1 န့ ယီ မိုဝ်း ရန်ဆူ ဂေ ဒူအီ ခြိုဝ် အာယူဒါ ဘော ဂေ ဒူအီ ခြိုဝ် အာဘေန်ယာမ်။ ဒေါ ဝီ ယိုဝ် ဂေ လွင် ဒူအီ အီ ဟဲ့ ဝီ တး ခဲင် မိူင် ဘာဘဲ၊ ဂေ ဟဲ့ ဝီ စုး ဒီ ဆမ် ဟုဝ် ဇဝ်ဖြာ၊ 2 ဂေ မိူဝ် တး ကာလာင် ဒီ အာဇေရူဘာဘေန် ဘော ဒီ ဂေ ဒူအီ အီ မုး ဂိန့် န့ဟူမ် ဂေ တွိုန်။ ဂေ တဝ်း၊ “တဲး ဘော ယေ ပွိုန် ဒီ စွယ် ဘူင် ရိုမ် ဒူပ် ဘေ။ ယေ မိူဝ် ကြိုပ် ဇဝ်ဖြာ ပီ ကြိုပ် ဘေ တီ။ ယေ မိူဝ် ဟဲ့ ဒွိုမ် လှူ ဒီ အန် ဇဝ် ဆိန့် ဒေါ မုး စုဝ် ဘာန် ခုန်ဒီခမ် တာင် အီ စိူဝ် အာဆာဟာဒူန် အီ အိုပ် မိူင် အာဆူရာ အီ ဟဲ့ ယဲတ့် တး အေ ဒီ နီ။” ဂေ ဟဲ့ ဟွတ့် တဝ်း ပါယ် တီ 3 အာဇေရူဘာဘေန် ဘော အာယောဆူ ဘော ဂေ အီ ဆီ ဂိတ် ဆီ ကွယ်၊ အီ မုး ဂိန့် န့ဟူမ် ဒူအီ အီဆာရေလ၊ ဂေ ဝီ တဝ်း၊ “ဘေ တူ ပွိုန် လိုပ် ဘူင် ရိုမ် ဒူပ် ယေ ဟုဝ် ဇဝ်ဖြာ တီ။ မီ ယေ အီ ဒီ ဘူင် အာဒါ ဇဝ်ဖြာ ပီ ကြိုပ် ယေ ဒူအီ အီဆာရေလ။ ခုန်ဒီခမ် တာင် အာဆာယ်ရတ် အီ အိုပ် မိူင် ဘီရာဆီ တွိုန်၊ အန် မိူဝ် ဟဲ့ ဒွါ အာမိင် ပါယ် တီ။” 4 ပါယ် တီ ဂေ ဒူအီ အီ ကွယ် ခဲင် ရဝ် ခဲင် မိူင် တီ၊ ဂေ မိူဝ် ဘူင် တဲး ဒူအီ အာမျုဝ် အာယူဒါ က့လိုဝ် ဘော ယုဝ်၊ ကွဲ့ တဲး ဂေ ဘူင် ဟာဝ် ဂါန် ဂေ တီ။ 5 ဂေ ဘော ဇာင် ဒူအီ အီ နပ် ဒီ ဒွါ အာကျာမ် အာငျာန်၊ တဲး ဂေ ခြဲ ပီ ခြာမ် ဒူအီ အာယူဒါ ဒီ ဘူင်။ ဂေ ဘူင် ပါယ် တီ ဒေါ မုး စုဝ် ဘာန် ခုန်ဒီခမ် အာဆာယ်ရတ် ဘော စုဝ်၊ န့ ကော ဝီ ဇမ် ဘော စုဝ် ဘာန် ခုန်ဒီခမ် အာတာရိတ် ဝီ အိုပ် မိူင် ဘီရာဆီ တွိုန်။

6 ဒေါ ကာစုး ခုန်ဒီခမ် အာဆေဟာရူ ဒီ အိုပ် မိူင် ဘီရာဆီ၊ ဂေ အီ မုး ရန်ဆူ ဒူအီ အီဆာရေလ၊ ဂေ ဘော ဒဲမ် ပဲ့ အီ ဖျာက် ဂေ ဒူအီ အာယူဒါ ဘော ဂေ ဒူအီ အီ ကွယ် ခဲင် မိူင် ယေရူဆာလဲမ်။

