1 ဇဝ်ဖြာ ပီ ဝီ ကာလာင် တဝ်း၊ “တဲး မဲ ဟာဝ် စိုဝ်း ကာပဝ် ကာဒါယ် ဒီ ဒါ အီ ဘူင် ကာလုဝ့် ကာဒါယ်။” ဟဲ့ ဟွတ့်၊ မဲ ဘော ဝီ ဒဲ့ ဂေ အီ မုး ဒါ တာင် ခဲင် မိူင် ဘော ဒါ တာင် အီ အိုပ် ဂေ ဒူအီ ဘော ဂေ ဒူအီ အီ လှူ ဒီ ဇဝ်ဖြာ။ 2 တဲး ဘေ ဝီ ဟာဝ် ဒူင် ကွယ် ဒီလယ့် ဘေန်ဟီနုမ် အီ ကွယ် ကာတတ် မာလုဝ်း အီ စိူဝ် ဒူန့် ကာလုဝ့် ကာလာတ့်။ တဲး မဲ ဘော ကာလာင် ဂြုဝ်း ပဲ့ ဟဲ့ ကာလာင် အုန် အုဝ် ဒီ မဲ။ 3 တဲး မဲ တဝ်း၊ “အိုယ် ဘေ ခုန်ဒီခမ် ခဲင် မိူင် ယူဒါ ဘော ဘေ ဒူအီ ခဲင် မိူင် ယေရူဆာလဲမ်၊ တဲး ဘေ ထူမ် ဂြုဝ်း ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ်။ အန် ဇဝ် ဘော မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။ အန် ဟဲ့ တဝ်း၊ ‘အုဝ် ဒီ တဲး အာဖေ အာရေ တး ဒီ နီ၊ တဲး ဟျုဝ့် ဂေ ဒူအီ အီ ထူမ် လွင် အန် ကော ကာအာဝ် ဒွန် အီ။’ 4 ခုဝ်၊ ဂေ ဟဲ့ ဝဲန် အုဝ် ဘော ဝီ ဘူင် တဲး ဒူင် တီ ကာဒါတ့် ကာဆဝ်။ ဂေ ဟဲ့ ဝီ ဒုဝ့် လှူ ဆီနမ် အုး ငှုန် ဒီ ဇဝ် ပီ ကြိုပ် အီ ဟဝ် အီ မုး ဇဝ် ပီ တူ ဒွိုမ် နပ် ဂေ ဘော ပီ တူ ဒွိုမ် နပ် ဂုန့် ဒင် ဂေ ဘော ခုန်ဒီခမ် ဂေ။ ဂေ မိူဝ် ဟဲ့ တဲး နှာမ် ဂေ ဒူအီ အီ မိုဝ်း နဝ်း ဆိူဝ် နဝ်း မှာန် လှဲ ဒွန် နာ ဒွန် ပ့လုဝ့်။ 5 ဂေ ဟဲ့ ဝီ ဘူင် ဒူင် စာ အာဒါ ဇဝ် ဘာလ၊ တဲး ဂေ ပွိုန် ဒီ ဒုဝ့် လှူ ဂွန် ဂေ ခဲင် ငဝ် ဒီ ဇဝ် ဘာလ တီ။ လွင် အန် တီ န့ ဘော မုး ပီ တူ စ်ု အုဝ် ဂေ ဘူင်၊ ပီ တူ မိုဝ်း အုဝ် ဒီ ကာလာင်။ အုဝ် မိူဝ် တူ ဒွိုမ် ဇေန့်ဇာ လွင် အန် တီ ဒေါ မှဝ်။ 6 ကူပ် န့ ပါယ် တီ ဇဝ်ဖြာ ဝီ တဝ်း၊ န့ ဒီ ဘော ဇမ် အာခြာဝ် ဒေါ တူ ဒဲ့ ဂေ စိူဝ် ဒူင် တီ တဝ်း တောဖေတ် ဘော ဒီလယ့် ဘေန်ဟီနုမ်။ ဂေ ဒီ ဘော ဝီ ဒဲ့ ဒူင် တီ တဝ်း ဒီလယ့် ဒူင် ငဝ်း ယမ် ဂေ ဒူအီ ကိူန်။”

