1 ခဲင် မိူင် မာအုတ် ဟဲ့ ဒွိုမ် မိုဝ်း ဒူအီ အူ ဝီ အီ စိူဝ် အာယုဝ်ဘာ။ အန် ဘော မိုဝ်း နဝ်း ဆိူဝ် နဝ်း မှာန်၊ အာဝ် မိုဝ်း အီ ပွိုန် ကာလာင် နာ တူ မွှိုမ် လွင် အန်။ အန် ဘော ရုဝ်ဆေ ဇဝ်ဖြာ ဘော ဝး နာ တူ မွှိုမ်။

2 အန် မိူဝ် မိုဝ်း ဂွန် အီမာယ် ဘူ ဝီ၊ မိုဝ်း ဂွန် အီဘိုန့် အူယ် ဝီ။

3 အန် မိုဝ်း ဘော မာဘူ ဘူ ဟြဲန့် ဒုဝ်၊ မင်ပြွင့် ကာဟာတ့် အူယ် ဟြဲန့် ဒုဝ်၊ မာမက် ဖန် မာယဝ်း ဂူ ဘော မာလာ ဖန် မာယဝ်း ဒုဝ်။ အန် ဘော မိုဝ်း မှာယ်၊ မိုဝ်း ဒဲစေန့် ကိူန် ကာဆဝ်။ ပါယ် တီ အန် ဘော မုး ဒါ အီ ခြမ် လွှိုမ် အီ ဟဝ် အီ ကွယ် ဘ့လာက် နာ လေး ဆီငဲ။

4 ဂွန် အီမာယ် အာယုဝ်ဘာ တွိုန် ဘော အိုင် ဒီ ဘူင် ဘ့လွယ်၊ လာယ် ဟျီင် ဒီ ကာင် ဂေ ဘဲန် ဝီ ဘဲန် ဝီ ဒေါ ဟဲ့ ဇမ် ဆီငဲ လုဝ် ဘူင် ဝီ မှဝ် ဝီ အန်။ ဂေ ဒဲ့ ဘော ဝါ ဂေ အီ မုး ဂွန် အီဘိုန့် အူယ် ဝီ တွိုန် တး ဟူမ် ရိုမ် ဒူပ် ဂေ။

5 ဒေါ ဟဲ့ ဟွတ့် ပွုန် ဆီငဲ ဘူင် ဂေ ဘ့လွယ် တီ၊ အာယုဝ်ဘာ မိူဝ် လှူ ဒီ ဇဝ်ဖြာ၊ တဲး ဂွန် အန် ဝီ ဆီငါ ဘွတ်။ ဆိန့် ဆိန့်ဝး စေဝ် အန် မိူဝ် လှူ ပီ ဒီ လှူ အီ ဒုဝ့် ဒီ ငဝ် အာဒါ ဂွန် အန် ဒွန် အီ။ အန် ဘူင် ပါယ် တီ ကူပ် ယုဝ် အန် ဂွန် အန် ဂေ တီ ဟဲ့ ကာလုတ့် ဒီ ဘူင် မှာပ် ဘော နဲန ဇဝ်ဖြာ ဒေါ တူ လှုဝ်း တူ ထာင် ဂေ။ အန် မိူဝ် ဘူင် ပါယ် တီ ဆေဆေ။

6 အာဒါ အူ ဆီငဲ ဂေ အာမူ အာမာတ် ဇဝ်ဖြာ ဟဲ့ တး ကာဇု ဒီ အာတ့် ဇဝ်ဖြာ။ ဘော ဘုဝ် ကာနမ် အီ စိူဝ် ဆာတာန် ဟဲ့ တး ကွယ် ရိုမ် ဒူပ် ဂေ။

7 ဇဝ်ဖြာ မိူဝ် ဒီမွှတ် ဘုဝ် ကာနမ် တီ တဝ်း၊ “မဲ တး နာ မှဝ်။း” ဘုဝ် ကာနမ် တီ ဝီ တဝ်း၊ “အုဝ် ဟာဝ် ဟာဝ် တး တး၊ ဝိန် ဒီလဲ လဲပ် ဒီ ယွတ် ဒဲင် ကာဒါယ် နီ ဒွန် ပ့လုဝ့်။”

