အာအေလီဖာတ် တဝ်း ဟာဝ်၊ “ဆေ မဲ ဆီ ဒတ် ဒဲ့ ပါယ် တီ ဟဲ့ ပွိုန်။ န့ ယီ တူ မိုဝ်း အီ ထူမ် ဂြုဝ်း မဲ။ ကာတဲ ဂေ ဒါ ဆာရာ အီ ဆီငါ ဘွတ်၊ မဲ ဒီ ဘိုင် အာဆေ၊ တဲး ဂေ စွယ် မဲ။း

2 နဝ်း ရူ နပ် ဒီ ပျာတ့် ဝဲန် ဒူအီ အီ တူ မိုဝ်း အာငျာန်။ နဝ်း လှယ့် အီ နပ် ဒီ ငဝ်း ယမ် ဒူအီ အီ တူ လွှက့်။

3 အုဝ် ဟဲ့ ဒွိုမ် ယိုဝ် ဒူအီ တူ လွှက့် အီ ထာင် အန် ဟဲ့ ပွိုန် ကွယ် ဆီချာ ပီ ဟေ အီ မိုဝ်း ရျီး။ မာလဲ၊ ဒေါ အန် တီ အူ ဇေန့် ဂေ ပီ ဝီ ဒိူင် ဝီ အေး ဒူင် ကွယ် အန် တီ။

4 ဂေ ဂွန် အန်၊ အာဝ် မိုဝ်း အီ လွတ် ခမ် အာဖေ အာရေ။ ဂေ ဘော ကာဒုး ဒီ ခမ် ပီ ခါနှာပ် အီ ဟဝ် ဒေါ ဆုင်ဖျာတ် အီ အာမူ ဂေ ဒီ ဘာင် မာလုဝ်း မိူင်။ န့ တူ မိုဝ်း ခေါ အူ ဝီ အီ ဒီ စွယ် ဂေ။

5 ဂေ ဒူအီ အီ ဟဲ့ အေတ့် ဟဲ့ ကာပြာန့်၊ ဂေ ဘော နပ် ဒီ ဖာတ် ဒိုဝ်း ပီ ဒီ ဟူမ် ဒီ ဒူအီ အီ တူ လွှက့် ဂေ တီ။ ငှုဝ် ပီ ဘော ဟဲ့ ကွယ် ကာတဲ ဟေ မာအာတ့် မိူဝ်၊ ဂေ ယီ နဲ့ ပွိုန် ဒီ ဒိုဝ်း။ ဂေ ဒူအီ အီ ဟဲ့ အေတ့် အီ ဟဲ့ ကာပြာန့် ဂေ ဝီ လှယ့် ကြုဝ်ကြာမ် ဒူအီ အီ တူ လွှက့် ဂေ တီ။

6 ခုဝ်၊ က့လိုဝ် ဂေ ငှဝ် အာဝ် နပ် ဒီ လေး တး ဒီ ကာပုး။ ဘော အီ ဒုက် ညှာပ် ဒီ နဝ်း၊ အာဝ် နပ် ဒီ လေး တး ဒီ ကာဒါယ်။

7 န့ ဟဲ့ မှာန် အာခါခ်ု၊ ဒူအီ ဂွိုတ် တး ဘော လုဝ် ခမ် ဒုက်။ န့ ဘော ပီ ကာစှူတ့် ငဝ် အီ ကုး ဟုဝ့် နာ ဒဲင်။

8 မာလဲ၊ ဆေ န့ မုး အုဝ်၊ အုဝ် ဒီ ဟာဝ် ကာလာင် လွင် အာရေ အုဝ် ဒီ ဇဝ်ဖြာ။ အုဝ် ဒီ ခဲ တူတ့် ဒွန် မျုဝ်၊ တဲး အန် ဇဝ် နပ်။

9 အီ မွှိုမ် အာမ် ပီ ဘူင် အန် ဇဝ် အာဝ် နပ် ဒီ ကာလှုး တူတ့် ဒီ နဝ်း။ ဘော နာ မွှိုမ် ပီ ဘူင် အန် ဇဝ်၊ အာဝ် ဟူ ပဲ နပ် ဒီ တိး။

