1 ဇဝ်ဖြာ ပီ ဝီ ကာလာင် တဝ်း၊ “ဂေ ဒါ အီ ဟျီင် မာဘူ အီ ဟဲ့ ဝီ ကာစွှာ့ ဘူင် တဲး မာဘူ တဝ် ခဲင် ဝဲင် အုဝ် ဒူင် ဟဲ့ ဒွိုမ် ဟူမ် ဂေ ပေတ့် တွိုန်၊ ဂေ ဒီ လုဝ် ခမ် ဝူတ် ဂေ။” 2 ပါယ် တီ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဝီ ကာလာင် လွင် ဂေ ဒါ အီ ယွတ် မဲန် ဒူအီ ပီ အိုပ် အုဝ်။ ဂေ ပီ ဒူအီ အီ ဟျီင် မာဘူ တီ။ အန် တဝ်း၊ “ဘေ ဟဲ့ ဘူင် ဒီ ညွန် တဲး မာဘူ အုဝ် တဝ် ကာယဝ်း ကာရေး။ ဘေ မိူဝ် အာဝ် ဟူ ယွတ် လိုမ်လာ ဂေ။ အုဝ် ဒီ ဝီ တဲး ဘေ ဝီ ခမ် မှာပ် ပဲ့ ဟဲ့ ဘူင် ဘေ တီ။” 3 “အုဝ် ဒီ ဝီ ဒိုဝ်း မာဘူ အီ ဆီ ဂိူတ် ဆီ ကွယ် ခဲင် မိူင် ပဲ့ ဟဲ့ ဟုဝ် လေး အုဝ် တွိုန်၊ တဲး ဂေ ဘောကာဂ့လျီတ် ဝီ တး ကွယ် ကာဇု ကာဒိုမ်။ အုဝ် ဒီ ဝီ ဒိုဝ်း တး ဂေ ဒူင် ကွယ် ဘြိမ် ဂေ။ ဂေ ဒီ ဘော ဝီ မိုဝ်း ဂွန် ဝီ ဘြဲ ဝီ ကိူန်။ 4 အုဝ် ဒီ တဲး ဂေ ဒါ အီ ဟျီင် မာဘူ ဂေ တီ ဝီ ယွတ် မဲန် ဂေ ဘော အိုပ် ဂေ။ ဝါယ် အန် တီ မာဘူ ဂေ တီ မိူဝ် အာဝ် ဟူ မိုဝ်း ဒီ လုဝ် ယုဝ်။ အာဝ် မိုဝ်း ဒီ လုဝ် ကာစွာ၊ လုဝ် ကာပိုန့်။ ဂေ မိူဝ် အာဝ် ဟူ ဘျုဝ်း၊ အာဝ် ဟူ ဟြာယ် ဒေါ မှဝ်။”

5 ဇဝ်ဖြာ ပီ ဝီ တဝ်း၊ “န့ ဒီ ဇမ် ဆီငဲ ပန် ဒီ တဲး အုဝ် ဒူအီ အီ မိုဝ်း နဝ်း ဆိူဝ် နဝ်း မှာန် ဂွိုတ် တး ခဲင် ဒူအီ အာမျုဝ် အာဒါဝိတ်။ ဝီ တီ ဒီ ဘော ဘဲန် ခုန်ဒီခမ်။ အန် ဒီ ဘော မိုဝ်း အာငျာန် ဘော ဆုင်ဖျာတ် ဒူပ် ဒါရာ ဘော ဘူင် ဆိူဝ် ဆိူဝ် မှာန် မှာန် ဒဲင် ကာဒါယ် နီ။

