1 ပန် အန် တီ ဒါ အီ လှူ ဒီ ဇဝ်ဖြာ အီ စိူဝ် အာဘာဆူရာ အီ မုး ဂွန် အာအီမေရာ အန် ဘော မုး ဒါ အီ လှူ ဒီ ဇဝ်ဖြာ ဘော အိုပ် ခဲင် ဟုဝ် ဇဝ်ဖြာ။ အန် ဘော ယိုဝ် လွင် အာယေရေမီ ဟဲ့ ဘျာန် ဂြုဝ်း ဇဝ်ဖြာ ပါယ် တီ။ 2 အန် ဘော စ်ု ဂေ မး ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ တီ။ အန် ဘော တဲး ဂေ စှိုပ် ထာင် ဒီ ပ့လဝ် အာယေရေမီ ဘော ခြွင့် အန် ဒီ မာလုဝ်း အီ စိူဝ် အာဘေန်ယာမ်၊ အီ ကွယ် ခြွင့် ဒဲင် ခူပ် ဟုဝ် ဇဝ်ဖြာ။ 3 ပါ ခဲညှာ အာဘာဆူရာ ဘော ဝီ ဒိုဝ်း လေး ထာင် ဒီ ပ့လဝ် အာယေရေမီ တွိုန်။ အာယေရေမီ ဝီ တဝ်း ဒီ အန်၊ “ဇဝ်ဖြာ အာဝ် ဟူ ဒဲ့ မဲ စိူဝ် အာဘာဆူရာ။ အန် ဒီ ဝီ ဒဲ့ မဲ တဝ်း အာမာကောမီဆာဖိပ်။ လွင် ဒါင် အန် ဘော လေး အီ မွှိုမ် ယုဝ် ဒွန် နာ ဒွန် ပ့လုဝ့်။ 4 ခုဝ်၊ ဇဝ်ဖြာ ဟဲ့ ဟွတ့် ကာလာင်၊ ‘အုဝ် ဒီ တဲး မဲ ဘဲန် အီ မွှိုမ် ယုဝ် ဒီ ဒုဝ် ဘြိမ် မဲ ဘော ဒီ ဂိုက် မဲ ဂေ ဘောကာဂ့လျီတ်။ ဂေ ဒီ ဝီ လိုဝ် စှိုမ် ဘော ယမ် ဒီ မာပွါ့ လာင် ရန်ဆူ ဂေ။ မဲ ဒီ ဘော ယိုဝ် ဒီ ငါယ် မဲ။ အုဝ် ဒီ ဒိုဝ်း မိူင် ယူဒါ၊ ဝီ အာပ် တဲး ခုန်ဒီခမ် မိူင် ဘာဘဲ ဝီ အိုပ်။ အန် ဒီ ဘော မှေတ့် ဟာဝ် ဂေ ဒီ မိူင် ဘာဘဲ ဘော ငဝ်း ယမ် ဂေ အီ ဆီ ဂိတ် ဆီ ကွယ် တာ မာပွါ့ လာင် အန်။ 5 အုဝ် ဒီ ဒိုဝ်း ခဲ့ ကွယ် ခြမ် ဂေ ဒူအီ ခဲင် မိူင် နီ ဘော ကြုဝ်ကြာမ် ပဲ့ ဟဲ့ ဟြေတ့် တး ဂေ ဘော ခါဂုန် ပီ ဂဲပ် အုန် ဂေ ဘော ကြုဝ်ကြာမ် ခုန်ဒီခမ် ယူဒါ ဒွန် မျုဝ်၊ ဝီ အာပ် ဒွါ ဒီ ရန်ဆူ ဂေ။ ရန်ဆူ ဂေ ဒီ ဘော ဖာတ် ဒိုဝ်း ဇိုဝ် တီ ဒွန် မျုဝ်၊ ဝီ ဟာဝ် အုန် ခဲင် မိူင် ဘာဘဲ။ 6 ဘော မဲ ဘော ဂေ ဒူအီ ခဲင် န့ဟူမ် မဲ၊ ဘေ ဘောကာဂ့လျီတ် ဒီ ဘော ခမ် အီ မှေတ့် ဟာဝ် ဘေ၊ တဲး ဘေ ကော ဇမ် ခဲင် မိူင် ဘာဘဲ။ ဘော မဲ ဘော ဂေ ဂိုက် မဲ ပဲ့ ဟဲ့ ကာလာင် မဲ ဂြုဝ်း တူ မှာန် ဒီ ဂေ၊ ဘေ ဒီ ဘော ယမ် တူတ့် ခဲင် မိူင် တီ။ ဂေ အီ ဟဝ် ဘော ဒိပ် ဘေ ခဲင် မိူင် တီ။’”

