1 ခုန်ဒီခမ် အာဒါဝိတ် ဝီ ကာလာင် ဒီ ဂေ ဒူအီ ကိူန် တဝ်း၊ “ဂွန် အီမာယ် အုဝ် အီ စိူဝ် အာဆာလုဝ်မုဝ် ပီ ရဝ်း ဇဝ်ဖြာ နီ၊ အာဆာက် အန် ဆီ နှိုမ်။ အန် မိူဝ် ညှမ် ဒွိုမ် ခြူ တး မာဆေ။ ဂါန် ပီ ဒီ ဘူင် အန် ယီ မုး ဂါန် အီ အာရေ တာင်။ ခုဝ်၊ ဟုဝ် တီ အာဝ် မုး ဟုဝ် အာဒါ ဒူအီ။ န့ မုး ဟုဝ် ဇဝ်ဖြာ။ 2 ခဲ့ ပီ ပွိုန် အုဝ် ဘူင်၊ အုဝ် မိူဝ် ဟဲ့ ရဲန် အုန် အာဒါ ဟုဝ် ဇဝ်ဖြာ တီ။ ဘော မုး ခြိဝ်၊ ရွိုန်၊ ဘွင့် ဒေန့်၊ ဟိန်၊ ဟေ၊ ဆဲန့် ဝွင့် လုယ် အာဒါ ဒီ ဟပ် ကာင် အန် ဘော ဆဲန့် ငျီန် ခွင် ဘော ဆဲန့် ဘွတ် အီ မိုဝ်း ဒီငဝ်း ဒီခန် ဘော မာဝ် လုယ် မာဝ် ရာဝ်၊ အုဝ် ဟဲ့ ဟွတ့် ရဲန် အုန် တူတ့် ဒွန် မျုဝ်၊ န့ မိူဝ် ဟဲ့ ကိူန် ကာဆဝ်။ 3 ဒဲင် ကြုဝ်ကြာမ် ပဲ့ ဟဲ့ ရဲန် အုန် အုဝ် အာဒါ ဟုဝ် ဇဝ်ဖြာ အီ ဆီငါ ဘွတ် တီ ဒေါ တီ နီ အုဝ် ဝီ ဒိုဝ်း ဘော ရွိုန် ဘော ခြိဝ် အီ မုး ကြုဝ် အုဝ်၊ ဝီ လှူ တဲး န့ ဒူပ် ခဲ့ ရွက့် အုဝ် ဒီ ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်။ 4 အုဝ် မိူဝ် ဟဲ့ လှူ ခြိဝ် ဇဲတ် အီ တး မိူင် အုဝ်ဖီ အာဒါ အူယ် ဟြဲန့် ထာလေန်၊ ရွိုန် ဇဲတ် ဘူ ဟြဲန့် ထာလေန်၊ တဲး န့ ဘဲန် အီ ပိတ် ဒီ ရဲင် ဟုဝ် ဇဝ်ဖြာ တီ။ 5 အုဝ် ဆီ တဲး ဂေ ဒါ လာက် ဘော တာ ခြိဝ် ဂေ ရွိုန် တီ ဒွန် ပ့လုဝ့် ဒူင် ကာအာပ် လုဝ် တာ။ ခုဝ်၊ ဒေါ တီ နီ အုဝ် ဆီ ဒီမွှတ် ဘေ ဘောကာဂ့လျီတ်၊ အာဆေ ဒီ ခမ် ဒီ လှူ ဒုဝ် အန် ဘူင် ဂါန် ဇိုဝ် တီ။း”

