1 န့ မိုဝ်း ခုန်ဒီခမ် အူ ကာဒင် အီ စိူဝ် အာဟာဆေရူ။ အန် အိုပ် မိူင် အူ မာယဝ်း ဒီ အာ ဂိုဝ် ဒီ ဘူ မိူင်၊ စုး ဒီ မိူင် ဂူလာ ကော ဇမ် ဒီ မိူင် ကူဆာ အီ ဘော စိူဝ် မိူင် အေထီအူပ်။ 2 အန် ဘော ကွယ် ခဲင် ဟုဝ် အီ ကွယ် ခဲင် မိူင် ဆူဆာန်။ 3 ဒေါ ဘဲန် အန် ခုန်ဒီခမ် အာဒါ အူယ် ဆီနမ် အန် ဘူင် ဘ့လွယ်၊ ဟျီင် ဂေ အာမူ အာမာတ် အန် ဘော ဒဲစေန့် အန်။ အန် ဘော ဒဲ့ ဒါ ဘုဝ် အီ ကွယ် ခဲင် မိူင် ဘေန်ရာဆီ ဘော ဒါ ဘုဝ် အီ ကွယ် ခဲင် မိူင် မဲတီ ဘော အာမူ အာမာတ် အန် ဘော ဒါ ကာညာ ပီ ဘ့လေး အန် ခဲင် မိူင် ဒွန် မိူင်၊ တဲး ဂေ ဘောကာဂ့လျီတ် တး ဒူင် ကွယ် အန်။

4 ဂေ ဟဲ့ ဟွတ့် တး ကာဇု ဒူင် ကွယ် အန် အာဒါ အူ မာယဝ်း ဒီ ဒါ ဂိုဝ် ဆီငဲ၊ အန် ဘော ဘျ ခဲ့ မိုဝ်း အန် ကြုဝ်ကြာမ် အီ ငဝ်း တာင်၊ အီ ဘွတ် ဒွန် မျုဝ်။ အန် တဲး ဂေ ယိုဝ် ခဲ့ မိုဝ်း အန် အာဖုင် ဒင်ခုဝ် ဘော ခဲ့ တာင် ပွုန် အန်။ 5 ဟဲ့ ဟွတ့် အူ မာယဝ်း ဒီ ဒါ ဂိုဝ် ဆီငဲ တီ၊ အန် ပီ ဝီ ဘူင် ဘ့လွယ် ဟျီင် အီ ဟူမ် အာဒါ ပေါ ဘူ ဆီငဲ။ အန် ဟျီင် ဂေ ဒူအီ ကိူန် ဘော အီ တျီ့ အီ တာင်၊ တဲး ဂေ ကွယ် ခဲင် ကာပိုမ် ခူပ် ဟုဝ် အန် အီ ကွယ် ဒီ မိူင် ဆူဆာန် တွိုန်။ 6 ကာပိုမ် ဒူင် ဘူင် အန် ဘ့လွယ် တီ၊ ဂေ ဟဲ့ ဟွယ် ဘိက် ကာတမ် လုယ် ဂေ ဘိက် အီ ငျီန်။ ဂေ ဟဲ့ ဒိုဝ်း ဘော ဘိက် အီ လုယ် အီ ရေန့် ဂဲ၊ ဝီ ပက် ဟွယ် ဒီ ခမ် ရွိုန် အီ ဒိုက် ဒီ ရွင့် မာဝ် လုယ် တွိုန်။ န့ ဘော မိုဝ်း ဘော ကာစှူင့် ရွိုန်၊ ကာစှူင့် ခြိဝ်၊ အီ ပွိုန် တုတ့်။ ဂေ ဟဲ့ ဝီ ဘ့လေး ကာစှူင့် တီ ဒဲင် ဘိူန် ပီ ဒ ဂေ ဆဲန့် အီ ဒီဖ့လ၊ အီ ရေန့်၊ အီ ခွင်၊ အီ လုယ်၊ အီ ဝွင့်။ 7 ဂေ ဘော ဒျီင် အိုမ် မာငုန်၊ တာ ဆီလယ့် ခြိဝ် အီ တူ မုး အူ မျုဝ်။ ခုန်ဒီခမ် တဲး ဂေ ဒျီင် ကိူန် ကာဆဝ်၊ တဲး န့ လိုဝ်း နဝ်း ဟာင် အန်။ 8 ခုန်ဒီခမ် ဘော ဒွါ အာမိင်၊ တဲး ဂေ ဒွန် အီ ဒျီင် ခဲ့ အိုင် ဂေ။ ခုန်ဒီခမ် ဟဲ့ ကာလာင် အုန် ဒီ ဂေ အီ လိုမ်လာ ခဲတ့်၊ တဲး ဂေ ဒွါ တဲး ခဲတ့် ဒျီင် ခဲ့ ဆီ ဒျီင် ဂေ ဒွန် အီ။

