1 ဟဲ့ ဟွတ့်၊ အာမုဝ်တာကေ ဘော ဝီ နပ် လွင် ပီ ခြာမ် ဂေ။ အန် ဘော ကာယာတ့် ခြိုင် တာ အန်၊ ဝီ စှိုပ် ဒီ တာ ခြိုင် စာန်၊ ဝီ ဒိုဝ်း ကာဝှါင် ဘြတ် ဒီ ဒုဝ် အန်။ အန် ဘော ဝီ ဟာဝ် ခဲင် မိူင် ဘော ယာမ် တာင် ဘော က့လိုဝ် ကာဆဝ်။ 2 အန် ဘော ဟာဝ် ဇမ် ဘာင် မာလုဝ်း ဟုဝ် ခုန်ဒီခမ်။ ကူပ် ဟဲ့ စှိုပ် အန် ခြိုင် စာန်၊ အာဝ် ဟူ ပွိုန် လိုပ် နာ ခဲင်။ 3 ပဲ့ အာမိင် ခုန်ဒီခမ် တွိုန် ဟဲ့ ဇမ် ဒွန် မိူင် ပီ အိုပ် အန်၊ န့ တဲး ဂေ ဒူအီ အာယူဒါ ဝီ က့လိုဝ် ဘော ယုဝ် ဘော ယာမ်။ ဂေ ကိူန် ဘော ယိူန် ပီ ဒီ ဟူမ်၊ ဘော စှိုပ် ခြိုင် စာန်၊ ကွယ် ခဲင် ကာဝှါင် ဘော ယာမ် တာင်။

4 ပန် တီ န့ ဘော မိုဝ်း ဒဲစေန့် နာင် အေဆာထာ ဘော ဒူအီ ဆး အီ အိုပ် ဇိူင် နာင်၊ ဂေ ဘော ကာလာင် တဲး နာင် အေဆာထာ နပ် လွင် အာမုဝ်တာကေ။ အန် ဘော နပ်၊ အာဝ် လဝ့် နဝ်း အန်။ အန် ဘော ဝီ ဒိုဝ်း ခြိုင် တိုယ် ဟာဝ်၊ တဲး အာမုဝ်တာကေ ကာပ့လု ဝဲန် ခြိုင် စာန် အန် တွိုန်။ အာမုဝ်တာကေ ယီ တူ လုဝ်။ 5 ဟဲ့ ဟွတ့် နာင် အေဆာထာ ဘော ဝီ ဒဲ့ အာဟာဒေက်၊ အီ မုး ဒူအီ ပဲ့ ဟဲ့ ဒွါ ခုန်ဒီခမ်၊ တဲး အန် ဘဲန် အီ ပီ ဆုတ့် ပီ စ်ု နာင်။ နာင် ဘော စ်ု အန် ဟာဝ် ဒီမွှတ် အာမုဝ်တာကေ၊ မှဝ် န့ ပါယ် ပီ ဘူင် အန် ပါယ် တီ။

6 အာဟာဒေက် ဘော ဟာဝ် ခဲင် မိူင်၊ ဇမ် ဒီ ဒူင် ဂ့လင် နာ အာတ့် မာလုဝ်း ဟုဝ် ခုန်ဒီခမ် ဒူင် ကွယ် အာမုဝ်တာကေ တွိုန်။ 7 အာမုဝ်တာကေ ဘော ကာလာင် တူတ့် ဒွန် မျုဝ် လွင် ပီ ဆီ ဘူင် ဂေ ဒီ အန် ဘော လွင် ရွိုန် ပဲ့ ဟဲ့ ကာဆဲန့် အာဟာမာန် ဒီ ဒွါ ဒီ ခုန်ဒီခမ်၊ တဲး အန် စ်ု အီ ငဝ်း ဝဲန် တူတ့် ခဲ့ ကွယ် ဒူအီ အာယူဒါ။ 8 အန် ဘော ဒိုဝ်း ပဲ့ အာမိင် ပီ ဒဲမ် ဂေ ဒီ မိူင် ဆူဆာန် အီ တဝ်း ဒီ ငဝ်း ဝဲန် ဂေ ဒူအီ အာယူဒါ။ အန် ဝီ တဲး အာဟာဒေက် ဒိုဝ်း ဒွါ ဒီ နာင်၊ တဲး နာင် ဝီ ဟာဝ် ကာလာင် ဒီ ခုန်ဒီခမ်၊ တဲး အန် ဝီ ကာဝေ ဒူအီ အာယူဒါ အီ မုး ဒူအီ အာမျုဝ် အန်။