6 ဝါယ် အန် တီ ဂေ အီ မုး ဒါ တာင် အီ အိုပ် ခြိုဝ် ဂေ ခဲင် မိူင် အီဆာရေလ၊ ဒါ ကာညာ အီ အိုပ် အူ ဟြဲန့် ဝီ ဘော အူ မာယဝ်း ဝီ၊ ဘော ဒါ တာင် အီ အိုပ် ဂါန် ခုန်ဒီခမ် ဘဲန် မျုဝ် ဘဲန် မျုဝ်၊ ဂေ ဘော ကာဖြူမ် ဒီ လှူ ခဲ့ မိုဝ်း ဂေ နဝ်း ဆီ လှူ။ 7 ဘော မုး ခြိဝ် ဖန် ဟြဲန့် ထာလေန် ဘော ဒဲင်ဂါ ခြိဝ် အူ မှိုန့် ဘူင့်၊ ရွိုန် အူ မှိုန့် ထာလေန်၊ ဘွင့် ဒေန့် အူ မှိုန့် ဒီ ဒါ ဟြဲန့် ထာလေန် ဘော ဟိန် အူ ဆဲန် ထာလေန်။ ဂေ မိူဝ် လှူ တဲး န့ ဘဲန် အာဒါ ပီ ဒီ ဘူင် ဟုဝ် ဇဝ်ဖြာ တီ။ 8 ဂေ အီ မိုဝ်း ဆဲန့် ဘွတ် မိူဝ် တး လှူ၊ တဲး န့ ဘဲန် အာဒါ ပီ ဒီ ဆမ် ဟုဝ် ဇဝ်ဖြာ တီ။ ဂေ မိူဝ် အာပ် ဒွါ ဒီ အာယေဟီလာ အီ မုး ဒူအီ အာမျုဝ် အာဂေန်ရာဆူန် တွိုန်။ 9 ဂေ ဒူအီ ကိူန် မိူဝ် ဟဲ့ လှူ ဒီ ဇဝ်ဖြာ ခဲ့ မိုဝ်း ဂေ နဝ်း ဆီ လှူ၊ ဂေ မိူဝ် ခူယ် ဒါခိုယ် ကူပ် ဟဲ့ ပွိုန် ဂေ ဒီ လှူ ကိူန် ခဲ့ တီ။ ခုန်ဒီခမ် အာဒါဝိတ် မိူဝ် ခူယ် ဒါခိုယ် ကာဆဝ်။

10 ပါယ် တီ ခုန်ဒီခမ် အာဒါဝိတ် မိူဝ် အိူပ် မျုက် ဇဝ်ဖြာ၊ တဲး ဂေ ဒူအီ ကိူန် ထူမ်။ အန် တဝ်း၊ “အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ယေ ဒူအီ အီဆာရေလ၊ တဲး အီ ဘော အိူပ် မျုက် မဲ ဇဝ် ဒွန် စုဝ် ဒွန် ဘာန်။

11 မဲ ဇဝ်ဖြာ၊ မဲ ဟဲ့ ဘွတ် မျာတ် ကာဆဝ်။ မဲ ဘော မိုဝ်း အာဖုင် ဒင်ခုဝ်၊ မိုဝ်း ဆာရေ ဘော ပွုန် အီ ပဲ ဒီ အိုပ် တူတ့်။ ခဲ့ ဘော မိုဝ်း မျုဝ် အီ ကွယ် ခဲင် ဂါင်ဟြာဝ် ဘော အီ ကွယ် ဒဲင် ကာဒါယ် ဒွန် မျုဝ်၊ န့ ဘော မုး တူတ့် ကြုဝ် မဲ ဇဝ်။ မဲ ဇဝ် မုး ဒါ ကာညာ အီ တာင် ကာဆဝ်။ မဲ မိူဝ် အိုပ် တူတ့် ဒွန် မျုဝ်။

12 အာဖုင် ဆာရေ ဘော ကြုဝ်ကြာမ် ဒွန် မျုဝ် န့ မုး မဲ ဇဝ် အီ ဒွါ တူတ့် ဒွန် မျုဝ်။ မဲ ဇဝ် မိူဝ် တာ ဟဲန့် ဂေ အာဖုင် ဒင်ခုဝ် မဲ၊ အိုပ် တူတ့် ဒွန် မျုဝ်။ မဲ ဇဝ် မိုဝ်း ဟဲန့် ဂေ အာဖုင် ဒင်ခုဝ် အီ ကာအာပ် အိူပ် မျုက်။ မဲ ဘော တဲး ဒူအီ ဒွန် အီ မိုဝ်း ပ့လူမ် မိုဝ်း ဟဲန့်။

