1 ဂေ ဒူအီ အီ ဟဲ့ ဒွိုမ် ကွယ် ခဲင် မိူင် ယူဒါ အီ ဟဲ့ ဘဲန် ကာဒါယ် မိူင် ပီ အိုပ် ခုန်ဒီခမ် ခဲင် မိူင် ဘာဘဲ၊ ဂေ ဒူအီ ပဲ့ ဟဲ့ ဒွိုမ် မှေတ့် ဟာဝ် ခုန်ဒီခမ် အာနေဘူခတ်နေစာ အီ ကွယ် ခဲင် မိူင် ဘာဘဲ တွိုန်၊ ဂေ ဟဲ့ ဝီ တး ဇမ် ခဲင် မိူင် ယေရူဆာလဲမ် ဘော ခဲင် မိူင် ယူဒါ၊ ဂေ ဘော ဝီ ဟာဝ် ဒူင် ကွယ် ဘြိမ် ဂေ ဝီ မှဝ် ဝီ အန်။

2 ဂေ အီ ကာဒူပ် တး တီ၊ ဂေ ဟဲ့ ဒူပ် အာဇေရူဘာဘေန် ဘော အာယောဆူ၊ အာနေဟာမီ၊ အာဆေရာယာ၊ အာရေလာယာ၊ အာမုဝ်တာကေ၊ အာဘီဂါဝီ၊ အာမီဇာဘာ၊ အာဘီကာဝေ၊ အာရေဟုမ် ဘော အာဘာနာ။ ဒူအီ ဂေ တီ ဟဲ့ ယဲတ့် ဂေ ဒူအီ ဟဝ်။

ဇာရာင် ဂေ ဒူအီ အီဆာရေလ ဘောကာဂ့လျီတ် အီ ဟဲ့ ဝီ တး ခဲင် မိူင် ဂေ၊ န့ ပါယ် နီ။

3 ဂေ လှုက်လှာန် အာဘာရူတ် ဂေ ကွယ် အာ ဟြဲန့် ဒီ အူ မာယဝ်း ဒီ ဘူ ဂိုဝ် ဒီ အာ ဝီ။

4 ဂေ လှုက်လှာန် အာဆေဖာဒီ ဂေ ကွယ် အူယ် မာယဝ်း ဒီ ဘူ ဂိုဝ် ဒီ အာ ဝီ။

5 ဂေ လှုက်လှာန် အာရာဟာ ဂေ ကွယ် ဘူ မာယဝ်း ဒီ ဘူ ဂိုဝ် ဒီ ဖန် ဝီ။

6 ဂေ လှုက်လှာန် အာဘာဟာတ်မုဝ်အာပ် အီ မုး အာမျုဝ် အာယောဆူ ဂါယ် အာယောဖ ဂေ ကွယ် အာ ဟြဲန့် ဒီ ဒါ မာယဝ်း ဒီ ဂိုဝ် ဒီ အာ ဝီ။