6 ဒေါ မုး စုဝ် ဘာန် အန် တီ၊ ဇဝ်ဖြာ ဒီ ချွတ် ဂေ ဒူအီ ခဲင် မိူင် ယူဒါ။ မိူင် အီဆာရေလ မိူဝ်၊ ဂေ ဒီ ဘော ပွိုန် ကွယ် ဒါခိုယ် ကွယ် ဂတ် ဂျီတ်။ ဂေ မိူဝ် တဲး အန် ဇဝ် စိူဝ်၊ ‘ဇဝ်ဖြာ အီ တဲး အေ ဘူင် နာ ဆိူဝ် နာ မှာန်။’”

7 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “န့ ဒီ ဘော ဇမ် အာခြာဝ် ဂေ ဒူအီ အာဝ် ဟူ ဒိူင် တဝ်း၊ ‘ပီ တဝ်း အုဝ် ဟဲ့ မုး ဟဲ့ မှာန် ပီ ဇဝ်ဖြာ ဟဲ့ ချွတ် လေး ဂေ ဒူအီ အီဆာရေလ ခဲင် မိူင် အဲဂိုပ် ဟဲ့ မုး ဟဲ့ မှာန်။’ 8 ဂေ ယီ ဒီ ဝီ ဒိူင် ဝီ ကာဆဲန့် တဝ်း၊ ‘ပီ တဝ်း အုဝ် ဟဲ့ မုး ဟဲ့ မှာန် ပီ ဇဝ်ဖြာ ဟဲ့ ဒိုဝ်း လေး ဂေ ဒူအီ အီဆာရေလ ခဲင် မိူင် နာ ကွာ ဟဲ့ မုး ဟဲ့ မှာန်။’ အန် ဇဝ် ပီ ဒီ ဝီ ဒိုဝ်း တး လှုက်လှာန် ဂေ ဒူအီ ခဲင် မိူင် ဒူင် ဟဲ့ ဟုဝ် အန် ဇဝ် ဒီ ဂေ၊ တဲး ဂေ ဝီ တး ကွယ် ဒါခိုယ် ခဲင် မိူင် ဘြိမ် ဂေ။”

9 ဂြုဝ်း အီ ကာလာင် လွင် ဂေ ဒါ အီ ဘျာန် ဂြုဝ်း ဇဝ်ဖြာ န့ ဘော ပါယ် နီ။ န့ မုး ကူပ် ဇဝ်ဖြာ ဘော ဂြုဝ်း ဇဝ်ဖြာ အီ ဆီငါ ဘွတ်၊ န့ ဘော ဘဲန် နဝ်း လိုဝ် နဝ်း ကာပျာတ့် ဒီ အုဝ်။ ကာအာင် အုဝ် မိူဝ် ဟဲ့ ဟွတ့် ဒီယုး ဒီယေန့် တူတ့်။ အုဝ် မိူဝ် ဟဲ့ ပီ ဒူအီ ယိုတ့် ပဝ်း ဘော ဒူအီ အီ မွက့် ကာဆဝ် အိုမ် မာငုန်။

10 ခဲင် မိူင် နီ ဟဲ့ မုး တူတ့် အီ တူ မွှိုမ်၊ အီ လာယ် လုတ့် လာယ် လာယ်။ ခဲင် မိူင် နီ ဟဲ့ ဘဲန် က့လိုဝ် ဘဲန် ငှဝ် ကူပ် ဇဝ်ဖြာ ဟဲ့ ဒိူင် မိူင် နီ။ ခဲင် ပြဲ ဒူင် ဟူမ် ဂေ ဒုဝ် ဆတ်ဒါဝါ ဒီ ပေတ့် တွိုန် မိူဝ်၊ ဟဲ့ ဟွတ့် ကာဟဝ်း တူတ့်။ န့တေန့် ဒူင် ဝဝ့် ဒူင် ဟာဝ် ဂေ မိူဝ် ဟဲ့ မုး တူတ့် အီ တူ မွှိုမ်။ အာဖုင် ဒင်ခုဝ် ဂေ မိူဝ်၊ အာဝ် ဟူ ဒူပ် နာ ဆိူဝ် နာ မှာန်။

