1 ဒေါ အန် တီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟက်ကာယ် ဘော ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဆာခါရာ အီ မုး ဂွန် အာအီတော ဂါယ် ဘော ဂါဝ် ပွုန် ဇဝ်ဖြာ ပီ ကြိုပ် ဂေ ဒူအီ အီဆာရေလ ဘော ကာလာင် ဒီ ဂေ ဒူအီ အာယူဒါ အီ ကွယ် ခဲင် မိူင် ယူဒါ ဘော ခဲင် မိူင် ယေရူဆာလဲမ် ဘောကာဂ့လျီတ်။

2 ပန် တီ အာဇေရူဘာဘေန် အီ မုး ဂွန် အာဆေထီအေန် ဘော အာယောဆူ အီ မုး ဂွန် အာယောစာတာက်၊ ဂါယ် ဘော ဝီ ယိုဝ် ဂြုဝ်း ပီ ကာလာင် ဒါ အီ ဘျာန် ဂြုဝ်း ဇဝ်ဖြာ ဂါယ် တီ၊ ဂါယ် ဘော ဝီ ကာစုး ဒီ ဘူင် ဟာဝ် ဟုဝ် ဇဝ်ဖြာ အီ ကွယ် ခဲင် မိူင် ယေရူဆာလဲမ် တွိုန်။ ဒါ အီ ဘျာန် ဂြုဝ်း ဇဝ်ဖြာ အာ ဝီ တီ မိူဝ် စွယ် ဂါယ်။

3 ဒေါ အန် တီ အာတာတနေ အီ မုး ဒါ ကာညာ တာင် အီ အိုပ် မိူင် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ် ဘော အာဆေဆာပေါစာနေ ဘော ဂေ အီ ဘူင် ရိုမ် ဂါန် ဒူပ် အန်၊ ဂေ ဘော တး ဒီ မိူင် ယေရူဆာလဲမ် ဘော ဒီမွှတ် ဂေ ဒူအီ အီဆာရေလ တဝ်း၊ “အာဆေ ဟဲ့ ဒွါ အာမိင်၊ တဲး ဘေ ဝီ ဆမ် ဟုဝ် ဇဝ်ဖြာ ဘော ရဲင် မိူင် နီ။း” 4 ဂေ ဘော ဒီမွှတ် ဘော ပီ စိူဝ် ဂေ အီ လာယ် ဖြူမ် ဒီ ဘူင် ဟုဝ် ဇဝ်ဖြာ တီ။ 5 မာလဲ၊ ဇဝ်ဖြာ ယီ ဘ်ု ဒီ ယွတ် ဂေ အီ မုး ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ။ ဒါ ကာညာ ဂေ အီ မိုဝ်း ပွုန်၊ အီ မုး ဒူအီ အာမျုဝ် ဘီရာဆီ၊ ဂေ ယီ တူ ပွိုန် ခြဲ ဂါန် ဂေ တီ၊ တဲး န့ ကော ဂိူတ်။ ဂေ လုဝ် ဒဲမ် ပဲ့ တိုယ် ဒီ ခုန်ဒီခမ် အာတာရိတ် ဒီ အာတ့်။ ဟဲ့ ဟွတ့်၊ ဂေ လုဝ် နှဝ့် တဲး ခုန်ဒီခမ် ကော ဝီ ဒဲမ် ဝျီ့ ပဲ့ တီ။

6 ပဲ့ ပဲ့ ဟဲ့ ဒဲမ် ဂေ တီ၊ န့ ဟဲ့ ဝီ ထုတ် လေး ပါယ် နီ။ န့ တဝ်း၊ “အာတာတနေ အီ မုး ဒါ ကာညာ တာင် အီ အိုပ် ဘ့လာက် နာ ဂေတ့် ဆီငဲ အိုမ် ဘ့လဲင် အူဖာရာတ် ဘော အာဆေဆာပေါစာနေ ဘော ဂေ အီ ဘူင် ရိုမ် ဂါန် ဒူပ် အန်၊ ဂေ ဟဲ့ ဒဲမ် ပဲ့ နီ။”

