1 ဝါယ် အန် တီ ဂေ ဒူအီ အီဆာရေလ မိူဝ် ဟဲ့ ကွယ် ဆီချာ ခဲင် မာန် မိူင် ဂေ တီ။ န့ ဘော ဇမ် မာဂျီန် မ့ဘူ၊ ခဲ့ ကွယ် ဂေ ဘောကာဂ့လျီတ် ဂေ ဟဲ့ ဘဲန် အူ နဝ်း အူ ဖွိုမ် ဘော ဝီ တး ကာဇု ဒီ မိူင် ယေရူဆာလဲမ်။ 2 ဒေါ အန် တီ အာယောဆူ အီ မုး ဂွန် အာယောဇာဒက် ဘော ဂေ အီ မုး ဒါ အီ လှူ ဒီ ဇဝ်ဖြာ အီ ဘူင် ရိုမ် ဂါန် ဒူပ် အန် ဘော အာဇေရူဘာဘေန် အီ မုး ဂွန် အာဆေထီအေန် ဘော ဂေ ဘီနွင် အန် ဘော ကာဖြူမ် ဒီ ဘူင် ကာစှူင့် လှူ။ န့ မုး ကာစှူင့် လှူ ဂေ ဒီ ဇဝ်ဖြာ ပီ ကြိုပ် ဂေ ဒူအီ အီဆာရေလ။ ဂေ ဘူင် ကာစှူင့် တီ၊ တဲး ဂေ ပွိုန် ဒီ လှူ ပီ ဒီ လှူ အီ ဒုဝ့် ဒီ ငဝ် ဒဲင် ကာစှူင့် တီ၊ တဲး န့ ဘော ဒူပ် ခဲ့ ပီ ဒဲမ် အုန် အာမုဝ်ဆဲ အီ မုး ဒူအီ ပီ အိုပ် ဇဝ်ဖြာ တွိုန်။ 3 ဂေ ပီ ဘော ယုဝ် ဒူအီ ဟဝ် အီ ကွယ် ခဲင် မိူင် တီ ဒွန် နာ ဒွန် ပ့လုဝ့် မိူဝ်၊ ဂေ ယီ ဝီ ဆမ် ကာစှူင့် လှူ ဒဲင် ဒူင် ဘြိမ် တွိုန်။ ဂေ ဘော ဒိုဝ်း ပီ ဒီ လှူ အီ ဒုဝ့် ဒီ ငဝ်၊ ဝီ လှူ ဒီ ဇဝ်ဖြာ ဆေဆေ ဒွန် မှိုဝ် ဒွန် ညှာ။ 4 ဂေ ဘော ဘူင် ဘ့လွယ် လုဝ် ကွယ် ခဲင် ထိုပ်၊ တဲး န့ ဘော ဒူပ် ပဲ့ ဟဲ့ ဒဲမ် အုန် ခဲင် ဘပ် ဇဝ်ဖြာ။ ဂေ ဘော ဘူင် ဘ့လွယ် တီ ဘော လှူ ပီ ဒီ လုဝ် ဂေ လှူ ဒွန် ဆီငဲ ဒွန် ဆီငဲ။ 5 ဝါယ် အန် တီ ဂေ ဘော ဝီ လှူ ဒုဝ် ပီ လုဝ် လှူ အီ ဒုဝ့် ဒီ ငဝ် ဆေဆေ။ ဂေ ဘော လှူ ဘော ပီ လုဝ် လှူ ဒေါ ဇမ် ဆီငဲ မာဂျီန် ကာမာယ်။ ဂေ ဘော ဘူင် ဘော ဘ့လွယ် ဒွန် မျုဝ် ပီ ဒမ် အုန် ဇဝ်ဖြာ ဒီ ဂေ။ ဂေ လှူ ဘော ပီ ဆီ လှူ ဒူအီ ရာင် အာဆေ ရာင် အန်။ ဂေ ဘော ဒိုဝ်း တး တူတ့် ဇိုဝ် တီ၊ လှူ ဒီ ဇဝ်ဖြာ။ 6 ဂေ ပီ ဘော ညှမ် ပွိုန် ဒီ ဆမ် စေန့် ရွင့် ဟုဝ် ဇဝ်ဖြာ မိူဝ်၊ ဂေ ယီ ဝီ စုး ဒီ လှူ ပီ ဒီ လှူ အီ ဒုဝ့် ဒီ ငဝ်။ ဒေါ ဇမ် မာဂျီန် မ့ဘူ ဆီငဲ လှေး၊ ဂေ စုး ဒီ လှူ ပါယ် တီ။