8 ဇဝ်ဖြာ ဝီ တဝ်း ဒီ အန်၊ “မဲ လှုဝ်း ဒဲစေန့် အုဝ် အီ စိူဝ် အာယုဝ်ဘာ တွိုန်။း ဒဲင် ကာဒါယ် နီ အာဝ် မိုဝ်း အီ ပီ အန် ခေါ အူ ဝီ။ အန် ဘော မုး ဒူအီ ပီ တူ ပွိုန် ကာလာင် အီ ဟဝ် နာ တူ မွှိုမ် လွင် အန်။ အန် ဘော မိုဝ်း နဝ်း ဆိူဝ် နဝ်း မှာန် ဘော နပ် ဒီ ရုဝ်ဆေ ဇဝ်ဖြာ။ အန် ဘော မုး ဒူအီ အီ ဝး နာ တူ မွှိုမ်။”

9 ဘုဝ် ကာနမ် ဝီ တဝ်း ဒီ ဇဝ်ဖြာ၊ “ဆေ အာယုဝ်ဘာ တူ ပွိုန် အာဂျိုဝ် မာဆေ၊ အန် တူ ငှိုယ် ဒီ ဘော ရုဝ်ဆေ မဲ ဇဝ်ဖြာ။

10 မဲ ဇဝ် ယီ ဟဲ့ ရဲ ဟဲ့ ဂွင့် အန် ဘော ဂေ ဒူအီ ခဲင် န့ဟူမ် အန် ဘော ကြုဝ်ကြာမ် အန် ဘောကာဂ့လျီတ်၊ တဲး န့ ပီ မဲ ဟဲ့ လူင့် ရူပ် အန်။ မဲ ဇဝ် မိူဝ် ဟဲ့ မွင့်ကာရာ ဒွါ ဒီ ဂါန် ပီ ဘူင် အန် ဘော ဒုဝ် ဆတ်ဒါဝါ ပီ ဟျီင် အန်၊ တဲး န့ မိုဝ်း ကိူန် ကာဆဝ် ဒွန် နာ ဒွန် ပ့လုဝ့်။

11 ဒေါ တီ နီ၊ ဆေ မဲ စူ ယွတ် မဲန် အန် ဘော ဒိုဝ်း ဝဲန် ခဲ့ မိုဝ်း အန် ကြုဝ်ကြာမ် တီ၊ အန် ဒီ ဘော ဒိူင် ဘော အေး ဒွက် နာ မဲ ဇဝ်ဖြာ။”

12 ဇဝ်ဖြာ မိူဝ် ဝီ တဝ်း ဒီ ဘုဝ် ကာနမ်၊ “ဆေ န့ ပါယ် တီ တဲး မဲ ပျာတ့် ဝဲန် ကြုဝ်ကြာမ် အန် တီ။ မာလဲ၊ ဒုဝ် ဘူင့် အန် ကွဲ့ တဲး မဲ ပျာတ့်။” ဟဲ့ ဟွတ့်၊ ဘုဝ် ကာနမ် ဘော လေး ဟာဝ် ဒူင် ကွယ် ဇဝ်ဖြာ တွိုန်။

13 ပါယ် တီ အာဒါ အူ ဆီငဲ ဂေ ဂွန် အီမာယ် ဘော ဂွန် အီဘိုန့် အာယုဝ်ဘာ တွိုန် ဟဲ့ ငျာ ဟူမ် ဘ့လွယ် ဘော ဒျီင် အိုမ် မာငုန် ဒီ ကာင် အီကတ် တာင် ဂေ။

14 ဒဲစေန့် အူ ဝီ ဘော ကာဘ့လဲပ် တး ဒူင် ကွယ် အာယုဝ်ဘာ ဘော ကာလာင် ဒီ အန် တဝ်း၊ “ယေ ဟဲ့ ထဲ ဒူင် နာ တာ မာမက်။ မာလာ ဂေ တွိုန် မိူဝ် ဟဲ့ ဟူမ် ပေတ့် ခူပ် ဒူင် ကွယ် ယေ တီ။

15 ဒေါ အန် တီ ဂေ ဒူအီ ခဲင် မိူင် ဆာဘာ ဘော တး ဇူန် ယေ။ ဂေ ဘော မှေတ့် ဟာဝ် ဒုဝ် ဂေ တီ။ ဂေ ဒဲစေန့် မဲ မိူဝ်၊ ဂေ ဟဲ့ ဟွတ့် ငဝ်း ယမ် ဒွန် အီ တာ မာပွါ့ လာင် ဂေ။ မီ အုဝ် အူ ဝီ ဟဲ့ လွတ်။ အုဝ် ဘော ဝီ တး ကာလာင် ဒီ မဲ ဒါ ကာညာ အုဝ်။”

