1 ဒေါ အန် တီ အာအေလီဖာတ် အီ မုး ဒူအီ အီ ကွယ် ခဲင် မိူင် ထေမာန်၊ အန် ဝီ ဝျီ့ ဂြုဝ်း အာယုဝ်ဘာ တီ။

2 အန် တဝ်း၊ “အိုယ် အာယုဝ်ဘာ၊ ဆေ အူ ဝီ ကာလာင် ဂြုဝ်း ဒီ မဲ၊ မဲ ဒီ ခမ် ဒီ ထူမ်။း ဆေ အုဝ် ယီ တူ ကာလာင်၊ အုဝ် အာဝ် ဟူ ပဲ ခမ် ဒီ ယိူန်။

3 မဲ ဟဲ့ နပ် ဒီ မာနုဝ် ဒူအီ ကိူန်။ မဲ ဟဲ့ ဒွိုမ် ဒွါ ပ့လူမ် ဒွါ ဟဲန့် ဒီ ဂေ အီ ဟဲ့ ဒီလှး န့စမ်။

4 ဂြုဝ်း ပီ ကာလာင် မဲ ဟဲ့ စွယ် ဂေ အီ ဟဲ့ ဒွိုမ် ကာလိုပ်၊ ဒွိုမ် ဒီပ့လာတ်။ န့ ဘော ဘဲန် ပ့လူမ် ဘဲန် ဟဲန့် ဒီ ဂေ အီ ဟဲ့ မိုဝ်း နဝ်း လိုဝ် နဝ်း တျီ့။

5 ဒေါ တီ နီ အာဖေ အာရေ ယီ ဟဲ့ ဝီ တး ဇမ် ဒီ ဒုဝ် မဲ၊ န့ ဟဲ့ တဲး မဲ ဝီ ဘဲန် နဝ်း လိုဝ် နဝ်း တျီ့။ မဲ ဟဲ့ ဝီ ခမ် အာဖေ အာရေ တီ၊ န့ ဟဲ့ တဲး မဲ ဘဲန် ရိုဝ် ဘဲန် ဂ့၀ွင်။

6 ကူပ် ရုဝ်ဆေ မဲ ဇဝ်ဖြာ၊ န့ ဆော နပ် ဒီ ဝီ ဘဲန် နဝ်း ကြွိုမ် နဝ်း တာင် ဒီ မဲ။ ကူပ် ဘူင် ဒူပ် မဲ ဒါရာ၊ န့ ဆော နပ် ဒီ ဝီ တဲး မဲ ညှိုမ် ဘိုင် ဇဝ်ဖြာ။

7 တဲး မဲ ဝီ ကာဒွါ့ ကာဖာ၊ ဒူအီ အီ တူ ဘူင် မှာပ်၊ ဝီ မှဝ် ဟဲ့ ဒွိုမ် လိုဝ် စှိုမ်။း ဒူအီ နဝ်း ဆိူဝ် နဝ်း မှာန်၊ ဝီ မှဝ် ဟဲ့ ဒွိုမ် ဇမ် ဒုက် တာင်။း

8 ခဲ့ ပီ ဒွိုမ် ယိုဝ် အုဝ်၊ ဒူအီ အီ အွန် ဒီ ဘူင် မှာပ် ဆေဆေ ပီ ဒူအီ အီ ထဲ ဒူင် နာ။ ဂေ ပီ ဘော ဒူအီ အီ ဘြတ် ဆီမာ ငှုဝ်၊ အီ ဝီ ပွိုန် ဒီ ဆုဝ့် ပီ ဘြတ် ဂေ အီ တူ မွှိုမ် တီ။

9 ဆေ န့ ပီ ဇဝ်ဖြာ ဟိုဝ်း ဖွိုမ် ဒီ ဂေ၊ န့ ဒီ တဲး ဂေ လိုဝ် စှိုမ်။ ဆေ န့ ပီ ဇဝ်ဖြာ ဘုတ် ဂေ၊ န့ ဒီ တဲး ဂေ ဟြာယ် တူတ့်။

10 ဟမ် မာခြင်ဆီ ပီ ဘော ဟဲ့ တာင် ကာဆဝ်၊ န့ ဒီ ဝီ ယေန် ဝီ ငွင့်။ မာခြင်ဆီ နှိုမ် ပီ ဘော ဟဲ့ ပွိုန် ကဝ့် ယမ် ဒုဝ် ဆတ်ဒါဝါ၊ ဟြာင် အန် ယီ နပ် ဒီ ဝီ ကာဘက်။