7 ယေ မိူဝ် မိုဝ်း ပဲ့ ဒါင် ဇမ် မဲ ခုန်ဒီခမ် တာင် အာတာရိတ်၊ တဲး မဲ ဂတ် ယေန် ဂျာမ်ဆာ။ 8 တဲး မဲ ခုန်ဒီခမ် တာင် နပ် ဘော လွင် ဟဲ့ တး ဇမ် ယေ ဒီ မိူင် ယူဒါ။ ယေ ဟဲ့ ယိုဝ် ဟုဝ် ဇဝ်ဖြာ အီ တာင် အီ ဘွတ် ကာဆဝ်။ ဂေ ဟဲ့ ဂုဝ် တာ မာဝ် တာင်၊ ဟဲ့ ဝီ ဒိုဝ်း မာနက် အန်၊ ဟပ် ခဲင် ရဲင် မာဝ် ပီ ဂုဝ် ဂေ တီ။ ပဲ့ ဟဲ့ ဘူင် ဂေ တီ၊ ဟဲ့ ခိုက်ခမ် ဟဲ့ တာင် ဘော ခြန် ကာဆဝ်။

9 ယေ မိူဝ် ဟဲ့ ဝီ ဒီမွှတ် ဂေ အီ မုး ဒါ တာင် အီ အိုပ် အီ ယဲတ့် ဂေ၊ တဲး ဂေ ဝီ ကာလာင် နှဲ ဒီ ယေ၊ အာဆေ ဟဲ့ ခ့ဝါင် တဲး ဂေ ဆမ် ဟုဝ် ဇဝ်ဖြာ ဘူင် ဘော ရဲင် မိူင် တီ။ 10 ယေ မိူဝ် ဟဲ့ ဒီမွှတ် ဘော စိူဝ် ဂေ အီ မုး ဒါ တာင် အီ အိုပ် အီ ယဲတ့် ဂေ တီ၊ တဲး ယေ ပွိုန် ဒီ ဒိုဝ်း စိူဝ် ဂေ တီ၊ ဝီ ဒါင် ဒီ မဲ ခုန်ဒီခမ်။

11 ဂေ မိူဝ် ဟဲ့ ဝီ ကာလာင် ဒီ ယေ။ ဂေ တဝ်း၊ “ယေ မုး ဒဲစေန့် ဇဝ်ဖြာ အီ အိုပ် ဂါင်ဟြာဝ် ဘော ကာဒါယ်။ ယေ ဟဲ့ ဝီ ဂုဝ် ဝီ မ့ပြာယ် ဟုဝ် ဇဝ်ဖြာ ပဲ့ ဟဲ့ ဆမ် အုန် ခုန်ဒီခမ် တာင် အီ အိုပ် မိူင် ဒူအီ အီဆာရေလ အူ ဆိန့် အာတ့် နီ။ 12 မာလဲ၊ ဂေ ဂုန့် ဒင် ယေ ဟဲ့ ဘူင် တဲး ဇဝ်ဖြာ အီ အိုပ် ဂါင်ဟြာဝ် တီ ရူ ဒီ ယေ။ အန် ဇဝ် ဟဲ့ တဲး ခုန်ဒီခမ် အာနေဘူခတ်နေစာ တး ကာဂုဝ်း ဒီ ဂေ။ ခုန်ဒီခမ် တီ၊ အန် ဘော မုး ဒူအီ အာမျုဝ် ခါလာဒေ အီ အိုပ် မိူင် ဘာဘဲ။ အန် မိူဝ် ဟဲ့ ပျာတ့် ဝဲန် ဘော ဟုဝ် ဇဝ်ဖြာ၊ မှေတ့် ဟာဝ် ဘော ဒူအီ ဘော မာန် ဘော မိူင်၊ တဲး ဂေ ဟာဝ် ခမ် ဒုက် တာင် ခဲင် မိူင် ဘာဘဲ တွိုန်။