7 ဒေါ မုး စုဝ် ဘာန် ခုန်ဒီခမ် တာင် အီ စိူဝ် အာတာစေရိတ် အီ အိုပ် မိူင် ဘီရာဆီ တွိုန် မိူဝ်၊ အာဘီဆာလမ် ဘော အာမီဆာရေဒတ် ဘော အာတာဘီလာ ဘော ဂိုက် အန် ဂေ ဘော ဒဲမ် ပဲ့ ဝီ တိုယ် ဟာဝ် ဒီ ခုန်ဒီခမ် တာင် အီ စိူဝ် အာတာစေရိတ်။ ဂေ ဟဲ့ ဒဲမ် ဒုဝ် အာရာမီ ဘော ဂြုဝ်း အာရာမီ။

8 အီ မုး ဒါ ဘုဝ် တာင် အီ စိူဝ် အာရေဟုမ် ဘော ဒါ စာရေ တာင် အီ စိူဝ် အာဆီမာဆေ၊ ဂါယ် ဟဲ့ ဒဲမ် ပဲ့ လွင် မိူင် ယေရူဆာလဲမ်၊ ဝီ တိုယ် ဒီ ခုန်ဒီခမ် တာင် အီ စိူဝ် အာတာစေရိတ်။ ပီ ဒဲမ် ဂေ န့ ပါယ် နီ။

9 ဂေ အီ ဒဲမ် ပဲ့ တီ၊ န့ ဘော မုး ဒါ ဘုဝ် တာင် အာရေဟုမ် ဘော ဒါ စာရေ တာင် အီ စိူဝ် အာဆီမာဆေ ဘော ဂိုက် အန် ဂေ၊ ဒါ တာင် အီ ဆုင်ဖျာတ် ဒါရာ ဘော ဂေ အာမူ အာမာတ် အီ အိုပ် ဒူအီ အီ တး ခဲင် မိူင် ဘေရေတ်၊ မိူင် ဘာဘဲ ဘော ဂေ ဒူအီ အေလာမ် အီ ကွယ် ခဲင် မိူင် ဆူဆာန်။ 10 န့ မုး ဘော ဂေ ဒူအီ အာမျုဝ် ဟဝ် ပဲ့ ဟဲ့ တိုယ် ဒါ ကာညာ တာင် အီ စိူဝ် အာဆာနာပ်၊ တဲး ဂေ ဟာဝ် ကွယ် ခဲင် မိူင် ဆာမာရီ ဘော ခဲင် မိူင် အီ ကွယ် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ် ဒွန် ပ့လုဝ့်။ ဂေ ဘောကာဂ့လျီတ် ဟဲ့ လာယ် ဖြူမ် ဒီ ဒဲမ် ပဲ့ တီ။

11 ပဲ့ ဖိူန် ပီ ဒဲမ် တိုယ် ဂေ ဒီ ခုန်ဒီခမ် တာင် အီ စိူဝ် အာတာစေရိတ် တွိုန်၊ ဂေ ဟဲ့ ဝီ ထုတ် လေး။ န့ ဘော တဝ်း၊ “ယေ အီ မုး ဒူအီ အီ ကွယ် ခဲင် မိူင် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ်၊ ယေ အီ မုး ဒဲစေန့် မဲ ခုန်ဒီခမ် တာင်၊ ယေ ဟဲ့ ဒဲမ် ပဲ့ နီ ဒီ မဲ ခုန်ဒီခမ် တာင် အီ စိူဝ် အာတာစေရိတ်။

12 ယေ ဆီ တဲး မဲ ခုန်ဒီခမ် တာင် နပ်၊ ဂေ ဒူအီ အာယူဒါ အီ ဟဲ့ လေး ခဲင် မိူင် မဲ ခုန်ဒီခမ် ဝီ တး ကွယ် ခဲင် မိူင် ယေရူဆာလဲမ် ဂေ ဟဲ့ ဝီ စုး ဒီ ဝီ ဆမ် မိူင် အီ ဟာယ်၊ အီ မုး မိူင် အီ တူ မွှိုမ်၊ မိူင် အီ နပ် ဒီ ကာဘး ဆေဆေ။ ဂေ ဟဲ့ ဝီ ကာစုး ဒီ ဂုဝ် ရဲင် မိူင်၊ ဟဲ့ ဝီ မ့ပြာယ် ဒင် အန်။

