1 ဒေါ ဟဲ့ အိုပ် ခုန်ဒီခမ် အာတာစေရိတ် မာန် မိူင် အန် အာဒါ အာ ဂိုဝ် ဆီနမ် ဒေါ မုး မာဂျီန် နီဆန်၊ အုဝ် ဟဲ့ ဒိုဝ်း ဆီလယ့် အိုမ် မာငုန်၊ အာပ် ဒွါ ဒီ ခုန်ဒီခမ်။ အာတ့် အန် တီ၊ ခုန်ဒီခမ် မိူဝ် တူ ဒွိုမ် ယိုဝ် အုဝ် ဟဲ့ က့လိုဝ် ဟဲ့ ငှဝ် ခေါ အူ ဇေန့်။ 2 ခုဝ်၊ ခုန်ဒီခမ် ဝီ ဒီမွှတ် အုဝ် တဝ်း၊ “နာ မဲ ပီ ဆော မှူင် ကူပ် မာဆေ။း မဲ ယီ တူ ဆဝ်။ နှဲန် ဟဲ့ မိုဝ်း အီ ဒုက် အီ ညှာပ် ဒီ နဝ်း မဲ။”

3 အုဝ် ဘော ဝီ ကာပိုန့် ကာဆဝ်၊ ဘော ဝီ ကာလာင် ဒီ ခုန်ဒီခမ် တဝ်း၊ “တဲး မဲ ခုန်ဒီခမ် ကွယ် ဆေဆေ။ ဆေ အုဝ် ဟူ က့လိုဝ် ဟူ ငှဝ်၊ မှဝ် အုဝ် ဒီ ပါယ် ဒီ ကွယ်။း မိူင် ဘြိမ် ယေ ပဲ့ ဟဲ့ ဒိပ် ယေ ဒီ ဂုန့် ဒင် ယေ၊ န့ ဟဲ့ လိုဝ်၊ ဟဲ့ ဟွတ့် ရာမ်။ မာလုဝ်း မိူင် မိူဝ်၊ ငဝ် ဟဲ့ ဟွတ့် ကာဆိုမ် တူတ့်။”

4 ခုန်ဒီခမ် မိူဝ် ဝီ ဒီမွှတ် တဝ်း၊ “မာဆေ ပီ ဆီ မှာန့် မဲ။း” အုဝ် မိူဝ် ဝီ ဆာခိုဝ် ဒီ ဇဝ်ဖြာ အီ အိုပ် ဂါင်ဟြာဝ်။

5 အုဝ် ဘော ဝီ ကာလာင် ဒီ ခုန်ဒီခမ် တဝ်း၊ “ဆေ န့ ဘော မုး ပီ အိုင် မဲ ခုန်ဒီခမ်၊ တဲး မဲ ဂေဇူ အုဝ်။ အုဝ် မှာန့်၊ တဲး မဲ ခ့ဝါင် အုဝ် ဝေန့် ဒီ ကာဒါယ် မိူင် ယူဒါ အီ မုး ဒူင် ကွယ် ဘာရေဝ် ဂုန့် ဒင် ယေ၊ တဲး ယေ ဝီ ပွိုန် ဒီ ဝီ ဂုဝ် ဝီ မ့ပြာယ် မိူင် တီ။”

6 ဒေါ အန် တီ နာင် ဟောခမ် ယီ ကွယ် ရိုမ် ဒူပ် ခုန်ဒီခမ်။ ခုန်ဒီခမ် မိူဝ် တဝ်း ဒီ အုဝ်၊ “ဆေ မဲ ဟာဝ်၊ န့ ဒီ လှေန့် ခဲ့ မှဝ်။း ပန် မှဝ် မဲ ဒီ ဝီ တး။း” ခုန်ဒီခမ် ဟဲ့ မိုဝ်း နဝ်း ဆီ တိုယ် အုဝ် ဟာဝ်။ ခုဝ်၊ အုဝ် ဘော ကာလာင် ခဲ့ မှဝ် န့ ဒီ လှေန့်။