13 န့ ဘော ဝီ ဇမ် စုဝ် ဘာန် ခုန်ဒီခမ် အာဆာယ်ရတ်။ ဒေါ ဟဲ့ အိုပ် အန် မိူင် အန် အာဒါ အူ ဆီနမ် ခုန်ဒီခမ် အာဆာယ်ရတ် တီ ဟဲ့ ဝီ ဒွါ အာမိင် တဲး ယေ ဝီ ဂုဝ် ဝီ မ့ပြာယ် ဟုဝ် ဇဝ်ဖြာ နီ။ 14 အန် မိူဝ် ဟဲ့ ဝီ ဒိုဝ်း ခြိုင် ရွိုန် ဂေ ခြိုင် ခြိဝ် အီ မုး ကြုဝ် အီ ဟဲ့ ဒွိုမ် ကွယ် ခဲင် ဟုဝ် ဇဝ်ဖြာ။ ခြိုင် တီ ခုန်ဒီခမ် အာနေဘူခတ်နေစာ ဟဲ့ ဒိုဝ်း လေး ခဲင် ဟုဝ် ဇဝ်ဖြာ အီ ကွယ် ဒီ မိူင် ယေရူဆာလဲမ် နီ၊ ဝီ ဟာဝ် အုန် ခဲင် ဟုဝ် ဇဝ် ပီ ကြိုပ် ဂေ အီ ကွယ် ခဲင် မိူင် ဘာဘဲ။ ခုန်ဒီခမ် တာင် အာဆာယ်ရတ် တွိုန်၊ အန် ဟဲ့ ဝီ ဒိုဝ်း ကြုဝ် ဂေ တီ၊ ဝီ အာပ် ဒွါ ဒီ ဒူအီ အီ စိူဝ် အာဆေဆာဘာစာ အီ မုး ဒါ ကာညာ အီ အိုပ် ဒူအီ အာယူဒါ ပဲ့ ဟဲ့ ဒါင် ခုန်ဒီခမ် အာဆာယ်ရတ် တီ။ 15 ခုန်ဒီခမ် တီ ဟဲ့ ဝီ ဒမ် တဝ်း၊ ‘တဲး မဲ ဒိုဝ်း ကြုဝ် ဂေ နီ၊ ဝီ ဟာဝ် အုန် ခဲင် ဟုဝ် ဇဝ်ဖြာ အီ ကွယ် ခဲင် မိူင် ယေရူဆာလဲမ်။ ဟဲ့ ဟွတ့်၊ တဲး ဘေ ဝီ ဂုဝ် ဝီ မ့ပြာယ် ဟုဝ် ဇဝ်ဖြာ ဒူင် ကွယ် ဘြိမ် အန် တွိုန်။’ 16 ပါယ် တီ အာဆေဆာဘာစာ တွိုန် မိူဝ် တး ဆမ် အုန် စေန့် ရွင့် ဟုဝ် ဇဝ်ဖြာ တီ။ ယေ ဘော ဘူင် ဟာဝ် ဂါန် တီ ကော ဇမ် အာတိုဝ် နီ။ ယေ ယီ ညှမ် ဟွတ့် ဘူင်။” ဂေ တဝ်း ပါယ် တီ။

17 ဒေါ တီ နီ၊ ဆေ မဲ ခုန်ဒီခမ် တာင် အိုင်၊ မှာန့် တဲး မဲ ဝီ ဟြေတ့် ပဲ့ ပဲ့ ဟဲ့ ဒဲမ် အုန် ခဲင် မိူင် ဘာဘဲ။ တဲး မဲ နပ် ဆီချာ ယုဝ် ဟဲ့ မှာန် အာဝ် မှာန် ပီ တဝ်း ဂေ။ ယုဝ် ခုန်ဒီခမ် တာင် အာဆာယ်ရတ် ဟဲ့ ဒွိုမ် ဒွါ အာမိင်၊ တဲး ဂေ ဝီ ဆမ် ဝီ မ့ပြာယ် ဟုဝ် ဇဝ်ဖြာ ခဲင် မိူင် ယေရူဆာလဲမ် နီ။ ဆေ ဟီ ဟွတ့် ပါယ် တီ ခဲ့ ပီ ဆီ ဘူင် မဲ ခုန်ဒီခမ် တာင်၊ တဲး မဲ ဝီ ကာလာင် တး ဒီ ယေ။