16 ဒေါ ဆီငျာ ကာလာင် အန် ပါယ် တီ ညှမ် ဒန် ဟွတ့်၊ ဒဲစေန့် ပေါ အူ ဝီ ပီ ဝီ တး ကာလာင် ဒီ အာယုဝ်ဘာ တဝ်း၊ “ဇဝ်ဖြာ ဟဲ့ တဲး န့ မိုဝ်း ငဝ် စုဝ်း လူင် ခဲင် ဘ့လေန့် ဘော ကာဆိုမ် ယမ် တူတ့် မာဘူ ဘော ဂေ ဒါ အီ ဟျီင် မာဘူ ဘောကာဂ့လျီတ်။ မီ အုဝ် အူ ဝီ ဟဲ့ လွတ်။ အုဝ် ဘော ဝီ တး ကာလာင် ဒီ မဲ ဒါ ကာညာ အုဝ်။”

17 ဒေါ ဆီငျာ ကာလာင် အန် ပါယ် တီ ညှမ် ဒန် ဟွတ့်၊ ဒဲစေန့် ပေါ ဝီ ပီ ဝီ တး ကာလာင် ဒီ အာယုဝ်ဘာ တဝ်း၊ “ဂေ ဒူအီ အာမျုဝ် ကာလာဒေ အူယ် ဖိုင်၊ ဂေ ဟဲ့ တး ဖာတ် ဒိုဝ်း ဟာဝ် တူတ့် မင်ပြွင့် ကာဟာတ့် မဲ။ ဂေ ဒဲစေန့် မဲ မိူဝ် ဂေ ဟဲ့ ငဝ်း ယမ် တူတ့်၊ တာ မာပွါ့ လာင် ဂေ။ မီ အုဝ် အူ ဝီ ဟဲ့ လွတ်။ အုဝ် ဘော ဝီ တး ကာလာင် ဒီ မဲ ဒါ ကာညာ အုဝ်။”

18 ဒေါ ဆီငျာ ကာလာင် အန် ပါယ် တီ ညှမ် ဒန် ဟွတ့်၊ ဒဲစေန့် ပေါ ဝီ ပီ ဝီ တး ကာလာင် ဒီ အာယုဝ်ဘာ တဝ်း၊ “ဂေ ဂွန် အီမာယ် မဲ ဘော ဂွန် အီဘိုန့် မဲ၊ ဂေ ဟဲ့ ဟူမ် ကျဝ် ဘော ဒျီင် အိုမ် မာငုန် ဒီ ကာင် အီကတ် တာင် ဂေ။

19 ဒေါ အန် တီ န့ ဘော မိုဝ်း ခုန် တာင် တး နာ ခဲင် ပြဲ ကာဟဝ်း ဘော ဘုတ် ဟဲန့် ကာဆဝ် ဖွုန် ကာတုဝ့် ကာင် ဂေ။ ကာင် တီ ဘော ဒီဂြပ် ထိပ် ယမ် တူတ့် ဂွန် မဲ တီ။ မီ အုဝ် အူ ဝီ ဟဲ့ လွတ်။ အုဝ် ဘော ဝီ တး ကာလာင် ဒီ မဲ ဒါ ကာညာ အုဝ်။”

20 ဟဲ့ ဟွတ့် ပန် တီ အာယုဝ်ဘာ ဘော ယိတ့်၊ ကာယာတ့် ခြိုင် တာ အန် ဘော ဂါ့ ဝဲန် ဟိုက် ဂိန့် အန် ကူပ် ဟဲ့ လိုဝ် ကာဆဝ် နဝ်း အန်။ အန် ဝီ မုတ် ဂိုပ် ဒီ ကာဒါယ် ဘော ကြိုပ် ဇဝ်ဖြာ။

21 အန် တဝ်း၊ “ဒေါ ဂွိုတ် တး အုဝ်၊ အုဝ် ဂွိုတ် တး ဒုဝ် ဂ့လ။ ပန် ဒီ ဝီ လေး ဟာဝ် အုဝ် မိူဝ်၊ အုဝ် ပီ ဒီ ဝီ လေး ဟာဝ် ဒုဝ် ဂ့လ။ ဇဝ်ဖြာ ဟဲ့ ဒွါ ဒီ အုဝ်၊ ပဲ့ ဟဲ့ ဝီ ဒိုဝ်း ဝိဝ်။ အုဝ် ယီ ဒီ အိူပ် မျုက် ဇဝ်ဖြာ ဆေဆေ။”

22 လွင် ဇိုဝ် တီ ဒွန် မျုဝ်၊ အာယုဝ်ဘာ တူ လုတ့် နဝ်း၊ တူ မိုဝ်း ဒီ နဲ ဇဝ်ဖြာ မာဆေ။