11 “ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒါ အီ လှူ ဒီ ဇဝ်ဖြာ၊ ဂေ အာဝ် ဟူ ရုဝ်ဆေ ဇဝ်ဖြာ။ ခဲင် ကာင် အုဝ် အုဝ် ဘော ယိုဝ် နာ ဟာယ် နာ မိူက် ပီ ဘူင် ဂေ။” ဇဝ်ဖြာ ဟဲ့ ကာလာင် ပါယ် တီ။

12 “ပါယ် တီ ပီ ဒူပ် ဂေ၊ န့ ပီ ဂေ ဒူပ် အီ အပ် ဝွင့်။ ဂေ လုဝ် ခမ် အီ ဟဝ် ဇုန် ကေး ဂေ။ ခုဝ်၊ ဆေ ဟီ ဝီ ဇမ် ဆီနမ် ဒီ ဒမ် အုဝ် မှာပ် ဂေ၊ အုဝ် ဒီ တဲး ဂေ ခမ် ကာဆဝ်။” ဇဝ်ဖြာ ဟဲ့ ကာလာင် ပါယ် တီ။

13 အုဝ် ဟဲ့ ဟွတ့် ယိုဝ် မျုဝ် အီ တူ မွှိုမ် ဒီ ဂေ ဒါ အီ ဘျာန် ဂြုဝ်း ဇဝ်ဖြာ ခဲင် မိူင် ဆာမာရီ။ ဂေ ဟဲ့ ဝီ ဘိုင် ကြိုပ် ဇဝ် ဘာလ ဘော ဘျာန် ဂြုဝ်း ဇဝ်ဖြာ။ ဂေ ဘူင် တဲး ဒူအီ အီဆာရေလ အီ မုး ဒူအီ ပီ အိုပ် အုဝ် ကာလိုပ်။

14 ကာတဲ ဂေ ဒါ အီ ဘျာန် ဂြုဝ်း ဇဝ်ဖြာ ခဲင် မိူင် ယေရူဆာလဲမ် တီ မိူဝ်၊ အုဝ် ဟဲ့ ယိုဝ် အီ တူ မွှိုမ် ကာဆဝ်။ ဂေ လာယ် လုတ့် လာယ် လာယ် ဘော ကာလာင် ဂြုဝ်း ကာလုဝ် ဘော ဘူင် အီ တူ မှာန် ဆေဆေ။ ဂေ ဘော ဝီ ဒွါ ပ့လူမ် ဒွါ ဟဲန့် ဒီ ဂေ အီ ဘူင် နာ ဟာယ် နာ မိူက်။ န့ မိူဝ် တူ မိုဝ်း ခေါ အူ ဝီ အီ ပွိုန် ဝဲန် နာ ဟာယ် နာ မိူက် ပီ ဘူင် ဂေ။ ခဲ့ ကွယ် ဂေ ဘောကာဂ့လျီတ်၊ ဟဲ့ ပီ ဒူအီ ခဲင် မိူင် ဆုဝ်ဒူမ်။ ဂေ မိူဝ် ဟဲ့ ပီ ဒူအီ ခဲင် မိူင် ဂုဝ်မုဝ်။

15 ဇဝ်ဖြာ အီ အိုပ် တူတ့် ဒွန် မျုဝ် ဝီ ကာလာင် လွင် ဂေ ဒါ အီ ဘျာန် ဂြုဝ်း ဇဝ်ဖြာ ပါယ် နီ။ အန် တဝ်း၊ “အုဝ် ဒီ ဘော ဟျီင် တဲး ဂေ ဒျီင် အိုမ် ဒဝ် ဆွင့်၊ ဘော အိုမ် အီ မိုဝ်း ငူန် ဂေ ဆာန်။ ခုဝ်၊ ဂေ ဒါ အီ ဘျာန် ဂြုဝ်း ဇဝ်ဖြာ တီ၊ ဂေ တူ ရုဝ်ဆေ ဇဝ်ဖြာ။ န့ တဲး မိူင် ဘော မိူင် ကာဒါတ့်။”

