1 ဒေါ အန် တီ အာယုဝ်ဘာ ဝီ ဝျီ့ ဂြုဝ်း တီ။

2 အန် တဝ်း၊ “အုဝ် ဆီ တဲး န့ ပွိုန် ဒိုဝ်း လွင် ပဲ့ ဟဲ့ ကာလုတ့် အုဝ် နဝ်း ဘော လွင် ဟဲ့ ရူ ဟဲ့ လိုဝ် နဝ်း အုဝ်၊ ဝီ ဆ ဒဲင် လစူ။

3 န့ ဟဲ့ ကိူန် လွှိုမ် ကာဟာတ့် ဒီ အိုမ် နမ်မုက်ဆာရာ။ ခုဝ်၊ ဂြုဝ်း ပဲ့ ဟဲ့ ကာလာင် အုဝ် ဟဲ့ ပွုန်၊ ဟဲ့ လွှိုမ်။

4 န့ ပီ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဒိုဝ်း ဘ့လာ အ၊ ဘန့် လိုပ် ခဲင် ဒုဝ် အုဝ်။ အာယ် အန် တီ ဟဲ့ ငျာ ဘြဲ ဟာဝ် ကာလတ့် ခဲင် နဝ်း ဖွိုမ် အုဝ်။ န့ ပီ အီ မွှိုမ် ယုဝ်၊ မွှိုမ် ကာဟိဝ် ပီ ဘူင် ဇဝ်ဖြာ ဟဲ့ ဘ်ု ဒီ ကာဂုဝ်း ဒီ အုဝ်။

5 မာလာ ပြဲ မိူဝ် တူ ဟမ်၊ ဆေ အန် ပွိုန် ဒီ ဟူမ် ဖဲ ဟူမ် ကိူန် ဒေါ ဟဲ့ မိုဝ်း ပေတ့် ကိူန်။ မက် ဒီဆုဝ် မိူဝ် တူ အုတ်အွာ ဒေါ ဟဲ့ မိုဝ်း ဟျြီင်။

6 ပီ ဒီ ဟူမ် အီ ပ့လေ အီ တူ ဟပ် ဆယ့်၊ န့ တူ ပွိုန် ဟူမ်။ ဘော ခဝ် လုယ် ပွိုန် အျီန် အာဝ် နပ် ဒီ ဇဲမ်။

7 ပီ ဒီ ဟူမ် မျုဝ် တီ၊ အုဝ် မိူဝ် တူ ဒိုဝ် တူ ပါ။ န့ ဘော မုး ပီ ကာအိး ပီ ပိုဝ် ကာဆဝ် အုဝ်။

8 အုဝ် ဘော ကာပြာ ကာဆဝ်၊ တဲး အုဝ် ပွိုန် ပီ မှာန့် အုဝ်။ တဲး ဇဝ်ဖြာ ဘော ကာဝေ ဒွါ ပီ ဆီ ပွိုန် အုဝ်။

9 အုဝ် ဘော မွင် ကာဆဝ်၊ တဲး ဇဝ်ဖြာ ပျာတ့် ဝဲန် အုဝ်။ တဲး အန် ဇဝ် ဘူင် တဲး အုဝ် လိုဝ် စှိုမ်။

10 ဆေ အန် ဇဝ် ဘူင် ပါယ် တီ အုဝ် ဒီ ဘော ခူယ်။ အုဝ် ပီ ဘော ဟဲ့ ဒိမ် ဟဲ့ ဆဝ် ဆေဆေ၊ အုဝ် ယီ ခူယ် ဒါခိုယ် ကူပ် တူ ထဲန့် တူ လှိုဝ် အုဝ် ဂြုဝ်း ဇဝ်ဖြာ အီ ဆီငါ ဘွတ်။

11 အုဝ် အာဝ် မိုဝ်း ဟဲန့် ဒီ ဘ်ု ပီ နှဝ့် န့ဒဝ့် အုဝ် ပေါ မ့ပွါ။ အာဝ် မိုဝ်း ဒီခုဝ် မာဆေ ဒီ နှဝ့် ဒီ ယိူန် အုဝ် ပေါ မ့ပွါ။

12 ဟဲန့် အုဝ် တူ နှဲန် မာဝ်။ ဘော ယင် အုဝ် တူ ပီ ဘွင့် ဒေန့်။

13 အုဝ် တူ မိုဝ်း ဟဲန့် ဒီ ဝီ စွယ် ဒုဝ် ဘြိမ် အုဝ်။ နာ ဒီ ဆီကဲန် အုဝ်၊ အာဝ် ဟူ နှဲန် ဒီ မိုဝ်း။ န့ ပီ ဟဲ့ ဟွတ့် ဟုဝ် တဝ် တူတ့်။

14 ဒူအီ အီ တူ မိုဝ်း နဝ်း ကာဝေ ဂိုက် အန်၊ န့ ပီ အန် ဘူင် အီ မွှိုမ် ဆာယ်။ အန် မိူဝ် တူ ရုဝ်ဆေ အန် ဇဝ် အီ အိုပ် တူတ့် ဒွန် မျုဝ်။

15 ဘေ ဘီနွင် အုဝ်၊ ဘေ တူ ကာဆိူဝ် ဒီ အုဝ်၊ တဲး န့ ပီ အိုမ် ပြဲ့ အီ လှဲ ဒူပ် ဘ့လဲင် ဒူပ် ဒီလယ့် အီ ဟဲ့ ဟိတ် ဒေါ တူ မိုဝ်း ဂ့လာယ်။

