1 ခုန်ဒီခမ် အာဆာလုဝ်မုဝ် အီ မုး ဂွန် အာဒါဝိတ် တွိုန် အန် ဟဲ့ ကြဲ ဒီ မိုဝ်း ပွုန် အီ မန် ဆီချာ၊ တဲး အန် အိုပ် မိူင် အီဆာရေလ ဘော မိူင်။ ခုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် အန် ဟဲ့ မွင့်ကာရာ ဒွါ နာ မွှိုမ် ဒီ အန်၊ တဲး အန် မိုဝ်း အာဖုင် ဒင်ခုဝ် တာင် ကာဆဝ်။

2 ခုန်ဒီခမ် အာဆာလုဝ်မုဝ် မိူဝ် ကာလာင် ဒီ ဂေ ဒူအီ အီဆာရေလ ဘောကာဂ့လျီတ် အီ မုး ဒါ ဘုဝ် အီ အိုပ် ဒူအီ အူ ဟြဲန့် ဝီ ဘော အီ အိုပ် အူ မာယဝ်း ဝီ။ အန် ကာလာင် ဘော ဒီ ဂေ ဒါ အီ ဆုင်ဖျာတ် ဒါရာ ဘော ဒီ ဂေ ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ ဘော ဒီ ဂေ အီ မုး ဂိန့် န့ဟူမ် ဒွန် အီ။ 3 အန် တဲး ဂေ ဘောကာဂ့လျီတ် ဟာဝ် ဒီ မိူင် ကီပွင် အီ မုး ဒူင် ဒီ ကြိုပ် ဂေ ဇဝ်ဖြာ။ ခုဝ်၊ ထိုပ် ဘိက် ဘွတ် ကွယ် ဒီ တီ။ န့ မုး ထိုပ် ဒူင် လာယ် ကာတုန့် ဇဝ်ဖြာ ဂါယ် ဒူအီ ပဲ့ ဟဲ့ ဘူင် အုန် ဒဲစေန့် ဇဝ်ဖြာ အီ စိူဝ် အာမုဝ်ဆဲ ဒေါ ကွယ် ဂေ ခဲင် ပြဲ ကာဟဝ်း တွိုန်။ 4 ခုန်ဒီခမ် အာဒါဝိတ် ဟဲ့ ဒွိုမ် ဒိုဝ်း ဇီဒိူက် ဇဝ်ဖြာ ဒီ မိူင် ကီရီယာတ်အာရိမ်၊ ဝီ အုန် ခဲင် မိူင် ယေရူဆာလဲမ် ခဲင် ထိုပ် ဘိက် ပီ ဆမ် အန် တွိုန်။ 5 အီ မုး ကာစှူင့် လှူ ဘွင့် ဒေန့် ပီ ဘူင် အာဘေဇာလေန် အီ မုး ဂွန် အာအူရီ ဘော လှာန် အာဟူရာ န့ ယီ ဆီ ကွယ် ဒီ မိူင် ကီပွင်။ န့ ကွယ် နာ အာတ့် ထိုပ် ဘိက် ဘွတ်။ ခုဝ်၊ ခုန်ဒီခမ် အာဆာလုဝ်မုဝ် ဘော ဂေ ဒူအီ ကိူန်၊ ဂေ ဘောကာဂ့လျီတ် ကာဖြူမ် ဒီ ကြိုပ် ဇဝ်ဖြာ ဒီ တီ။ 6 ခုန်ဒီခမ် အာဆာလုဝ်မုဝ် မိူဝ် ဒိုဝ်း ဒုဝ် ဆတ်ဒါဝါ အူ ဟြဲန့် ဒုဝ်၊ ဘူင် တဲး န့ ဘဲန် ပီ ဒီ လှူ အီ ဒုဝ့် ဒီ ငဝ် ဘော ဒုဝ့် လှူ ဒဲင် ကာစှူင့် လှူ ဘွင့် ဒေန့် အီ ကွယ် နာ အာတ့် ထိုပ် ဘိက် ဘွတ် တွိုန်၊ အီ မုး ဒူင် လာယ် ကာတုန့် ဇဝ်ဖြာ ဂါယ် ဒူအီ။

7 ခဲင် မှိုဝ် တီ ဇဝ်ဖြာ မိူဝ် တး ကာပ့လုး ဒီ အာဆာလုဝ်မုဝ် ဘော ကာလာင် ဂြုဝ်း ဒီ အန် တဝ်း၊ “တဲး မဲ မှာန့် ပီ ဆီ မှာန့် မဲ၊ အုဝ် ဒီ ဒွါ ဒီ မဲ။” 8 အာဆာလုဝ်မုဝ် မိူဝ် ဝီ ကာလာင် ဒီ ဇဝ်ဖြာ တဝ်း၊ “မဲ ဇဝ် ဟဲ့ ဂေဇူ ကိူန် ကာဆဝ် ဒီ အာဒါဝိတ် အီ မုး ဂုန့် အုဝ်။ မဲ မိူဝ် ဟဲ့ ဝီ တဲး ဘော အုဝ် ပွိုန် ဒီ ဘဲန် ခုန်ဒီခမ် ဝီ ပ့လု အန်။ 9 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဘူင် ဒီ အုဝ် ဒူပ် ကာဒိက် ဆတ်ဇာ ပဲ့ ဟဲ့ ဒွါ မဲ ဒီ ဂုန့် အုဝ် အီ မုး အာဒါဝိတ် တီ။ ခုဝ်၊ မဲ ဇဝ် မိူဝ် ဟဲ့ တဲး အုဝ် ဘဲန် ခုန်ဒီခမ် အီ အိုပ် ဒူအီ ကိူန် ကာဆဝ်၊ အီ ပီ ကာပုး ကော ဟူ နပ် ဒီ တိး။ 10 အုဝ် မှာန့် တဲး မဲ ဇဝ် ဒွါ အာငျာန် ဒီ အုဝ်၊ တဲး အုဝ် နပ် ပီ ဒီ ပါယ် ဒီ အိုပ် ဒူအီ ကိူန် ဂေ တီ။ ဆေ အာဝ် ပါယ် တီ၊ အာဝ် မိုဝ်း အာဆေ အီ ဒီ ပဲ ဒီ အိုပ် ဒူအီ ပီ အိုပ် မဲ ဇဝ် အီ ဟဲ့ ကိူန် ကာဆဝ် တီ။”

