1 ဘော ဇမ် ခဲင် မှိုဝ်၊ ခုန်ဒီခမ် အာဝ် ပွိုန် ဒီ အိတ်။ အန် ဘော တဲး ဂေ ဒိုဝ်း တး ပဲ့ ဘိူန် မိူင် ပီ ဒဲမ် အုန် ဂေ ဒေါ မုး စုဝ် အန်။ ဂေ ဘော ဒိုဝ်း တိး၊ တဲး ခုန်ဒီခမ် ထူမ်။ 2 ဂေ ဘော တိး ဘော လွင် အာမုဝ်တာကေ ဟဲ့ ကာလာင် လွင် အာဘီကာဆန် ဂါယ် အာဒေရိတ် တွိုန်၊ အီ မုး အီ ဘ်ု မာလုဝ်း ဟုဝ်၊ အီ ဟဲ့ ခြာမ် ဒီ ငဝ်း ယမ် ခုန်ဒီခမ် အာဟာဆေရူ။

3 ခုန်ဒီခမ် ဘော ဝီ ဒီမွှတ် တဝ်း၊ “အီ ဟဲ့ ဒွါ မာဆေ ဒီ အာမုဝ်တာကေ အီ ဘဲန် ရုး ပီ ကာလာင် အန်။း” ဂေ ဒဲစေန့် အန် ဝီ တဝ်း၊ “အာဝ် မိုဝ်း ဒီ ဒွါ ရုး မာဆေ ဒီ အန်။း”

4 ခုန်ဒီခမ် ဝီ ဒီမွှတ် တဝ်း၊ “အာဆေ ကွယ် ဒီ ဂ့လ ဒွယ်။း” ဒေါ အန် တီ န့ ငျာ တး ဟာဝ် အာဟာမာန် ဒီ ဂ့လ တီ။ အန် တဝ်း ဒီ တး မှာန့် ဒီ ခုန်ဒီခမ်၊ တဲး အန် ပွိုန် ဒီ ပက် ဟွယ် မဲင် အာမုဝ်တာကေ ဒီ ရွင့် ပီ ဆမ် ဂေ တွိုန်။

5 ဂေ ဒဲစေန့် အန် ဝီ တဝ်း၊ “အာဟာမာန် အီ တး။” ခုန်ဒီခမ် ဝီ တဝ်း၊ “ဒဲ့ တဲး အန် တး လိုပ် နာ ခဲင်။”

6 အာဟာမာန် ဘော တး လိုပ် ဒူင် ကွယ် ခုန်ဒီခမ်။ ခုန်ဒီခမ် ဝီ တဝ်း ဒီ အန်၊ “မဲ ထာင်၊ န့ ဒီ လုဝ် ပါယ် မှဝ် ဒီ ဒူအီ ပီ ဆီ မျုက် အုဝ် ခုန်ဒီခမ်။း” အာဟာမာန် ဝီ ကာဖာ ခဲင် နဝ်း အန်၊ “ဒဲင် အုဝ် နီ အာဝ် မိုဝ်း အာဆေ ပီ ဒီ မျုက် ခုန်ဒီခမ်၊ တဲး အန် တာင် လွှိုမ် အီ။”

7-8 ခုဝ်၊ အန် ဝီ တဝ်း ဒီ ခုန်ဒီခမ်၊ “ဒူအီ ပီ ဆီ မျုက် မဲ တွိုန်၊ အန် လုဝ် ဒိုဝ်း ခြိုင် ပီ တာ ခုန်ဒီခမ် ဘော မ့ပြွင့် ပီ ဒွိုမ် ပဝ့် ခုန်ဒီခမ်၊ တဲး ဘော ဇိုမ် ခုန်ဒီခမ် ဒိုက် ဒီ ဂိန့် မ့ပြွင့် တီ။ 9 ဟဲ့ ဟွတ့်၊ ဇိုဝ် တီ ဒွန် မျုဝ် လုဝ် ဒိုဝ်း ဒွါ ဒီ ဒါ ကာညာ အူ ဝီ၊ တဲး အန် ဝီ အာပ် ဒီ ဒူအီ ပီ ဆီ မျုက် မဲ ခုန်ဒီခမ်၊ တဲး အန် ပဝ့် မ့ပြွင့် ဟာဝ် ဒူပ် န့တေန့် ကာတဲ မိူင် နီ၊ တဲး န့ ဝီ မိုဝ်း အီ ယဲတ့် နာ အာတ့် အန် အူ ဝီ ဒတ်၊ ‘ခုန်ဒီခမ် ဘူင် ပါယ် နီ ဒီ ဒူအီ ပီ ဆီ မျုက် အန်။’”