7 ဂေ ဘော ဒိုဝ်း ရွိုန်၊ ဒွါ ဒီ ဂေ ဒူအီ အီ နပ် ဒီ ဂုဝ် မာအုတ် ဘော ဒီ ဂေ အီ မုး လက်ဆာမာ။ ဂေ ဒိုဝ်း ဘော ပီ ဒီ ဟူမ် ပီ ဒီ ဒျီင် ဘော နာမန်၊ ဒွါ ဒီ ဂေ ဒူအီ ခဲင် မိူင် ဆီဒူန် ဂါယ် မိူင် ထူရုဝ်၊ တဲး ဂေ ဒိုဝ်း ဟေ အာရိတ်။ ဂေ ဘော လုဝ် ဟုဝ့် ဒဲင် နွန် လေဘာနုန်၊ ဝီ ဒိုဝ်း လူင် ဟေ တီ၊ တဲး န့ လှဲ ဒူပ် အိုမ် နမ်မုက်ဆာရာ၊ ဝီ ဇမ် ဘာင် အိုမ် ဒီ မိူင် ယုဝ်ဖာ။ ခုန်ဒီခမ် အာဆာယ်ရတ် အီ အိုပ် မိူင် ဘီရာဆီ တွိုန်၊ အန် ဟဲ့ ဟွတ့် ခ့ဝါင် ဂေ ဘူင် ပါယ် တီ။

8 ဝါယ် ဟဲ့ ဟွတ့် တး ဇမ် ဂေ ဒူင် ကွယ် ဟုဝ် ဇဝ်ဖြာ အီ ကွယ် ခဲင် မိူင် ယေရူဆာလဲမ် တွိုန်၊ န့ ဘော ဝီ ဇမ် ပန် နာ ဒီ တး ဒေါ မုး မာဂျီန် ဟာအာ။ ဒေါ အန် တီ အာဇေရူဘာဘေန် အီ မုး ဂွန် အာဆေထီအေန် ဘော အာယောဆူ အီ မုး ဂွန် အာယောဇာဒက် ဘော ဂေ ဘီနွင် အီ မုး ဒါ အီ လှူ ဒီ ဇဝ်ဖြာ ဘော ဂေ ဒူအီ ခြိုဝ် အာလေဝီ၊ ဂေ ဒူအီ အီ ဟဲ့ လေး ခဲင် မိူင် ဘာဘဲ၊ အီ ဟဲ့ ဝီ တး ဇမ် ခဲင် မိူင် ယေရူဆာလဲမ် တွိုန်၊ ဂေ ဘောကာဂ့လျီတ် စုး ဒီ ဝီ ဆမ် ဟုဝ် ဇဝ်ဖြာ။ ဂေ ဘော ဒါင် တဲး ဒူအီ ခြိုဝ် အာလေဝီ ဘဲန် ဒူအီ အီ အိုပ် အီ ယွတ် ဂါန် ပီ ဒီ ပါယ် ဒီ ဝီ ဆမ် ဟုဝ် ဇဝ်ဖြာ တီ။ ဒွန် အီ အာဆာက် အီ ဟဲ့ နုဝ့် အာ ဂိုဝ် ဆီနမ် ဟုဝ့် နာ ဒဲင် ဟဲ့ ဘဲန် ဒူအီ အီ ယဲတ့် ဂါန် တီ။ 9 ဒေါ အန် တီ အာယောဆူ ဂေ ဂွန် အီမာယ် အန် ဘော ဂေ ဘီနွင် ဝေါဝဲ အန် ဘော အာကာတာမေလာ ဘော ဂွန် အီမာယ် အန်၊ ဂေ အီ မုး လှုက်လှာန် အာဟုဝ်တောဝါ ဘော ဂေ ဂွန် အာဟေနာတ ဘော ဂွန် ဂေ ဘော ဘီနွင် ဝေါဝဲ ဂေ အီ မုး ဒူအီ ခြိုဝ် အာလေဝီ တွိုန်၊ ဒူအီ ဂေ တီ ဘော ဘဲန် ဒူအီ အီ အိုပ် အီ ယွတ် ဂေ ဒူအီ အီ ဆမ် ဟုဝ် ဇဝ်ဖြာ တွိုန်။