7 ဂေ လှုက်လှာန် အာအေလမ် ဂေ ကွယ် အူ ဟြဲန့် ဒီ အာ မာယဝ်း ဒီ ဖန် ဂိုဝ် ဒီ ဖွုန် ဝီ။

8 ဂေ လှုက်လှာန် အာစာတု ဂေ ကွယ် ဒိမ် မာယဝ်း ဒီ ဖွုန် ဂိုဝ် ဒီ ဖန် ဝီ။

9 ဂေ လှုက်လှာန် အာစာခေ ဂေ ကွယ် ဘူ မာယဝ်း ဒီ ဒဝ် ဂိုဝ် ဝီ။

10 ဂေ လှုက်လှာန် အာဘာနီ ဂေ ကွယ် ဒဝ် မာယဝ်း ဒီ ဖွုန် ဂိုဝ် ဒီ အာ ဝီ။

11 ဂေ လှုက်လှာန် အာဘေဘေ ဂေ ကွယ် ဒဝ် မာယဝ်း ဒီ အာ ဂိုဝ် ဒီ အူယ် ဝီ။

12 ဂေ လှုက်လှာန် အာဇာကာတ် ဂေ ကွယ် အူ ဟြဲန့် ဒီ အာ မာယဝ်း ဒီ အာ ဂိုဝ် ဒီ အာ ဝီ။

13 ဂေ လှုက်လှာန် အာတောနီကမ် ဂေ ကွယ် ဒဝ် မာယဝ်း ဒီ ဒဝ် ဂိုဝ် ဒီ ဒဝ် ဝီ။

14 ဂေ လှုက်လှာန် အာဘီဂါဝီ ဂေ ကွယ် အာ ဟြဲန့် ဒီ ဖန် ဂိုဝ် ဒီ ဒဝ် ဝီ။

15 ဂေ လှုက်လှာန် အာတိန် ဂေ ကွယ် ဖွုန် မာယဝ်း ဒီ ဖန် ဂိုဝ် ဒီ ဖွုန် ဝီ။

16 ဂေ လှုက်လှာန် အာတ အီ မုး ခြိုဝ် အာဟေစကီ ဂေ ကွယ် ဒိမ် ဂိုဝ် ဒီ ဒါ ဝီ။

17 ဂေ လှုက်လှာန် အာဘေဇာ ဂေ ကွယ် အူယ် မာယဝ်း ဒီ အာ ဂိုဝ် ဒီ အူယ် ဝီ။

18 ဂေ လှုက်လှာန် အာယုဝ်ရာ ဂေ ကွယ် အူ မာယဝ်း ဒီ ဂိုဝ် ဒီ အာ ဝီ။

19 ဂေ လှုက်လှာန် အာဟာဆူမ် ဂေ ကွယ် အာ မာယဝ်း ဒီ အာ ဂိုဝ် ဒီ အူယ် ဝီ။

20 ဂေ လှုက်လှာန် အာဂီဘာ ဂေ ကွယ် ဒိမ် ဂိုဝ် ဒီ ဖန် ဝီ။

21 ဂေ ဒူအီ ခဲင် မိူင် ဘေတ်လဲမ်၊ ဂေ ကွယ် အူ မာယဝ်း ဒီ အာ ဂိုဝ် ဒီ အူယ် ဝီ။

22 ဂေ ဒူအီ ခဲင် မိူင် မေတောဖာ ဂေ ကွယ် ဖန် ဂိုဝ် ဒီ ဒဝ် ဝီ။

23 ဂေ ဒူအီ ခဲင် မိူင် အာနာထူတ် ဂေ ကွယ် အူ မာယဝ်း ဒီ အာ ဂိုဝ် ဒီ ဒါ ဝီ။

24 ဂေ ဒူအီ ခဲင် မိူင် အာဇာမာဝိတ် ဂေ ကွယ် ဖွုန် ဂိုဝ် ဒီ အာ ဝီ။

25 ဂေ ဒူအီ ခဲင် မိူင် ကီရီယာတ်ယာရိမ်၊ မိူင် ခေဖီရာ ဘော မိူင် ဘေရောဆီ ဂေ ကွယ် ဘူ မာယဝ်း ဒီ ဖွုန် ဂိုဝ် ဒီ အူယ် ဝီ။

26 ဂေ ဒူအီ ခဲင် မိူင် ရာမာ ဘော ဒူအီ ခဲင် မိူင် ဂီဘာ ဂေ ကွယ် ဒဝ် မာယဝ်း ဒီ အာ ဂိုဝ် ဒီ အူ ဝီ။

27 ဂေ ဒူအီ ခဲင် မိူင် မိက်မာတ် ဂေ ကွယ် အူ မာယဝ်း ဒီ အာ ဂိုဝ် ဒီ အာ ဝီ။

28 ဂေ ဒူအီ ခဲင် မိူင် ဘေဒါအေန် ဂါယ် မိူင် အာယီ ဂေ ကွယ် အာ မာယဝ်း ဒီ အာ ဂိုဝ် ဒီ အူယ် ဝီ။

