1 အာနေဟာမီ အီ မုး ဂွန် အာဟာခီ ဟဲ့ ခဲ ပါယ် နီ။

ဒေါ မုး မာဂျီန် ခီဆာလူ ဒေါ ဟဲ့ အိုပ် ခုန်ဒီခမ် အာတာစေရိတ် မိူင် ဘီရာဆီ အာဒါ အာ ဂိုဝ် ဆီနမ်၊ အုဝ် ဟဲ့ ကွယ် ခဲင် ဟုဝ် ခုန်ဒီခမ် ခဲင် မိူင် ဆူဆာန်။ 2 ဒေါ အန် တီ န့ မိုဝ်း ဝါ အုဝ် အူ ဝီ အီ စိူဝ် အာဟာနာနီ။ ဘော အန် ဘော အီ ဟဝ် မင် အီ ဟဲ့ တး ခဲင် ကာဒါယ် မိူင် ယူဒါ၊ ဝီ တး ဇမ် ဒူင် ကွယ် အုဝ်။ အုဝ် ဘော ဒီမွှတ် ဂေ လွင် မိူင် ယေရူဆာလဲမ် ဘော လွင် ဂေ ဘီနွင် အီ မုး ဒူအီ အာယူဒါ အီ ဟဲ့ လေး ခဲင် မိူင် ဘာဘဲ၊ ဝီ တး ဇမ် ဒူင် ကွယ် ဘြိမ် ဂေ။

3 ဂေ ဘော တဝ်း၊ “ဂေ ဒူအီ အီ ဟဲ့ ဝီ တး ဇမ် မိူင် ဘြိမ် ဂေ ဟဲ့ ကာဒုး ဒီ ခမ် ဒုက် တာင် ကာဆဝ် ကူပ် ဟဲ့ နဲန ဒူအီ ဟဝ် ဒီ ဂေ။ ရဲင် မိူင် ယေရူဆာလဲမ် မိူဝ် ဟဲ့ ဟွတ့် ကေး လိုဝ်၊ ကာပျာတ့် တူတ့်။ မာလုဝ်း မိူင် မိူဝ်၊ ငဝ် ဟဲ့ ဟွတ့် ကာဆိုမ်၊ ယီ ညှမ် ပွိုန် ဒီ ဝီ မ့ပြာယ်။”

4 အုဝ် ဘော ယိုဝ် ဂြုဝ်း ဂေ တီ၊ အုဝ် ဘော တုတ့် ယာမ် အူ ဇေန့်။ အုဝ် မိူဝ် ယာမ် ငှုန်၊ တူ ဟူမ် မာဆေ ဘဲန် ဆီငဲ ဘဲန် ဆီငဲ။ အုဝ် ဘော ဝီ ဆာခိုဝ် ဒီ ဇဝ်ဖြာ တဝ်း၊

5 “အိုယ် မဲ ဇဝ်ဖြာ အီ အိုပ် ဂါင်ဟြာဝ်၊ မဲ ဇဝ် ဘော မုး ဇဝ်ဖြာ အီ ဘွတ် မျာတ် ကာဆဝ်။ န့ ဟဲ့ ကာအာပ် ရုဝ်ဆေ မဲ ဇဝ်။ မဲ ဇဝ် မိူဝ် ဘူင် ဒူပ် ကာဒိက် ဆတ်ဇာ ပဲ့ ဟဲ့ ဒွါ မဲ ဒီ ဂေ အီ ရွက့် မဲ။ မဲ ဘော မိုဝ်း နဝ်း ကာဝေ ဂေ အီ ဒူပ် ဒါရာ မဲ ဇဝ်။ 6 အိုယ် မဲ ဇဝ်ဖြာ၊ အုဝ် မှာန့် တဲး မဲ ဇဝ် ယွတ် ယိုဝ် အုဝ်၊ တဲး မဲ ဘော ထူမ် ဂြုဝ်း ပီ မှာန့် အုဝ်။ အုဝ် ဟဲ့ ဆာခိုဝ် ဒီ မဲ ဇဝ် ဒွင် ခိူန် ဒွင် ဝန် ဒါင် ဒူအီ အီဆာရေလ အီ မုး ဒဲစေန့် မဲ ဇဝ်။ ယေ ဒူအီ အီဆာရေလ၊ ဘော အုဝ် ဘော ဂုန့် ဒင် အုဝ်၊ ယေ ဟဲ့ ဟွတ့် ဘူင် လုတ့် မဲ ဇဝ်။ 7 ပဲ့ ဟဲ့ ဘူင် လုတ့် ယေ ဒီ မဲ ဇဝ်ဖြာ ဟဲ့ ဟာယ် ကာဆဝ်။ ယေ မိူဝ် တူ ဒူပ် ဒါရာ ပီ ဒွါ အုန် မဲ ဇဝ် ဒီ ယေ။ ယေ မိူဝ် တူ ဒူပ် ပီ ဒမ် အုန် မဲ ဇဝ် ဘဲန် မျုဝ် ဘဲန် မျုဝ် ဒီ အာမုဝ်ဆဲ တွိုန် အီ မုး ဒဲစေန့် မဲ ဇဝ်။

