာ လျီး။ အုဝ် ဒီ တဲး ခမ် ဒုက် အေတ့် ပီ ဒီ ဟူမ်၊ ဒုက် ဒီ ဆဝ် ဂါလ။ တဲး အီ ဟဝ် ပျာတ့် ဝဲန် ဂေ၊ တဲး ဂေ ကော တူတ့် ခဲင် မိူင် ပဲ့ ဟဲ့ ဒွါ အုဝ် ဒီ ဂေ ဘော ဂုန့် ဒင် ဂေ။”