13 ခုဝ် အန် တီ ယေ အိူပ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ယေ။ ယေ အိူပ် မျုက် မဲ ဇဝ် ဘော ဒါင် ဂုင် ဂေဇူ ဒီ မဲ။ ယေ မိူဝ် အိူပ် မျုက် မဲ ဇဝ် အီ မိုဝ်း ပွုန် တာင်။

14 မာလဲ၊ ဘော အုဝ် ဘော ဂေ ဒူအီ ပီ အိုပ် အုဝ် ဂေ နီ ယေ တူ မိုဝ်း ဒီခုဝ် မာဆေ။ မဲ ယီ ခ့ဝါင် တဲး ယေ မိုဝ်း နဝ်း ဆီ လှူ ကိူန် ပါယ် နီ။ ခုဝ်၊ ခဲ့ မိုဝ်း ယေ ဒွန် မျုဝ် မဲ ဇဝ် အီ ဒွါ။ ယေ ဝီ ဒိုဝ်း ကြုဝ်ကြာမ် တီ၊ ဝီ လှူ ဝိဝ် ဒီ မဲ ဇဝ်။ 15 ယေ ဒူအီ အီ ကွယ် ဒဲင် ကာဒါယ် နီ၊ မဲ ဇဝ် ယီ မာတ် ယေ ပီ ခဲတ့်၊ ပီ ဘော ဂေ ဂုန့် ဒင် ယေ။ စုဝ် ကွယ် ယေ ဒဲင် ကာဒါယ် နီ၊ န့ ပီ ကာမိုက်၊ အာဝ် ပွိုန် လွတ် ယမ် ဒေါ မှဝ်။ 16 အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ယေ၊ ယေ မိူဝ် ဟဲ့ ဒိုဝ်း ကြုဝ်ကြာမ် ယေ ဂေ နီ၊ တး လှူ ဒီ မဲ ဇဝ်၊ တဲး ယေ ဘော ပွိုန် ဒီ ဆမ် ဟုဝ် အာဒါ မဲ ဇဝ် အီ မိုဝ်း ပွုန် တာင်။ မာလဲ၊ ကြုဝ် ဂေ တီ ဘော မုး တူတ့် ကြုဝ် မဲ ဇဝ်။ 17 အိုယ် မဲ ဇဝ်ဖြာ ပီ ကြိုပ် အုဝ်၊ အုဝ် ဟဲ့ နပ်၊ မဲ ဇဝ် ဇဲတ် ဒီ ယွတ် နဝ်း ဒူအီ ဒွန် အီ။ မဲ မိူဝ် အိုင် ဂေ ဒူအီ အီ မိုဝ်း နဝ်း ဆိူဝ် နဝ်း မှာန်။ အုဝ် မိူဝ် ဟဲ့ မိုဝ်း နဝ်း ဆိူဝ် နဝ်း မှာန် ဘော မိုဝ်း နဝ်း ဒါခိုယ် ဒီ လှူ။ အုဝ် ဝီ ယိုဝ် ဘော ဂေ ဒူအီ အီ ကွယ် ဒီ နီ၊ ဂေ မိူဝ် ဟဲ့ မိုဝ်း နဝ်း ခူယ် ဒါခိုယ် ကာဆဝ် ကူပ် ဟဲ့ ပွိုန် ဂေ ဒီ လှူ ဒီ မဲ ဇဝ်။

18 မဲ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဂုန့် ဒင် ယေ အီ မုး အာဘြာဟမ်၊ အာဆဲက် ဘော အာကူပ်၊ တဲး ဂေ ဒူအီ ပီ အိုပ် မဲ ဇဝ် နီ မိုဝ်း နဝ်း ပါယ် တီ ဆေဆေ၊ ကွဲ့ တဲး န့ ကာဒတ်။ တဲး ဂေ မိုဝ်း နဝ်း ရွက့် မဲ ဇဝ် ဆေဆေ။