29 ဂေ ဒူအီ ခဲင် မိူင် နေပေါ ဂေ ကွယ် ဖန် ဂိုဝ် ဒီ အာ ဝီ။

30 ဂေ ဒူအီ ခဲင် မိူင် မာဂါဘေတ် ဂေ ကွယ် အူ မာယဝ်း ဒီ ဖန် ဂိုဝ် ဒီ ဒဝ် ဝီ။

31 ဂေ ဒူအီ ခဲင် မိူင် အေလမ် ပေါ အူ မိူင် ဂေ ကွယ် အူ ဟြဲန့် ဒီ အာ မာယဝ်း ဒီ ဖန် ဂိုဝ် ဒီ ဖွုန် ဝီ။

32 ဂေ လှုက်လှာန် အာဟာရိမ် ဂေ ကွယ် အူယ် မာယဝ်း ဒီ အာ ဂိုဝ် ဝီ။

33 ဂေ ဒူအီ ခဲင် မိူင် လောတာ၊ မိူင် ဟာဒိတ် ဘော မိူင် အောနော ဂေ ကွယ် ဘူ မာယဝ်း ဒီ အာ ဂိုဝ် ဒီ ဖန် ဝီ။

34 ဂေ ဒူအီ ခဲင် မိူင် ယေရီခုဝ် ဂေ ကွယ် အူယ် မာယဝ်း ဒီ ဖွုန် ဂိုဝ် ဒီ ဖန် ဝီ။

35 ဂေ ဒူအီ ခဲင် မိူင် ဆေနာ ဂေ ကွယ် အူယ် ဟြဲန့် ဒီ ဒဝ် မာယဝ်း ဒီ အူယ် ဂိုဝ် ဝီ။

36 ဇာရာင် ဂေ ဒါ အီ လှူ ဒီ ဇဝ်ဖြာ န့ ပါယ် နီ။

အီ မုး လှုက်လှာန် အာယီတာယာ အီ တး ခဲင် ခြိုဝ် အာယောဆူ ဂေ ကွယ် ဒိမ် မာယဝ်း ဒီ ဘူ ဂိုဝ် ဒီ အူယ် ဝီ။

37 ဂေ မုး လှုက်လှာန် အာအီမေရာ ဂေ ကွယ် အူ ဟြဲန့် ဒီ ဖန် ဂိုဝ် ဒီ အာ ဝီ။

38 ဂေ လှုက်လှာန် အာဘာဆူရာ ဂေ ကွယ် အူ ဟြဲန့် ဒီ အာ မာယဝ်း ဒီ ဖွုန် ဂိုဝ် ဒီ ဘူ ဝီ။

39 ဂေ လှုက်လှာန် အာဟာရိမ် ဂေ ကွယ် အူ ဟြဲန့် ဒီ ဂိုဝ် ဒီ ဘူ ဝီ။

40 ဇာရာင် ဂေ ဒူအီ ခြိုဝ် အာလေဝီ အီ မုး ဂေ လှုက်လှာန် အာယောဆူ ဘော အာကာတာမေလာ အီ မုး လှုက်လှာန် အာဟုဝ်တာဝါ ဂေ ကွယ် ဘူ ဂိုဝ် ဒီ ဖွုန် ဝီ။

41 ဂေ ဒူအီ အီ နပ် ဒီ တဝ်း မှုဝ် အီ မုး လှုက်လှာန် အာဆာပ် ဂေ ကွယ် အူ မာယဝ်း ဒီ အာ ဂိုဝ် ဒီ ဒါ ဝီ။