9 အာဟာဒေက် ဘော ဝီ တး ကာလာင် ပီ တဝ်း အာမုဝ်တာကေ တီ။ 10 ပန် တီ နာင် အေဆာထာ ဘော ဝီ ကာလာင် ဒီ အာဟာဒေက် တဲး အန် ဝီ ဟာဝ် တဝ်း ဒီ အာမုဝ်တာကေ၊ 11 “ခဲ့ ကွယ် ဒဲစေန့် ခုန်ဒီခမ် ဘောကာဂ့လျီတ် ဘော ဒူအီ အီ ကွယ် ဒွန် မာန် ဒွန် မိူင်၊ ဂေ ဘောကာဂ့လျီတ် ဟဲ့ နပ် ဆီချာ၊ လွင် ဒါရာ ခုန်ဒီခမ်။ ဆေ န့ မိုဝ်း အီဘိုန့် အီမာယ် ပီ တူ ဒဲ့ ခုန်ဒီခမ် တး၊ အန် ယီ တး ဒူင် ကွယ် ခုန်ဒီခမ်၊ န့ မိုဝ်း မီ ဒါရာ အူ မျုဝ်။ ဒူအီ တီ လုဝ် ယမ်။ န့ မိုဝ်း မီ အူ မျုဝ် အီ တဲး ဒူအီ တီ လွတ် ယမ်။ ဆေ ခုန်ဒီခမ် ဒိုဝ်း လျီး ခြိဝ် အန်၊ ဆူင့် ဒီ ဒူအီ အီ တး၊ အာဝ် လုဝ် ယမ်။ အီ မုး အုဝ်၊ ခုန်ဒီခမ် တူ ဒဲ့ အုဝ်၊ ဟဲ့ နုဝ့် အူ မာဂျီန်။”

12 ဂေ ဘော ဝီ ဟာဝ် ကာလာင် ဒီ အာမုဝ်တာကေ ပီ တဝ်း နာင် တီ။ 13 အာမုဝ်တာကေ ဝီ တဲး ဂေ တဝ်း ဒီ နာင်၊ “ဆေ ဒူအီ အာယူဒါ ဘောကာဂ့လျီတ် လုဝ် ယမ်၊ မဲ ထာင်၊ ကူပ် ကွယ် မဲ ခဲင် ဟုဝ် ခုန်ဒီခမ်၊ မဲ ဒီ လွတ် ယမ်။း 14 ဆေ မဲ တူ တဝ်း မာဆေ ဒေါ တီ နီ၊ န့ ဒီ ဘော မိုဝ်း အီ ဟဝ် အီ ဒီ စွယ်၊ အီ ဒီ ချွတ် ဒူအီ အာယူဒါ။ မာလဲ၊ ဘော မဲ ဘော ခြိုဝ် ဂုန့် မာ မဲ၊ ဘေ ဒီ စှိုမ်။ အုဝ် ယီ ထာင်၊ မဲ ကွယ် ခဲင် ဟုဝ် နီ ဒေါ တီ နီ၊ တဲး မဲ ပွိုန် ဒီ စွယ်။”

15 နာင် အေဆာထာ ပီ ဝီ စ်ု ဂေ ဟာဝ် တဝ်း ဒီ အာမုဝ်တာကေ၊ 16 “တဲး မဲ ဟာဝ် ဒဲ့ ကာဇု ဂေ ဒူအီ အာယူဒါ ဘောကာဂ့လျီတ် အီ ကွယ် ခဲင် မိူင် ဆူဆာန်၊ တဲး ဘေ ယိူန် ပီ ဒီ ဟူမ် အာဒါ အုဝ်၊ တဲး ဘေ ဆာခိုဝ် ဒီ ဇဝ်ဖြာ ဒွင် ခိူန် ဒွင် ဝန် အာဒါ အူယ် ဆီငဲ။ ဘော အုဝ် ဘော ဂေ ဒဲစေန့် အုဝ် ယေ မိူဝ် ဒီ ယိူန် ပီ ဒီ ဟူမ် ပါယ် တီ။ ဟဲ့ ဟွတ့်၊ ခုန်ဒီခမ် ပီ ဆ ဒဲ့ အုဝ်၊ အုဝ် ဒီ ဟာဝ် ဒူင် ကွယ် အန်။ ဆေ အုဝ် ဘော လုဝ် ယမ်၊ အုဝ် ဟဲ့ ခမ်။”

17 ပန် တီ အာမုဝ်တာကေ ဘော ဟာဝ် ဘူင် ဒူပ် ပီ တဝ်း နာင် အေဆာထာ တီ။