16 ဆေ န့ မိုဝ်း အိုမ် ဂြုဝ့် ဂျီတ် ဘော ကာဘိတ် အိုမ် အီ လှဲ နာ ခြိုမ်၊ ကွဲ့ တဲး န့ လိုဝ်း။ ဘော ဆေ အိုမ် ဒါတ် ဟဲ့ လာတ့်၊ န့ ဘော တဲး အိုမ် တာင်။

17 မာလဲ၊ ဆေ ဆီငဲ ဟီ ဆွိုန် ဒေါ ဇမ် အာခြာဝ် ဆောဒါတ်၊ အိုမ် ဘော နပ် ဒီ ဟြာယ် ဒူင် တီ။

18 ဖိုင် ဂေ ဒူအီ အီ ကာစိုဝ်း ကာယွင့်၊ ဂေ ဝး န့တေန့် ခူပ် အိုမ် တီ၊ ဝီ ဟာဝ် ဒူင် ကာဂ့လ၊ တဲး ဂေ စှိုမ်။

19 ဖိုင် ဂေ ဒူအီ အာမျုဝ် ထေမာ အီ ဟာဝ် ဒူပ် န့တေန့် တီ၊ ဂေ ဝီ ဟြေတ့် အိုမ်။ ဘော ဂေ ဒူအီ အီ ယွင့် ကြုဝ် အီ ကွယ် မိူင် ဆေဘာ ဝီ ဟာဝ် ဒူပ် န့တေန့် ဘော ဟြေတ့် အိုမ် တီ။

20 မာလဲ၊ ပီ နှဝ့် န့ဒဝ့် ဂေ တီ၊ ယီ ဝီ ဘျွင်၊ ဝီ ဘဲန် အီ ကာလုတ့် နဝ်း။ ဂေ ဟဲ့ ဒွိုမ် နပ် န့ မိုဝ်း အိုမ် ဒီ တီ၊ ဂေ ဘော တး ဇမ် ယီ တူ ဝီ ယိုဝ် မာဆေ။

21 ဘေ မိူဝ် ဟဲ့ ပီ အိုမ် ဘ့လဲင် တီ ဒီ အုဝ်။ ဘေ ဘော ယိုဝ် အီ မွှိုမ် ယုဝ်၊ ဘေ ဘော ဝီ ကာစွာ။

22 အုဝ် မိူဝ် တူ ဒွိုမ် တဝ်း၊ ‘ဒိုဝ်း အူ မျုဝ် အူ မျုဝ် ဒွါ ဒီ အုဝ်။ ဒိုဝ်း ကြုဝ်ကြာမ် ဘေ ကာဖြူမ် ဒီ ထုတ် လေး အုဝ်။

23 တဲး ဘေ ကာဖြူမ် ဒီ ထုတ် လေး အုဝ် ဒီ ရန်ဆူ အုဝ်။ တဲး ဘေ ထုတ် လေး အုဝ် ဒီ ဂေ အီ ခါနှာပ် အုဝ်။’ ဘေ ဟဲ့ ဒွိုမ် ယိုဝ် အုဝ် တဝ်း ပါယ် တီ။း

24 တဲး ဘေ မာနုဝ် အုဝ်။ အုဝ် မိူဝ် ဒီ ကွယ် နှိမ် နှိမ်၊ တူ တဝ်း မာဆေ။ တဲး ဘေ ကာလာင် ပီ လုတ့် အုဝ်၊ အုဝ် ဒီ ထူမ်။

25 ဂြုဝ်း မုး ဂြုဝ်း မှာန် ဘော မိုဝ်း အာဖုင် ဒင်ခုဝ်။ မာလဲ၊ ဆေ န့ မုး ဂြုဝ်း ပီ တူ လာယ် ဆီဖုဝ် ဘေ၊ န့ တူ မိုဝ်း ဒီခုဝ် မာဆေ။

26 မှဝ် န့ ပါယ် ပီ ဆီ နဲ ဘေ ဒီ အုဝ် ကူပ် ဂြုဝ်း ပီ ကာလာင် အုဝ် နီ။း ဆေ ဒူအီ ဟူ မိုဝ်း ပီ ခြာမ် ပီ မာင် ကာလာင် ဂြုဝ်း၊ ဘေ ထာင် အာဝ် မိုဝ်း ဒီခုဝ်။း ဘေ ထာင် န့ ဒီ ဘဲန် တူတ့် ဟိုတ့် ဂေ ခုန် ဒီလူယ်။း

27 ဘေ နပ် ဒီ ကာတာမ်၊ တဲး ဘေ ပွိုန် ဒီ စ်ု၊ ပွိုန် ဒီ အိုပ် ဂွန် ဆီပြး။ ဘေ ဘော ဒိုဝ်း ဒီ ဟူမ် နမ်လေး နမ်မျာတ် အန် ဒီ ဂိုက် ဘေ။

28 ဒေါ တီ နီ၊ တဲး ဘေ ယွတ် အုဝ်။ အုဝ် မိူဝ် တူ ကာလုဝ် ဘေ။

29 တဲး ဘေ အူတ် နဝ်း ခေါ အီ စဲက်။ ကွဲ့ တဲး ဘေ ဆုင်ဖျာတ် အီ တူ ဒူပ် ဒါရာ။ တဲး ဘေ ဝီ ဇေန့်ဇာ လွင် ဒုက် အုဝ် ပေါ အူ ဇေန့်။ အုဝ် တူ ဆီ တဲး အုဝ် စှိုမ် ဆာရေ။

30 ဘေ ထာင် အုဝ် ကာလုဝ် ဘေ။း ဘေ ထာင် အုဝ် ဟူ နပ် ဒီ ကာယဝ်း အီ မွှိုမ် အီ တူ မွှိုမ်။း”