16 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ကွဲ့ တဲး ဘေ ထူမ် ဂြုဝ်း ဂေ ဒါ အီ ဘျာန် ဂြုဝ်း ဇဝ်ဖြာ တီ။ ဂေ ကာလာင် ဂြုဝ်း ပီယေန့်၊ ဂြုဝ်း ဒီလူယ် ဒီလာယ်။ ဂေ တဲး ဘေ နှဝ့် န့ဒဝ့် အီ တူ မှာန်။ ဂေ တူ ကာလာင် ဒူပ် ပီ ကာလာင် ဇဝ်ဖြာ။ ဂေ ဝီ ကာလာင် ဂြုဝ်း အီ လေး ခဲင် နဝ်း ဂေ။

17 ဒါ အီ ဘျာန် ဂြုဝ်း ဇဝ်ဖြာ ဂေ တီ၊ ဂေ ဘော ဝီ ကာလာင် ဒီ ဂေ အီ တူ ရီမာတ် ဂြုဝ်း ဇဝ်ဖြာ တဝ်း၊ ‘ဘေ ဒီ ပွိုန် ကွယ် ဂတ် ဂျီတ်၊ ကွယ် ဒါခိုယ်။’ ဂေ ဘော ဝီ ကာလာင် ဒီ ဂေ ဒူအီ အီ ဒိူဝ် ကာဆဝ် အီ ဘူင် ဒူပ် ပီ အိုင် ဂေ တဝ်း၊ ‘ဘေ တူ ကာဒုး အာဖေ အာရေ မာဆေ။’”

18 န့ မိူဝ် တူ မိုဝ်း အာဆေ အီ ဟဲ့ ဒွိုမ် ကာမွုန် ဆင်ချာင် ရိုမ် ဒူပ် ဇဝ်ဖြာ၊ တဲး အန် နပ်၊ အန် ယိုဝ်၊ တဲး အန် ပွိုန် ဒီ ထူမ် ဂြုဝ်း ဇဝ်ဖြာ။ န့ မိူဝ် တူ မိုဝ်း အာဆေ အီ ဟဲ့ ထူမ် ဂြုဝ်း ဇဝ်ဖြာ။

19 ဘ်ု ဘေ ယွတ်၊ နဝ်း ရူ ဇဝ်ဖြာ ဒီ လေး ပီ ခုန် လာင်။ န့ ဒီ ဘော ဘုတ် ဘန် ကာဆဝ် ဒဲင် ဂိန့် ဂေ အီ တူ ဒူပ် ဒါရာ။

20 နဝ်း ရူ ဇဝ်ဖြာ၊ တူ နပ် ဒီ စူ။ အန် ဒီ ဘော ဘူင် တဲး န့ ကော ဘြေ့ ခဲ့ ပီ ခြာမ် အန် ဒီ ဘူင်။ န့ ဒီ ဇမ် အူ ဆီငဲ၊ ဒေါ အန် တီ ဘေ ဒီ ဘော ဝီ နပ် ဆီချာ ဆီချာ လွင် အန် တီ ခဲင် နဝ်း ဘေ။

21 ဒူအီ အီ ဘျာန် ဂြုဝ်း ဇဝ်ဖြာ ဂေ တီ အုဝ် တူ စ်ု ဂေ ဟာဝ်။ ဂေ ယီ ဟဲ့ ဟွတ့် ကာဘ့လဲပ် ဟာဝ် ကာလာင် ဂြုဝ်း ဂေ။

