1 ဝါယ် အန် တီ အာယုဝ်ဘာ ဝီ စုး ဒီ ကာလာင် ဂြုဝ်း ဘော ဒိူင် ဘော အေး ဆီငဲ ဒေါ ဂွိုတ် အန်။

2 အန် တဝ်း၊

3 “ဆီငဲ ဂွိုတ် တး အုဝ် တူ မွှိုမ်။ ဂါမ် အုဝ် မိူဝ် တူ ဘွတ်။ မှိုဝ် ဒေါ ဒဲ အုဝ် ဘာဒိက် ဆန်ထေ ဒေါ တဝ်း ဂေ၊ ‘ဟဲ့ ဘုဝ် ဘဲန် ဂွန် အီမာယ်၊’ အာဝ် ဒါခိုယ်။

4 ဆီငဲ တီ တဲး န့ အပ် ဝွင့် တူတ့်၊ ကွဲ့ တဲး ဇဝ်ဖြာ ဆီ လှုဝ်း မာဆေ။ ဘ့လာင် ဂေ ကာတာန် ဆီငဲ၊ ကွဲ့ တဲး န့ ဆီ မိုဝ်း။

5 အီ အပ် ဝွင့် ကာဆဝ် ဘော အီ ယာပ် မိူင် မာရာန တဲး န့ ဝီ ဖာတ် ဒိုဝ်း ဆီငဲ တီ။ တဲး န့အု ပ့လိုက် တူတ့် အန်။ ဆီငဲ တီ တဲး န့ ဘဲန် ဆီငဲ အီ မွှိုမ် ယုဝ်၊ မွှိုမ် ကာပိုန့် လွှိုမ် ဒွန် ဆီငဲ။

6 မှိုဝ် တီ၊ တဲး န့ အပ် ဝွင့် ဒီတိန့်။ ကွဲ့ တဲး အီ ပွိုန် ဒီ တိး ဆီငဲ တီ ခဲင် ဆီနမ် အန် ဘော ခဲင် မာဂျီန် အန်။

7 တဲး မှိုဝ် တီ ယေန် ဘော ငွင့်၊ ကွဲ့ တဲး န့ မိုဝ်း မှုဝ် ဒါခိုယ် လွင် အန်။

8 တဲး ဂေ အီ နပ် ဒီ ရဝ်း ဆီငဲ ရဝ်း ယာမ် ဘော ဒိူင် ဆီငဲ တီ။ ဂေ အီ နပ် ဒီ ဘျိတ့် ယိတ့် မာကြာယ်၊ တဲး ဘော ဂေ ဘူင် ပါယ် တီ။

9 ဆီမန့် အီ ဘ့လာင် ဆိန့်ဝး စေဝ်၊ ကွဲ့ တဲး န့ ဘ့လာင်။ တဲး မှိုဝ် တီ ဘော ဘ်ု ဒီလူယ် ဒီလာယ် ပီယေန့် ပန် ဒီ ဘ့လာင်။

10 ခုဝ်၊ မှိုဝ် တီ တူ ခြဲ အုဝ် ဂွိုတ်။ အန် တူ ရဲ တူ ဂွင့် ဒုက် တာင် တီ ဒီ အုဝ်။

11 မှဝ် န့ ပါယ် ပီ တူ ယမ် အုဝ် ဆိန့် ဒေါ ဂွိုတ် တး အုဝ်။း မှဝ် န့ ပါယ် ပီ တူ ယမ် အုဝ် ဒေါ ဂွိုတ် လေး အုဝ် ခဲင် ဝတ့် မာ အုဝ်။း

12 မှဝ် န့ ပါယ် ပီ စုဝ့် ငျီ့ မာ အုဝ် ဒီ အုဝ် ဒဲင် ဘိုမ် အန်။း မှဝ် န့ ပါယ် ပီ တဲး မာ အုဝ် အုဝ် ပူ ဒီ အန်။း

13 ဆေ အာဝ် ပါယ် တီ၊ အုဝ် ဟဲ့ ပွိုန် ဒီ အိတ် ယေန် ဒါခိုယ် ဒေါ တီ နီ။ အုဝ် မိူဝ် ဟဲ့ ပွိုန် ဒီ အိတ် တူ န့ ဆိုဝ်း။

14 အုဝ် မိူဝ် ဟဲ့ ပွိုန် ဒီ အိတ် ဒူပ် ဂေ ခုန်ဒီခမ် ဘော ဂေ အာမူ အာမာတ် အီ ဒွါ အာကျာမ် အာငျာန်၊ ဂေ အီ ဟဲ့ ဒဲ မိူင် အာဒါ ဒုဝ် ဘြိမ် ဂေ၊ အီ ဟဲ့ လိုဝ် ဟဲ့ ရာမ် ဒေါ တီ နီ။

