1 ဝါယ် တီ နဝ်း ရူ ခုန်ဒီခမ် အာဟာဆေရူ ဟဲ့ ဝီ ဟြာယ်။ အန် ဘော ဝီ နမ်လှုဝ်း နာင် ဝါဆာဒီ၊ ဝီ လှုဝ်း လွင် ပဲ့ ဟဲ့ ဘူင် ပဲ့ ဟဲ့ ဆုင်ဖျာတ် အန်။ 2 ဂေ ဒဲစေန့် အန် အီ ကွယ် ရိုမ် ဒူပ် အန် ဆေဆေ၊ ဂေ ဝီ တဝ်း ဒီ အန်၊ “ယေ မှာန့်၊ တဲး မဲ ခ့ဝါင် ယေ ဟြေတ့် ဒီဘျာ စှိတ် ခေါ အူ ဝီ အာဒါ မဲ ခုန်ဒီခမ်။ 3 တဲး မဲ ကာလာင် ဘော ဒီ ဂေ ဒါ တာင် အီ ကွယ် ခဲင် မိူင် ပီ အိုပ် မဲ ဒွန် ပ့လုဝ့်၊ တဲး ဂေ တိုယ် ခဲ့ ကွယ် ဒီဘျာ အီ စှိတ် ဒွန် အီ၊ တဲး ဂေ တး ကာဇု ဒူင် ကွယ် ဂေ ဇိုင် နာင် ဒီ ဟုဝ် မဲ ခဲင် မိူင် ဆူဆာန် နီ။ တဲး ဂေ အာပ် နာင် တီ ဒီ အာဟေကဲ အီ မုး ဒူအီ ဆး အီ အိုပ် ဇိုင် နာင် တီ။ တဲး ဂေ ဖဝ်း ဘော ဆီနမ် ဘဲန် မျုဝ် ဘဲန် မျုဝ်၊ တဲး ဂေ စှိတ်။ 4 တဲး မဲ ခုန်ဒီခမ် ရဝ်း ဝီ မှဝ် အီ ဟဲ့ လဝ့် နဝ်း မဲ၊ တဲး မဲ တဲး အန် ဝီ ပ့လု နာင် ဟောခမ် ဝါဆာဒီ တွိုန်။” ဂြုဝ်း ဂေ တီ ဘော လဝ့် နဝ်း ခုန်ဒီခမ်။ အန် ဘော ဘူင် ပါယ် တီ အူ ဇေန့်။

5 န့ ယီ မိုဝ်း ဒူအီ အာယူဒါ အူ ဝီ၊ အန် စိူဝ် အာမုဝ်တာကေ။ အန် မုး ဂွန် အာယာအီရာ။ အာယာအီရာ ဝီ မုး ဂွန် အာဆီမီ။ အာဆီမီ ဝီ မုး ဂွန် အာကီဆာ အီ မုး ဒူအီ ခြိုဝ် အာဘေန်ယာမ်။ အာမုဝ်တာကေ တီ ဘော ကွယ် ဒူင် ကွယ် ဟုဝ် ပီ ချြီင် ဒါ ဆိုက် ခဲင် မိူင် ဆူဆာန် တွိုန်။ 6 အန် ဟဲ့ တး ခဲင် မိူင် ယေရူဆာလဲမ် ဒေါ မှေတ့် ဟာဝ် ဂေ ဖိုင် ခုန်ဒီခမ် အာယေခေါနီ အီ အိုပ် မိူင် ယူဒါ တွိုန်။ ဒေါ အန် တီ ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ ဟဲ့ မှေတ့် ဂေ ဘောကာဂ့လျီတ်၊ တိုယ် ဟာဝ် ဂေ ဇမ် ခဲင် မိူင် ဆူဆာန် တီ။ 7 အာမုဝ်တာကေ တီ မိုဝ်း လှာန် အူ ဝီ အီ မုး ဂွန် ဂုန့် တဲ့ အန်။ အန် စိူဝ် နာင် အေဆာထာ။ ခဲင် ဂြုဝ်း ဟဲဘြဲ အန် စိူဝ် နာင် ဟက်တာဆ။ နာင် အေဆာထာ တီ ဟဲ့ စှိတ် ကာဆဝ်။ ဒေါ ဟဲ့ ယမ် ဂုန့် မာ အန်၊ အာမုဝ်တာကေ ဟဲ့ ဝီ ဒိုဝ်း ဒီ ဟျီင် အန်၊ တဲး အန် ပီ ဂွန် အာရာင် အာမုဝ်တာကေ။