22 ဆေ ဂေ ဟဲ့ ကွယ် ရိုမ် ဒူပ် အုဝ် ဒေါ ကာမွုန် ဆင်ချာင် အုဝ် ဘဲန် မျုဝ် ဘဲန် မျုဝ်၊ ဂေ ဒီ ဘော ပွိုန် တဲး ဒူအီ ပီ အိုပ် အုဝ် ယိုဝ် ဂြုဝ်း အုဝ်၊ တဲး ဂေ ဘော ပွိုန် ဒီ ဝး အီ တူ မှာန် ဘော ဝဲန် ဘော ပဲ့ ဟဲ့ ဘူင် ဂေ အီ တူ ဘွတ် အီ တူ မွှိုမ်။

23 ဇဝ်ဖြာ တဝ်း၊ ဘေ ထာင် အုဝ် မုး ဇဝ်ဖြာ အီ ကွယ် မီ ဒူင် ကာတတ်။း အုဝ် မုး ဇဝ်ဖြာ အီ ကွယ် ဘော ဒူင် ကာတူင့်။

24 အာဝ် မိုဝ်း အာဆေ အီ ဒီ ပွိုန် ချြီင် ဒီ အုဝ်၊ ကွဲ့ တဲး အုဝ် ယိုဝ် အန်။ ဘော ခဲင် ဂါင်ဟြာဝ် ဘော ဒဲင် ကာဒါယ် အုဝ် ဘော ကွယ် ဒွန် နာ ဒွန် ပ့လုဝ့်။ ခဲ့ တီ ဇဝ်ဖြာ ဟဲ့ ကာလာင်။

25 အုဝ် ဟဲ့ ဟွတ့် ယိုဝ် ဂြုဝ်း ဂေ ဒါ အီ ဘျာန် ဂြုဝ်း ဇဝ်ဖြာ။ ဂေ တဝ်း ဒီ ဘိုင် ပွုန် အုဝ် ယီ ဝီ ကာလာင် ဂြုဝ်း ကာလုဝ်။ ဂေ တဝ်း၊ ‘အုဝ် ဟဲ့ ဟွတ့် အိတ် မ့ဘာဝ်။ အုဝ် ဟဲ့ ဟွတ့် အိတ် မ့ဘာဝ်။’ 26 ဒူအီ အီ တဝ်း ဒီ ဘျာန် ဂြုဝ်း ဇဝ်ဖြာ အီ ကာလာင် ဒူပ် အီ လေး ခဲင် နဝ်း ဂေ၊ ကာလာင် အီ တူ မှာန် တီ၊ ဂေ ဒီ ဘော ဒီ ဘူင် ပါယ် တီ န့ ဒီ လှေန့် ခဲ့ မှဝ်။း 27 ဂေ ထာင် ဆေ ဂေ လာယ် ကာလာင် လွင် ပီ မ့ဘာဝ် ဂေ တီ၊ န့ ဒီ တဲး ဒူအီ ပီ အိုပ် အုဝ် ပိဝ် လွင် အုဝ်။ ပါယ် တီ ဂုန့် ဒင် ဂေ ဟဲ့ ပိဝ် အုဝ် ကူပ် ကြိုပ် ဂေ ဇဝ် ဘာလ။ 28 ဒါ အီ ဘျာန် ဂြုဝ်း ဇဝ်ဖြာ အီ ကာလာင် လွင် ပီ မ့ဘာဝ် ဂေ တီ၊ တဲး ဂေ ကာလာင် ပီ မ့ဘာဝ် ဂေ တီ။ ဂေ ဒါ အီ ဘျာန် ဂြုဝ်း အုဝ်၊ တဲး ဂေ ကာလာင် ဆီချာ ပီ စ်ု အုဝ် ဂေ ကာလာင်။ န့ ပီ ခါမ် ဂါယ် ဒီဂါဝ် တူ ပွိုန် လာယ် ကာဂဝ်။ ဇဝ်ဖြာ ဟဲ့ ကာလာင် ပါယ် တီ။ 29 ဇဝ်ဖြာ ပီ ဝီ တဝ်း၊ “ဂြုဝ်း အုဝ် န့ ဘော ပီ ငဝ်။ န့ ဘော ပီ ဘော မီဒဲ ဟိန် အီ ပွိုန် မး မာဝ်၊ တဲး န့ ကာလာတ့် ဘဲန် ဘူင့် ဘဲန် ဘူင့်။