7 အုဝ် ပီ ဝီ မှာန့် ဒီ ခုန်ဒီခမ် တဝ်း၊ “ဆေ မဲ ခုန်ဒီခမ် ကော အိုင်၊ အုဝ် မှာန့် တဲး မဲ ဒွါ ပဲ့ အာမိင် ဒီ အုဝ်။ ဂေ ဒါ ကာညာ အီ အိုပ် မိူင် အီ ကွယ် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ်၊ ကွဲ့ တဲး ဂေ ပွိုန် ဒီ ခြဲ အုဝ်။ တဲး ဂေ စွယ် အုဝ်၊ တဲး အုဝ် ဟာဝ် ဇမ် ဆီချာ ဒီ ကာဒါယ် မိူင် ယူဒါ။ 8 တဲး မဲ ကာဝေ အုဝ်၊ ဝီ ဒွါ ပဲ့ ပေါ အူ ဖိူန် အာဒါ အာဆာပ် တွိုန် အီ မုး ဒါ ကာညာ အီ အိုပ် ဟေ ဂေ ပြဲ မဲ တွိုန်၊ တဲး အန် ဒွါ ဟေ ဒီ အုဝ်၊ တဲး အုဝ် ပွိုန် ဒီ ဘူင် မာနက် အီ ကွယ် ဒီ မာလုဝ်း ဟုဝ် တာင် အီ ကွယ် ခူပ် ဟုဝ် ဇဝ်ဖြာ။ တဲး အန် ဒွါ ဟေ ဘော အာဒါ ရဲင် မိူင် ဘော အာဒါ ကာင် အီ မုး ဒူင် ဒီ ကွယ် အုဝ်။” ပါယ် တီ ခုန်ဒီခမ် မိူဝ် ဒွါ ဒွန် မျုဝ် ခဲ့ ပီ မှာန့် အုဝ်။ ခုဝ်၊ ဇဝ်ဖြာ ဟဲ့ ဂေဇူ အုဝ်။ 9 ခုန်ဒီခမ် မိူဝ် စ်ု ဒါ ဆိုက် အီ အိုပ် ဘဲန် ဖိုင် ဘဲန် ဖိုင် ဘော ဒါ ဆိုက် အီ အိုပ် မင်ပြွင့်၊ တဲး ဂေ ဟာဝ် ဒူပ် အုဝ်။ အုဝ် မိူဝ် ဟာဝ် ဇမ် နာ ဂေတ့် ဆီငဲ အိုမ် ဘ့လဲင် အူဖာရာတ်။ အုဝ် မိူဝ် ဒိုဝ်း ပဲ့ အာမိင် ခုန်ဒီခမ် တာင် တွိုန် နှဲ ဒီ ဂေ ဒါ ကာညာ အီ အိုပ် မိူင်။

10 မာလဲ၊ အာဆန်ဘာလာတ် အီ တး ခဲင် မိူင် ဘေတ်ဟုဝ်ရူန် ဘော အာတောဖီယာ အီ မုး ဒါ တာင် ဂေ ဒူအီ အမ်မူန်၊ ဂါယ် ဘော ယိုဝ် လွင် ဟဲ့ မိုဝ်း ဒူအီ အူ ဝီ အီ ဒီ တး စွယ် ဒူအီ အီဆာရေလ၊ ဂါယ် တူ အိုင်၊ အာဝ် လဝ့် နဝ်း ဂါယ်။