11 ဇဝ်ဖြာ ဝီ ကာလာင် ဒီ အာဆာလုဝ်မုဝ် တဝ်း၊ “မဲ ဟဲ့ ရဝ်း အီ မုး အီ မှာန်။ မဲ တူ မှာန့် ကြုဝ်ကြာမ် ဘော အာဖုင် ဂေ ဆာရေ။ မဲ မိူဝ် တူ မှာန့် တဲး မဲ ပွိုန် ဒီ ငဝ်း ဝဲန် ရန်ဆူ မဲ။ မဲ မိူဝ် တူ မှာန့်၊ တဲး အာဆာက် မဲ တူင့်။ မဲ ယီ မှာန့် မီ အာငျာန်၊ တဲး မဲ ပဲ ဒီ အိုပ် ဒူအီ ကိူန် ပဲ့ ဟဲ့ အာပ် အုဝ် ဒီ မဲ၊ တဲး မဲ ဘဲန် ခုန်ဒီခမ် အီ အိုပ် ဆီချာ ဂေ။ 12 ကူပ် န့ ပါယ် တီ အုဝ် ဒီ ဒွါ အာငျာန် တီ ဒီ မဲ။ ဒဲင် တီ အုဝ် ဒီ ဝီ ဒွါ ဘော ကြုဝ်ကြာမ် ဘော အာဖုင် ဂေ ဆာရေ ဒီ မဲ။ ဂေ ခုန်ဒီခမ် အီ ဟဲ့ ဒွိုမ် ဘဲန် ဒီ အာတ့် မဲ ဘော ဂေ အီ ဒီ ဘဲန် ဝါယ် မဲ အာဝ် မိုဝ်း ခေါ အူ ကာဒင် အီ ဒီ ခြပ် မဲ အီ ဒီ ကာရမ် မဲ။”

13 ပါယ် တီ အာဆာလုဝ်မုဝ် ဘော ဝီ လေး ခဲင် မိူင် ကီပွင် ဒူင် လှူ ဂေ ဒီ ထိုပ် ဘိက် ဘွတ် တွိုန်။ အန် ဝီ ဝေန့် ခဲင် မိူင် ယေရူဆာလဲမ် ဘော အိုပ် တူတ့် မိူင် အီဆာရေလ။

14 အန် ဘော မိုဝ်း လက်လဝ် မ့ပြွင့် အူ ဟြဲန့် ဒီ ဖွုန် မာယဝ်း လှာင် ဘော မ့ပြွင့် အူ မှိုန့် ဒီ အာ ဟြဲန့် ဒုဝ်။ အန် ဘော ဒိုဝ်း မင် ကာလဝ့်၊ ဟာဝ် အုန် ခဲင် မိူင် ယေရူဆာလဲမ်။ အီ ဆီ ဂိတ် ဆီ ကွယ် ဂေ တွိုန်၊ အန် ဘော အုန် ပေါ မိူင်။ 15 ဒေါ ဘဲန် အန် ခုန်ဒီခမ် တီ ခဲင် မိူင် ယေရူဆာလဲမ် ရွိုန် ဂေ ခြိဝ် ဟဲ့ ကိူန် ကာဆဝ်။ ဂေ ဝီ မာတ် တဲး န့ ပီ မာဝ်။ ဟေ အာရိတ် မိူဝ် ဟဲ့ ကိူန် ကာဆဝ်။ ဂေ ဝီ မာတ် န့ ပီ ဟေ ဒီပူ အီ လတ့် ခဲင် ပြဲ။ 16 မင်ပြွင့် ကိူန် ပီ ဒိုဝ်း တး ဒွါ ဂေ ဒီ အာဆာလုဝ်မုဝ် တီ၊ ဂေ ဒိုဝ်း တး ခဲင် မိူင် အဲဂိုပ် ဘော ခဲင် မိူင် ကုယ်။ ဂေ အီ စိုဝ်း အီ ယွင့် ကြုဝ် ခုန်ဒီခမ်၊ ဂေ ဟဲ့ စိုဝ်း တး မင်ပြွင့် တီ ခဲင် မိူင် ကုယ်။ 17 ဂေ ဒိုဝ်း တး လက်လဝ် ခဲင် မိူင် အဲဂိုပ်၊ အူ လှာင် အာဒါ ရွိုန် ဇဲတ် ဒဝ် မာယဝ်း ဆေခေန်။ ဘော မ့ပြွင့် အူ ဒုဝ် ဂေ ဒွါ ရွိုန် ဇဲတ် အူ မာယဝ်း ဒီ ဖန် ဂိုဝ် ဆေခေန်။ ဂေ ဘော ဒိုဝ်း ကြုဝ် တီ၊ ဝီ ယွင့် ဒီ ခုန်ဒီခမ် ဒွန် ကာဒင် အီ အိုပ် ဒူအီ ဟေထိတ် ဘော ဂေ ဒူအီ အာရာမ်။