13 မဲ ခုန်ဒီခမ်၊ ယေ ဆီ တဲး မဲ နပ်၊ ဆေ ဂေ ဟီ ဟွတ့် ဝီ ဂုဝ် ဝီ မ့ပြာယ် မိူင် ဘော ရဲင် မိူင် တီ၊ ဂေ မိူဝ် အာဝ် ဟူ ဟပ် ခွန် န့တေန့်၊ ခွန် ကာစိုဝ်း ကာယွင့် ဘော ရွိုန် စိုင်။ ရွိုန် ပီ ဒီ လုဝ် ပွိုန် မဲ ခုန်ဒီခမ်၊ န့ ဒီ ယူမ် လူင် ဒွန် မျုဝ်။ 14 ယေ ယီ မုး ဒူအီ ပီ ယွတ် မဲန် မဲ ခုန်ဒီခမ်။ ပါယ် တီ ယေ မိူဝ် တူ ဆီ တဲး အာဖုင် ဒင်ခုဝ် မဲ ခုန်ဒီခမ် ယူမ် လူင်။ ခုဝ်၊ ယေ ဝီ တိုယ် ပဲ့ နီ၊ တဲး မဲ နပ် လွင် အန် တီ။ 15 ဆေ မဲ ဝီ ဟြေတ့် ဒီ ယွတ် ခဲင် ပဲ့ ပီ အုန် ခုန်ဒီခမ် ကာဒင် အာတ့်၊ မဲ ဒီ ဘော ယိုဝ် ပီ ဒဲမ် ခဲင် ပဲ့ တီ ဆိန့် အာတ့် နီ။ မိူင် တီ၊ န့ ဘော မုး မိူင် အီ အွန် ဒီ ကာဘး ဆေဆေ။ န့ ဟဲ့ ဒွိုမ် ဘဲန် ဒုက် ဒီ ခုန်ဒီခမ် ကာဒင် အာတ့် ဘော ဒီ မာန် မိူင် ဂေ။ ဒူအီ ခဲင် မိူင် တီ၊ ဂေ ဟဲ့ ဝီ ကာခဲန့် ဒီ ဂေ ဒါ ကာညာ အီ အိုပ် ဂေ ဆိန့် စုဝ် ဒေါ မွိုန်။ ကူပ် န့ ပါယ် တီ မိူင် တီ န့ ကော ကာဒုး ဒီ ကာဂုဝ်း၊ ကာဒုး ဒီ ပျာတ့် ဝဲန်။ 16 ယေ ကာလာင် တဲး မဲ ခုန်ဒီခမ် တာင် နပ်၊ ဆေ မိူင် တီ ဟီ ဟွတ့် ဝီ မ့ပြာယ် ကာမာယ်၊ ဟီ ဟွတ့် ဝီ ဂုဝ် ဘော ရဲင် မိူင်၊ မဲ ခုန်ဒီခမ် တာင် မိူဝ် အာဝ် ဟူ မိုဝ်း မိူင် ပီ ဒီ ပဲ မဲ ဒီ အိုပ် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ် နီ။”

17 ပန် တီ ခုန်ဒီခမ် မိူဝ် ဝီ ဒဲမ် ပဲ့ တိုယ် ဟာဝ် ဒီ ဂေ။ အန် တဝ်း၊ “အုဝ် မိူဝ် မိုဝ်း ပဲ့ တိုယ် ဒီ မဲ ဒါ ဘုဝ် တာင် အီ စိူဝ် အာရေဟုမ် ဘော ဒါ စာရေ တာင် အီ စိူဝ် အာဆီမာဆေ ဘော ဒီ ဂေ ဂိုက် မဲ ဘော ဒီ ဂေ အီ ဟဝ် အီ ကွယ် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ်၊ တဲး ဘေ ဂတ် ယေန် ဂျာမ်ဆာ ဒွန် အီ။