10 အန် ဇဝ် ဘူင် တဲး ဂ့လာယ် စုဝ်း ဒဲင် ကာဒါယ်၊ တဲး န့ ဘော မိုဝ်း အိုမ် ခဲင် ဒူင် နာ။

11 အန် ဇဝ် ဘော နပ် ဒီ မျုက် စုဝ့် ဝီ အီ ဟဲ့ ချဝ့် ကာဆဝ်၊ တဲး အန် ဝီ ပွိုန် ဒီ ကွယ် ဒူင် စာ။ ဂေ အီ ဟဲ့ ငှုန် ဟဲ့ က့လိုဝ်၊ အန် ဘော တဲး ဂေ လွတ် အာဖေ အာရေ။

12 ဒူအီ အီ အွန် ဒီ ပီလွှက့် ဒီ အီ ဟဝ်၊ အန် ဇဝ် ဒီ ပျာတ့် ဝဲန် အာကျာမ် အာငျာန် ဂေ၊ ကွဲ့ တဲး ဂေ ပွိုန် ဒီ ဘူင် ခဲ့ ပီ ခြာမ် ဂေ။

13 ဆေ ဂေ အီ မိုဝ်း အာငျာန် ပီလွှက့် ဒီ အီ ဟဝ်၊ ဇဝ်ဖြာ ဒီ ဝီ မှေတ့် ဂေ။ အန် ဝီ ဘူင် တဲး ပီ ခြာမ် ဂေ လိုဝ် စှိုမ် တူတ့်။

14 ဇဝ်ဖြာ ဒီ ဘူင် တဲး အပ် ဝွင့် တး ပ့လိုက် ဂေ ဒေါ ကာတဲ ဆီငဲ။ ဂေ ဘော လုဝ် ဟာဝ် မာဘုန် မာဘုန် ပီ ခဲင် မှိုဝ်။

15 အန် ဇဝ် ယီ ချွတ် ဂေ ဒူအီ ဂိန် ဒူအီ ဖ့လာန်၊ တဲး ဂေ လွတ် ယမ်။ အန် ဇဝ် ဝီ စွယ် ဂေ အီ တူ မိုဝ်း မာဆေ၊ တဲး ဂေ လွတ် ဒီ ဒူအီ အီ အွန် ဒီ ခါနှာပ် ဂေ။

16 ကူပ် ပါယ် တီ ဂေ ဒူအီ ဒုက် ဒူအီ ဂိန် မိုဝ်း ပီ နှဝ့် န့ဒဝ့်။ ဂေ အီ ဟာယ် အီ မိူက်၊ ဂေ တူ ပွိုန် ဘူင် မာဆေ။ န့ ပီ ဇဝ်ဖြာ ဟဲ့ ကာဘိတ် မူတ့် ဂေ။

17 ဒူအီ ပဲ့ ဟဲ့ မာနုဝ် ဟဲ့ မ့ပြာယ် ဇဝ်ဖြာ နဝ်း အန်၊ အန် ဟဲ့ ဒါခိုယ်။ ခုဝ်၊ ဆေ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ မး ဟဲ့ မာနုဝ် မဲ၊ ကွဲ့ တဲး မဲ လုက်တာယ် လွင် အန် တီ။

18 အန် ဇဝ် ဟဲ့ တဲး အေ မိုဝ်း ဒိမ် မိုဝ်း ဆဝ်၊ အန် ပီ ဒီ ဝီ ကာဘန်၊ ဝီ ပက် ကာဆိူဝ် ဒိမ် တီ။ အန် ဇဝ် ဟဲ့ တဲး အေ ခမ် ဒုက်၊ အန် ဇဝ် ပီ ဒီ ဝီ တဲး န့ ဟြာယ်။

