1 ဝါယ် အန် တီ ခုန်ဒီခမ် အာဟာဆေရူ ဘော ဝီ ဒိုဝ်း အာဟာမာန် အီ မုး ဂွန် အာဟာမဲတာဆ၊ အီ မုး ဒူအီ အာမျုဝ် အာကာတ်၊ တဲး အန် တာင် လွှိုမ် ဂေ အာမူ အာမာတ် ဒွန် အီ။ 2 ခဲ့ ကွယ် ဂေ အီ မုး ဒဲစေန့် ခုန်ဒီခမ် အီ ကွယ် ခဲင် ဝဲင် ဟုဝ် တွိုန်၊ ဂေ ဒွန် အီ ကြိုပ် အာဟာမာန် ဒူပ် အာမိင် ပီ တဝ်း ခုန်ဒီခမ် ဒီ ဂေ။ အာမုဝ်တာကေ ယီ တူ ကြိုပ်၊ တူ ရုဝ်ဆေ အန်။

3 ပန် တီ ဂေ ဒဲစေန့် ခုန်ဒီခမ် ဂေ အီ ကွယ် ဘာင် မာလုဝ်း ဟုဝ် တွိုန်၊ ဂေ ဝီ ဒီမွှတ် အာမုဝ်တာကေ တဝ်း၊ “မှဝ် န့ ပါယ် ပီ လှိုဝ် မဲ အာမိင် ခုန်ဒီခမ်။း” 4 အန် တဝ်း ဒီ ဂေ၊ အန် မုး ဒူအီ အာယူဒါ။ ဂေ ပီ ဘော စ်ု အန် ကြိုပ် ဒွန် ဆီငဲ မိူဝ်၊ အန် ယီ တူ ကြိုပ်။ ဟဲ့ ဟွတ့်၊ ဂေ ဘော ဝီ ကာလာင် ဒီ အာဟာမာန် တဲး အန် နပ်၊ ယုဝ် အန် ဒီ ခမ် တူ ခမ် ပီ ဘူင် အာမုဝ်တာကေ ကူပ် မုး အန် ဒူအီ အာမျုဝ် ယူဒါ။

5 အာဟာမာန် ဘော နပ်၊ အာမုဝ်တာကေ တူ ဂူမ်၊ တူ ကြိုပ် အန်၊ အန် ဘော ရူ ကာဆဝ်။ 6 ဆေ အန် ဒီ မှေတ့် ငဝ်း ယမ် အာမုဝ်တာကေ အူ ဝီ၊ အာဝ် ဘြေ့ ဒီ နဝ်း အန်။ ကူပ် မုး အာမုဝ်တာကေ ဒူအီ အာယူဒါ၊ အန် ဘော ဟြေတ့် ပီ ဒီ ပါယ်၊ တဲး အန် ပွိုန် ဒီ ငဝ်း ဝဲန် တူတ့် ခဲ့ ကွယ် ဒူ အီ အာမျုဝ် ယူဒါ ခဲင် မာန် မိူင် ပီ အိုပ် ခုန်ဒီခမ် အာဟာဆေရူ ဒွန် ပ့လုဝ့်။

7 ခုန်ဒီခမ် အာဟာဆေရူ ဟဲ့ ဘဲန် ခုန်ဒီခမ် အာဒါ ဂိုဝ် ဒီ အာ ဆီနမ်၊ ဒေါ မုး မာဂျီန် ဒေါ ဂုဝ် အီ စိူဝ် မာဂျီန် နီဆန်၊ ဂေ ဘော ကာတာမ်၊ တဲး ဂေ နပ် ဆီငဲ ဒီ ပွိုန် ဒီ ငဝ်း ဂေ ဒူအီ အာယူဒါ။ ဘော အာဟာမာန် ဟဲ့ ယိုဝ် ဒူပ်။ န့ ဘော ငျာ မာဂျီန် ဂိုဝ် ဒီ ဟာအာ အီ စိူဝ် မာဂျီန် အာတာ။

8 ဝါယ် အန် တီ အာဟာမာန် ဝီ တဝ်း ဒီ ခုန်ဒီခမ် အာဟာဆေရူ၊ “န့ မိုဝ်း ဒူအီ အူ မျုဝ် အီ ကွယ် ဒွန် နာ ဒွန် ပ့လုဝ့် ခဲင် မိူင် ပီ အိုပ် မဲ၊ အီ ကွယ် ဒူပ် ဒူအီ ဒွန် မျုဝ်။ ထုင်ဂျာမ် ဂေ တူ ပီ ထုင်ဂျာမ် ဒူအီ အာမျုဝ် ဟဝ်။ ဂေ မိူဝ် တူ ထူမ် ထုင်ဂျာမ် ပီ ဆုင်ဖျာတ် အုန် မဲ ခုန်ဒီခမ်။ အာဝ် မိုဝ်း အာဂျိုဝ် ဒီ မဲ၊ ဆေ မဲ ခ့ဝါင် ဂေ ပါယ် တီ။ 9 ဆေ မဲ ခုန်ဒီခမ် ဖြူမ်၊ တဲး မဲ ဒဲမ် ပဲ့ အာမိင် ငဝ်း ဝဲန် တူတ့် ဒူအီ အာမျုဝ် တီ။ အုဝ် ဒီ ဒိုဝ်း ရွိုန် အူ မှိုန့် ထာလေန်၊ ဒွါ ဒီ မဲ ခုန်ဒီခမ်၊ တဲး ဂေ ဒဲစေန့် မဲ ပွိုန် ဒီ ဘူင် ဒူပ် အာမိင် မဲ တီ။” ^a

