1 ဇဝ်ဖြာ ပီ ဝီ ကာလာင် ဒီ အာယေရေမီ တဝ်း၊ “တဲး မဲ ဝီ လူင် ဒူင် ကွယ် ဟုဝ် ခုန်ဒီခမ် ယူဒါ ဘော ကာလာင် ဂြုဝ်း ပီ ဒမ် အုန် အုဝ် ဒီ အန်။ 2 တဲး မဲ တဝ်း၊ ‘အိုယ် မဲ ခုန်ဒီခမ် အီ အိုပ် မိူင် ယူဒါ အီ မုး မိူင် ပဲ့ ဟဲ့ ဒွိုမ် အိုပ် ခုန်ဒီခမ် အာဒါဝိတ်၊ ဘော မဲ ဘော ဂေ ဒဲစေန့် မဲ ဘော ဂေ ဒူအီ ခဲင် မိူင် မဲ အီ လိုပ် ဒီ မာလုဝ်း မိူင် နီ၊ တဲး ဘေ ထူမ် ဂြုဝ်း ဇဝ်ဖြာ။ 3 ဇဝ်ဖြာ ဝီ ကာလာင် ဒီ ဘေ၊ တဲး ဘေ ဘူင် ဒူပ် ဒါရာ။ တဲး ဘေ စွယ် တဲး ဒူအီ လွတ် ဒီ ဒူအီ အီ ခါနှာပ် ဂေ။ ကွဲ့ တဲး ဘေ ဘူင် အီ တူ ဒူပ် ဒါရာ။ ကွဲ့ ခါနှာပ် ဂေ အီ မုး ခဲတ့် ဘော ဂွန် ဆီပြး ဂေ ယာ ဆီပြး။ ခဲင် မိူင် ဒူင် ကွယ် ဘေ နီ ကွဲ့ တဲး ဘေ ငဝ်း ယမ် ဒူအီ အီ တူ မိုဝ်း မှာပ်။ 4 ခုဝ်၊ ဆေ ဘေ ဘော ဘူင် ဒူပ် ဒါရာ၊ ခုန်ဒီခမ် အီ အိုပ် မိူင် ပဲ့ ဟဲ့ ဒွိုမ် အိုပ် ခုန်ဒီခမ် အာဒါဝိတ်၊ ဂေ ဘော ဒီ တး လိုပ် ဒီ မာလုဝ်း အီ စိူဝ် မာလုဝ်း ခုန်ဒီခမ်။ ဘော ဂေ ဘော ဒဲစေန့် ဂေ ဘော ဒူအီ ခဲင် မာန် မိူင် ဂေ၊ ဂေ ဘောကာဂ့လျီတ် ဒီ ဘော ဒူပ် ခုန်ဒီခမ် ဂေ အီ ပဝ့် လက်လဝ် မ့ပြွင့်၊ ပဝ့် ဘော မ့ပြွင့်၊ ဝီ တး လိုပ် ခဲင် မိူင် နီ။ 5 ဆေ ဘေ ယီ တူ ဘူင် ဒူပ် ဂြုဝ်း ဇဝ်ဖြာ နီ၊ အုဝ် ဇဝ်ဖြာ ဒီ ဝီ ဒိူင်၊ တဲး ဘော ဒုဝ် ဘြိမ် အုဝ် ဝီ ဆီဖုဝ်။ အုဝ် ဒီ တဝ်း၊ ဟုဝ် ခုန်ဒီခမ် တီ ဒီ ကာပျာတ့် လိုဝ် တူတ့်။’”

6 ခုဝ်၊ ဇဝ်ဖြာ ဟဲ့ ဟွတ့် ကာလာင် လွင် ဟုဝ် ခုန်ဒီခမ် အီ အိုပ် မိူင် ယူဒါ။ အန် တဝ်း၊ “မဲ ပီ ဘော ဟဲ့ ပီ မိူင် ဂီလေအာတ် ဘော ကာဒဲ့ နွန် လေဘာနုန် အာဒါ အုဝ်။ အုဝ် ယီ ဒီ ဝီ ဘူင်၊ တဲး မဲ ပီ ပြဲ ကာဟဝ်း ဒူင် တူ ဒွိုမ် မိုဝ်း တူ ဒွိုမ် ကွယ် ဒူအီ။