9 အီ မုး နာင် ဟောခမ် အီ စိူဝ် နာင် ဝါဆာဒီ၊ အန် မိူဝ် ဘူင် ဘ့လွယ်၊ ဟျီင် ဂေ အီဘိုန့် ခဲင် ဟုဝ် ခုန်ဒီခမ် အာဟာဆေရူ တွိုန်။

10 န့ ဟဲ့ ဟွတ့် ဇမ် ဘူ ဆီငဲ၊ ခုန်ဒီခမ် မိူဝ် ဟဲ့ ဒျီင် အိုမ် မာငုန်၊ တဲး နဝ်း အန် ဒါခိုယ် ကာဆဝ်။ 11 ဒေါ အန် တီ အန် ဘော ဒဲ့ ဂေ အီ မုး ဒဲစေန့် အန် ဘူ ဝီ အီ မုး ဒူအီ ဆး၊ အီ စိူဝ် အာဟူမာန်၊ အာပီဇာဆာ၊ အာဟာဘောနာ၊ အာဘီကာဆာ၊ အာဘာကာဆာ၊ အာဇေဆာ ဘော အာကာကာတ်။ အန် ဘော စ်ု ဂေ တဲး ဂေ ကာလာင် ဒီ နာင် ဝါဆာဒီ တွိုန်၊ တဲး အန် စှိုပ် မင်ဂိုမ် အန်၊ တး ဒူင် ကွယ် ခုန်ဒီခမ်။ ကူပ် ဟဲ့ စှိတ် ကာဆဝ် နာင် တီ၊ ခုန်ဒီခမ် ဆီ ဘျ ခဲ့ စှိတ် အန် တဲး ဂေ အီ ဟဝ် ဘော ဂေ ဒါ ကာညာ ခဲင် မိူင် ပီ အိုပ် အန် ဘော ပွိုန် ဒီ ယိုဝ်။ 12 ဒဲစေန့် အန် ဟဲ့ ဟွတ့် ကာလာင် ဒီ နာင် ဟောခမ် လွင် ပီ စ်ု ခုန်ဒီခမ်၊ အန် ဝီ ထဲန့် ဂြုဝ်း တီ။ အန် မိူဝ် တူ တး။ ဟဲ့ ဟွတ့်၊ နဝ်း ခုန်ဒီခမ် အာဝ် ဟူ ဒါခိုယ်။ အန် ဘော ရူ ကာဆဝ်။

13 ပန် တီ ခုန်ဒီခမ် ဘော ဒဲ့ ဂေ အီ မိုဝ်း အာငျာန်၊ အီ နပ် ဒါရာ အီ ဒူပ် ထုင်ဂျာမ် ဂေ ခုန်ဒီခမ်။ အန် ဘော ဆင်ချာင် ဒီ ဂေ၊ မှဝ် ဂေ ဒီ ပါယ် ဒီ ဆုင်ဖျာတ်။ 14 ဂေ အီ ဒွါ အာကျာမ် အာငျာန် တီ၊ ဂေ စိူဝ် အာကာဆေနာ၊ အာဆေဆာ၊ အာဒါမာဆာ၊ အာထာဆိတ်၊ အာမဲရိတ်၊ အာမာဆေနာ ဘော အာမာမူခါန်။ ဂေ ဘူ ဝီ တီ၊ ဂေ မုး ဒါ ကာညာ အီ အိုပ် မိူင် ဘေန်ရာဆီ ဂါယ် မိူင် မဲတီ။ ဂေ ကွယ် ရိုမ် ဒူပ် ခုန်ဒီခမ် ဆေဆေ၊ မုး အီ တာင် လွှိုမ် အီ ဟဝ် ခဲင် မိူင် အန် တီ။

15 ခုန်ဒီခမ် အာဟာဆေရူ ဝီ တဝ်း ဒီ ဂေ၊ “ဆေ အေ ဒူပ် ဒါရာ အေ နီ၊ မှဝ် အေ ဒီ ပါယ် ဒီ ဆုင်ဖျာတ် အာမူ နာင် ဟောခမ် အီ စိူဝ် နာင် ဝါဆာဒီ နီ။း ခုဝ်၊ အုဝ် ဟဲ့ စ်ု ဂေ ဟာဝ် ကာလာင် ဒီ အန်။ အန် ယီ တူ ထူမ် ဂြုဝ်း ပီ ကာလာင် အုဝ် တီ။”

