1 ဇဝ်ဖြာ ပီ ဝီ ကာလာင် ဂြုဝ်း ပေါ အူ မျုဝ် ဒီ အာယေရေမီ တဝ်း၊ 2 “တဲး မဲ လူင် ဒူင် ကွယ် ကာင် ဒူအီ အီ ဘူင် ကာလုဝ့် ကာဒါယ်။ အုဝ် ဒီ တဲး မဲ ယိုဝ် ဂြုဝ်း အုဝ် ဒီ တီ။” 3 ပါယ် တီ အုဝ် မိူဝ် လူင် ဒီ ကာင် ဒူအီ အီ ဘူင် ကာလုဝ့် တီ။ အုဝ် မိူဝ် ဟဲ့ ယိုဝ်၊ အန် ကွယ် ဒီ စာက်၊ ဘူင် တဲး န့ လေး ကာလုဝ့်။ 4 ကာလုဝ့် ပီ ဘူင် အန် တီ ယီ တူ လေး ဆီချာ။ အန် ဝီ ဒိုဝ်း ကာလုဝ့် တီ၊ ဝီ ဘ့လာတ့်၊ ဝီ ဒီက့လွုန် ကာဒါယ် ကာပိတ် တီ၊ ဝီ ဘူင် ပေါ အူ ဇေန့် ဒူပ် ပီ အိုင် အန်။

5 ဒေါ အန် တီ ဇဝ်ဖြာ ဘော ကာလာင် ဂြုဝ်း ဒီ အုဝ်။ 6 အန် တဝ်း၊ “အိုယ် ဘေ ဒူအီ အီဆာရေလ၊ အုဝ် ပွိုန် ဘူင် ဒီ ဘေ၊ တဲး န့ ပီ ပီ ဘူင် ဒူအီ တီ ဒီ ကာလုဝ့် ပီ ဘူင် အန်။ ဘေ ဒူအီ အီဆာရေလ၊ အုဝ် ဟဲ့ ပါ ဘေ ခဲင် ဒဲ အုဝ်၊ ပီ ဒါ အီ ဘူင် ကာလုဝ့် ဟဲ့ ပါ ကာဒါယ် ကာပိတ် ခဲင် ဒဲ အန်။ 7 ဆေ န့ ဘော မိုဝ်း ဒူအီ အူ မျုဝ် ဘော မိူင် အူ မိူင် ပဲ့ ဟဲ့ တဝ်း အုဝ် ဒီ ရိုတ့် ဝဲန် ဘော ပျာတ့် ဝဲန်၊ ဆေ အုဝ် တဲး မဲ ပျာတ့် ဝဲန် မိူင် ဘဲန် မိူင်၊ 8 ဆေ ဂေ ဒူအီ ခဲင် မိူင် ပဲ့ ဟဲ့ ဒမ် အုဝ် ဆာဒိက် ဒီ ဂေ တီ ဝီ ဝဲန် နာ တူ မွှိုမ် ပဲ့ ဟဲ့ ဘူင် ဂေ၊ အုဝ် ဒီ ဘော ဝီ ဘျွင် နဝ်း အုဝ်၊ တူ ဝီ ဒမ် မှာပ် ဒီ ဂေ ပဲ့ ဟဲ့ ခြာမ် အုဝ် ဒီ ဘူင်။ 9 ဆေ အုဝ် တဝ်း လွင် ဒူအီ ပေါ အူ မျုဝ် ဘော မိူင် ပေါ အူ မိူင်၊ အုဝ် ဒီ ယွတ် လိုမ်လာ ဂေ။ 10 ဆေ ဂေ ယီ ဝီ ဘူင် အီ တူ မွှိုမ် ဒီ အာတ့် အုဝ် ဘော တူ ထူမ် ဂြုဝ်း အုဝ်၊ အုဝ် ဒီ ဘော ဝီ ကာပ့လု နဝ်း အုဝ်၊ ဝီ ဘျွင် လွင် နာ ဘွတ် နာ မွှိုမ် ပဲ့ ဟဲ့ တဝ်း အုဝ် ဒီ ယွတ် လိုမ်လာ ဂေ။

