1 ဒေါ မွိုန် ဇဝ်ဖြာ ဟဲ့ ဒွိုမ် ကာလာင် ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ။ ဝါယ် အန် တီ န့ ဘော ဇမ် အာခြာဝ် ဒေါ ဘဲန် အာဆာယ်ရတ် ခုန်ဒီခမ် အီ အိုပ် မိူင် ဘီရာဆီ။ ဒေါ မုး ဆီနမ် ဒေါ ဂုဝ် အန်၊ ခုန်ဒီခမ် အာဆာယ်ရတ် တီ ဟဲ့ ဒွါ အာမိင် လွင် ဒူအီ အီဆာရေလ တဲး ဂေ ဒူအီ ဘော မာန် ဘော မိူင် နပ်။ န့ ယီ မုး ဇဝ်ဖြာ အီ ဟဲ့ ကာဆုး နဝ်း ခုန်ဒီခမ်၊ တဲး အန် ဒွါ အာမိင် တီ၊ တဲး န့ ဘော ဒူပ် ပဲ့ ဟဲ့ ဒွိုမ် ကာလာင် အာယေရေမီ တွိုန်။ အာမိင် တီ ခုန်ဒီခမ် ဘော စ်ု ဒါ စာရေ အန်၊ တဲး ဂေ ဒဲမ် အုန်။

2 န့ တဝ်း၊ “ခုန်ဒီခမ် အာဆာယ်ရတ် အီ အိုပ် မိူင် ဘီရာဆီ၊ အန် ဟဲ့ ကာလာင် တဝ်း၊ ‘ဇဝ်ဖြာ အီ အိုပ် ဂါင်ဟြာဝ်၊ အန် ဟဲ့ ဒွါ ဒွန် မိူင် ဒဲင် ကာဒါယ် နီ၊ တဲး အုဝ် အိုပ်။ အန် ဇဝ် မိူဝ် ဟဲ့ ဝီ ဒမ် အုဝ်၊ တဲး အုဝ် ဆမ် ဟုဝ် အာဒါ အန် ဇဝ် ခဲင် မိူင် ယေရူဆာလဲမ် အီ ကွယ် ခဲင် မိူင် ယူဒါ။ 3 န့ ဘော မုး ဒူအီ ပီ အိုပ် ဇဝ်ဖြာ အီ ကွယ် ကာတဲ ဘေ နီ။ အုဝ် မှာန့်၊ တဲး ဇဝ်ဖြာ ပီ ကြိုပ် ဂေ ကွယ် ရိုမ် ဒူပ် ဂေ၊ တဲး ဂေ ဝီ ဝေန့် ခဲင် မိူင် ယေရူဆာလဲမ် အီ ကွယ် ခဲင် မိူင် ယူဒါ၊ တဲး ဂေ ဝီ ဝေန့် ဆမ် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။ အန် ဇဝ် ဘော မုး ဇဝ်ဖြာ အီ ကွယ် ခဲင် မိူင် ယေရူဆာလဲမ် တီ။ 4 ဂေ ဒူအီ အီဆာရေလ အီ ဆီ ကွယ်၊ ဂေ ဘော ကွယ် ဒီ မှဝ် အာဝ် တဝ်း၊ တဲး ဂေ ဒူအီ အီ ကွယ် ကာတတ် ဂေ တီ စွယ် ဂေ။ ဘော မုး ရွိုန်၊ ဘော မုး ခြိဝ်၊ ဘော မုး ကြုဝ်ကြာမ် ဘော ဒုဝ် ဆတ်ဒါဝါ၊ ဘော မုး ပီ ဆီ လှူ ဂေ ဘဲန် မျုဝ် ဘဲန် မျုဝ်၊ တဲး ဂေ လှူ၊ တဲး န့ စွယ် ဂေ ဒူအီ အီ ဝေန့် ဆမ် ဟုဝ် ဇဝ်ဖြာ ခဲင် မိူင် ယေရူဆာလဲမ် တီ။’” ခဲ့ တီ အာမိင် ပဲ့ ဟဲ့ ဒဲမ် ဒွါ ခုန်ဒီခမ် တွိုန်။