7 အုဝ် ဒီ ဘူင် တဲး အီ ဟဝ် တး ပျာတ့် မဲ၊ တဲး ဒွန် အီ ဂူင့် ခြိုင် ကာဂုဝ်း ဂေ။ ဂေ ဒီ ဂ်ု ဟေ အာရိတ် ကာဒင် အီ ဟဲ့ မွှိုမ် ကာဆဝ် ဘော ဝီ ကာနူမ် ဒုဝ့် ခဲင် ငဝ်။

8 ဂေ ဒူအီ ကိူန် အီ တး ကာလုဝ်း မိူင် တီ ဂေ ဒီ ဘော လာယ် ကာမွုန် တဝ်း၊ ‘ကူပ် မာဆေ ဇဝ်ဖြာ ပီ ဆော ဘူင် ပါယ် နီ ဒီ မိူင် တာင် နီ။း’ 9 ဟဲ့ ဟွတ့်၊ ဂေ ပီ ဒီ ဝီ ဝျီ့ တဝ်း၊ ‘န့ ဘော မုး ကူပ် ဟဲ့ ဝဲန် ဂေ ပီ ကာဆဲန့် ဂေ ဒီ ဇဝ်ဖြာ ပီ ကြိုပ် ဂေ။ ဂေ ဟဲ့ ဝီ ဒူပ် ဒီ ကြိုပ် ဇဝ် ပီ ကြိုပ် အီ ဟဝ်။’”

10 ကွဲ့ တဲး ဘေ ယာမ် ကူပ် ခုန်ဒီခမ် အီ ဟဲ့ ယမ်။ တဲး ဘေ ယီ ယာမ် ကူပ် ခုန်ဒီခမ် ပဲ့ ဟဲ့ မှေတ့် ဟာဝ် ရန်ဆူ ဘေ။ ခုဝ်၊ အန် အာဝ် ဟူ ပွိုန် ဒီ ဝီ တး ယိုဝ် မိူင် ဘြိမ် အန်။

11 ဟဲ့ ဟွတ့်၊ ဇဝ်ဖြာ ပီ ဝီ ကာလာင် လွင် အာဆာလူမ် အီ မုး ဂွန် ခုန်ဒီခမ် အာယုဝ်ဆီယာ အီ အိုပ် မိူင် ယူဒါ။ အာဆာလူမ် ဟဲ့ ဝီ ပ့လု ဂုန့် အန် ဘော လုဝ် ဝီ လေး တဝ် တ မိူင် အန်။ ခုဝ်၊ ဇဝ်ဖြာ တဝ်း၊ “ခုန်ဒီခမ် တီ တူ ပွိုန် ဒီ ဝီ တး ခဲင် မိူင် နီ။ 12 အန် ဒီ ဘော ဟာဝ် ယမ် ခဲင် မိူင် ဒူင် ဟဲ့ မှေတ့် ဟာဝ် အီ ဒီ အန်။ အန် မိူဝ် အာဝ် ဟူ ပွိုန် ဒီ တး ယိုဝ် မိူင် ဘြိမ် အန်။”

13 ဒူအီ အီ ဆမ် ကာင် ယီ တူ ဘူင် ဒူပ် ဒါရာ၊ အန် လုဝ် ခမ် ဝူတ်။ ဆေ အန် ဘူင် ဟူင် အိတ် အန် ခြွင့် ဒဲင်၊ ယီ တူ ဘူင် နာ ဆိူဝ် နာ မှာန်၊ အန် တူ ပွိုန် မွင့်ကာရာ။ အန် ဘော နပ် ဒီ ခါနှာပ် အီ ဟဝ် ဘူင် ဂါန် အန်၊ ယီ တူ ဒွါ ရုး အန်။

14 အန် တဝ်း၊ “အုဝ် ဒီ ဆမ် ကာင် တဲး န့ တာင်။ အုဝ် ဒီ ဘူင် ဟူင် ဒီ ခြွင့် ဒဲင်၊ တဲး န့ ဝဝ်း။” ပါယ် တီ အန် ဘော ဘူင် ကာဒဝ် ပါတဲင် အီ ကာဝဝ်း ဘော ဒိုဝ်း ဟေ အာရိတ် ဒိုက် ဒီ ရဲင်။ ဟဲ့ ဟွတ့်၊ အန် ဘော ဝီ ဖဝ်း အီ ရေန့်။