42 ဂေ ဒူအီ အီ ဘ်ု ဘာင် မာလုဝ်း ခဲင် ဟုဝ် ဇဝ်ဖြာ အီ မုး လှုက်လှာန် အာဆာလူမ်၊ လှုက်လှာန် အာတာ၊ လှုက်လှာန် အာတာလာမူန်၊ လှုက်လှာန် အာအေခူပ်၊ လှုက်လှာန် အာဟာတီတာ ဘော လှုက်လှာန် အာဆောဘေ ဂေ ဘောကာဂ့လျီတ် ကွယ် အူ မာယဝ်း ဒီ အူယ် ဂိုဝ် ဒီ ဒိမ် ဝီ။

43 ဇာရာင် ဂေ ဒူအီ အီ ဘူင် ဂါန် ခဲင် ဟုဝ် ဇဝ်ဖြာ န့ ပါယ် နီ။

န့ မုး ဂေ လှုက်လှာန် အာဇီဟာ၊ လှုက်လှာန် အာဟာဆာဖာ၊ လှုက်လှာန် အာတာပွက်၊ 44 လှုက်လှာန် အာကေရူတ်၊ လှုက်လှာန် အာဆာယာဟာ၊ လှုက်လှာန် အာဘာဒူန်၊ 45 လှုက်လှာန် အာလေပါနာ၊ လှုက်လှာန် အာဟာကာဘာ၊ လှုက်လှာန် အာအေခူပ်၊

46 လှုက်လှာန် အာဟာကပ်၊ လှုက်လှာန် အာဆာလာမဲ၊ လှုက်လှာန် အာဟာနန်၊ 47 လှုက်လှာန် အာကိတ်ဒေလာ၊ လှုက်လှာန် အာကာဟာ၊ လှုက်လှာန် အာရာယာ၊

48 လှုက်လှာန် အာရေစီနာ၊ လှုက်လှာန် အာနေကောတာ၊ လှုက်လှာန် အာကီစပ်၊ 49 လှုက်လှာန် အာအူဇာ၊ လှုက်လှာန် အာဖာဆေယာ၊ လှုက်လှာန် အာဘေဆေ၊ 50 လှုက်လှာန် အာဆာနာ၊ လှုက်လှာန် အာမာဟာနိမ်၊ လှုက်လှာန် အာနာပူဆီ၊ 51 လှုက်လှာန် အာဘာကာဘုဝ်၊ လှုက်လှာန် အာဟာကူဖာ၊ လှုက်လှာန် အာဟာရူယာ၊ 52 လှုက်လှာန် အာဘာဇာလိတ်၊ လှုက်လှာန် အာမာဟီတ၊ လှုက်လှာန် အာဟာရဆာ၊ 53 လှုက်လှာန် အာဘာကူတ်၊ လှုက်လှာန် အာဆီဆာလ၊ လှုက်လှာန် အာထာမာ၊ 54 လှုက်လှာန် အာနေစီ ဘော လှုက်လှာန် အာဟာတီဖာ။

55 ဇာရာင် လှုက်လှာန် ဂေ ဒူအီ အီ မုး မှာယ် ခုန်ဒီခမ် အာဆာလုဝ်မုဝ် တွိုန် န့ ပါယ် နီ။

န့ ဘော မုး လှုက်လှာန် အာဆောဒေ၊ ဘော လှုက်လှာန် အာဆောဖီရာတ်၊ လှုက်လှာန် အာဘေရူတာ။ 56 ဂေ လှုက်လှာန် အာယာလာ၊ လှုက်လှာန် အာဒါခူန်၊ လှုက်လှာန် အာကိတ်ဒေလာ၊ 57 ဂေ လှုက်လှာန် အာဆေဖာဒီ၊ လှုက်လှာန် အာဟာထီလာ၊ လှုက်လှာန် အာဖောခိတ် အီ တး ခဲင် မိူင် ဇေဘိမ်၊ လှုက်လှာန် အာမိန်။

