1 ဆီငဲ တီ ခုန်ဒီခမ် အာဟာဆေရူ ဘော ဒိုဝ်း ကာင် အာဟာမာန် အီ မုး ရန်ဆူ ဒူအီ အာယူဒါ တွိုန်၊ ဝီ အာပ် ဒွါ ဒီ နာင် အေဆာထာ။ အာမုဝ်တာကေ ဘော ပွိုန် ဒီ လိုပ် ကွယ် ခဲင် ဟုဝ် ခုန်ဒီခမ်။ ခုဝ်၊ နာင် အေဆာထာ ဟဲ့ တဝ်း ဒီ ခုန်ဒီခမ် လွင် မုး ဂါယ် အူ ဝေါဝဲ။ 2 ခုန်ဒီခမ် ဘော ဘုတ့် ဆီကာနူ အီ မုး ဇိုမ် အန် ပီ ဒိုဝ်း ဝိဝ် အန် ဒီ အာဟာမာန် တွိုန်၊ ဝီ ဒွါ ဒီ အာမုဝ်တာကေ။ နာင် အေဆာထာ ဘော ဝီ တဲး အာမုဝ်တာကေ အိုပ် ကြုဝ် ဂေ ကာင် အာဟာမာန် တွိုန်။

3 ဝါယ် တီ၊ နာင် အေဆာထာ ဘော ဝီ တး ကြိုပ် ဂိုပ် ဒီ ပ့လဝ် ခုန်ဒီခမ် ဘော ယာမ်။ အန် ဝီ မှာန့်၊ တဲး ခုန်ဒီခမ် ဝဲန် အာမိင် လွင် ဒူအီ အာယူဒါ အီ မုး ဂြုဝ်း ပဲ့ ဟဲ့ ဒွါ အာဟာမာန် အီ မုး ဒူအီ အာကာတ် တွိုန်။ 4 ခုန်ဒီခမ် ဘော ဒိုဝ်း လျီး အန် ဆူင့် ဒီ အန်၊ အန် ဘော ဟာဝ် ညိူဝ် ခုန်ဒီခမ်။ အန် ဝီ တဝ်း ဒီ ခုန်ဒီခမ်၊

5 “ဆေ မဲ ခုန်ဒီခမ် အိုင် အုဝ် ဒဲစေန့် မဲ နီ၊ ဆေ အုဝ် ဟဲ့ လဝ့် နဝ်း မဲ၊ ဆေ မဲ ဘော ဖြူမ်၊ အုဝ် မှာန့် တဲး မဲ ဝီ ဒဲမ် ပဲ့ အာမိင် ပေါ အူ ဖိူန်၊ တဲး န့ ဝဲန် ပဲ့ အာမိင် ပီ ဒဲမ် အာဟာမာန် အီ မုး ဂွန် အာဟာမဲတာဆ၊ ဘော ဒူအီ အာမျုဝ် အာကာတ် တွိုန်။ န့ မုး အာမိင် တွိုန် အီ တဲး ဂေ ငဝ်း ဝဲန် တူတ့် ခဲ့ ကွယ် ဒူအီ အာယူဒါ ဒွန် မာန် ဒွန် မိူင် ပီ အိုပ် မဲ ခုန်ဒီခမ်။ 6 ခုဝ်၊ မှဝ် အုဝ် ဒီ ပါယ် ဒီ ခမ်၊ ဆေ နာ တူ မွှိုမ် တး ဇမ် ဒီ ဒူအီ အာမျုဝ် အုဝ်။း မှဝ် အုဝ် ဒီ ပါယ် ဒီ ယွတ်၊ ဆေ ဘီနွင် ဝေါဝဲ အုဝ် ဒီ စှိုမ် တူတ့်။း”