8 ဒေါ တီ နီ အုဝ် မှာန့်၊ တဲး မဲ ဇဝ် ဝီ လှုဝ်း ဂြုဝ်း ကာဒိက် ဆတ်ဇာ ပီ ကာလာင် မဲ ဒီ အာမုဝ်ဆဲ တွိုန်။ မဲ ဇဝ် ဟဲ့ တဝ်း၊ ‘ဆေ ဘေ ဟီ လှိုဝ် ဟီ ဘ့လိူင် ဒါရာ အုဝ်၊ အုဝ် ဒီ တဲး ဘေ ကာယဝ်း ကာရေး ဟာဝ် ကွယ် ကာတဲ ဒူအီ အာမျုဝ် ဟဝ်။ 9 မာလဲ၊ ဆေ ဘေ ကော ဝီ တး ကြိုပ် အုဝ်၊ ဝီ ဘူင် ဒူပ် ဒါရာ အုဝ်၊ ဘေ ပီ ဘော ဟဲ့ ကာယဝ်း ကာရေး ဟာဝ် ကော ဇမ် ဒူင် ဆိူတ် ကာဒါယ် မိူဝ်၊ အုဝ် ပီ ဒီ ဝီ ဒိုဝ်း တး ဘေ၊ တဲး ဘေ ဇမ် ဒီ ဒူင် ပဲ့ ဟဲ့ ရဝ်း အုန် အုဝ်၊ တဲး န့ ဘဲန် ဒူင် ကွယ် အုဝ်။’

10 အိုယ် မဲ ဇဝ်ဖြာ၊ ဒူအီ ဂေ နီ၊ ဂေ ဘော မုး ဒဲစေန့် မဲ ဇဝ် ဘော မုး ဒူအီ ပီ အိုပ် မဲ ဇဝ်။ မဲ ဇဝ် ဟဲ့ တာ အာဖုင် ဒင်ခုဝ် မဲ ဘော ပွုန် တာင် မဲ၊ ဟဲ့ ထုတ် လေး ဂေ ဒီ ရန်ဆူ ဂေ။ 11 ဒေါ တီ နီ အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ်၊ ထူမ် ဘော ဂြုဝ်း ပီ ဆာခိုဝ် ဂေ အီ ရုဝ်ဆေ မဲ ဇဝ် ဆေဆေ။ ယေ ဘော မုး ဒူအီ အီ ဟဲ့ ဒါခိုယ် ဒီ ဘူင် ပီ အိုင် မဲ ဇဝ်။ အာတိုဝ် နီ ယေ မှာန့်၊ တဲး မဲ မွင့်ကာရာ ဒွါ နာ မွှိုမ် ဒီ ယေ၊ တဲး ခုန်ဒီခမ် မိုဝ်း နဝ်း ကာဝေ ယေ ဘော မိုဝ်း နဝ်း ဆီ ဂေဇူ ယေ။”

ဒေါ ဆာခိုဝ် အုဝ် ပါယ် တီ အုဝ် မုး ဒူအီ အီ လုဝ် ဂါပ် ဆီလယ့် အိုမ် မာငုန် ဒီ ခုန်ဒီခမ် တီ။