11 အုဝ် ဟဲ့ ဟွတ့် တး ဇမ် ခဲင် မိူင် ယေရူဆာလဲမ် ဘော ကွယ် ပွိုန် အူယ် ဆီငဲ၊ 12 အုဝ် မိူဝ် ညှမ် ကာလာင် ဒီ အာဆေ လွင် ဇဝ်ဖြာ ဟဲ့ ကာဆုး နဝ်း အုဝ်၊ တဲး အုဝ် ဝီ ဘူင် ဝီ မ့ပြာယ် မိူင် ယေရူဆာလဲမ်။ အုဝ် မိူဝ် ဒဲ့ ဂေ အီ တး ဒူပ် အုဝ် မင် အီ၊ တဲး ဂေ ယိတ့် ကာတဲ ဆွိုမ်၊ တဲး ဂေ ဟာဝ် ဒူပ် အုဝ်။ န့ ယီ တူ မိုဝ်း ဒုဝ် ဆတ်ဒါဝါ အီ ဒူပ် အုဝ်။ န့ မိုဝ်း မီ မ့ပြွင့် ပီ ပဝ့် အုဝ်။

13 န့ ယီ ဆီ မုး ခဲင် မှိုဝ် ဒေါ လေး ဟာဝ် အုဝ် နာ ရေတ့် မိူင်။ အုဝ် ဟာဝ် ဒူပ် န့တေန့် အီ လေး ဒီ မာလုဝ်း ဒူပ် ဒီလယ့် ဘော ဟာဝ် ဒီ အိုမ် ခိုမ် အီ စိူဝ် အိုမ် ခိုမ် မာကြာယ်၊ ဘော ဝီ ဟာဝ် ဇမ် ဒီ မာလုဝ်း အီ စိူဝ် မာလုဝ်း အျီင် မက်။ ဒေါ ဟာဝ် ယေ တီ၊ အုဝ် ဆာခိ ဒီ ယွတ် ရဲင် မိူင် အီ ဟဲ့ ကေး ဟဲ့ လိုဝ် ဘော မာလုဝ်း မိူင် အီ ဟဲ့ ကာဆိုမ် ဒီ ငဝ်။ 14 ဟဲ့ ဟွတ့် ပါယ် တီ အုဝ် ဘော ဝီ ကာလုဝ်း ဟာဝ် ဇမ် ဒီ မာလုဝ်း အီ စိူဝ် မာလုဝ်း အိုမ် တုဝ်း ဘော ဒီ အိုမ် ဒိုင် ခုန်ဒီခမ်။ ဒူင် တီ အာဝ် ဟူ မိုဝ်း န့တေန့် အီ ဒီ ပွိုန် ဟာဝ် မ့ပြွင့်။ 15 ခုဝ်၊ အုဝ် ဘော ဝီ လူင်၊ ဝီ ဟာဝ် ခူပ် ဒီလယ့် အိုမ်၊ ဝီ ဟာဝ် ဒူပ် ရဲင် မိူင်။ ဟဲ့ ဟွတ့်၊ အုဝ် ဘော ဝီ ကာဘတ် ဝေန့်၊ ဝီ ဒူပ် န့တေန့် ဒူင် တး အုဝ် တွိုန်။ အုဝ် ဘော ဝီ လိုပ် ခဲင် မိူင်၊ လိုပ် ဒီ မာလုဝ်း အီ ကွယ် ဒူပ် ဒီလယ့် တွိုန်။ 16 ဂေ ဒါ ကာညာ အိုပ် မိူင်၊ အာဝ် မိုဝ်း အာဆေ အီ နပ် လွင် ဟာဝ် အုဝ် နာ မှဝ် ဘော ဟာဝ် ဘူင် မာဆေ။ အုဝ် မိူဝ် ညှမ် ကာလာင် လွင် အန် တီ ဒီ ဂေ ဘီနွင် အီ မုး ဒူအီ အာမျုဝ် အာယူဒါ ဘော ဒီ ဂေ ဒါ အီ လှူ ဒီ ဇဝ်ဖြာ၊ ဒီ ဂေ ဒါ တာင် အီ အိုပ် အီ ယဲတ့် ဂေ၊ ဒီ ဂေ အာမူ အာမာတ် ခုန်ဒီခမ် ဘော ဒီ ဂေ အီ ဒီ ဘတ် ဘူင် ဂါန် ဒီ တီ။ အာဝ် မိုဝ်း အာဆေ အီ ဟဲ့ နပ် လွင် ပီ ခြာမ် အုဝ် ဒီ ဘူင်။