7 နာင် အေဆာထာ ဟဲ့ ဟွတ့် တဝ်း ပါယ် တီ ခုန်ဒီခမ် အာဟာဆေရူ ဝီ ကာလာင် ဒီ နာင် အေဆာထာ၊ တဲး ဘော အာမုဝ်တာကေ နပ်။ အန် တဝ်း၊ “မဲ ယွတ်၊ ကူပ် ဟဲ့ တဝ်း အာဟာမာန် ဒီ ငဝ်း ဝဲန် ဒူအီ အာယူဒါ တီ၊ အုဝ် ဟဲ့ ဟွတ့် တဲး ဂေ ဒိုဝ်း ကာင် အန် ဒွါ ဒီ မဲ၊ ဟဲ့ တဲး ဘော ဂေ ပက် ဟွယ် မဲင် အန် ဒီ ရွင့် စာ တွိုန်။ 8 ဒေါ တီ နီ တဲး ဘာယ် ဒဲမ် ရာင် ဘာယ် အာဒါ ဂေ ဒူအီ အာယူဒါ တီ။ ဒဲမ် ခဲ့ ပီ အိုင် ဘာယ်။ ဒိုဝ်း ဇိုမ် ခုန်ဒီခမ်၊ ဒွက်။ ဘာယ် ဟီ ဘူင် ပါယ် တီ၊ အာဝ် မိုဝ်း အာဆေ အီ ပွိုန် ပျာတ့် ဝဲန် အာမိင် ခုန်ဒီခမ် ကူပ် ဟဲ့ ဟွတ့် ဒွက် ဇိုမ် တီ။”

9 ဘော ဇမ် မာဂျီန် ဟာအူယ် အီ စိူဝ် မာဂျီန် စီဝန်၊ ဒေါ ဇမ် ဆီငဲ အာ ဂိုဝ် ဒီ ဟာအူယ်၊ ဂေ ဘော ဒဲ့ ဒါ စာရေ ခုန်ဒီခမ်၊ တဲး ဂေ ဒဲမ် ပီ ကာလာင် အာမုဝ်တာကေ၊ တဲး ဂေ တိုယ် အာမိင် တီ ဒီ ဒူအီ အာယူဒါ၊ တိုယ် ဘော ဒီ ဂေ အီ မုး ဒါ ကာညာ အီ အိုပ် ဒွန် မိူင် ဘော ဒီ ဂေ ဒါ တာင် အီ ကွယ် ခဲင် မိူင် အူ မာယဝ်း ဒီ အာ ဂိုဝ် ဒီ ဘူ မိူင်၊ စုး ဒီ မိူင် ဂူလာ ကော ဇမ် မိူင် ကူဆာ အီ ဘော စိူဝ် မိူင် အေထီအူပ်။ ဂေ ဒဲမ် အာမိင် တီ၊ တာ ဒုဝ် ပဲ့ ဂေ ဒူအီ မျုဝ် မှဝ် မျုဝ် အန်၊ ဂြုဝ်း မျုဝ် မှဝ် မျုဝ် အန်။ ဘော ဂေ ဒူအီ အာယူဒါ ဘော ဒဲမ် ဒုဝ် ပဲ့ ဂေ၊ ဂြုဝ်း ဂေ။ 10 ဂေ ဒဲမ် အာမိင် တီ၊ တဲး န့ ပီ ခုန်ဒီခမ် အာဟာဆေရူ ဟဲ့ ဒဲမ် ရာင် အန်။ ဂေ ဘော ဟပ် စိူဝ် အန်၊ ဒွက် ဇိုမ် အန်၊ ဝီ တဲး ဒါလာမ် ဘဲန် ဝီ ဘဲန် ဝီ ပဝ့် မင်ပြွင့်၊ တဲး ဂေ ဟာဝ် ခြန် ခြန်၊ ဟာဝ် ဇမ် ဒွန် နာ ဒွန် ပ့လုဝ့် ခဲင် မိူင် ဒွန် မိူင်။ မင်ပြွင့် ပီ ပဝ့် ဂေ တီ ဘော မုး ဆီမာ မင်ပြွင့် ခုန်ဒီခမ်။

