1 ဝါယ် ခုန်ဒီခမ် အာဟပ် ဟဲ့ ဟွတ့် ယမ်၊ ဂေ ဒူအီ ခဲင် မိူင် မုဝ်အာပ် ဘော လာယ် ကာဘး ဒီ ဒူအီ အီဆာရေလ။ 2 အာဟာဇီယာ တွိုန် ဘော စုဝ်း ဒီ ကာဘဲး အီ ကွယ် ဒီ ခူပ် ဟူင် အန် နာ ခြွင့် ဒဲင်၊ ဘော ဘဲန် ဆဝ် ဒီ အန်။ အန် ဘော စ်ု ဒဲစေန့် အန် ဟာဝ်။ အန် တဝ်း ဒီ ဂေ၊ “ဘေ ဟာဝ် ဒူင် ကွယ် ဇဝ် ဘာလဆေဘုဝ် အီ ကွယ် မိူင် အေခြူန် တွိုန်။ ဘေ ဒီမွှတ် လွင် ဆဝ် အုဝ် နီ၊ ယုဝ် န့ ဒီ ကဲန်၊ တူ ကဲန်။”

3 ဒေါ အန် တီ အာမူ အာမာတ် ဇဝ်ဖြာ ဘော ကာလာင် ဒီ အာအေလီယာ အီ တး မိူင် ထီဆာဘီ တွိုန်။ အန် တဝ်း၊ “မဲ ယိတ့် ဟာဝ်၊ တဲး မဲ လာယ် ကာတုန့် ဒီ ဂေ ဒဲစေန့် ခုန်ဒီခမ် ဆာမာရီ တွိုန်၊ တဲး မဲ ကာလာင် ဒီ ဂေ တဝ်း၊ ‘ကူပ် ထာင် ဘေ အာဝ် ဟူ မိုဝ်း ဇဝ်ဖြာ ခဲင် မိူင် အီဆာရေလ၊ ဘေ ကော လုဝ် ဟာဝ် ဒီမွှတ် ဇဝ် ဘာလဆေဘုဝ် ဒီ မိူင် အေခြူန်။’ 4 ကူပ် ပါယ် တီ ဇဝ်ဖြာ ဝီ ကာလာင် တဝ်း၊ ‘မဲ အာဝ် ဟူ ပွိုန် ယိတ့် ဒဲင် ကာစှူင့် ဒူင် အိတ် မဲ တီ။ မဲ ဒီ ယမ် အာခ်ု မှာန်။’” ဟဲ့ ဟွတ့်၊ အာအေလီယာ ဘော ဟာဝ်။

5 ဒဲစေန့် အာဟာဇီယာ ဂေ တွိုန် ဘော ဝီ တး ဒူင် ကွယ် ခုန်ဒီခမ် ဂေ။ အန် ဘော ဒီမွှတ် ဂေ တဝ်း၊ “န့ ပါယ် မှဝ် ဘေ ဝီ တး။” 6 ဒဲစေန့် အန်၊ ဂေ ဘော ကာဖြူမ် ဒီ ကာလာင် ဒီ အန်။ ဂေ တဝ်း၊ “န့ မိုဝ်း ဒူအီ အူ ဝီ လာယ် ကာတုန့် ဒီ ယေ၊ အန် ကာလာင် ဒီ ယေ။ အန် တဝ်း၊ ‘တဲး ဘေ ဝီ ဝေန့် ဒူင် ကွယ် ခုန်ဒီခမ် အီ စ်ု ဘေ တး တွိုန်၊ ကာလာင် ဒီ အန် ခဲ့ ပီ တဝ်း ဇဝ်ဖြာ။ အန် တဝ်း၊ “ကူပ် ထာင် မဲ အာဝ် ဟူ မိုဝ်း ဇဝ်ဖြာ ခဲင် မိူင် အီဆာရေလ နီ၊ မဲ ကော လုဝ် ဟာဝ် ဒီမွှတ် ဇဝ် ဘာလဆေဘုဝ် ခဲင် မိူင် အေခြူန် တွိုန်။ ခုဝ် အန် တီ၊ မဲ အာဝ် ဟူ ပွိုန် ယိတ့် ဒဲင် ကာစှူင့် ဒူင် ဟဲ့ ဟုဝ့် အိတ် မဲ တီ၊ မဲ အာဝ် ဟူ ပွိုန် ဝီ လူင်။ မဲ ဒီ ယမ် အာခ်ု မှာန်။”’”

7 ခုန်ဒီခမ် ဝီ ဒီမွှတ် ဂေ တဝ်း၊ “ဒူအီ ပီ လာယ် ကာတုန့် ဘေ တီ၊ အီ ကာလာင် ဂြုဝ်း ဇိုဝ် တီ၊ အန် မုး ဒူအီ ပါယ် မှဝ်။း”

