1 ပေါ အူ ဆီငဲ ဂေ အာမူ အာမာတ် ဇဝ်ဖြာ ဝီ တး ကွယ် ဒီ အာတ့် ဇဝ်ဖြာ ပေါ အူ ဇေန့်။ ဘုဝ် ကာနမ် အီ စိူဝ် ဆာတာန် တွိုန် မိူဝ် တး ဒူပ် ဂေ၊ တဲး ဘော အန် ကွယ် ဒီ အာတ့် ဇဝ်ဖြာ။

2 ဇဝ်ဖြာ ဝီ ဒီမွှတ် ဘုဝ် ကာနမ် တီ တဝ်း၊ “မဲ တး နာ မှဝ်။း” ဘုဝ် ကာနမ် ဝီ တဝ်း၊ “အုဝ် ဟာဝ် ဟာဝ် တး တး၊ ဝိန် ဒီလဲ လဲပ် ဒီ ယွတ် ဒဲင် ကာဒါယ် နီ ဒွန် ပ့လုဝ့်။”

3 ဇဝ်ဖြာ ဝီ တဝ်း ဒီ အန်၊ “မဲ လှုဝ်း ဒဲစေန့် အုဝ် အီ စိူဝ် အာယုဝ်ဘာ တွိုန်။း ဒဲင် ကာဒါယ် နီ အာဝ် မိုဝ်း ခေါ အူ ဝီ အီ ပီ အန်။ အန် မုး ဒူအီ ပီ တူ ပွိုန် ကာလာင် အီ ဟဝ် နာ တူ မွှိုမ် လွင် အန်။ အန် ဘော မုး ဒူအီ အီ မိုဝ်း နဝ်း ဆိူဝ် နဝ်း မှာန် ဘော နပ် ဒီ ရုဝ်ဆေ ဇဝ်ဖြာ။ အန် ဘော မုး ဒူအီ အီ ဝး နာ တူ မွှိုမ်။ မဲ ပီ ဘော ဟဲ့ ကာဆုး အုဝ်၊ တဲး အုဝ် စ်ု မဲ ဟာဝ် ထေဝ် ဒီ ပျာတ့် အန် ဒေါ တူ မိုဝ်း ဒီခုဝ် မိူဝ်၊ အာယုဝ်ဘာ ယီ ဆီ ဒူပ် ဆီချာ အုဝ်။”

4 ဘုဝ် ကာနမ် တွိုန် ဝီ ကာလာင် ဒီ ဇဝ်ဖြာ တဝ်း၊ “န့ ဘော ပီ ဂြုဝ်း ပီ တဝ်း အီ တွိုန်၊ ‘ဟုန် အာဒါ ဟုန်။’ ဒူအီ ဒွန် အီ ဘော နပ် ဒီ ဒွါ ခဲ့ ပီ မိုဝ်း အန်၊ တဲး န့ ကာဒါင် အာဆာက် အန်။

5 ခုဝ်၊ ဆေ မဲ ဇဝ် ဒွါ အာဖေ အာရေ ဒီ ဒုဝ် ဘူင့် အန်၊ အန် ဒီ ဘော ဒိူင် ဘော အေး ဒွက် နာ မဲ အူ ဇေန့်။”

6 ဇဝ်ဖြာ ဝီ ကာလာင် ဒီ ဘုဝ် ကာနမ် တဝ်း၊ “တဲး မဲ ဘူင် ခဲ့ ပီ ဆီ ဘူင် မဲ။ မာလဲ၊ မဲ ကွဲ့ တဲး အာဆာက် အန် စှိုမ်။”

7 ပါယ် တီ ဘုဝ် ကာနမ် ဘော လေး ဒူင် ကွယ် ဇဝ်ဖြာ။ အန် ဘော ဘူင် တဲး ဘိုပ် ဒိမ် လေး ဒီ အာယုဝ်ဘာ ဘော ဒုဝ်၊ စုး ဒီ ကာဘာ ပ့လဝ် ကော ဇမ် ဒီ ဂိန့် အန်။