10 အာဟာမာန် ဟဲ့ ဟွတ့် ကာလာင် ပါယ် တီ ခုန်ဒီခမ် ဝီ တဝ်း ဒီ အန်၊ “တဲး မဲ ဟာဝ် ခြန် ခြန်၊ ဟာဝ် ဒိုဝ်း ခြိုင် တာ ဂေ မ့ပြွင့်၊ တဲး မဲ ဘူင် ဒီ အာမုဝ်တာကေ ခဲ့ ပီ ကာလာင် မဲ တီ ဒွန် မျုဝ်။ အာမုဝ်တာကေ မုး ဒူအီ အာယူဒါ အီ ကွယ် ဘာင် မာလုဝ်း ဟုဝ် တွိုန်။ ခဲ့ ပီ တဝ်း မဲ ဒွန် မျုဝ် တီ၊ အာဝ် ပွိုန် တဲး ယူမ် ခေါ အူ မျုဝ်။”

11 ပန် တီ အာဟာမာန် ဘော ဟာဝ် ဒိုဝ်း ခြိုင် တာ ဘော မ့ပြွင့်၊ ဝီ အာပ် ဒွါ ဒီ အာမုဝ်တာကေ၊ တဲး အန် ဘော ပဝ့် မ့ပြွင့် တီ ဟာဝ် ခဲင် မိူင်။ အာဟာမာန် ဘော ယဲတ့် ဒီ အာတ့်၊ ဒတ် တဝ်း၊ “ခုန်ဒီခမ် ဘူင် ပါယ် နီ ဒီ ဒူအီ ပီ ဆီ မျုက် အန်။”

12 ဟဲ့ ဟွတ့် ဘူင် ပါယ် တီ အာမုဝ်တာကေ ဘော ဝီ တး ဒီ ဘာင် မာလုဝ်း ဟုဝ် တွိုန်။ အီ မုး အာဟာမာန်၊ အန် ဟဲ့ ဆာယ်၊ ဘော ကာမှုဝ့် ဂိန့် အန်၊ ဝီ ပီခြန် အန် ဒီ ဝေန့် ဒီ ကာင် အန်။ 13 အန် ဘော ဝေန့် ကာလာင် ဇိုဝ် တီ ဒွန် မျုဝ် ဒီ နာင် ဇေရိတ် အီ မုး အီဘိုန့် အန် ဂေ ဂိုက် အန်၊ တဲး ဂေ ထူမ်။

ပန် တီ ဂေ အီ မိုဝ်း အာငျာန် ဘော အီဘိုန့် အန်၊ ဂေ ဝီ တဝ်း ဒီ အန်၊ “ဆေ န့ ပါယ် တီ၊ မဲ ဒီ စှိုမ် မှာန် ဒီ အာမုဝ်တာကေ အီ မုး ဒူအီ အာယူဒါ တီ။ မဲ တူ နပ် ဒီ ပဲ အန် ဒေါ မှဝ်။”

14 ဒေါ ကာလာင် ဂေ ဒီ အန် ပါယ် တီ ဒူအီ ဆး ဂေ တး ခဲင် ဟုဝ် ခုန်ဒီခမ်၊ ဝီ ဒဲ့ အာဟာမာန်၊ တဲး အန် ဟာဝ် ခြန် ခြန် ဒူင် ဘူင် နာင် အေဆာထာ ဘ့လွယ် ဟျီင် တွိုန်။