1 ဝါယ် တီ အူယ် ဆီငဲ၊ နာင် အေဆာထာ ဘော စှိုပ် ခြိုင် နာင် ဟောခမ်၊ ဝီ လိုပ် ဟာဝ် ဒီ ဂ့လ ဟုဝ် ခုန်ဒီခမ်။ ခုန်ဒီခမ် မိူဝ် ဟဲ့ တုတ့် ဒဲင် မာလာင် ကာဆိူဝ် မာလုဝ်း ဟုဝ် အန်။ 2 အန် ဘော ယိုဝ် နာင် ဟောခမ် အေဆာထာ ဟဲ့ စွင့် ဒီ ဂ့လ ဟုဝ် အန်၊ န့ ဘော လဝ့် နဝ်း အန်။ အန် ဘော ဆူင့် လျီး ပီ ဂူင့် အန် ဘျ ဒီ နာင် အေဆာထာ။ နာင် ဘော ဟာဝ် ညိူဝ် ခုန်ဒီခမ်၊ ဘော ဒိုဝ် ကာဒဲ့ ဘ့လာ လျီး အန် တီ။

3 ခုန်ဒီခမ် ဝီ တဝ်း ဒီ နာင်၊ “အိုယ် နာင် ဟောခမ် အေဆာထာ၊ မာဆေ ပီ လုဝ် မဲ။း မဲ ဆီ မှာန့် မာဆေ။း ခဲ့ ပီ ဆီ မှာန့် မဲ၊ ဘော မုး မာန် မိူင် အာဒါ အူ ကာတဲ၊ အုဝ် ဒီ ဒွါ။”

4 နာင် အေဆာထာ ဝီ တဝ်း၊ “ဆေ မဲ ခုန်ဒီခမ် အိုင်၊ အုဝ် မှာန့်၊ တဲး ဘော မဲ ခုန်ဒီခမ် ဘော အာဟာမာန် တး ဒူင် ဘူင် အုဝ် ဘ့လွယ် ဟျီင် အာဒါ ဘာယ် ခုန်ဒီခမ်။ အုဝ် ဒဲစေန့် မဲ နီ ဟဲ့ ရဲန် အုန် ဘ့လွယ် တီ။”

5 ခုန်ဒီခမ် ဝီ စ်ု ဒဲစေန့် အန် တဝ်း၊ “တဲး ဘေ ဒဲ့ အာဟာမာန်၊ တဲး အန် တး ခြန် ခြန်၊ တဲး ယာယ် ဘူင် ဒူပ် ပီ တဝ်း နာင် တွိုန်။” ဟဲ့ ဟွတ့်၊ ခုန်ဒီခမ် ဂါယ် အာဟာမာန် ဘော ဟာဝ် ဒူင် ဘူင် နာင် ဘ့လွယ် တီ။ 6 ဒေါ ဒျီင် ဂေ အိုမ် မာငုန် ခဲင် ဘ့လွယ် တီ၊ ခုန်ဒီခမ် ဝီ တဝ်း ဒီ နာင်၊ “မဲ ဆီ ပွိုန် မာဆေ၊ အုဝ် ဒီ ဒွါ။ မဲ ဘော မှာန့် မာဆေ၊ ခဲ့ ပီ မှာန့် မဲ၊ ဘော မုး မာန် မိူင် အာဒါ အူ ကာတဲ၊ အုဝ် ဒီ ဒွါ။”

7 နာင် အေဆာထာ ဝီ တဝ်း၊ “ပီ ဆီ မှာန့် အုဝ် ဒဲစေန့် မဲ နီ၊ 8 ဆေ အုဝ် ဒဲစေန့် မဲ ဘော ဟဲ့ လဝ့် နဝ်း မဲ၊ ဆေ မဲ ခုန်ဒီခမ် ဟဲ့ မိုဝ်း နဝ်း ကာဝေ၊ ဟဲ့ မိုဝ်း နဝ်း ဆီ တဲး ခဲ့ ပီ လုဝ် ပီ မှာန့် အုဝ်၊ အုဝ် မှာန့် ဘော မဲ ဘော အာဟာမာန်၊ တဲး ဘာယ် ဝီ တး ဒီ ဘ့လွယ် အုဝ် ပေါ အူ ဇေန့်။ ခဲညှာ အုဝ် ဒီ ဝီ ရဲန် ဘ့လွယ် ပေါ အူ ဇေန့် အာဒါ မဲ ခုန်ဒီခမ်။ ပန် အန် တီ အုဝ် ဒီ ဝီ ကာလာင် လွင် ပဲ့ ဟဲ့ ဒီမွှတ် မဲ ဒီ အုဝ်”