17 ဝါယ် အန် တီ အုဝ် ဝီ တဝ်း ဒီ ဂေ၊ “ဘေ ယိုဝ်၊ ဟဲ့ ဒုက် ကာဆဝ် ဒီ အေ ကူပ် ဟဲ့ ရာမ် ဟဲ့ လိုဝ် မိူင် ယေရူဆာလဲမ် ဘော မာလုဝ်း မိူင်၊ ငဝ် ဟဲ့ ဟွတ့် ကာဆိုမ်။ တး၊ တဲး အေ ဝီ ဒဲ ဝီ မ့ပြာယ် မိူင် ယေရူဆာလဲမ်၊ ကွဲ့ တဲး အေ လုဝ် ဆာယ် အီ ဟဝ်။” 18 အုဝ် ပီ ဝီ ကာလာင် နှဲ ဒီ ဂေ ဘော လွင် ဇဝ်ဖြာ အီ ဟဲ့ ဂေဇူ အုဝ်၊ ဟဲ့ စွယ် အုဝ်။ အုဝ် ဘော ကာလာင် ဘော လွင် ခုန်ဒီခမ် တာင် အီ ဟဲ့ ဒွါ အာမိင် ဒီ အုဝ် တွိုန်။ ဂေ မိူဝ် ဝီ တဝ်း၊ “အိုဝ်၊ တဲး အေ ကာဖြူမ် ဒီ ဝီ ဂုဝ် ဝီ မ့ပြာယ် မိူင်။” ဟဲ့ ဟွတ့်၊ ဂေ ဘော ဝီ ကာစုး ဒီ ဘူင် ဂါန် အီ ဟဲ့ ဘွတ် ဟဲ့ မွှိုမ် တီ။

19 န့ ယီ မုး အာဆန်ဘာလာတ် အီ တး ခဲင် မိူင် ဘေတ်ဟုဝ်ရူန် ဘော အာတောဖီယာ အီ မုး ဒူအီ အာမျုဝ် အမ်မူန် ဘော အာဂေဆိမ် အီ မုး ဒူအီ အာမျုဝ် အာရာပ်။ ဂေ ဘော နပ် ဘော ယိုဝ် လွင် အန် တီ၊ ဂေ ဘော ဖျာက် ဘော ကာညး နဲန ယေ တဝ်း၊ “မာဆေ န့ မုး ပီ ဒီ ဘူင် ဘေ။း န့ ပီ ဘေ ခြာမ် ဒီ ဝီ ကာခဲန့် ဒီ ခုန်ဒီခမ်”

20 အုဝ် ယီ ဝီ တဝ်း ဒီ ဂေ၊ “ဇဝ်ဖြာ အီ အိုပ် ဂါင်ဟြာဝ်၊ အန် ဟဲ့ ခ့ဝါင် တဲး အုဝ် ဘူင်။ အန် ဒီ ဘော ဘူင် တဲး န့ ကော ဟွတ့်။ ပါယ် တီ ယေ အီ မုး ဒဲစေန့် အန် ဇဝ် တီ၊ ယေ ဒီ ဝီ စုး ဒီ ဝီ မ့ပြာယ် မိူင် တီ။ အီ မုး ဘေ၊ ဘေ ယီ တူ ပွိုန် တး မှာန့် မာဆေ၊ ကူပ် တူ မိုဝ်း ဘေ ပွုန် မာဆေ။ ဘေ မိူဝ် တူ မိုဝ်း ပီ ဒီ နမ်လှုဝ်း မာဆေ ခဲင် မိူင် နီ။”