58 ဂေ ဒူအီ အီ ဘူင် ဂါန် ခဲင် ဟုဝ် ဇဝ်ဖြာ ဘော လှုက်လှာန် ဂေ၊ ဂေ အီ မုး ဒဲစေန့် ခုန်ဒီခမ် အာဆာလုဝ်မုဝ်၊ ဂေ ဘောကာဂ့လျီတ် ကွယ် အူယ် မာယဝ်း ဒီ ဒိမ် ဂိုဝ် ဒီ အာ ဝီ။

59 ဂေ အီ ဟဲ့ တး ခဲင် မိူင် တေလမဲလာ ဘော ခဲင် မိူင် တေလဟာဆာ၊ ခဲင် မိူင် ဒေရာပ်၊ မိူင် အတ်တာန် ဘော မိူင် အီမေရာ။ ဂေ ယီ တူ ပွိုန် ဘျ မာဆေ အီ တဲး န့ လိုဝ်း ဆီချာ လွင် မုး ဂေ ဒူအီ အီဆာရေလ။

60 န့ ပီ ဝီ မိုဝ်း ဒူအီ အာဒါ ဒဝ် မာယဝ်း ဒီ ဖန် ဂိုဝ် ဒီ အာ ဝီ အီ မုး လှုက်လှာန် အာဒေလာယာ၊ လှုက်လှာန် အာတောဖီယာ ဘော လှုက်လှာန် အာနေကောတာ။

61 ခြိုဝ် ဂေ ဒါ အီ လှူ ဒီ ဇဝ်ဖြာ အီ တူ နပ် ဒီ ကာလာင် အာဆေ မုး ဂုန့် ဒင် ဂေ၊ န့ ဘော မုး လှုက်လှာန် အာဟာဘာယာ၊ လှုက်လှာန် အာဟာခူတ် ဘော လှုက်လှာန် အာဘာစီ။ အာဘာစီ တီ ဟဲ့ ဒွိုမ် ဒိုဝ်း အီဘိုန့် အီ မုး ဂွန် အာဘာစီ အီ ကွယ် ခဲင် မိူင် ဂီလေအာတ်။ အန် ဘော ဒိုဝ်း စိူဝ် ဒူပ် ခြိုဝ် ဘိုဝ် အန် တီ။ 62 ဒူအီ ဂေ တီ ဂေ ဟြေတ့် စိူဝ် ဂုန့် ဒင် ဂေ ခဲင် ဇာရာင် ဒူအီ အီဆာရေလ၊ ယီ တူ ယိုဝ်။ ခုဝ်၊ ဂေ တူ ပွိုန် ဘဲန် ဒါ အီ လှူ ဒီ ဇဝ်ဖြာ။ ဂေ တူ ဆီငါ ဒူပ် ပီ ဒမ် ဒါရာ။

63 ဒါ ကာညာ အီ အိုပ် မိူင် ယူဒါ ဟဲ့ ဆုင်ဖျာတ် တဝ်း၊ “ကွဲ့ တဲး ဒါ အီ လှူ ဒီ ဇဝ်ဖြာ ဟူမ် အီ ဘွတ် ပဲ့ ဟဲ့ ဟွတ့် လှူ ဒီ ဇဝ်ဖြာ။ တဲး အေ နှဝ့် ဒါ အီ လှူ ဒီ ဇဝ်ဖြာ တး အီ မိုဝ်း ဒီ ဂူင့် အူရိမ် ဂါယ် ထူမိမ်၊ အီ ပွိုန် ဒီ ဆုင်ဖျာတ် ဒီ ယွတ် လွင် အန် တီ။”