19 အုဝ် မှာန့်၊ တဲး ဂွန် အုဝ် အီ စိူဝ် အာဆာလုဝ်မုဝ် နီ မိုဝ်း နဝ်း ဆီ ဘူင် ဒူပ် ဂြုဝ်း မဲ ဇဝ် ဒွန် မျုဝ်။ တဲး အန် ဘော ပွိုန် ဒီ ဘူင်၊ ပွိုန် ဒီ ဆမ် ဟုဝ် ဇဝ်ဖြာ ဒူပ် ပဲ့ ဟဲ့ ရဲန် အုန် အုဝ် နီ။”

20 ဟဲ့ ဟွတ့် ပါယ် တီ အာဒါဝိတ် ဝီ ကာလာင် ဒီ ဂေ ဒူအီ ကိူန် တဝ်း၊ “တဲး ဘေ အိူပ် မျုက် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။” ပါယ် တီ ခဲ့ ကွယ် ဂေ ဒူအီ ဘောကာဂ့လျီတ် မိူဝ် ကာဖြူမ် ဒီ အိူပ် မျုက် ဇဝ်ဖြာ အီ မုး ဇဝ်ဖြာ ပီ ကြိုပ် ဂုန့် ဒင် ဂေ။ ဂေ မိူဝ် မုတ် ဂိုပ် လူင်၊ ဝီ ကြိုပ် ဇဝ်ဖြာ ဘော ခုန်ဒီခမ်။

21 ဘော ဇမ် ပါ ခဲညှာ ဂေ ဝီ ဘူင် ဘ့လွယ် လှူ ဒီ ဇဝ်ဖြာ။ ဂေ မိူဝ် လှူ ပီ ဒီ လှူ အီ ဒုဝ့် ဒီ ငဝ် ဘော မုး မက် အာလူင့် အူ ဟြဲန့် ဒုဝ်၊ မာဘူ အာလူင့် အူ ဟြဲန့် ဒုဝ်၊ ဂွန် မာဘူ အူ ဟြဲန့် ဒုဝ်။ ဂေ လှူ ဘော ပီ ဒီ ဒျီင် ဘော ပီ လှူ အာမျုဝ် ဟဝ် အီ ဟဲ့ ကိူန် ကာဆဝ်။ န့ မုး ပီ လှူ ဂေ ဒီ ဇဝ်ဖြာ အာဒါ ဂေ ဒူအီ အီဆာရေလ ဘောကာဂ့လျီတ်။ 22 ဆီငဲ တီ ဂေ မိူဝ် ဟူမ် ရိုမ် ဘျုဝ် ဘျုဝ် ကျဝ် ကျဝ်၊ ကွယ် ဒါခိုယ် ကာဆဝ် ဘော လှုဝ်း ဇဝ်ဖြာ။ ဂေ မိူဝ် ဝီ စုဝ့် မျုက် အာဆာလုဝ်မုဝ် ပေါ အူ ဇေန့်၊ တဲး အန် ဘဲန် ခုန်ဒီခမ်။ ဂေ မိူဝ် ဂါဝ် ပွုန် ဇဝ်ဖြာ ဘော ဖဝ်း နာမန် ဒီ ဂိန့် အန်၊ တဲး အန် ဘဲန် ခုန်ဒီခမ်။ ဂေ တဲး ဘော အာဇာဒူက် ဘဲန် ဒါ အီ လှူ ဒီ ဇဝ်ဖြာ။ 23 ပါယ် တီ အာဆာလုဝ်မုဝ် ဘော ဘဲန် ခုန်ဒီခမ် တုတ့် ဒဲင် မာလာင် ပီ ဒွါ ဇဝ်ဖြာ။ အန် ဘော ဝီ ပ့လု ဂုန့် အန် အီ စိူဝ် အာဒါဝိတ်။ ခဲ့ ပီ ဘူင် အန် မိူဝ် အွင်။ ဂေ ဒူအီ အီဆာရေလ ဘောကာဂ့လျီတ် မိူဝ် ထူမ် ဂြုဝ်း အန်။ 24 ဘော မုး အာမူ အာမာတ် ခုန်ဒီခမ်၊ ဘော မုး ဒါ ဘုဝ် အီ အိုပ် ဒါ ဆိုက် အီ ကျ ဒီ ကာဂုဝ်း ဘော ဂေ အီ မုး ဂွန် အာဒါဝိတ်၊ ဂေ ဘောကာဂ့လျီတ် ခမ် ပီ အိုပ် ခုန်ဒီခမ် အာဆာလုဝ်မုဝ် တီ။