8 အာယုဝ်ဘာ ဘော ဟာဝ် တုတ့် ခဲင် ကာဝှါင်၊ ဝီ ဒိုဝ်း ဒူန့် ကာလုဝ့် ကာလာတ့်၊ ဝီ ခုတ် ဝီ ဂါ့ ဒိမ် အန် ဂေ ဘိုပ် အန် တီ။

9 ဒေါ အန် တီ အီဘိုန့် အန် ဝီ တဝ်း ဒီ အန်၊ “မဲ ဆီ ဒီ ဒူပ် ဇဝ်ဖြာ ယိုဝ့်။း တဲး မဲ ဒိူင် ဇဝ်ဖြာ ဘော ယမ်။”

10 အာယုဝ်ဘာ ဝီ ဝျီ့ ဂြုဝ်း အန် တီ တဝ်း၊ “မဲ နီ၊ မဲ ကာလာင် ဂြုဝ်း ပီ အီဘိုန့် အီ ဟဲ့ ရိုဝ်။ ဒေါ ဟဲ့ ဒွါ ဇဝ်ဖြာ တဲး အေ ဘျုဝ် ဒါခိုယ် ဂျာမ်ဆာ၊ အေ ဟဲ့ ဒိုဝ်း ဟဲ့ ရပ်။ ဒေါ ဝီ ဒွါ အန် ဇဝ် ဒုက် ဂေ ညှာပ်၊ အေ ဒီ ဘော ဝီ ပိုန့် ဝီ အေး ယိုဝ့်။း” လွင် ဇိုဝ် တီ ဒွန် မျုဝ်၊ အာယုဝ်ဘာ တူ တဲး အန် ကာလိုပ် ဂြုဝ်း၊ ကာလိုပ် မူတ့် ခေါ အူ ဒဲ။

11 အာယုဝ်ဘာ မိုဝ်း ဂိုက် အူယ် ဝီ။ န့ ဘော မုး အာအေလီဖာတ် အီ မုး ဒူအီ မိူင် ထေမာန်၊ အာဘီလာဒတ် အီ မုး ဒူအီ မိူင် ဆူဟိတ် ဘော အာစောဖ အီ မုး ဒူအီ မိူင် နေမာတ်။ ဒေါ ယိုဝ် ဂေ လွင် အာယုဝ်ဘာ ဟဲ့ ခမ် ဒုက် တာင် ကာဆဝ် တီ၊ ဂေ ဘော တဝ်း ဒီ တး လဲ တး စ်ု အန်၊ တဲး န့ လှဝ် နဝ်း အန်။

12 ဂေ ဘော ယွတ် အာယုဝ်ဘာ ဒေါ ဆီ ရာမ် ကာတူင့်၊ ဂေ အာဝ် ဟူ နုဝ် အန်။ ဒေါ ဝီ နပ် ဂေ ဟဲ့ မုး အန်၊ ဂေ မိူဝ် ယာမ် ဒတ် အူ ဇေန့်။ ဂေ မိူဝ် ကာယာတ့် ခြိုင် တာ ဂေ။ ဂေ ဘော ဒိုဝ်း ကာပုး ဘြတ် ဒဲင် ဂိန့် ဂေ။

13 ဂေ ဟဲ့ ဟွတ့် ဘူင် ပါယ် တီ ဂေ မိူဝ် တုတ့် ရိုမ် ဒူပ် အာယုဝ်ဘာ ဒဲင် ကာဒါယ် ကော နုဝ့် ဘူ ဆီငဲ ဒီ ဘူ မှိုဝ်။ ဂေ မိူဝ် အာဝ် ဟူ မိုဝ်း အီ လာယ် ဂြုဝ်း ကူပ် ဟဲ့ ယိုဝ် ဂေ ဒုက် တာင် ပီ ခမ် အာယုဝ်ဘာ။