16 အာမာမူခါန် ဝီ တဝ်း ဒီ ခုန်ဒီခမ် ဘော ဒီ ဂေ အာမူ အာမာတ် ဒွန် အီ၊ “နာင် ဟောခမ် ဝါဆာဒီ နီ အာဝ် မုး အန် လုတ့် အီ မဲ ခုန်ဒီခမ်၊ အန် ဟဲ့ လုတ့် ဒါ ကာညာ ဘောကာဂ့လျီတ် ဘော ဒူအီ ဒွန် မာန် ဒွန် မိူင် ခဲ့ ပီ အိုပ် မဲ ခုန်ဒီခမ်။ 17 ဆေ အီဘိုန့် အီ ဟဝ် ဟီ ယိုဝ် လွင် ပီ ဘူင် အန် တီ၊ ဘော ဂေ ဒီ တူ ရုဝ်ဆေ အီမာယ် ဂေ။ ဂေ ဒီ တဝ်း၊ ‘ခုန်ဒီခမ် အာဟာဆေရူ ဟဲ့ ကာလာင် ဒီ နာင် ဟောခမ် ဝါဆာဒီ၊ တဲး အန် တး ကွယ် နာ အာတ့် အန်။ နာင် ယီ တူ တး။’ 18 ဂေ အီဘိုန့် အီ မုး ယာ တာင် အီ ကွယ် ခဲင် မိူင် ဘေန်ရာဆီ ဂါယ် မိူင် မဲတီ၊ ဂေ ဟီ ယိုဝ် ပီ ဘူင် နာင် ဟောခမ် တီ၊ ဂေ ဒီ ဝီ ဘူင် ပါယ် တီ ဒီ အီမာယ် ဂေ အီ မုး အာမူ အာမာတ် ခုန်ဒီခမ် ဘော ဒါ ကာညာ အီ အိုပ် မိူင်။ န့ ဒီ ဘဲန် လာယ် ရူ ကာဆဝ် ဒီ ဂေ။

19 ဆေ မဲ ခုန်ဒီခမ် ဖြူမ်၊ တဲး မဲ ဘူင် အာမိင် ဒဲမ် ဟပ် ခဲင် ပဲ့၊ တဲး န့ ဘဲန် ဒါရာ ခဲင် မိူင် ဘေန်ရာဆီ ဂါယ် မိူင် မဲတီ။ တဲး န့ တဝ်း၊ နာ အာတ့် နီ ဟာဝ် နာင် ဝါဆာဒီ အာဝ် ဟူ ပွိုန် ဒီ တး ဒူင် ကွယ် ခုန်ဒီခမ် အာဟာဆေရူ ဒေါ မှဝ်။ ဒါရာ တီ၊ အာဝ် ပွိုန် ကာပ့လု။ တဲး မဲ ခုန်ဒီခမ် ဝဲန် အန်၊ ကွဲ့ တဲး အန် ဘဲန် နာင် ဟောခမ်။ မဲ ဘော ဝီ ဒိုဝ်း အီဘိုန့် အီ မွှိုမ် လွှိုမ် အန် တီ၊ တဲး အန် ဝီ ဘဲန် နာင် ဟောခမ်။ 20 ဆေ မဲ ခုန်ဒီခမ် ဘူင် ပါယ် တီ ဆေ အာမိင် ပီ ဘူင် မဲ တီ ဟီ ကာလတ့် ဒွန် နာ ဒွန် ပ့လုဝ့်၊ ဂေ အီဘိုန့် ဘောကာဂ့လျီတ် ဒီ ဝီ ရုဝ်ဆေ အီမာယ် ဂေ ဘော ဂေ အီ တျီ့ အီ တာင်။”

21 ဂြုဝ်း ပီ ကာလာင် အာမာမူခါန် တီ န့ ဘော လဝ့် နဝ်း ခုန်ဒီခမ် ဘော နဝ်း ဂေ ဒါ ကာညာ ဒွန် အီ။ ခုန်ဒီခမ် ဘော ဘူင် ဒူပ် ပါယ် တီ။

22 အန် ဘော ဒဲမ် ပဲ့ အာမိင်၊ တဲး ဒူအီ ပွိုန် ဒီ တိး၊ တဲး န့ ဒူပ် ဂြုဝ်း မိူင် မှဝ် မိူင် အန်။ ဒူအီ အာမျုဝ် မှဝ် မိူဝ်၊ ပွိုန် ဒီ တိး ဒုဝ် ပဲ့ အန်။ ပဲ့ တီ န့ တဝ်း၊ အီမာယ် ဒွန် အီ လုဝ် အိုပ် န့ဟူမ် အန်။