10 ခုန်ဒီခမ် ဘော ဘုတ့် ဆီကာနူ အီ မုး အီ ဒွက် ဇိုမ် အန်၊ ဒွါ ဒီ အာဟာမာန် အီ မုး ဂွန် အာဟာမဲတာဆ အီ မုး အာမျုဝ် ဒူအီ အာကာတ် အီ ဘဲန် ရန်ဆူ ဂေ ဒူအီ အာယူဒါ တွိုန်။ 11 ခုန်ဒီခမ် ဝီ တဝ်း ဒီ အန်၊ “ရွိုန် တီ၊ မဲ တူ လုဝ် ဒွါ။ ဘော ဒူအီ ဂေ တီ အုဝ် ဒီ အာပ် ဒီ မဲ၊ တဲး မဲ ဘူင် ပီ ဆီ ဘူင် မဲ။”

12 ဘော ဇမ် မာဂျီန် ဒေါ ဂုဝ်၊ ဇမ် ဆီငဲ ဂိုဝ် ဒီ ဟာအူယ်၊ အာဟာမာန် ဘော ဒဲ့ ဂေ ဒါ စာရေ ခုန်ဒီခမ် ဒွန် အီ၊ တဲး ဂေ ဒဲမ် အုန် ဂြုဝ်း ပီ ကာလာင် အန်။ ဂေ ဒဲမ် တဲး န့ လေး ခဲင် ဂြုဝ်း ဒွန် မျုဝ် ပီ ကာလာင် ဂေ ဒူအီ ဒွန် မိူင်။ ဂေ ဆီ တဲး ဂေ ဒါ ကာညာ အီ အိုပ် မိူင် ဘဲန် မိူင် ဘဲန် မိူင် ဘော ဂေ ဒါ တာင် ခဲင် ဒူအီ ဒွန် မျုဝ် နပ် ပီ ဒမ် အုန် အာဟာမာန်။ ပီ ဒဲမ် ဂေ၊ န့ ပီ ခုန်ဒီခမ် ဟဲ့ ဒဲမ် ရာင် အန်။ ဂေ မိူဝ် ဟဲ့ ဒွက် ဇိုမ် ခုန်ဒီခမ်။ 13 ဟဲ့ ဟွတ့်၊ ဂေ ဘော တဲး ဒါလာမ် တိုယ် ပဲ့ အာမိင် တီ၊ ဟာဝ် ဇမ် ဒွန် မာန် ဒွန် မိူင်၊ ဒွန် နာ ဒွန် ပ့လုဝ့်၊ တဝ်း တဲး ဂေ ငဝ်း ဝဲန် တူတ့် ခဲ့ ကွယ် ဒူအီ အာယူဒါ။ ဟီ ဇမ် မာဂျီန် ဂိုဝ် ဒီ ဟာအာ၊ အီ စိူဝ် မာဂျီန် အာတာ၊ ဟီ ဇမ် ဆီငဲ ဂိုဝ် ဒီ ဟာအူယ်၊ တဲး ဂေ ငဝ်း ဘော ဒူအီ ကတ်၊ ဒူအီ နှိုမ်၊ ဘော အီဘိုန့် ဂေ ဂွန်၊ တဲး ဂေ ဝီ ဒိုဝ်း ဘော ကြုဝ်ကြာမ် ဂေ။ 14 ပဲ့ အာမိင် တွိုန်၊ ဂေ ဘော ကာလာင် ဒီ ဒူအီ ဒွန် မျုဝ် ဒွန် မာန် ဒွန် မိူင်။ ဟီ ဇမ် ဆီငဲ တီ၊ တဲး ဂေ ရဲန် ဒုဝ် ဂေ။

15 ဂေ ဒါလာမ် အီ တိုယ် ပဲ့ တွိုန်၊ ဂေ ဘော ပီခြန် ဂေ ဒီ ဟာဝ် ကာလာင် ပီ တဝ်း ခုန်ဒီခမ် တွိုန် ဒွန် ပ့လုဝ့်။ တဲး ဘော ဂေ အီ ကွယ် ဒီ မိူင် ဆူဆာန် တွိုန် ဘော နပ် လွင် အန် တီ။ အီ မုး ခုန်ဒီခမ် ဂါယ် အာဟာမာန် ယီ ကွယ် ကာဒူပ် ဒျီင် အိုမ် မာငုန်။ ဂေ အီ ကွယ် ဒီ မိူင် ဆူဆာန် တွိုန်၊ ဂေ ယီ က့လိုဝ် ဘော ယုဝ်၊ တူ နပ် ပီ ဒီ ပါယ်။