25 ဇဝ်ဖြာ မိူဝ် စုဝ့် မျုက် အာဆာလုဝ်မုဝ် တဲး ဂေ ဒူအီ အီဆာရေလ ဘောကာဂ့လျီတ် ယိုဝ်။ အန် ဇဝ် မိူဝ် ဒွါ တဲး အာဆာလုဝ်မုဝ် မိုဝ်း အာဖုင် ဒင်ခုဝ် တာင် လွှိုမ် ဂေ ခုန်ဒီခမ် ဒူအီ အီဆာရေလ ဒွန် ကာဒင် အီ ဟဲ့ ပွုန် တး အာတ့် နီ။

26 အာဒါဝိတ် အီ မုး ဂွန် အာယေဆေ တွိုန်၊ အန် မိူဝ် ဟဲ့ အိုပ် မိူင် အီဆာရေလ ဘော မိူင်။ 27 အန် မိူဝ် ဟဲ့ အိုပ် အာဒါ ဖွုန် ဂိုဝ် ဆီနမ်။ အန် ဘော ကွယ် ခဲင် ဟုဝ် အန် ဒီ မိူင် ဟေဘြုဝ် ဘူ ဆီနမ် ဘော ခဲင် မိူင် ယေရူဆာလဲမ် အူယ် ဂိုဝ် ဒီ အူယ် ဆီနမ်။ 28 အန် ဟဲ့ ကတ် ကာဆဝ်။ အာဆာက် အန် မိူဝ် ဟဲ့ တူင့်၊ အန် ဟဲ့ ကွယ် ဒါခိုယ် ကူပ် မိုဝ်း အန် ကြုဝ်ကြာမ် ရွိုန် ဂေ ခြိဝ် ကိူန် ဘော ကူပ် ဒူအီ ဘောကာဂ့လျီတ် မိူဝ် ရုဝ်ဆေ အန်။ ဝါယ် ဟဲ့ ယမ် အန်၊ ဂွန် အီမာယ် အန် အီ စိူဝ် အာဆာလုဝ်မုဝ် ဘော ဝီ ဘဲန် ခုန်ဒီခမ် ပ့လု အန်။

29 လွင် ပီ ဘူင် ခုန်ဒီခမ် အာဒါဝိတ် ဒွန် မျုဝ် စုး ဆိန့် ဒေါ ဂုဝ် အန် ကော ဇမ် ဒီ ကာဒဲ့ န့ ဟဲ့ ဒဲမ် အုန် ခဲင် ဘပ် ပဲ့ ပီ ဒဲမ် အာဆာမူအေန် အီ မုး ဒါ အီ ယိုဝ်။ ဘော ခဲင် ဘပ် ပီ ဒဲမ် အာနာထာန် အီ မုး ဒါ အီ ဘျာန် ဂြုဝ်း ဇဝ်ဖြာ။ ဘော ခဲင် ဘပ် ပီ ဒဲမ် အာဂတ် အီ မုး ဒါ အီ ယိုဝ်။ 30 ခဲင် ဘပ် ပီ ဒဲမ် အုန် ဂေ အူယ် ဝီ တီ၊ န့ ဘော ဒဲမ် လွင် ဟဲ့ မိုဝ်း အန် ပွုန် ဒီ အိုပ် မာန် မိူင် ဘော လွင် ဟဲ့ မိုဝ်း အန် အာဖုင် ဒင်ခုဝ် ဘော လွင် အီ ဟဲ့ ဘုဝ် ဘဲန် ဒီ အန်။ န့ ဘော ဒဲမ် ဘော လွင် မိူင် အီဆာရေလ ဘော မိူင် ဟဝ် အီ ကွယ် ဒွန် နာ ဒွန် ပ့လုဝ့်။