7 အိုယ် မဲ ဇဝ်ဖြာ၊ အုဝ် မိူဝ် ဟဲ့ ခမ် မဲ ဇဝ် ပီလွှက့် ဒီ အုဝ်။ မဲ ဇဝ် ယီ မိုဝ်း ပ့လူမ် ဂေ ဟဲန့် လွှိုမ် အုဝ်၊ တဲး မဲ ပွိုန် ဒီ အိုပ် အုဝ်။ အုဝ် ဟဲ့ ကာဒုး ဒီ ခမ် ဘဲန် ပီ ကာညး အီ ဟဝ် ဘော ပီ နဲန အီ ဟဝ် ဘော ဒွင် ဝန်။

8 ဒေါ ကာလာင် အုဝ် ဂြုဝ်း ဒီ အီ၊ အုဝ် လုဝ် ဒတ် တာင်၊ တဲး ဂေ နပ် လွင် အာဖေ အာရေ ဘော လွင် အီ ဒီ ကာပျာတ့် လိုဝ် တူတ့် ဒွန် မျုဝ်။ ပါယ် တီ ကူပ် ကာလာင် အုဝ် ဂြုဝ်း ဇဝ်ဖြာ၊ အုဝ် ဟဲ့ ဘဲန် ပီ ညဝ့် ပီ ဘ့လတ့် အီ ဟဝ် ဒွန် ဆီငဲ။

9 ဆေ အုဝ် ယီ တဝ်း၊ “အုဝ် အာဝ် ဟူ ကာလာင် လွင် ဇဝ်ဖြာ၊ အုဝ် အာဝ် ဟူ ဘျာန် ဂြုဝ်း အန် ဇဝ်၊” ဂြုဝ်း ဇဝ်ဖြာ အီ ကွယ် ခဲင် နဝ်း အုဝ် ပီ ငဝ်။ န့ ပီ ငဝ် ဟဲ့ ကွယ် ခဲင် ကာအာင် အုဝ်၊ အာဝ် ပွိုန် လေး။ အုဝ် မိူဝ် ဟဲ့ နုန် ကာဆဝ် ဒီ ယိူန်၊ ကွဲ့ တဲး ဂြုဝ်း ဇဝ်ဖြာ လေး။ မာလဲ၊ အုဝ် ယီ တူ ပဲ ဒီ ခမ် ပါယ် တီ ပေါ မ့ပွါ။

10 အုဝ် ဟဲ့ ယိုဝ် ဂြုဝ်း ဂေ အီ လာယ် ဖူဖာပ်၊ အီ ဆီ ဖျာက် အုဝ်။ ဂေ ဟဲ့ ကိူန် ကာဆဝ် တဝ်း၊ “အန် နပ် မီ ဒီ ကာလာင် လွင် အီ မွှိုမ် ယုဝ် အီ မွှိုမ် ကာဟိဝ်။ အန် တူ နပ် ပေါ မျုဝ်။ တဲး အေ ဖျာက် အန်၊ တဲး ဂေ ဒါ တာင် ဒမ် မှာပ် ဒီ အန်။” ခဲ့ ကွယ် ဂေ ဂိုက် ကာလဝ့် အုဝ် ဘောကာဂ့လျီတ်၊ ဂေ ဘော ဘ်ု ဒီ ယွတ် ပန် ဒီ ကေး ဒီ စှိုမ် အုဝ်။ ဂေ ဘော တဝ်း၊ “အာဝ် လှေန့် န့ ဒီ လိုဝ်း ဆီချာ လွင် ပဲ့ ဟဲ့ ကာလုဝ် အန်။ ဒေါ အန် တီ၊ အေ ဒီ ပဲ အန် ဘော ပွိုန် ဒီ ဘူင် ဝျီ့ ဒီ အန်၊ တဲး န့ ကော ဘြေ့ ဒီ နဝ်း အေ။”