18 ပဲ့ ပီ ဒဲမ် တိုယ် ဘေ တွိုန် ဟဲ့ ဟွတ့် တိး၊ ဟဲ့ ဟွတ့် ဘျာန် ဆီဖဝ် အန်၊ တဲး အုဝ် နပ်။ 19 အုဝ် ဟဲ့ ဟွတ့် စ်ု တဲး ဂေ ယွတ် လွင် မိူင် ယေရူဆာလဲမ် တီ။ ဟဲ့ မှာန်၊ ဟဲ့ ဟွတ့် နပ်၊ အူ ဆိန့် ဒေါ မွိုန်၊ ဂေ ဒူအီ အီ ကွယ် ခဲင် မိူင် ယေရူဆာလဲမ်၊ ဂေ အွန် ဒီ ကာခဲန့် ဒီ ဂေ ဒါ ကာညာ အီ အိုပ် ဂေ။ ဂေ အွန် ဒီ ကာဘး ဆေဆေ၊ ဘော ဝီ တဲး န့ ဒုက် ဒီ ခုန်ဒီခမ် ခဲင် မိူင် တီ။ 20 န့ ဟဲ့ ဒွိုမ် မိုဝ်း ခုန်ဒီခမ် ဘဲန် ကာဒင် ဘဲန် ကာဒင် အီ မိုဝ်း ပွုန် တာင် အီ ကွယ် ခဲင် မိူင် တီ။ ဂေ ဟဲ့ ဒွိုမ် အိုပ် တူတ့် မာန် မိူင် အီ ကွယ် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ် တီ ဘောကာဂ့လျီတ်။ ဂေ ဟဲ့ ဒွိုမ် ဂဲပ် ရွိုန် စိုင် ဘော ခွန် ကာစိုဝ်း ကာယွင့် ဘော ခွန် န့တေန့်။ 21 ဆေ န့ ပါယ် တီ တဲး ဘေ ဝီ ဒွါ အာမိင် ဒီ ဒူအီ ခဲင် မိူင် တီ၊ ကွဲ့ တဲး ဂေ ဝီ ဆမ် ဝီ မ့ပြာယ် ဟာဝ် မိူင် တီ ပေါ န့ ပွါ၊ တဲး န့ ကော ဇမ် ပန် ဒီ ဝီ ဒွါ အုဝ် အာမိင် အီ ခ့ဝါင် ဂေ ဘူင်။ 22 တဲး ဘေ ဆာဒိက် ဒီ ဘူင် ဆီချာ ပီ စ်ု အုဝ် တီ၊ ကွဲ့ တဲး အီ တူ မွှိုမ် တီ ကြဲ ဒီ တာင်၊ ကွဲ့ တဲး အာဂျိုဝ် ဒီ မာန် မိူင် အေ လိုဝ် စှိုမ်။”

23 ဝါယ် အန် တီ ဂေ မိူဝ် တိး ပဲ့ ပီ တိုယ် ခုန်ဒီခမ် တာင် အာတာစေရိတ်။ ဘော ဒါ ဘုဝ် တာင် အာရေဟုမ်၊ ဒါ စာရေ တာင် အာဆီမာဆေ ဘော ဂေ ဂိုက် အန်၊ ဂေ ဘောကာဂ့လျီတ် ဟဲ့ ထူမ် လွင် အန် တီ၊ ဂေ မိူဝ် ယိတ့် အူ ဇေန့်၊ ပီခြန် ဂေ၊ တဲး ဂေ ပွိုန် ဒီ ဟာဝ် ခြဲ ဒူအီ အာယူဒါ၊ ကွဲ့ တဲး ဂေ ပွိုန် ဒီ ဝီ မ့ပြာယ် ဝီ ဒဲ ဟာဝ် မိူင် တီ။

24 ပါယ် တီ ဟုဝ် ဇဝ်ဖြာ တွိုန် မိူဝ် အာဝ် ဟူ ပွိုန် ဒီ ဆမ်။ ဂေ ဘော လုဝ် ဘ့လေး အုန် ပါယ် တီ တဲး န့ ကော ဝီ ဇမ် စုဝ် ခုန်ဒီခမ် အာတာရိတ် ဒေါ အိုပ် အန် မိူင် ဘီရာဆီ အာဒါ အာ ဆီနမ်။