64 ဂေ ဒူအီ အီ ဟဲ့ ဝီ တး ခဲင် မိူင် ဂေ၊ ဂေ ဘောကာဂ့လျီတ် ကွယ် ဖွုန် မှိုန့် ဒီ အာ ဟြဲန့် ဒီ အူယ် မာယဝ်း ဒီ ဒဝ် ဂိုဝ် ဝီ။ 65 အီ မုး မှာယ် အီ ဟဝ် ဘော အီဘိုန့် ဘော အီမာယ် ဂေ ကွယ် ဘော ဘူ ဟြဲန့် ဒီ အူယ် မာယဝ်း ဒီ အူယ် ဂိုဝ် ဒီ ဘူ ဝီ။ ဒူအီ အီ နပ် ဒီ တဝ်း မှုဝ် ဘော အီဘိုန့် ဘော အီမာယ် ဂေ ဘော ကွယ် အာ မာယဝ်း ဝီ။ 66 မင်ပြွင့် ဂေ ဘော မိုဝ်း ဘူ မာယဝ်း ဒီ အူယ် ဂိုဝ် ဒီ ဒဝ် ဒုဝ်။ ဘော မာလုဝ် အာ မာယဝ်း ဒီ ဖွုန် ဂိုဝ် ဒီ ဖန် ဒုဝ်။ 67 မင်ပြွင့် ကာဟာတ့် ဂေ ဘော မိုဝ်း ဖွုန် မာယဝ်း ဒီ အူယ် ဂိုဝ် ဒီ ဖန် ဒုဝ်။ မာလာ ဂေ ဘော မိုဝ်း ဒဝ် ဟြဲန့် ဒီ ဘူ မာယဝ်း ဒီ အာ ဂိုဝ် ဒုဝ်။

68 ဂေ ဒူအီ ဘောကာဂ့လျီတ် ဒေါ ဟဲ့ ဟွတ့် ဝီ တး ဇမ် တူတ့် ဂေ ဒူင် ကွယ် ဟုဝ် ဇဝ်ဖြာ ခဲင် မိူင် ယေရူဆာလဲမ် တွိုန်၊ ဂေ ဂိန့် န့ဟူမ် မင် အီ၊ ဂေ ဘော ဝီ မိုဝ်း နဝ်း ဆီ လှူ ဆီ ဒါန်၊ တဲး ဂေ ဝီ ပွိုန် ဒီ ဝီ ဆမ် ဟုဝ် ဇဝ်ဖြာ ဒူင် ကွယ် ဘြိမ် အန် တွိုန်။ 69 ဂေ ဘော လှူ ခဲ့ ပွိုန် ဂေ လှူ။ ဂေ ဘော ဒိုဝ်း ခြိဝ် ဒဝ် မှိုန့် ဒီ အူ ဟြဲန့် ကျာပ်၊ ဘော ရွိုန် ဖန် ဟြဲန့် မီနာ^a ဘော ဆီတုဝ် တုန် ပီ တာ ဒါ အီ လှူ ဒီ ဇဝ်ဖြာ အူ မာယဝ်း ဖိူန်။ ဂေ ဝီ ဒိုဝ်း တူတ့် ကြုဝ် တီ၊ ဝီ လှူ ဟပ် ခဲင် ဇီဒိူက် ဒူင် ဘ့လေး အုန် ဂေ ပီ ဒီ လှူ တွိုန်။

70 ဝါယ် အန် တီ ဒါ အီ လှူ ဒီ ဇဝ်ဖြာ အီ မုး ခြိုဝ် အာလေဝီ ဘော ဂေ အီ တဝ်း မှုဝ်၊ ဂေ အီ ဘ်ု မာလုဝ်း ဟုဝ် ဇဝ်ဖြာ ဘော ဂေ ဒူအီ အီ ဘူင် ဂါန် ခဲင် ဟုဝ် ဇဝ်ဖြာ ဂေ ဘောကာဂ့လျီတ် ဝီ ဟာဝ် ကွယ် ခဲင် ရဝ် ခဲင် မိူင် ဂုန့် ဒင် ဂေ အူ ဆိန့် အာတ့် နီ။ ဂေ ဒူပ် ဒူအီ ခဲင် ရဝ် ခဲင် မိူင် ဂေ တီ ဘော ဂေ ဒူအီ အီဆာရေလ ဒွန် အီ အီ ဟာဝ် ခဲင် မိူင် ဂေ၊ ရာင် အာဆေ ရာင် အန်။