11 ပီ ဘော ဟဲ့ ပါယ် တီ မိူဝ်၊ ဇဝ်ဖြာ ယီ ကွယ် ရိုမ် ဒူပ် အုဝ်။ အန် ဘော ပီ ဒါ ဆိုက် အီ မိုဝ်း ပ့လူမ် တာင် အီ မွှိုမ် ယုဝ် ကာဆဝ်။ ပါယ် တီ ဂေ အီ ခါနှာပ် အုဝ် မိူဝ် ဂေ တူ ပဲ အုဝ်။ ခုဝ်၊ ပီ ခြာမ် ဂေ ဒီ ဘူင် အာဝ် အး၊ အာဝ် ဟူ မိုဝ်း ဒီခုဝ် မာဆေ။ ဂေ ဒီ ဘော ဝီ ဆာယ် အီ ဆေဆေ၊ အာဝ် ပိဝ် ဒေါ မှဝ်။

12 အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ မဲ မုး အန် ဇဝ် အီ ဇဲတ် ဒီ ယွတ် နဝ်း ဒူအီ။ မဲ ဇဝ် မိူဝ် နပ် ပီ ပါယ် ခဲင် နဝ်း ခဲင် ဖွိုမ် ဂေ။ အုဝ် မှာန့်၊ တဲး အုဝ် ယိုဝ် ပန် ဒီ ဘူင် ဝျီ့ မဲ ဇဝ် ဒီ ဂေ ရန်ဆူ အုဝ် ခဲ့ ပဲ့ ဟဲ့ ဘူင် ဂေ ဒီ အုဝ်။ ခုဝ်၊ အုဝ် မိူဝ် ဟဲ့ ဟွတ့် အာပ် တဲး မဲ ဇဝ် ဆုင်ဖျာတ် အာမူ အုဝ်။

13 တဲး အေ တဝ်း မှုဝ် ဒီ ဇဝ်ဖြာ။ တဲး အေ တဝ်း မှုဝ် အီ အိူပ် ဇဝ်ဖြာ။ ခုဝ်၊ အန် ဇဝ် ဟဲ့ ချွတ် ဂေ အီ ဟဲ့ ဇုတ် လုတ်၊ တဲး ဂေ လွတ် ဒီ ဒူအီ ဟာယ် ဒူအီ မိူက်။

14 အုဝ် ဒိူင် တဲး ဆီငဲ ဂွိုတ် အုဝ် ဝီ ဘဲန် အီ တူ မွှိုမ်။ ဆီငဲ ဂွိုတ် တး အုဝ် ဒီ မာ အုဝ် တီ၊ ကွဲ့ တဲး န့ ဘဲန် ဆီငဲ ခူယ် ဒါခိုယ်။

15 အုဝ် ဟဲ့ ဒိူင် ဒူအီ အီ ကာလာင် ဒီ ဂုန့် အုဝ် တဝ်း၊ “မဲ ဟဲ့ မိုဝ်း ဂွန် အီမာယ်။” ပဲ့ ဟဲ့ ကာလာင် အန်၊ ဟဲ့ တဲး ဂုန့် အုဝ် ခူယ် ကာဆဝ်။

16 ဒူအီ ဝီ တီ တဲး အန် ပီ မိူင် ဘဲန် မိူင် ဘဲန် မိူင် ပီ ပျာတ့် ဇဝ်ဖြာ။ စေဝ် ညှာ တဲး န့ မိုဝ်း မီ ဂြုဝ်း အီ ယာမ် ဂေ အီ ဒတ်။ ဒေါ ကာတဲ ဆီငဲ၊ တဲး န့ မိုဝ်း မီ ပီ ဒတ် ရျီင် ဂေ ရန်ဆူ။

17 ခုဝ်၊ အန် ဇဝ် ပီ တူ တဲး အုဝ် ယမ် ဆိန့် အာတ့် ဂွိုတ် လေး အုဝ် ခဲင် ဝတ့် မာ အုဝ်။ အန် ပီ တူ တဲး ဝတ့် မာ အုဝ် ဝီ ဘဲန် ဘာရေဝ် အုဝ်၊ ပီ တူ တဲး ဝတ့် မာ အုဝ် တီ ဂိုဝ်း ဆေဆေ။

18 မှဝ် န့ ပါယ် ပီ ဂွိုတ် တး အုဝ်၊ တဲး အုဝ် ယိုဝ် မီ အီ ဒုက် အီ ညှာပ် ဘော အီ မှဲ ဒီ နဝ်း။း မှဝ် န့ ပါယ် ပီ တဲး ဇဝ်ဖြာ အုဝ် လုဝ် ဆာယ် အီ၊ တဲး န့ ကော ဇမ် တူတ့် အာဆာက် အုဝ်။း