15 ဆေ အာဝ် ပါယ် တီ အုဝ် ဟဲ့ အိတ် ဒူပ် ဂေ ဂွန် ဒါ တာင် အီ ဟဲ့ မိုဝ်း ခြိဝ်၊ ဟဲ့ အုန် ဘော ရွိုန် ကော နုဝ့် ခဲင် ကာင်။

16 ဆေ အာဝ် ပါယ် တီ မှဝ် န့ ပါယ် ပီ တူ ပီ အုဝ် ဂွန် အီ ဟဲ့ မ့ဘြွတ့် ဘော ဂွန် အီ တူ ထွုန်။း မှဝ် န့ ပါယ် ပီ တူ ပီ အုဝ် ဂွန် အီ တူ ပွိုန် ဒီ ယိုဝ် ဘ့လာင် ဆီငဲ။း

17 ဒူင် ကွယ် ဂေ တီ ဒူအီ ဟာယ် ဒူအီ မိူက် ဟဲ့ ဟွတ့် ကွယ် နှိမ်။ ဘော ဂေ အီ ဟဲ့ ရန့် ဂါန်၊ အီ ဟဲ့ နုန် ကာဆဝ် ဂေ ဟဲ့ ပွိုန် ဒီ ဒီလှဝ် ဒါခိုယ်။

18 ဂေ ဒူအီ အီ ဒွိုမ် ကွယ် ခဲင် ကာပိုမ်၊ ဂေ ဟဲ့ ဝီ ပွိုန် ဒီ ကွယ် ဘျုဝ် ဒါခိုယ် ဂျာမ်ဆာ။ ဂေ မိူဝ် ဟဲ့ လွတ် ဒီ ဂေ အီ ကာစွှာ့ ကာဘျုဝ် ဂေ။

19 ဂေ အီ မုး ဒါ တာင် အိုပ် မိူင် ဘော ဂေ အီ မုး ဒူအီ ရဝ် ဒူအီ ကာင် ဂေ ဘောကာဂ့လျီတ် ဟဲ့ ဟာဝ် ကွယ် တူတ့် ဒီ တီ။ ဂေ အီ ဒွိုမ် ဘဲန် မှာယ် အီ မိူဝ်၊ ဂေ ဟဲ့ ဟွတ့် လေး တ ဒါ ကာညာ ဂေ။

20 ဒူအီ အီ ကာဒုး ဒုက် တာင် နီ၊ မှဝ် န့ ပါယ် ပီ ဆီ နဲ့ ယိုဝ် အန် ဘ့လာင်။း ဒူအီ အီ ဟဲ့ မိုဝ်း ဒုက် ညှာပ် ဒီ နဝ်း၊ မှဝ် န့ ပါယ် ပီ ဆီ နဲ့ မိုဝ်း အန် အာဆာက် အိမ်။း

21 ဝီ အီ ဟဲ့ ဘ်ု အာခြာဝ် ဒီ ယမ် အန် မိူဝ်၊ အာခြာဝ် ဒီ ယမ် တီ ယီ တူ အိုင် ဒီ တး၊ တူ အိုင် ဒီ ဇမ်။ အန် ဘော ဟြေတ့် န့တေန့် ဒီ ယမ် အန်၊ လွှိုမ် အီ ဟြေတ့် ကြုဝ် ဘွတ် ပီ ဒိပ် အုန် အီ။

22 ဝီ တီ ဒီ ဘျုဝ် ဒါခိုယ် မီ ဒေါ တး ဇမ် အန် ခဲင် ကာဒဝ် ဘာရေဝ် တီ။

23 မှဝ် န့ ပါယ် ပီ လုဝ် တဲး န့ ဘ့လာင် ဒီ ဒူအီ အီ တူ ပွိုန် ဟာဝ် ဒူပ် န့တေန့် ဘော ဒီ ဒူအီ ပဲ့ ဟဲ့ ရဲ ဟဲ့ ခြွင့် အုန် ဇဝ်ဖြာ။း

24 ငှုန် ဂေ က့လိုဝ် ဟဲ့ ဘုဝ် ဘဲန် ဒီ အုဝ်၊ ဟဲ့ ဝီ ကာဒါင် ပီ ဒီ ဟူမ် အုဝ်။ ပီ ငှုန် ပီ ယာမ် အုဝ် မိူဝ် ဟဲ့ လေး ဆေဆေ ပီ အိုမ် လှဲ။

25 ဒုက် ပီ ယုဝ် ကာဆဝ် အုဝ်၊ ဟဲ့ ဝီ ဘုဝ် ဘဲန် ဒီ အုဝ်။ အာဖေ အာရေ ပီ ယုဝ် ဒီယုး ဒီယေန့် အုဝ် အုဝ် ဟဲ့ ဝီ ကာတုန့်။

26 နဝ်း အုဝ် မိူဝ် အာဝ် ဟူ နပ် ဒီ နှိမ် ဒီ ယေန် ဒေါ မှဝ်။ ဟဲ့ မိုဝ်း မီ ဒုက် ဒီလူယ်။”