30 ပါယ် တီ အုဝ် မိူဝ် ဒီ ဘူင် ကာဘး ဒီ ဂေ ဒါ အီ ဘျာန် ဂြုဝ်း ဇဝ်ဖြာ အီ ပြာ ဒီ ဒိုဝ်း ဂြုဝ်း ဒီ ဒါ အီ ဘျာန် ဂြုဝ်း အုဝ် ပေါ အူ ဝီ ဘော တဝ်း န့ မုး ဂြုဝ်း အုဝ်။ ဇဝ်ဖြာ ဟဲ့ ကာလာင် ပါယ် တီ။ 31 ဘ်ု ဘေ ယွတ်၊ အုဝ် ဒီ ဘူင် ကာဘး ဒီ ဂေ ဒါ အီ ဘျာန် ဂြုဝ်း ဇဝ်ဖြာ ယီ ကာလာင် အီ လေး ခဲင် နဝ်း ဂေ ယီ တဝ်း၊ ‘အာတီ ဇဝ်ဖြာ ဟဲ့ ဟွတ့် ကာလာင်။’” ဇဝ်ဖြာ ဟဲ့ ကာလာင် အုန် ပါယ် တီ။ 32 အုဝ် ဒီ ဘူင် ကာဘး ဒီ ဂေ ဒါ အီ ဘျာန် ဂြုဝ်း ဇဝ်ဖြာ အီ ကာလာင် ဒူပ် ပီ မ့ဘာဝ် ဂေ၊ ဘော ကာလာင် အီ တူ မှာန်။ ဂေ ဘော ကာလာင် အီ တူ မိုဝ်း ဒီခုဝ် ဘော ဘူင် တဲး ဒူအီ ပီ အိုပ် အုဝ် ဝီ ကာလိုပ်။ အုဝ် မိူဝ် တူ မိုဝ်း ဒီ စ်ု ဂေ။ အုဝ် မိူဝ် တူ မိုဝ်း ဒီ ကာလာင် ဒီ ဂေ။ ဂေ မိူဝ် အာဝ် ဘဲန် အာဂျိုဝ် ဒီ ဒူအီ ဂေ တီ။” ဇဝ်ဖြာ ဟဲ့ ကာလာင် ပါယ် တီ။