9 ဆီငဲ တီ အာဟာမာန် ဘော ဝီ လေး ခဲင် ဟုဝ်၊ ဝေန့် ဒီ ကာင် အန်။ နဝ်း အန် မိူဝ် ဟဲ့ ဒါခိုယ် ကာဆဝ်။ အန် ဘော ဝီ ဟာဝ် ယိုဝ် အာမုဝ်တာကေ ဒီ ဘာင် မာလုဝ်း ဟုဝ် ခုန်ဒီခမ်။ အာမုဝ်တာကေ ယီ တူ ယိတ့် စွင့်၊ တူ ရုဝ်ဆေ အန်။ အန် ဘော ရူ ကာဆဝ် ဒီ အာမုဝ်တာကေ တီ။

10 အန် ယီ အူတ် ယီ ယိူန် နဝ်း ရူ အန်၊ ဝေန့် ဇမ် ခဲင် ကာင် အန်။ အန် ဘော ဒဲ့ အီဘိုန့် အန်၊ အီ စိူဝ် နာင် ဇေရိတ် ဘော ဂိုက် အန် တဲး ဂေ တး။ 11 အန် ဘော ခဲ ပီ ပါယ် အန် ဒီ မိုဝ်း အာဖုင်၊ ခဲ့ ကိူန် ကြုဝ်ကြာမ် အန်၊ ခဲ့ ကိူန် ဂွန် အန်၊ ခုန်ဒီခမ် မိူဝ် ဟဲ့ မျုက် အန်၊ တဲး အန် မိုဝ်း ပွုန် ဘဲန် မျုဝ် ဘဲန် မျုဝ်၊ တဲး အန် တာင် လွှိုမ် ဂေ အာမူ အာမာတ် ဘော ဂေ အီ မုး ဒဲစေန့် ခုန်ဒီခမ် ဒွန် အီ။ 12 ဒဲင် တီ၊ အန် ဘော ခဲ တဝ်း၊ “နာင် အေဆာထာ အီ မုး နာင် ဟောခမ်၊ ဒဲင် အုဝ်၊ အန် တူ တဲး အာဆေ ဟာဝ် ဒူပ် ခုန်ဒီခမ် ဒူင် ဘူင် အန် ဘ့လွယ်။ ခဲညှာ မိူဝ်၊ အန် ဝီ ဘာင် ဘော အုဝ် ဟာဝ် ဒူပ် ခုန်ဒီခမ်။ 13 မာလဲ၊ ဆေ အုဝ် ယီ ဆီ ယိုဝ် အာမုဝ်တာကေ အီ မုး ဒူအီ အာယူဒါ၊ ဆေ အန် ဆီ ကွယ် ဘာင် မာလုဝ်း ဟုဝ် ခုန်ဒီခမ်၊ နဝ်း အုဝ် တူ ဒါခိုယ် လွင် ပီ ကာလာင် အုဝ် ဒေါ တီ နီ။”

14 အန် ဟဲ့ ဟွတ့် တဝ်း ပါယ် တီ အီဘိုန့် အန် အီ စိူဝ် နာင် ဇေရိတ် ဘော ဂေ ဂိုက် အန် ဝီ တဝ်း၊ “စ်ု အီ ဆမ် ရွင့်၊ တဲး န့ စာ ဖန် ဂိုဝ် ကာနိး ဘော ပက် ဟွယ် မဲင် အန် ဒီ ရွင့် တီ။ ခဲညှာ၊ တဲး မဲ ကာလာင် ဒီ ခုန်ဒီခမ်၊ တဲး အန် ခ့ဝါင် ဂေ ပက် ဟွယ် မဲင် အာမုဝ်တာကေ ဒီ ရွင့် တီ။ ဟီ ဟွတ့်၊ တဲး မဲ ဝီ ဟာဝ် ဒူပ် ခုန်ဒီခမ် ဟူမ် ဘ့လွယ်၊ တဲး နဝ်း မဲ ဒါခိုယ်။” ဂြုဝ်း ပီ ကာလာင် ဂေ တွိုန် ဘော လဝ့် နဝ်း အန်။ အန် ဘော ဝီ စ်ု ဂေ ဆမ် ရွင့် တီ အူ ဇေန့်။