11 န့ ဒီ ဘော ပါယ် တီ။ ဒေါ တီ နီ တဲး မဲ ဟာဝ် ကာလာင် ဒီ ဂေ ဒူအီ အာယူဒါ ဘော ဒီ ဂေ အီ ကွယ် ခဲင် မိူင် ယေရူဆာလဲမ် တဝ်း၊ “ဇဝ်ဖြာ ဟဲ့ ကာလာင် တဲး ဘေ ယွတ်။ အုဝ် ဟဲ့ ရဲန် အုန် အာဖေ အာရေ အာဒါ ဘေ။ အုဝ် မိူဝ် ဟဲ့ ခြာမ် ဒီ ဘူင် ကာဘး ဒီ ဘေ။ ကူပ် န့ ပါယ် တီ တဲး ဘေ ဒွန် အီ ဝဲန် နာ ဟာယ် နာ တူ မွှိုမ်၊ ဝီ ဘူင် ဒူပ် နာ ဆိူဝ် နာ မှာန်။” 12 မာလဲ၊ ဂေ ယီ ဝီ တဝ်း၊ “အာဝ် မိုဝ်း ဒီခုဝ် မာဆေ။ ယေ ဒီ ဘော ဘူင် ဟာဝ် နာ ဟာယ် နာ မိူက် ဒူပ် ပီ ခြာမ် နဝ်း ဒိူဝ် ယေ ရာင် အာဆေ ရာင် အန်။”

13 ပါယ် တီ ဇဝ်ဖြာ ပီ ဝီ တဝ်း၊ “တဲး ဘေ ဝိန် ဒီမွှတ် ဒူအီ ဘဲန် မျုဝ် ဘဲန် မျုဝ် တဝ်း၊ ‘အာဆေ ဟဲ့ ဒွိုမ် ယိုဝ် လွင် ဇိုဝ် နီ။း’ ယွတ်၊ ဂေ ဒူအီ အီဆာရေလ အီ ပီ ဒီဘျာ ဇဲတ် ဂေ ဟဲ့ ဘူင် အီ မွှိုမ် ကာအိး ကာဆဝ်။

14 အိုမ် ဒါတ် အီ စုဝ်း ဒီ နွန် လေဘာနုန် တူ ဒွိုမ် လာတ့် ဒီ ဒါအာင် မာဝ် ဒူပ် ဘန်ဒါပ် နွန် တီ။ အိုမ် ဘ့လဲင် အီ ဂျီတ် အီ လှဲ တး ဒီ နွန် တီ၊ န့ တူ ဒွိုမ် ဟိတ် ဒေါ မှဝ်။

15 မာလဲ၊ ဂေ ဒူအီ ပီ အိုပ် အုဝ်၊ ဂေ ဟဲ့ ပိဝ် အုဝ်။ ဂေ ဟဲ့ ဝီ ဟာဝ် ဒုဝ့် လှူ ဆီနမ် အုး ငှုန် ဒီ အာရိုပ် ရာင် အီ တူ မိုဝ်း ဒီခုဝ် မာဆေ။ အာရိုပ် ရာင် တီ ဘော နပ် ဒီ တဲး ဂေ ဒီပ့လာတ် ကေး ဒေါ ဟာဝ် ဂေ ဒူပ် န့တေန့် အီ ကွယ် ဆိန့် အာတ့် နီ။ အာရိုပ် ရာင် တီ ဘော တဲး ဂေ ဝီ ဒူပ် န့တေန့် လတ် အီ တူ မုး န့တေန့် တာင်၊ န့တေန့် ပီ တူ ဂုဝ် ပီ တူ ပုန် အီ။

16 န့ ဘော ဝီ တဲး မိူင် ဂေ ဘဲန် ဒူင် မွှိုမ် ယုဝ် မွှိုမ် ကာဟိဝ်။ န့ ဘော ဘဲန် ပီ ဖျာက် ပီ နဲန အီ ဟဝ် ဆေဆေ။ ဂေ ဒူအီ အီ တး ဟာဝ် ဒီ တီ၊ ဂေ ဒီ ဘော အာမ် ကာဆဝ် ဘော မာဝတ် ဂိန့် ဂေ။

17 အုဝ် ဒီ ဘော ဘူင် တဲး ဂေ ဘုင်ဘြတ် ဒီ အာတ့် ရန်ဆူ ဂေ၊ တဲး န့ ဘော ပီ ခုန် အီ တး နာ လေး ဆီငဲ။ ပန် ဒီ ဇမ် ဂေ ဒုက် တာင် တီ၊ အုဝ် မိူဝ် တူ ယွတ် ဂေ၊ အုဝ် ဒီ ဝီ ဒိန့် ကာတု ဒီ ဂေ။”