11 မာခြင်ဆီ တီ ဒီ ဘော ယမ် ကူပ် အေတ့် တူ မိုဝ်း ပီ ဒီ ဟူမ်။ ဂွန် မာခြင်ဆီ ဂေ တီ ဒီ ဘော ကာယဝ်း ဟာဝ် ဒွန် ဘ့လာက်။

12 န့ မိုဝ်း အာဒါ အူ ဇေန့်၊ ဂြုဝ်း ပီ ကာလာင် အီ ဟဝ် ဟဲ့ လိုဝ်း ဒီ ဟျုဝ့် အုဝ်။ အုဝ် ဘော ယိုဝ် ဂြုဝ်း ပီ ဖူဖာပ် ဂေ တီ။

13 ခဲင် မှိုဝ် ဒေါ အိတ် ဆီချာ အီ ဟဝ်၊ အုဝ် ဘော မ့ဘာဝ် စီစိဝ် စီစိဝ် ဒေါ ဟဲ့ ငျာ အိတ် အုဝ်။

14 အုဝ် ဘော ကာစွာ ဘော ယုဝ် ဒီယုး ဒီယေန့်၊ တဲး အုဝ် ကော န့စမ် ဘော ဒုဝ်။

15 န့ ဘော မိုဝ်း ခုန် ဂျီတ် တး ဘုတ် နာ အုဝ်၊ တဲး န့ ဘော ဘဲန် ဟိုက် ကာဘြး၊ ဘဲန် ဘော ကာဒွါ့ ယင် အျီန် လေး ဒီ အုဝ်။

16 အုဝ် ဘော ယိုဝ် အူ မျုဝ် ဟဲ့ စွင့် ခူပ် အုဝ်။ အုဝ် ယီ တူ နပ် တူ ပွိုန် ကာလာင် န့ မုး မာဆေ။ ဒေါ အန် တီ ယီ ယေန် ယီ ငွင့် ကာဆဝ်။ အုဝ် ယီ ယိုဝ် ဂြုဝ်း ဒီတဲတ်။

17 န့ တဝ်း၊ ‘ဆေ န့ မုး ဒူအီ အီ နပ် ဒီ ယမ်၊ အန် တူ မိုဝ်း နဝ်း ဆိူဝ် နဝ်း မှာန် အီ ဘွတ် လွှိုမ် ဇဝ်ဖြာ။ အာမျုဝ် ဒူအီ တူ မိုဝ်း နဝ်း ဆီငါ ဘွတ် လွှိုမ် ဒါ ကာညာ အီ ဟဲ့ ဖာန် ဘ့လေး ဂေ။’

18 ဇဝ်ဖြာ မိူဝ် တူ ဘိုင် ဂေ အီ ဘူင် ဂါန် အန်။ အန် ဘော နပ် ဒီ တဝ်း လွင် ဂေ အာမူ အာမာတ် အန်၊ ဂေ တူ ဇေ့ဇုင်။

19 ဒဲင် တီ၊ အန် ဇဝ် မိူဝ် တူ ဘိုင် ဒူအီ အီ ကွယ် ခဲင် ကာင် ကာဒါယ် ဘော ဟဲ့ ဒွိုမ် လေး ခဲင် ကာပုး။ ဂေ ဟဲ့ ငှိုယ် ယမ် လွှိုမ် မာဝ ဒီတဲတ် ပီ ဘ့လာတ့် ဝဲန် အီ။

20 စုး ဆိန့် စေဝ် ညှာ ကော ဇမ် ဘာ ဒီ အပ်၊ ဂေ ဘော ကာဒုး ဒီ ခမ် အီ ပျာတ့် ဂေ။ အာဝ် မိုဝ်း အီ လှုဝ်း ဂေ ဒီ လိုဝ် စှိုမ် ပါယ် တီ ဒေါ မှဝ်။

21 ကြုဝ်ကြာမ် ဂေ မိူဝ် ဟဲ့ ဟွတ့် ဘျုဝ်း ဟြာယ် တူတ့်။ ဂေ ယီ တူ မိုဝ်း အာငျာန် မာဆေ ဘော ယမ် ဟြာယ် ပါယ် တီ။”