8 ဒေါ ကာလာင် ဂေ ဂြုဝ်း ခုန်ဒီခမ် တွိုန် တဲး ဒွန် အီ နပ်၊ န့ ဘော မိုဝ်း ဒီဘျာ ကိူန် ပီ တိုယ် ဂေ ဒီ ဟုဝ် ခုန်ဒီခမ် ခဲင် မိူင် ဆူဆာန်။ ဂေ ဘော ဒိုဝ်း ဟာဝ် ဘော နာင် အေဆာထာ၊ တဲး အန် ဇမ် ဒူင် ကွယ် ဟုဝ် တီ။ ဂေ ဘော အာပ် ဒွါ နာင် အေဆာထာ ဒီ ဒါ အီ အိုပ် ဇိုင် နာင် အီ စိူဝ် အာဟေကဲ။ 9 နာင် အေဆာထာ တွိုန် ဘော လဝ့် နဝ်း အာဟေကဲ အူ ဇေန့်။ အာဟေကဲ ဘော ဒိုဝ်း ဆီနမ် ဘဲန် မျုဝ် ဘဲန် မျုဝ် အီ တဲး နာင် အေဆာထာ စှိတ်။ အာဟေကဲ ဘော ဒွါ ပီ ဒီ စှိုပ် ပီ ဒီ တာ ဘဲန် မျုဝ် ဘဲန် မျုဝ် ဒီ အန်။ အန် ဘော စ်ု ဒီဘျာ ပေါ ဘူ ဝီ အီ ကွယ် ခဲင် ဟုဝ်၊ တဲး ဂေ ဘဲန် အီ လိုမ်လာ နာင် အေဆာထာ၊ တဲး ဂေ စွိုမ် ပီ ဒီ ဟူမ် အာဒါ အန်။ အန် ဘော တဲး နာင် အေဆာထာ ကွယ် ဒူင် မွှိုမ် လွှိုမ် အီ ဟဝ် ခဲင် ဇိုင် နာင် ခုန်ဒီခမ်။

10 နာင် အေဆာထာ ယီ တူ ကာလာင် အီ မုး ဘီနွင် ဝေါဝဲ အန်။ ခုဝ်၊ အာမုဝ်တာကေ ဟဲ့ ဒမ် အုန် အန်၊ အာဝ် လုဝ် ကာလာင်။ 11 ဒွန် ဆီငဲ အာမုဝ်တာကေ မိူဝ် တး နာ ရေတ့် ဝဲင် ဇိုင် နာင် တွိုန်၊ ချွင် ဒီ ယွတ် ယုဝ် နာင် အေဆာထာ ဟဲ့ ဒါခိုယ် အာဝ် ဒါခိုယ်၊ ယုဝ် ဂေ ဘူင် မာဆေ ဒီ အန်။

12 နာင် ဂေ တီ၊ အာတ့် ပွိုန် ဂေ ဒီ ဟာဝ် ဒူင် ကွယ် ခုန်ဒီခမ်၊ ဂေ လုဝ် ပီစှိတ် ဒုဝ် ဂေ အာဒါ ဂိုဝ် ဒီ အာ မာဂျီန်။ ဂေ လုဝ် ဖဝ်း နာမန် ဒဝ် မူရာ အာဒါ ဒဝ် မာဂျီန်။ ဟဲ့ ဟွတ့်၊ ဂေ လုဝ် ဝီ ဖဝ်း နာမန် အုး ငှုန် ဘော ဆီနမ် ဘဲန် မျုဝ် ဘဲန် မျုဝ် အာဒါ ဒဝ် မာဂျီန်။ ဟဲ့ ဟွတ့် နုဝ့် ခြာဝ် တီ၊ ဂေ အူ ဝီ အူ ဝီ ပွိုန် ဟာဝ် ဒူင် ကွယ် ခုန်ဒီခမ်။ 13 ဒေါ ဟာဝ် လိုပ် နာင် အူ ဝီ ဒူင် ကွယ် ခုန်ဒီခမ်၊ အန် ပွိုန် တူတ့် ဒွန် မျုဝ် ခဲ့ ပီ ဆီ လုဝ် အန်၊ တဲး အန် ပွိုန် ဒီ ဒိုဝ်း လေး ခဲင် ဇိုင် နာင်၊ ဝီ ဟာဝ် ဒီ ခုန်ဒီခမ်။ 14 အီ မှဝ် ဘော ဟာဝ် ဒူင် ကွယ် ခုန်ဒီခမ်၊ အန် လုဝ် ဟာဝ် ဘာ ဒီ အပ်၊ ဝီ တး ဆိန့်ဝး။ အန် ယီ တူ ပွိုန် ဝီ ဝေန့် ခဲင် ဒူင် ကွယ် ဘြိမ် အန်။ အန် လုဝ် ဝီ ဟာဝ် ကွယ် ဒူင် ကွယ် အီဘိုန့် ခုန်ဒီခမ် အီ မုး အီဘိုန့် တျီ့၊ တဲး ဒူအီ ဆး အီ စိူဝ် အာဆာကာစ ဝီ အိုပ် အန်။ ဆေ ခုန်ဒီခမ် ဒီ အိုင် ဝီ မှဝ်၊ အန် ဒီ ဝီ ဒဲ့ ဝီ တီ။ ဆေ ခုန်ဒီခမ် ယီ တူ ဒဲ့၊ အန် တူ ပွိုန် ဟာဝ်။