11 ခဲင် ပဲ့ ပီ ဒဲမ် ဂေ တီ န့ တဝ်း၊ ခုန်ဒီခမ် ဟဲ့ ဟွတ့် ခ့ဝါင် ဂေ ဒူအီ အာယူဒါ အီ ကွယ် ဒွန် မာန် ဒွန် မိူင် ခဲင် ကာဒါယ် မိူင် ပီ အိုပ် အန်၊ တဲး ဂေ ကာဇု၊ တဲး ဂေ ရဲ ဒုဝ် ဂေ။ ဆေ န့ ဘော မိုဝ်း ဒါ ဆိုက် မျုဝ် မှဝ်၊ ဆေ ဂေ တဝ်း ဒီ ကာဂုဝ်း ဒီ ဂေ ဒူအီ အာယူဒါ ဘော အီဘိုန့် ဂေ ဂွန်၊ ဂေ ဒူအီ အာယူဒါ ပွိုန် ဒီ ဝီ ငဝ်း ယမ် တူတ့် ဂေ၊ တဲး ဂေ စှိုမ် တူတ့်၊ ကွဲ့ ဟူ တဲး န့ မိုဝ်း ရန်ဆူ ဂေ။ ဂေ ဒူအီ အာယူဒါ ဘော ပွိုန် ဒီ ဖာတ် ဒိုဝ်း ဘော ကြုဝ်ကြာမ် ဒီ ရန်ဆူ ဂေ။ 12 ဒေါ မုး မာဂျီန် ဂိုဝ် ဒီ ဟာအာ အီ စိူဝ် အာတာ ဟီ ဇမ် ဆီငဲ ဂိုဝ် ဒီ ဟာအူယ်၊ ဂေ ဒီ ပွိုန် ဒီ ဘူင် ဇိုဝ် တီ ဒွန် မျုဝ် ခဲင် မိူင် ဒွန် မိူင် ပီ အိုပ် ခုန်ဒီခမ် အာဟာဆေရူ။ 13 ပဲ့ အာမိင် တီ ဂေ ဘော ကာလာင် ဒွန် နာ ဒွန် ပ့လုဝ့် ဒီ ဒူအီ ဒွန် မျုဝ်၊ တဲး ဂေ ဒွန် အီ နပ် လွင် ဂေ ဒူအီ အာယူဒါ ဒီ ရဲန် အုန် ဒုဝ် ဂေ၊ တဲး ဂေ ဝီ ဘူင် ဝျီ့ ဒီ ရန်ဆူ ဂေ ဆီငဲ တီ။

14 ပါယ် တီ ဒါလာမ် အီ ပဝ့် မင်ပြွင့် တွိုန် ဂေ မိူဝ် ပီခြန် ဂေ ဒီ ဟာဝ် ကာလာင် ဒွန် နာ ဒွန် ပ့လုဝ့်။ ဘော ဒီ မိူင် ဆူဆာန် တွိုန်၊ ဂေ ဘော ကာလာင် လွင် အာမိင် တီ။

15 အီ မုး အာမုဝ်တာကေ တွိုန်၊ ဒေါ ဝီ လေး အန် ခဲင် ဟုဝ် ခုန်ဒီခမ် အန် ဘော စှိုပ် ဒီ တာ ခြိုင် ပီ တာ ခုန်ဒီခမ် အီ လုယ် အီ ငျီန်။ အန် ဟဲ့ စှိုပ် ဘော မင်ဂိုမ် ခြိဝ် အီ တာင် ဘော ဆီတုဝ် တုန် အီ ရေန့် ဂဲ အီ မုး ကာတမ် လုယ်။ ဂေ အီ ကွယ် ဒီ မိူင် ဆူဆာန် တွိုန် ဘော ခူယ် ကာဆဝ်။ 16 နဝ်း ဂေ ဒူအီ အာယူဒါ မိူဝ် ဘော ဒါခိုယ်။ ဂေ မိူဝ် ဟဲ့ ဘျုဝ်၊ ဟဲ့ ဝီ မိုဝ်း ဆာရေ။ 17 ဂေ ဒူအီ အာယူဒါ အီ ကွယ် ဒွန် မာန် ဒွန် မိူင်၊ ဂေ ဘော နပ် လွင် ပဲ့ တွိုန်၊ ဂေ ဘော ခူယ်။ နဝ်း ဂေ မိူဝ် ဒါခိုယ် ကာဆဝ်။ ဂေ ဘော ဘူင် ဘ့လွယ်။ န့ ဘော မိုဝ်း ဒူအီ ကိူန် တဝ်း ဒီ လိုပ် ဒူအီ အာယူဒါ ကူပ် ယုဝ် ဂေ ဒူအီ အာယူဒါ ဒီ ဘူင် နာ စာဝ် ဒီ ဂေ။