1 ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ။ ဒေါ အန် တီ ခုန်ဒီခမ် အာဇေဒေကီ ဟဲ့ စ်ု အာဘာဆူရာ အီ မုး ဂွန် အာမာလာခီယာ ဘော ဒါ အီ လှူ ဒီ ဇဝ်ဖြာ အီ စိူဝ် အာစေဖာနီ အီ မုး ဂွန် အာမာအာဆေယာ ဟာဝ် ဒူင် ကွယ် အာယေရေမီ။ 2 ဂါယ် လုဝ် တဝ်း၊ “မှာန့်၊ တဲး မဲ ဒီမွှတ် ဇဝ်ဖြာ အာဒါ ယေ လွင် ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ အီ ဟဲ့ တး ကာဂုဝ်း ဒီ ယေ။ တဲး ယေ နပ် ယုဝ် ဇဝ်ဖြာ ဒီ စွယ် ယေ ဘော ဘူင် အီ မွှိုမ် အာမ် ပီ ပီ ဒွိုမ် ဘူင် အန် ဘဲန် ဇေန့် ဘဲန် ဇေန့်။ တဲး ယေ နပ် ယုဝ် အန် ဒီ ဘူင် တဲး ခုန်ဒီခမ် တီ ကာဒုး ဒီ ဝီ ဝိဝ် မိူင် အန်။”

3 ပန် တီ အာယေရေမီ ဝီ ကာလာင် ဒီ ဂါယ် လွင် ပီ ဒီ လုဝ် ဝီ ကာလာင် ဂါယ် ဒီ ခုန်ဒီခမ် အာဇေဒေကီ။ 4 ဂါယ် လုဝ် တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ တဝ်း၊ ‘အုဝ် ဒီ ဘူင် ကွဲ့ တဲး ခြိုင် ကာဂုဝ်း ပီ စ်ု ပီ တာ ဘေ ဒိုဝ် လဝ့် ခုန်ဒီခမ် မိူင် ဘာဘဲ။ ဂေ ဒူအီ ဘာဘဲ ဒီ ဘော ကွယ် နာ ရေတ့် မိူင် ဘေ ဘော ဝဲင် ရူပ် ဘေ ဒွန် ဘ့လာက်။ အုဝ် ဒီ တဲး ဂေ တး ကာဇု ခဲင် မိူင် နီ။ 5 န့ မုး အုဝ် အီ ဒီ ကာဂုဝ်း ဒီ ဘေ။ အုဝ် ဒီ ဘော ကာဂုဝ်း ခဲ့ ဆီ ဒီ လေး ပ့လူမ် ဂေ ဟဲန့် အုဝ် ကူပ် ဟဲ့ ရူ ကာဆဝ် အုဝ်။ 6 အုဝ် ဒီ ဒမ် မှာပ် ဒီ ဂေ အီ ကွယ် ခဲင် မိူင် နီ။ ဘော ဒူအီ ဘော ဒုဝ် ဆတ်ဒါဝါ ဘောကာဂ့လျီတ်၊ ဂေ ဒီ ဘော ယမ် ဒီ ဆဝ် အီ ဟဲန့် ကာဆဝ်။’ 7 ဇဝ်ဖြာ ဝီ တဝ်း၊ ‘ဝါယ် အန် တီ အုဝ် ဒီ ဝီ ဒိုဝ်း အာဇေဒေကီ အီ မုး ခုန်ဒီခမ် ဒူအီ အာယူဒါ၊ ဒိုဝ်း ဘော ဂေ ဒဲစေန့် အန် ဒွန် အီ၊ ဘော ဂေ ဒူအီ ခဲင် မာန် မိူင် အန်၊ ဂေ အီ ဆီ ဂိူတ် ဆီ ကွယ်၊ အီ ဟဲ့ လွတ် ဒီ ဆဝ် ရောဂါ၊ လွတ် ဒီ မာပွါ့ လာင်၊ လွတ် ဘော ဒုက် အီ အေတ့် ပီ ဒီ ဟူမ် တွိုန်။ အုဝ် ဒီ ဝီ အာပ် ဂေ ဒီ ခုန်ဒီခမ် အာနေဘူခတ်နေစာ ဘော ဒီ ရန်ဆူ ဂေ အီ ဟဲ့ ဟြေတ့် ဒီ ငဝ်း ယမ် ဂေ။ ခုန်ဒီခမ် တီ မိူဝ် တူ မိုဝ်း နဝ်း လှယ့် ဂေ၊ တူ မိုဝ်း နဝ်း ကာဝေ ဂေ။ အန် ဒီ ဘော ငဝ်း ယမ် ဂေ တာ မာပွါ့ လာင်။’”