7 ဒူင် တီ အုဝ် ယီ ဒီ ပျာတ့် ဝဲန် တူတ့် ဒွန် မျုဝ် ပီ ခြာမ် ဒူအီ အာယူဒါ ဘော ဒူအီ ယေရူဆာလဲမ် ဒီ ဘူင်။ ဂေ ဒီ ဝီ ယမ် ဒီ မာပွါ့ လာင် ရန်ဆူ ဂေ အီ ဟြေတ့် ဒီ ငဝ်း ဂေ။ ဒုဝ် ယမ် ဂေ တီ၊ အုဝ် ဒီ တဲး ဂေ ဝီ ဘဲန် ပီ ဒီ ဟူမ် မာဆိမ် အီ ကွယ် ခဲင် ဘ့လေန့် ဘော ပီ ဒီ ဟူမ် မာဒုဝ် ပြဲ။ 8 အုဝ် ဒီ ဘူင် တဲး မိူင် တီ ကာပျာတ့် လိုဝ်၊ ဘူင် တဲး ဂေ ဒူအီ ခဲင် မိူင် တီ ကော ဝီ ကာစွာ၊ ဝီ ကာပိုန့် ကာဆဝ်။ အီ ဟဝ် အီ ဒီ ကာလုဝ်း ဒူင် တီ၊ ဂေ ဒီ ဘော မိုဝ်း မီ ဂြုဝ်း ဖျာက် ဒီလူယ်။ ဂေ ဒီ ဘော ဝီ အာမ် ကာဆဝ် ကူပ် ဟဲ့ ခမ် ဒူအီ ခဲင် မိူင် တီ အာဖေ အာရေ တာင်။ 9 အုဝ် ဒီ ဘူင် တဲး ဂေ ဝီ ကာဒုး ဒီ ဟူမ် ယင် ဂွန် အီဘိုန့် ဂွန် အီမာယ် ဂေ။ ရန်ဆူ ဂေ ဒီ ဝဲင် ရူပ် မိူင် တီ ကော လှေန့် ကာဆဝ်၊ တဲး ဂေ ကော ကာဒုး ဒီ ဝီ လာယ် ဟူမ် ယင် ဂေ အူ ဂိုက်။ န့ ဒီ ဘော ဒုက် ကာဆဝ် ဒီ နဝ်း ဂေ။’

10 ဟဲ့ ဟွတ့်၊ တဲး မဲ ဝီ မး ကာလာတ့် ကာပဝ် အိုမ် ပီ ဂူင့် မဲ၊ တဲး ဘော ဂေ ဒူအီ အီ ဟာဝ် ရိုမ် ဒူပ် မဲ ယိုဝ်။ 11 တဲး မဲ ကာလာင် ဒီ ဂေ တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ‘အုဝ် ဒီ ဘော တဲး မိူင် နီ ဘော ဒူအီ အီ ကွယ် ခဲင် မိူင် နီ လိုဝ် စှိုမ် ပီ ကာပဝ် ကာဒါယ် အီ ဟဲ့ ကာလာတ့်၊ ကွဲ့ တဲး န့ ဆီ ပွိုန် ဝီ မ့ပြာယ်။ ဂေ ဒီ ဘော ဝီ ဒိပ် ဒုဝ် ယမ် ဒူအီ တီ ဒီ ဒူင် စိူဝ် တောဖေတ်၊ ကွဲ့ တဲး ကာဒါယ် ဒူင် တီ ဆီ ဂြုဝ် အာဒါ ဒီ လုဝ် ဒိပ် ဒူအီ ယမ် ဂေ တီ။’ 12 ဇဝ်ဖြာ ပီ ဝီ ကာလာင်၊ ‘အုဝ် ဒီ ဘူင် ခဲင် မိူင် နီ ဘော ဒီ ဒူအီ ခဲင် မိူင် နီ တဲး န့ ကော ပီ ပီ ဘူင် အုဝ် ဒီ ဒူင် စိူဝ် တောဖေတ် တီ။ 13 ကာင် ဂေ ဒူအီ ခဲင် မိူင် ယေရူဆာလဲမ် ဘော ဟုဝ် ဂေ ခုန်ဒီခမ် အီ အိုပ် ကာဒါယ် မိူင် ယူဒါ ဒီ ဝီ ကာဒါတ့် ဘောကာဂ့လျီတ်၊ တဲး န့ ပီ အီ ဟဲ့ ကာဒါတ့် ဒီ ဒူင် စိူဝ် တောဖေတ် တွိုန်။ န့ ဘော မုး ဒွန် ကာင် ပဲ့ ဟဲ့ ဒုဝ့် လှူ ဂေ ဆီနမ် အုး ငှုန် နာ ဒဲင် ဘော ကြိုပ် ဆီမန့် ဘော လှူ ဘဲန် မျုဝ် ဘဲန် မျုဝ် ဒီ ဇဝ် ပီ ကြိုပ် ဒူအီ ဟဝ်။’”

14 ဝါယ် အန် တီ အာယေရေမီ ဘော ဝီ လေး ဒီ ဒူင် စိူဝ် တောဖေတ် အီ မုး ဒူင် ဟဲ့ ဒွိုမ် စ်ု ဇဝ်ဖြာ အန် ဟာဝ် ကာလာင် ဂြုဝ်း ဇဝ်ဖြာ ဒီ ဂေ။ အန် ဘော ဝီ တး ကွယ် ခဲင် ဝဲင် ဟုဝ် ဇဝ်ဖြာ၊ ဝီ ကာလာင် ဒီ ဂေ ဒူအီ ကိူန်။ 15 အန် တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် တဝ်း၊ ‘အုဝ် ဒီ တဲး ဂေ ဒူအီ ခဲင် မိူင် နီ ဘော ခဲင် ရဝ် ဂေ ခမ် ဒုက် တာင် ပဲ့ ဟဲ့ ဟွတ့် အုဝ် ကာလာင် အုန်။ ခုဝ်၊ ဂေ ဟဲ့ ဝီ ပီပ့လူမ် ဂိန့် ဂေ၊ တူ ဝီ ထူမ် ဂြုဝ်း ပီ ကာလာင် အုဝ်။’”