15 ဇဝ်ဖြာ ပီ ဝီ တဝ်း ဒီ အာဆာလူမ်၊ “မဲ ထာင် ဆေ မဲ ဟဲ့ မိုဝ်း ဟေ အာရိတ် ကိူန်၊ န့ ဒီ တဲး မဲ ဘဲန် ခုန်ဒီခမ်။း ဂုန့် မဲ ပွိုန် ဒီ ဟူမ် ဖဲ ဒျီင် ဖဲ ကူပ် ဘူင် ဒူပ် အန် ဒါရာ။ ပါယ် တီ အန် မိူဝ် ပွိုန် ဘော နာ ဘွတ် နာ မွှိုမ်။

16 အန် ဘော ယွတ် မဲန် ဂေ ဒူအီ ဒုက် ဒူအီ ဂိန် ဘော ဂေ အီ ဇုတ် လုတ်၊ တူ မိုဝ်း မာဆေ။ အန် ဘော ဆုင်ဖျာတ် ဒူပ် ဒါရာ။ အန် မိူဝ် ပွိုန် နာ ဘွတ် နာ မွှိုမ်။ ဆေ ဒူအီ တဝ်း၊ အန် ဟဲ့ နပ် ဇဝ်ဖြာ၊ အန် ဟဲ့ ကာအာပ် ဘူင် ပါယ် တီ။” ဇဝ်ဖြာ ဟဲ့ ကာလာင် ပါယ် တီ။

17 အန် ဝီ တဝ်း၊ “အီ မုး မဲ၊ ငါယ် မဲ ဘော တဲး မဲ မိုဝ်း မီ နဝ်း လောဖ၊ တဲး မဲ အွန် ဒီ ငဝ်း ယမ် ဒူအီ အီ တူ မိုဝ်း မှာပ် ဘော ခါနှာပ် ဘော ဖာတ် ဒိုဝ်း ကြုဝ်ကြာမ် အီ ဟဝ်။”

18 ကူပ် န့ ပါယ် တီ ဇဝ်ဖြာ ပီ ဝီ ကာလာင် လွင် အာယောယာခိမ် အီ မုး ဂွန် ခုန်ဒီခမ် အာယုဝ်ဆီယာ အီ အိုပ် ဂေ ဒူအီ အာယူဒါ။ ဇဝ်ဖြာ တဝ်း၊ “ဒေါ ယမ် အန် အာဝ် မိုဝ်း အီ တဝ်း၊ ‘အိုယ် အီကတ် အုဝ်၊ အိုယ် ဝါ အုဝ်။’ အာဝ် မိုဝ်း အီ က့လိုဝ် အီ ငှဝ် တဝ်း၊ ‘အိုယ် ဒါ ကာညာ အုဝ်၊ အာဖုင် ဒင်ခုဝ် မဲ ဟဲ့ ဟြာယ်။’

19 ဂေ ဒီ ဘော လာက် လေး ခုန်ဒီခမ် တီ နာ ရေတ့် မိူင် ယေရူဆာလဲမ်။ ဂေ ဒီ ဘော ဒိပ် ဒုဝ် ယမ် အန် ပီ အီ ဒိပ် မာလာ။”

20 တဲး မဲ ဟုဝ့် ဒဲင် နွန် လေဘာနုန် ဘော ဒဲ့ ဒီ ကာလာင်။ တဲး မဲ ဒတ် ဒဲ့ ဒီ ကာလာင် ဘော ခဲင် မိူင် ဘာဆန်။ တဲး မဲ ကွယ် ဒူင် စိူဝ် အာဘာရိမ် ဘော ဒတ် ရျီင်။ ခုဝ်၊ ဂေ ဂိုက် မဲ အီ ဟဲ့ ဒွိုမ် စွယ် မဲ၊ ဂေ ဟဲ့ ဟွတ့် လိုဝ် စှိုမ် တူတ့်။

21 ဒေါ ဟဲ့ ကွယ် ဒါခိုယ် မဲ၊ အုဝ် ဟဲ့ ဟွတ့် ဒမ် ဆာဒိက် ဒီ မဲ။ မဲ ဝီ တဝ်း၊ “အုဝ် တူ လုဝ်၊ အုဝ် တူ ထူမ်။ မဲ မိူဝ် တူ ထူမ် ဂြုဝ်း ပီ မာနုဝ် အုဝ် ဆိန့် ဒေါ ဒီတဲတ် မဲ။ မဲ မိူဝ် ဟဲ့ ဘူင် ပါယ် တီ ဆေဆေ။”