8 ဒဲင် တီ မဲ လုဝ် ဝီ ကာလာင် ဒီ ဂေ ဒူအီ ကိူန် တဝ်း၊ “ဇဝ်ဖြာ ဟဲ့ တဝ်း၊ ‘တဲး ဘေ ယွတ်၊ အုဝ် ဟဲ့ တဲး န့ မိုဝ်း န့တေန့် အီ ဒွါ အာဆာက် ဘော န့တေန့် အီ တဲး အီ ယမ်၊ တဲး န့ ကွယ် ဒီ အာတ့် ဘေ။ 9 ဒူအီ အီ ကွယ် ခဲင် မိူင် နီ၊ ဂေ ဒီ ဘော ယမ် ဒီ မာပွါ့ လာင်၊ ယမ် ဘော ဒီ အေတ့် ပီ ဒီ ဟူမ် ဘော ဒီ ဆဝ် ရောဂါ။ ဂေ အီ တဝ် လေး နာ ရေတ့် မိူင် နီ၊ ဝီ ဟာဝ် ဒူင် ကွယ် ဒူအီ ဘာဘဲ အီ ဟဲ့ ဝဲင် ရူပ် ဘေ ဘော ဝီ ဂူမ်၊ ဝီ ဒွင်ဘာန် ဂေ၊ ဂေ ဒီ လွတ် ယမ်။’ 10 ဇဝ်ဖြာ ဝီ တဝ်း၊ ‘အုဝ် အာဝ် ဟူ ဂေဇူ ဒူအီ ခဲင် မိူင် နီ။ အုဝ် ဟဲ့ ဆုင်ဖျာတ် ဒီ ပျာတ့် ဂေ၊ တဲး ဂေ ကော လိုဝ် စှိုမ် တူတ့်။ အုဝ် ဒီ အာပ် ဂေ ဒီ ခုန်ဒီခမ် ခဲင် မိူင် ဘာဘဲ။ အန် ဒီ ဘော ဒိုဝ်း ငဝ်၊ ဒုဝ့် တဲး မိူင် ဂေ ကာဆိုမ်။’

11 တဲး ဘေ ထူမ် ဂြုဝ်း ပီ ကာလာင် ဇဝ်ဖြာ လွင် န့ဟူမ် ခုန်ဒီခမ် ယူဒါ။

12 ဇဝ်ဖြာ တဝ်း၊ ‘အိုယ် ဘေ လှုက်လှာန် ခုန်ဒီခမ် အာဒါဝိတ်၊ ဇဝ်ဖြာ ဟဲ့ ဒမ် အုန် တဝ်း၊ ဒွန် ဆီငဲ ဆိန့် ဆိန့်ဝး စေဝ် တဲး ဘေ ဆုင်ဖျာတ် ဒူပ် ဒါရာ။ တဲး ဘေ စွယ် ဂေ ဒူအီ ပဲ့ ဟဲ့ ဖာတ် ဒိုဝ်း အီ ဟဝ်။ တဲး ဘေ စွယ် ဂေ၊ တဲး ဂေ လွတ် ဒီ ဒူအီ အီ ဟဲ့ ခါနှာပ် ဂေ ဘော ဖာတ် ဒိုဝ်း ကြုဝ်ကြာမ် ဂေ။ ဆေ ဘေ ယီ တူ ဘူင် ပါယ် တီ၊ အုဝ် ဒီ ဘော ရူ ကာဆဝ် ဒီ ဘေ ကူပ် အီ တူ မွှိုမ် ပဲ့ ဟဲ့ ဘူင် ဘေ တီ။ နဝ်း ရူ အုဝ် န့ ဒီ ပီ ငဝ် အီ ကာဆိုမ် တူတ့်၊ အာဝ် မိုဝ်း အာဆေ အီ ဒီ ပဲ ဒီ ဘျတ်။’

13 ဇဝ်ဖြာ တဝ်း၊ ‘ဘေ အီ ကွယ် ဒူပ် ဘ့လဲင် ဘော ဒူပ် ဒီလယ့်၊ တဲး ဘေ ယွတ်။ ဘေ အီ ကွယ် ဒဲင် မာဝ် ဘော ခဲင် ဂ့လင် ဘော ခဲင် ဒူင် နာ၊ အုဝ် ဒီ လာယ် ကာဂုဝ်း ဒီ ဘေ။ ဘေ ယီ ဟဲ့ တဝ်း၊ “အာဝ် မိုဝ်း အာဆေ အီ ဒီ ရဲန် ဆိုက် အန်၊ တး ကာဂုဝ်း ဒီ ယေ။ အာဝ် မိုဝ်း အာဆေ အီ ဒီ ပွိုန် ဒီ တး လိုပ် ဒူင် ကွယ် ယေ နီ။”

14 အုဝ် ဒီ ဝီ ဒမ် မှာပ် ဒီ ဘေ၊ တဲး န့ ကာဒါန် မှာပ် ပဲ့ ဟဲ့ ဘူင် ဘေ။ အုဝ် ဒီ တဲး ငဝ် ကာဆိုမ် ပြဲ ဂေ နင် ဟေ၊ တဲး န့ ကာဆိုမ် တူတ့် ဒွန် မျုဝ် အီ ကွယ် ရူပ် ဘေ။’” ဇဝ်ဖြာ ဟဲ့ ကာလာင် ပါယ် တီ။