5 ဝါယ် အန် တီ ဂေ အီ မုး ဒါ တာင် ခဲင် ခြိုဝ် ဒူအီ အာယူဒါ ဘော ခဲင် ခြိုဝ် ဒူအီ အာဘေန်ယာမ် ဘော ဂေ ဒါ အီ လှူ ဒီ ဇဝ်ဖြာ အီ မုး ခြိုဝ် အာလေဝီ၊ ဂေ အီ မုး ဒူအီ ပီ ဆုတ့် ပီ စ်ု ဇဝ်ဖြာ ဘောကာဂ့လျီတ်၊ ဂေ ဘော ရဲန် ဒီ ဟာဝ် ဒီ မိူင် ယေရူဆာလဲမ်၊ တဲး ဂေ ပွိုန် ဒီ ဆမ် ဟုဝ် ဇဝ်ဖြာ။ 6 ဂေ ဒူအီ အီ ကွယ် ကာတတ် ဂေ ဒူအီ အီဆာရေလ တွိုန်၊ ဂေ ဘော လှူ ပီ ဆီ လှူ ဂေ ဘဲန် မျုဝ် ဘဲန် မျုဝ်။ ဂေ ပီ ဝီ ဒွါ ဘော ရွိုန် ဘော ခြိဝ် ဘော ဒုဝ် ဆတ်ဒါဝါ ဘော ကြုဝ်ကြာမ် ဂေ အီ မိုဝ်း ဒီ ငဝ်း ဒီ ခန်၊ ပီ ဝီ စွယ် ဂေ ဒူအီ အီဆာရေလ။ 7 ဒဲင် တီ၊ ခုန်ဒီခမ် အာဆာယ်ရတ် ပီ ဝီ ဒိုဝ်း လေး ဘော န့ကြိုဝ်း အီ ဟဲ့ ဒွိုမ် ကွယ် ခဲင် ဟုဝ် ဇဝ်ဖြာ။ ခုန်ဒီခမ် အာနေဘူခတ်နေစာ ဟဲ့ ဒွိုမ် ဒိုဝ်း လေး န့ကြိုဝ်း တီ ခဲင် မိူင် ယေရူဆာလဲမ်၊ ပီ ဝီ ဟပ် အုန် ခဲင် ဟုဝ် ဇဝ် ပီ ကြိုပ် အန်။ 8 ခုန်ဒီခမ် အာဆာယ်ရတ် အီ အိုပ် မိူင် ဘီရာဆီ တွိုန်၊ အန် ဘော ဝီ ကာလာင် ဒီ အာမီဆာရေခတ် အီ မုး ဒါ အီ ဘ်ု ကြုဝ် အီ မိုဝ်း ဒီ ငဝ်း ဒီ ခန်၊ တဲး အန် ဒိုဝ်း လေး တိး ဒီ ယွတ် န့ကြိုဝ်း ဂေ တီ၊ တဲး အန် ဝီ အာပ် ဒွါ ဒီ အာဆေဆာဘာစာ အီ မုး ဒါ ကာညာ အီ အိုပ် မိူင် ယူဒါ တွိုန်။

9 ဇာရာင် ကြုဝ် ဂေ တီ၊ န့ ပါယ် နီ။

ဖာန် ခြိဝ် န့ ကွယ် အူယ် ဂိုဝ် ဘူင့်။ ဖာန် ရွိုန်၊ န့ ကွယ် အူ ဟြဲန့် ဘူင့်။ အာတိုမ် အာ ဂိုဝ် ဒီ ဒိမ် ဘ့လ။

10 ဆီလယ့် ခြိဝ်၊ အူယ် ဂိုဝ် ဘူင့်။ ဆီလယ့် ရွိုန် ပေါ အူ မျုဝ် ဖွုန် မာယဝ်း ဒီ ဂိုဝ် ဘူင့်။ န့ကြိုဝ်း အာမျုဝ် ဟဝ် အူ ဟြဲန့် ဘူင့်။

11 န့ကြိုဝ်း ခြိဝ် ဂေ ရွိုန် ဘောကာဂ့လျီတ်၊ န့ ကွယ် ဖန် ဟြဲန့် ဒီ ဖွုန် မာယဝ်း ဘူင့်။ န့ကြိုဝ်း ဇိုဝ် တီ အာဆေဆာဘာစာ ဝီ ဒိုဝ်း တး ဒေါ ဝီ ယဲတ့် အန် ဂေ ဒူအီ အီဆာရေလ၊ တဲး ဂေ ဝီ တး ခဲင် မိူင် ယေရူဆာလဲမ်။ ဂေ မုး ဒူအီ ပဲ့ ဟဲ့ ဒွိုမ် မှေတ့် ဟာဝ် အာနေဘူခတ်နေစာ ဒီ မိူင် ဘာဘဲ တွိုန်။