10 ဒူအီ အီ ဘူင် ဟုဝ် ဇဝ်ဖြာ ဂေ တီ ဒေါ ဟဲ့ ဟွတ့် ဂေ ဆမ် စေန့် ရွင့်၊ ဂေ ဒါ အီ လှူ ဒီ ဇဝ်ဖြာ မိူဝ် စှိုပ် ခြိုင် ပီ တာ ဒါ အီ လှူ ဒီ ဇဝ်ဖြာ၊ ဂေ ဂူင့် ဘော ဝဝ် နိုင် ပဲ။ ဂေ ဒူအီ ခဲင် ခြိုဝ် အာလေဝီ အီ မုး လှုက်လှာန် အာဆာပ်၊ ဂေ ဘော ဂူင့် စှဲန့်၊ စွင့် ဒူင် လုဝ် စွင့် ဂေ ရာင် အာဆေ ရာင် အန်။ ပါယ် တီ ဂေ ကာဖြူမ် ဒီ အိူပ် မျုက် ဇဝ်ဖြာ၊ တဲး န့ ပီ ပဲ့ ဟဲ့ ဒမ် အုန် ခုန်ဒီခမ် အာဒါဝိတ် အီ မုး ခုန်ဒီခမ် ဂေ ဒူအီ အီဆာရေလ။

11 ဂေ မိူဝ် ကာဖြူမ် ဒီ အိူပ် ဇဝ်ဖြာ ဘော ဒါင် ဂုင် ဂေဇူ ဒီ ဇဝ်ဖြာ၊ တဝ်း ဘော န့စေန့်၊ လာယ် ဝျီ့ ဘဲန် ဇေန့် ဘဲန် ဇေန့်။ ဂေ ဘော တဝ်း၊ “ဇဝ်ဖြာ ဟဲ့ ဘွတ် ကာဆဝ်။ နဝ်း ရွက့် ကာဝေ အန် ဇဝ် ဒီ ဒူအီ အီဆာရေလ မိူဝ်၊ န့ ဘော ကွယ် ဆေဆေ။” ပါယ် တီ ခဲ့ ကွယ် ဒူအီ ဘောကာဂ့လျီတ်၊ ဂေ ဘော ကာဖြူမ် ဒီ အိူပ် ဇဝ်ဖြာ၊ တဝ်း မှုဝ် တာင် တာင် ကူပ် ဟဲ့ ပွိုန် ဂေ ဒီ ဆမ် စေန့် ရွင့် ဟုဝ် ဇဝ်ဖြာ တီ။ 12 မာလဲ၊ န့ မုး ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ အာမျုဝ် အာလေဝီ အီ မုး ဒူအီ ကတ် ဒူအီ ဂဲ၊ ဂေ အီ မုး ဒင် ရဝ် အီ ဟဲ့ ဒွိုမ် ယိုဝ် ပီ ပါယ် ဟုဝ် ဇဝ်ဖြာ အီ ဟဲ့ ကွယ် အာတ့် နီ။ ဒေါ ဘ့လေး လူင် ဂေ ဒူအီ အီ ဆမ် ဟုဝ် ဇဝ်ဖြာ ဒီ စေန့် ရွင့် တီ၊ ဂေ ဘော ယာမ် တာင် ဒီ အာတ့် ဒူအီ ဂေ တီ။ ဂေ ဒူအီ ကိူန် အီ ကွယ် ဒီ တီ ယီ ကာဖြူမ် ဒီ ခူယ်၊ ဒတ် ဆီနန် ဆီနိူင်။ 13 အီ ဟဝ် ကော ဟူ ဝီ နပ် ပီ ဘော မုး၊ ယုဝ် န့ ဘော မုး ဂေ ဒတ် ရျီင် ကူပ် ဟဲ့ ဘျုဝ် ဒါခိုယ် ဂေ၊ ယုဝ် န့ ဘော မုး ဂေ ဒတ် ရျီင် ကူပ် ယာမ် တာင် ဂေ။ ဂြုဝ်း ပီ ဒတ် ရျီင် ဂေ တီ၊ န့ ဘော လိုဝ်း ဟာဝ် တူင့် ကာဆဝ်။