18 ဂေ မင် အီ ဘော တဝ်း၊ “တး တး အိုယ်၊ တဲး အေ ဘူင် ကာဘး ဒီ အာယေရေမီ။ ဆေ အန် တူ ကွယ်၊ ဆီ မိုဝ်း ဒါ အီ လှူ ဒီ ဇဝ်ဖြာ။ ဒူအီ အီ မိုဝ်း အာငျာန် အီ ဒွါ အာကျာမ် အာငျာန် မိူဝ် ဆီ မိုဝ်း။ ဒူအီ အီ ဟုဝ် ဒါရာ ဘော ဒါ အီ ဘျာန် ဂြုဝ်း ဇဝ်ဖြာ မိူဝ် တူ ဟြာယ်။ ခုဝ်၊ တး တး အိုယ်၊ တဲး အေ ဖျာက် အန်၊ ကွဲ့ တဲး အေ ထူမ် ဂြုဝ်း အန်။”

19 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဘော ထူမ် ဂြုဝ်း အုဝ်။ တဲး မဲ ထူမ် ဘော ဂြုဝ်း ပီ ကာလာင် ဂေ အီ လာယ် ကာဘး ဒီ အုဝ် တီ။

20 ဂေ အီ ဘူင် နာ ဘွတ် နာ မွှိုမ် တူ ကာအာပ် ဝီ ဝျီ့ နာ တူ ဘွတ် နာ တူ မွှိုမ်။ မာလဲ၊ ပီ ဘူင် ဂေ ဒူအီ တီ၊ န့ ပီ ဂေ ဟဲ့ ဂိုဝ်း အုန် ကာဒဝ် တဲး အုဝ် စုဝ်း ယမ်။ အုဝ် မှာန့်၊ တဲး မဲ ဝီ လှုဝ်း ဒေါ ကွယ် အုဝ် ဒီ မဲ ဘော ဆာခိုဝ် ဒါင် ဂေ၊ ကွဲ့ တဲး မဲ ဇဝ် ရူ ကာဆဝ် ဒီ ဂေ။

21 ပါယ် တီ တဲး မဲ ဇဝ် ဝီ တဲး ဂွန် ဂေ ဝီ ခမ် ဒုက် ကူပ် အေတ့် ဂေ ပီ ဒီ ဟူမ်။ တဲး ဂေ ခမ် ဘော ဒုက် ဒီ မာပွါ့ လာင်။ တဲး အီဘိုန့် ဂေ ဝီ ဘဲန် တူတ့် ယာ ဆီပြး၊ ကွဲ့ တဲး ဂေ မိုဝ်း ဂွန်။ အီမာယ် ဂေ၊ တဲး ဂေ ခမ် အီ ဟဝ် ငဝ်း ယမ် ဂေ။ ဒူအီ ဂေ အီ ဆီ နှိုမ်၊ တဲး ဂေ ဘော လိုဝ် စှိုမ် ဒီ မာပွါ့ လာင် ဒူင် လာယ် ကာဂုဝ်း ဂေ။

22 ပန် ဒီ တး ဇမ် ဖိုင် ဂေ အီ ဒီ တး ကာဂုဝ်း ဒီ ဂေ၊ တဲး န့ ဘော လေး ယာမ် ဂေ ဒတ် ဆီနန် ဆီနိူင် ခဲင် ကာင် ခဲင် ရဝ် ဂေ။ ခုဝ်၊ ဂေ ဟဲ့ ဂိုဝ်း အုန် ကာဒဝ် တဲး အုဝ် စုဝ်း ဘော ဒိန့် ယွတ့် ဂေ ခိူမ် တဲး အုဝ် ခြေ။

23 အိုယ် မဲ ဇဝ်ဖြာ၊ မဲ ဇဝ် မိူဝ် ဟဲ့ ဟွတ့် နပ် လွင် ဟဲ့ ခြာမ် ဂေ ဒီ ငဝ်း ယမ် အာဆာက် အုဝ်။ ကွဲ့ တဲး ဂေ လွတ် ခမ် မှာပ် ဂေ တီ။ ကွဲ့ တဲး မဲ ဇဝ် ဘျတ် ဝဲန် မှာပ် ဂေ တီ။ တဲး မဲ ဇဝ် ဒမ် မှာပ် ဒီ ဂေ ဒေါ ဟဲ့ ရူ ကာဆဝ် မဲ။