22 ခုန် ဒီ တး ဘုတ် ဝဲန် ဒူအီ မဲ အီ ယဲတ့် အီ ဟဝ် အီ ပီ ဒါ အီ ဟျီင် မာဘူ။ အီ ဟဝ် ဒီ ဘော မှေတ့် ဟာဝ် ဒူအီ အီ ဟဲ့ ဒွိုမ် စွယ် မဲ။ ပန် အန် တီ မဲ ဒီ ဝီ ဆာယ် အီ ဘော စှိုမ် ဆာရေ ကူပ် အီ ဟာယ် အီ မိူက် ပီ ဘူင် မဲ။

23 “မဲ အီ ကွယ် ခဲင် ဟုဝ် မဲ အီ စိူဝ် ‘လေဘာနုန်။’ မဲ ဘော နပ် ဒီ ဝီ ပီစှိတ် မဲ ဘော ကွယ် ဆီချာ ခဲင် ကာင် ဟေ အာရိတ်။ ဆေ ဟီ ဇမ် ပန် ဒီ ဝီ ခမ် မဲ ဒုက် တာင်၊ န့ ဒီ ဘော ပီ အီဘိုန့် ဆဝ် ဒီ မိုဝ်း ဂွန်။”

24 ဇဝ်ဖြာ ပီ ဝီ တဝ်း၊ “အုဝ် တဝ်း အာခ်ု ဒီ မဲ အာယေခေါနီ အီ မုး ဂွန် ခုန်ဒီခမ် အာယောယာခိမ် အီ ဟဲ့ ဘဲန် ခုန်ဒီခမ် ဂေ ဒူအီ အာယူဒါ၊ မဲ ပီ ဘော ဟဲ့ ပီ ဆီကာနူ ပဲ့ ဟဲ့ စှိုပ် အုဝ် ဒီ ကာနူ အုဝ် ဘ့လာက် အာအး မိူဝ်၊ အုဝ် ယီ ဒီ ဘုတ့် ဝဲန် မဲ။ 25 အုဝ် ဒီ ဝီ အာပ် မဲ ဒီ ဝီ အီ ဟဲ့ ဟြေတ့် ဒီ ငဝ်း ယမ် မဲ၊ အီ မုး ဝီ ပီ ယုဝ် ကာဆဝ် မဲ။ အုဝ် ဒီ အာပ် မဲ ဒီ ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ ဘော ဒီ ဂေ ဒူအီ အန်။ 26 အုဝ် ဒီ ဟုဝ် တဝ် မဲ ဘော မာ မဲ၊ တဲး ဘာယ် ဝီ ဟာဝ် ကွယ် ခဲင် မိူင် အီ တူ မုး မိူင် ဒူင် ဂွိုတ် ဘာယ်။ ဘာယ် ဒီ ဘော ယမ် ဒူင် တီ။ 27 ဘာယ် မိူဝ် တူ ပွိုန် ဒီ ဝီ တး ခဲင် မိူင် ဘြိမ် ဘာယ် ဒူင် ဆီ ဝီ တး ဘာယ်။”

28 ဟဲ့ မှာန်၊ အာယေခေါနီ တီ ဟဲ့ ပီ ကာလုဝ့် ကာဒါယ် အီ ဟဲ့ ကာလာတ့် ပဲ့ ဟဲ့ ဝဲန် အီ။ အန် ဟဲ့ ဘဲန် ပီ တူ အိုင် ပီ တူ ဝုဝ် အီ။ အီ ဟဝ် ဒီ ဟုဝ် တဝ် ဘော အန် ဘော ဂွန် အန်၊ တဲး ဂေ ဝီ ဟာဝ် ကွယ် ခဲင် မိူင် ပီ တူ နပ် ဂေ။

29 အိုယ် ဘေ ဒူအီ အီ ကွယ် ခဲင် မိူင် ဘော မိူင်၊ တဲး ဘေ ထူမ် ဂြုဝ်း ဇဝ်ဖြာ။

30 အန် ဟဲ့ တဝ်း၊ “တဲး ဘေ ဒဲမ် အုန် ခဲင် ဇာရာင် လွင် ဒူအီ ဝီ တီ၊ အန် တူ မိုဝ်း ဂွန် ခေါ အူ ဝီ။ အန် မိူဝ် တူ မိုဝ်း ဒေါ ဒါခိုယ် ဒေါ ဂျာမ်ဆာ ဘော စုဝ် အာဆာက် အန်။ ဂေ လှုက်လှာန် အန် မိူဝ် တူ အွင်၊ တူ ပွိုန် ဒီ အိုပ် မိူင် ပဲ့ ဟဲ့ ဒွိုမ် အိုပ် ခုန်ဒီခမ် အာဒါဝိတ်။”