15 န့ ယီ မုး နာင် အေဆာထာ အီ မုး ဂွန် ဒိုဝ်း အာမုဝ်တာကေ၊ အီ မုး ဂွန် ဂုန့် တဲ့ အာမုဝ်တာကေ အီ စိူဝ် အာဖီဟေလာ။ ဒေါ ဟာဝ် အန် ဒူင် ကွယ် ခုန်ဒီခမ်၊ အန် တူ မှာန့် မာဆေ ဒဲင် ပီ ကာလာင် အာဟေကဲ အီ မုး ဒါ အီ အိုပ် ဂေ တွိုန်။ နာင် အေဆာထာ ဘော လဝ့် နဝ်း ဒွန် အီ အီ ယိုဝ် အန်။ 16 ဒေါ အိုပ် ခုန်ဒီခမ် အာဟာဆေရူ မိူင် အန် အာဒါ ဘူ ဆီနမ်၊ ဒေါ မုး မာဂျီန် ဂိုဝ် အီ စိူဝ် မာဂျီန် ဒေဘေတ်၊ ဂေ တိုယ် နာင် အေဆာထာ ဟာဝ် ဒူင် ကွယ် ခုန်ဒီခမ်။

17 ခုန်ဒီခမ် ဘော အိုင် နာင် အေဆာထာ လွှိုမ် ဂေ အီဘိုန့် အန် ဒွန် အီ။ အန် ဘော ရွက့် နာင် အေဆာထာ လွှိုမ် ဂေ ဒီဘျာ ဒွန် အီ။ ခုဝ်၊ အန် ဘော စှိုပ် မင်ဂိုမ် ဒီ ဂိန့် နာင် အေဆာထာ၊ တဲး အန် ဘဲန် နာင် ဟောခမ်၊ ဝီ ပ့လု နာင် ဝါဆာဒီ တွိုန်။

18 အန် ဘော ဝီ ဘူင် ဘ့လွယ် တာင်၊ တဲး န့ ဘဲန် ဘ့လွယ် နာင် အေဆာထာ။ အန် ဘော ဒဲ့ ဒါ ကာညာ ဂေ အာမူ အာမာတ် အန်။ အန် ဘော တဲး ဒွန် အီ ခဲင် မိူင် ဒွန် မိူင် ဒီလှဝ် ဆီငဲ တီ။ အန် ဘော ကာဆာင် ဘော ခေါဆွင် အီ ကာဒါန် ဒီ မုး အန် ခုန်ဒီခမ်။

19 ဂေ ဘော ဝီ ဒဲ့ ကာဇု ဂွန် ဒီဘျာ တွိုန် ပေါ အူ ဇေန့်။ ဒေါ အန် တီ အာမုဝ်တာကေ ဘော ဝီ တး ကွယ် ဘာင် မာလုဝ်း ဟုဝ် ခုန်ဒီခမ်။ 20 နာင် အေဆာထာ ညှမ် ဒွိုမ် တဲး အာဆေ နပ် ဘီနွင် ဝေါဝဲ အန်။ ခုဝ်၊ အာမုဝ်တာကေ ဟဲ့ ဒွိုမ် ဒမ် အုန် အန်။ အန် မိူဝ် ထူမ် ဆီချာ ဂြုဝ်း အာမုဝ်တာကေ၊ တဲး န့ ကော ပီ ဒေါ ဟျီင် အာမုဝ်တာကေ ဒီ အန်။

21 ဒေါ ဆီ တုတ့် အာမုဝ်တာကေ ဘာင် မာလုဝ်း ဟုဝ် ခုန်ဒီခမ်၊ န့ ဘော မိုဝ်း ဂါယ် အာ ဝီ၊ ဂါယ် စိူဝ် အာဘီကာဆန် ဂါယ် အာဒေရိတ်။ ဂါယ် မုး ဒူအီ ဆး အီ ဟဲ့ ဘဲန် ဒဲစေန့် ခုန်ဒီခမ် အီ ဘ်ု မာလုဝ်း။ ဂါယ် တီ ဘော ရူ ဒီ ခုန်ဒီခမ် အာဟာဆေရူ တွိုန်၊ ဘော ခြာမ် ဒီ ငဝ်း ယမ် အန်။

22 အာမုဝ်တာကေ ဟဲ့ နပ် လွင် အန် တီ၊ အန် ဘော ဝီ ကာလာင် တဲး ဘော နာင် အေဆာထာ နပ်။ နာင် အေဆာထာ ဘော ဝီ တဲး ဘော ခုန်ဒီခမ် နပ် လွင် အန် တီ၊ တဲး အန် ဘော နပ်၊ န့ မုး အာမုဝ်တာကေ အီ ဟဲ့ ကာလာင်။

23 ဂေ ဘော ဒီမွှတ် ဘော ဇဲတ် တဲး ဂေ နပ် ဆီချာ လွင် အန် တီ။ ဂေ ဟဲ့ ဟွတ့် နပ်၊ ဟဲ့ မှာန် အာခါခ်ု၊ ဂေ ဘော ပက် ဟွယ် မဲင် ဂါယ် ဒီ ရွင့် တဲး ဂါယ် ယမ်။ လွင် အန် တီ ဂေ ဘော ဒဲမ် အုန် ခဲင် ဘပ် လွင် ဘိူန် ခုန်ဒီခမ်၊ တဲး ဘော ခုန်ဒီခမ် ယိုဝ်။