19 အန် ဇဝ် တူ ဝန် ဒီ စွယ် တဲး မဲ လွတ် ခဲင် ဒုက် ဒဝ် မျုဝ်၊ ဘော ဒုက် မျုဝ် မ့ဘူ အန် ဒီ စွယ် တဲး မဲ လွတ်၊ တူ တဲး န့ ဒိုဝ် မဲ။

20 ဆေ မဲ ဇမ် ဒုက် တာင် ကူပ် အေတ့် ပီ ဒီ ဟူမ်၊ အန် ဇဝ် ဒီ ထုတ် လေး မဲ၊ တူ တဲး မဲ ယမ်။ ဆေ န့ မိုဝ်း ဒါ ဆိုက် အီ လာယ် ကာဂုဝ်း၊ အန် ဒီ ရဲ ဒီ ဂွင့် မဲ၊ တဲး မဲ လွတ် ယမ် ဒီ မာပွါ့ လာင်။

21 ဇဝ်ဖြာ ဒီ ချွတ် တဲး မဲ လွတ် ဘော ခဲင် ဒုက် အီ လာယ် ကာယွင့်။ မဲ မိူဝ် တူ လုဝ် ယုဝ် အာဖေ အာရေ အီ နပ် ဒီ ပျာတ့် လိုဝ် ဘဲန် မျုဝ် ဘဲန် မျုဝ်။

22 မဲ ဒီ ဘော ဝီ ကာညး ဘော လင်ဂ့လွိုန် ဒီ အာဖေ အာရေ အီ နပ် ဒီ ပျာတ့် လိုဝ် ဘော ဒုက် အီ အေတ့် ပီ ဒီ ဟူမ် တီ။ မဲ မိူဝ် တူ လုဝ် ယုဝ် ဂေ မာဒုဝ် ပြဲ အီ ဟာယ် ကာဆဝ်။

23 ခုဝ်၊ န့ ပီ မာဝ် အီ ကွယ် ခဲင် မာန် ဂေ ဒူင် နာ မဲ၊ ဟဲ့ ဝီ ဘဲန် ဂိုက် မဲ။ န့ ဘော ပီ ဂေ မာဒုဝ် ပြဲ ဟာယ် ဒီ ဝီ ကာလဝ့် ဒီ မဲ။

24 မဲ ဒီ ဘော ပွိုန် ကွယ် ဒါခိုယ် ကွယ် ဂျာမ်ဆာ ခဲင် ထိုပ် မဲ။ ဆေ မဲ ဝီ ဇဲတ် ဒီ ယွတ် ဖိုင် မာဘူ ဂေ ဖိုင် မာမက် မဲ မိူဝ်၊ န့ တူ မိုဝ်း အီ ဘျုဝ်း အီ ဟြာယ် ခေါ အူ ဒုဝ်။

25 မဲ ဒီ ဝီ နပ် ဝီ ယိုဝ် ခဲ့ ကိူန် ဂေ ဂွန် မဲ။ ဘော လှုက်လှာန် မဲ ဒီ ဘြဲ ကိူန် ကာဆဝ်၊ တဲး န့ ကော ပီ ပေတ့် အီ လတ့် ဒဲင် ကာဒါယ် နီ။

26 မဲ မိူဝ် ဒီ ပွိုန် ဒီ ကတ် ဒီ ဂဲ၊ ဟဲ့ ဟွတ့် ဘော ယမ် ဟာဝ်။ န့ ဒီ ဘော ပီ အီ ဒိုဝ်း ဘ့လေး ဆီဘယ့် ငှုဝ် ဒေါ ဟဲ့ ဇမ် အာခြာဝ် အန်။

27 အိုယ် အာယုဝ်ဘာ၊ အုဝ် ဟဲ့ ဟွတ့် ဇဲတ်ဆေ ဒီ ယွတ် ဆီချာ ဆီချာ၊ ကော နပ် အီ မုး အီ မှာန် အီ ဟဲ့ ကာဇီ။” ပါယ် တီ တဲး မဲ ထူမ် ဘော တဲး န့ လိုပ် ခဲင် နဝ်း မဲ။