33 “ဘော မုး ဒူအီ အာမျုဝ် ဂေ နီ၊ ဘော မုး ဒါ အီ ဘျာန် ဂြုဝ်း ဇဝ်ဖြာ၊ ဘော မုး ဒါ အီ လှူ ဒီ ဇဝ်ဖြာ အာဝ် တဝ်း၊ ဆေ မင် အီ ဘော ဒီမွှတ် မဲ တဝ်း၊ ‘ဂြုဝ်း ဇဝ်ဖြာ အီ ကာလာင် အီ တူ မွှိုမ် လွင် နာ အာတ့် ဟာဝ်၊ န့ ပါယ် မှဝ်။း’ ဆေ ဂေ ဘော ဒီမွှတ် မဲ ပါယ် တီ မဲ လုဝ် တဝ်း ဒီ ဂေ၊ ‘အာဝ် မိုဝ်း အီ တူ မွှိုမ် ပီ ကာလာင် လွင် နာ အာတ့် ပေါ မ့ပွါ။ ဇဝ်ဖြာ ဟဲ့ ဟွတ့် ကာလာင် အီ တူ မွှိုမ် လွင် ဘေ။ အန် ဟဲ့ ဝဲန် ဘေ။’ 34 ဘော မုး ဒူအီ ဘျာန် ဂြုဝ်း ဇဝ်ဖြာ၊ ဘော မုး ဒါ အီ လှူ ဒီ ဇဝ်ဖြာ၊ ဘော မုး ဒူအီ ရဝ် ဒူအီ ကာင်၊ ဆေ န့ မိုဝ်း ဒူအီ အီ တဝ်း၊ ‘အာနီ ဂြုဝ်း ဇဝ်ဖြာ အီ ကာလာင် လွင် နာ အာတ့် ဟာဝ်။’ အုဝ် ဒီ ဒမ် မှာပ် ဒီ အန် ဘော ဒီ ဒူအီ ခဲင် န့ဟူမ် အန်။ 35 ဘေ ဒွန် အီ နပ် ဒီ ကာလာင် ဒီ ဂေ အီ ကွယ် ကာချြီ့ ဒီ ဘေ ဘော ဒီ ဘီနွင် ဝေါဝဲ ဘေ တဝ်း၊ ‘ဇဝ်ဖြာ ဟဲ့ ကာလာင် ပါယ် မှဝ်။း ဇဝ်ဖြာ ဝီ တဝ်း မာဆေ။း’ 36 အာခြာဝ် ဝါယ် အန် တီ မိူဝ်၊ ကွဲ့ တဲး ဘေ လာယ် ကာလာင် တဝ်း၊ ‘အာနီ မုး ဂြုဝ်း ဇဝ်ဖြာ အီ ကာလာင် လွင် နာ အာတ့် ဟာဝ်။’ ခုဝ်၊ ဂြုဝ်း ပီ ကာလာင် ဒူအီ ဒွန် အီ ဘေ တဝ်း၊ န့ ဘဲန် ဂြုဝ်း ပီ ကာလာင် အန် ဇဝ် လွင် နာ အာတ့်။ ပါယ် တီ ဘေ ဟဲ့ ဝဲန် ဂြုဝ်း ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ်။ 37 မဲ နပ် ဒီ ဝီ ဒီမွှတ် ဒါ အီ ဘျာန် ဂြုဝ်း ဇဝ်ဖြာ တဝ်း၊ ‘ဇဝ်ဖြာ ဟဲ့ တဝ်း မာဆေ ဒီ ဘေ။း ဇဝ်ဖြာ ဝီ ကာလာင် ပါယ် မှဝ် ဒီ ဘေ။း’ 38 ဘေ နပ် ဒီ တဝ်း၊ ‘အာနီ မုး ဂြုဝ်း ဇဝ်ဖြာ အီ ကာလာင် လွင် နာ အာတ့် ဟာဝ်။’ အုဝ် ယီ ဟဲ့ ဒမ် ဘေ၊ ကွဲ့ တဲး ဘေ ကာလာင် တဝ်း၊ ‘အာနီ မုး ဂြုဝ်း ဇဝ်ဖြာ ပီ ကာလာင် အန် လွင် နာ အာတ့် ဟာဝ်။’ ဆေ ဘေ ယီ ဆီ နဲ့ ကာလာင် တဝ်း၊ ‘အာနီ မုး ဂြုဝ်း ဇဝ်ဖြာ အီ ကာလာင် လွင် နာ အာတ့် ဟာဝ်၊’ 39 အုဝ် ဒီ ဘော ဒိုဝ်း ဘေ ဘော မိူင် ပဲ့ ဟဲ့ ဒွါ အုဝ် ဒီ ဘေ ဘော ဂေ ဂုန့် ဒင် ဘေ ဘောကာဂ့လျီတ်။ အုဝ် ဒီ ဝဲန် တဲး န့ ကွယ် တူင့် ကာဆဝ် ဒီ အုဝ်။ 40 အုဝ် ဒီ ဘော တဲး ဘေ ခမ် ပီ နဲန အီ ဟဝ်။ ဘေ ဘော လုဝ် ဆာယ် အီ ဆေဆေ၊ ကွဲ့ တဲး ဘေ ဆီ နပ် ဒီ ပိဝ် ဒေါ မှဝ်။’”