1 ပါယ် တီ ခုန်ဒီခမ် ဂါယ် အာဟာမာန် ဘော ဝီ ဟာဝ် ဟူမ် ဘ့လွယ် ပီ ဟျီင် နာင် အေဆာထာ ပေါ အူ ဇေန့်။ 2 ဒေါ အန် တီ ဒေါ ဒျီင် ဂေ အိုမ် မာငုန်၊ ခုန်ဒီခမ် ဝီ ကာလာင် ဒီ နာင် ပေါ အူ ဇေန့် တဝ်း၊ “အိုယ် နာင် အေဆာထာ၊ မာဆေ ပီ လုဝ် မဲ။း မာဆေ ပီ ဆီ မှာန့် မဲ။း ခဲ့ ပီ ဆီ မှာန့် မဲ တီ ဘော မုး မာန် မိူင် အာဒါ အူ ကာတဲ အုဝ် ဒီ ဒွါ။”

3 နာင် ဟောခမ် အေဆာထာ ဝီ တဝ်း၊ “အိုယ် မဲ ခုန်ဒီခမ်၊ ဆေ အုဝ် အီ မုး ဒဲစေန့် မဲ ဟဲ့ လဝ့် နဝ်း မဲ၊ အုဝ် မှာန့်၊ တဲး မဲ ကာဝေ အာဆာက် အုဝ်၊ တဲး မဲ ကာဝေ ဘော အာဆာက် ဒူအီ အာမျုဝ် အုဝ်၊ ကွဲ့ တဲး ယေ ယမ်။ ခဲ့ တီ ပီ ဆီ မှာန့် အုဝ်။ 4 ခုဝ်၊ ဂေ အီ ဟဝ် ဟဲ့ ဟွတ့် ယွင့် အုဝ် ဘော ဒူအီ အာမျုဝ် အုဝ်၊ တဲး ယေ ယမ် ပီ ဒုဝ် ဆတ်ဒါဝါ ပီ ငဝ်း အီ။ ဆေ န့ မုး ဂေ ယွင့်၊ တဲး ယေ ဘဲန် မှာယ် အီ ဟဝ်၊ ဘော မုး မှာယ် အီဘိုန့် အီမာယ်၊ အုဝ် တူ တဝ်း မာဆေ။ ခုဝ်၊ အာရေ ဇိုဝ် တီ အာဝ် ကာအာပ် ဒီလဲ မဲ ခုန်ဒီခမ်။”

5 ပန် တီ ခုန်ဒီခမ် အာဟာဆေရူ ဘော ဝီ ဒီမွှတ် နာင် အေဆာထာ တဝ်း၊ “အီ မှဝ် ဟဲ့ ယ ခြာမ် ဒီ ဘူင် ပါယ် တီ။း အန် မုး အာဆေ။း အန် ကွယ် ဒီ မှဝ်။း”

6 နာင် အေဆာထာ ဝီ တဝ်း၊ “အီ ဘဲန် ရန်ဆူ ယေ၊ အီ ဆီ ဘူင် နာ စီစိဝ် ဒီ ယေ ဟဲ့ မုး အာဟာမာန် နီ၊ အီ ဟာယ် ကာဆဝ်။” အန် ဟဲ့ ဟွတ့် တဝ်း ပါယ် တီ အာဟာမာန် တွိုန် ဘော ဒီယေန့် ဒီယုဝ် ခုန်ဒီခမ် ဂါယ် နာင်။ 7 ပန် တီ ခုန်ဒီခမ် ဘော ရူ ကာဆဝ်။ အန် ဘော ယိတ့် ဒီ ဘာင် ဘ့လွယ် ဝီ ဟာဝ် ခဲင် ကာပိုမ် အန်။ အာဟာမာန် ဘော နပ်၊ ခုန်ဒီခမ် ဒီ ဒမ် မှာပ် ဒီ အန်၊ အန် ဘော ဝီ ကွယ် ဒီ ပန်၊ မှာန့် တဲး နာင် အေဆာထာ ကာဝေ အန်၊ ကွဲ့ တဲး အန် ကာဒုး ဒီ ယမ်။

8 ခုန်ဒီခမ် ဘော ဝီ တး ဒူင် ကွယ် နာင် အေဆာထာ။ အန် ဘော တး ယိုဝ်၊ အာဟာမာန် ဟဲ့ ဂိုပ် ဒီ ကာစှူင့် ဒူင် တုတ့် နာင် အေဆာထာ တွိုန်။ အန် ဝီ တဝ်း၊ “ဒေါ တီ နီ မဲ ပီ ဝီ ဆီ ဘ့လတ့် ဘော နာင် ဟောခမ် ဒီ အာတ့် အုဝ် ခဲင် ဟုဝ် နီ။” ဒေါ တဝ်း ခုန်ဒီခမ် ပါယ် တီ ဂေ ဘော တး ကာမှုဝ့် ဂိန့် အာဟာမာန်။

9 န့ ယီ မိုဝ်း အာဘုဝ်နာ အီ မုး ဒူအီ ဆး အီ ဘဲန် ဒဲစေန့် ခုန်ဒီခမ်။ အန် ဝီ တဝ်း၊ “ခူပ် ကာင် အာဟာမာန် န့ မိုဝ်း ရွင့် ပီ ဆမ် အန်၊ အီ စာ ဖန် ဂိုဝ် ကာနိး။ အန် ဟဲ့ ခြာမ် ဒီ ပက် ဟွယ် မဲင် အာမုဝ်တာကေ၊ အီ ဟဲ့ ဒွိုမ် စွယ် မဲ ခုန်ဒီခမ် တွိုန်။” ခုန်ဒီခမ် ဝီ တဝ်း၊ “ဟာဝ် ပက် ဟွယ် မဲင် အန် ဒီ တီ။”

10 ပန် တီ ဂေ ဘော ဒိုဝ်း အာဟာမာန် ဟာဝ် ပက် အန် ဒီ ရွင့် ပီ ဆမ် အုန် အန် အာဒါ အာမုဝ်တာကေ တွိုန်။ ဟဲ့ ဟွတ့်၊ နဝ်း ခုန်ဒီခမ် ဘော ဝီ ဒါခိုယ် အူ ဇေန့်။