8 ဂေ တွိုန် ဝီ တဝ်း၊ “ဒူအီ ဝီ တီ မိုဝ်း ဟိုက် ကိူန်။ အန် မိုဝ်း ဟိုက် ဘော ဒုဝ် ဘော စှိုပ် ဆဲ့ ဟုန် ဒီ ညွယ် အန်။” အန် ဝီ တဝ်း၊ “ဟဲ့ မုး အာအေလီယာ၊ ဒူအီ အီ တး မိူင် ထီဆာဘီ တွိုန်။”

9 အန် ဘော စ်ု ဒါ တာင် အီ အိုပ် ဒါ ဆိုက် ဖန် ဂိုဝ် ဝီ၊ တဲး အန် ဘော ဂေ ဖန် ဂိုဝ် ဝီ တွိုန် ဟာဝ် ဇမ် ဒူင် ကွယ် အာအေလီယာ။ အာအေလီယာ ယီ ကွယ် ဒဲင် နွန်။ ဂေ ဘော တး ဇမ် ဒူင် ကွယ် အန် တီ၊ ဝီ ကာလာင် ဒီ အန် တဝ်း၊ “အိုယ် မဲ ဒါ အီ ပီ တိုယ် ဇဝ်ဖြာ၊ ခုန်ဒီခမ် ဟဲ့ တဝ်း၊ တဲး မဲ ဝီ လူင်၊ တး ဒူင် ကွယ် အန်။”

10 အာအေလီယာ ဝီ ကာလာင် ဒီ ဂေ ဒူအီ ပီ တိုယ် ခုန်ဒီခမ် တွိုန် ဝီ တဝ်း၊ “ဆေ ဟဲ့ မှာန် မုး အုဝ် ဒါ အီ ပီ တိုယ် ဇဝ်ဖြာ၊ တဲး ငဝ် တး ခဲင် ဂါင်ဟြာဝ်၊ တဲး န့ ကာဆိုမ် ဘော မဲ အီ အိုပ် ဒါ ဆိုက်၊ ဘော ဒူအီ မဲ ဖန် ဂိုဝ် ဝီ အီ ဒူပ် မဲ။” အန် ဟဲ့ ဟွတ့် ကာလာင်၊ ငဝ် ဘော တး ခဲင် ဂါင်ဟြာဝ် ဘော ကာဆိုမ် ဂေ တွိုန် ဘော အန် ဘော ဒူအီ အီ ဒူပ် အန် ဖန် ဂိုဝ် ဝီ၊ ဂေ ဘော ကာဆိုမ် တူတ့်။

11 ခုန်ဒီခမ် ပီ ဝီ စ်ု ပေါ အူ ဖိုင် အီ မုး ဖန် ဂိုဝ် ဝီ ဘော ဒါ အီ အိုပ် ဂေ၊ တဲး ဂေ ဝီ ဟာဝ်။ ဂေ ဘော ကာလာင် တဝ်း၊ “အိုယ် မဲ ဒါ အီ ပီ တိုယ် ဇဝ်ဖြာ၊ ခုန်ဒီခမ် ဟဲ့ ဒမ် တဝ်း၊ တဲး မဲ ဝီ တး ခြန် ခြန်။”

12 အာအေလီယာ ပီ ဝီ ကာလာင် ဒီ ဂေ တဝ်း၊ “ဆေ ဟဲ့ မှာန်၊ မုး အုဝ် ဒါ အီ ပီ တိုယ် ဇဝ်ဖြာ၊ တဲး ငဝ် လေး ခဲင် ဂါင်ဟြာဝ်၊ တဲး န့ ကာဆိုမ် မဲ ဘော ဒူအီ ဂေ အီ ဒူပ် မဲ ဖန် ဂိုဝ် ဝီ တီ။” အန် ဟဲ့ ဟွတ့် ကာလာင်၊ ဇဝ်ဖြာ ဘော တဲး ငဝ် စုဝ်း ခဲင် ဂါင်ဟြာဝ်၊ လူင် ကာဆိုမ် ဘော ဒါ အီ အိုပ် ဖိုင် တီ ဘော ဒူအီ ဖန် ဂိုဝ် ဝီ တွိုန်။ ဂေ ဘော ကာဆိုမ် တူတ့်။

13 ဟဲ့ ဟွတ့်၊ ခုန်ဒီခမ် ပီ ဝီ စ်ု ပေါ အူ ဖိုင် ဟာဝ်။ ဒါ အီ အိုပ် ဒါ ဆိုက် ဖန် ဂိုဝ် ဝီ ဘော ဒါ ဆိုက် ဖန် ဂိုဝ် ဝီ၊ ဂေ ဝီ ဟာဝ်၊ ဟဲ့ နုဝ့် အူယ် ဖိုင် ဘော အူယ် ဇေန့် ခါ နီ။ ဂေ ဖိုင် ဟာအူယ် တီ ဟဲ့ ဟွတ့် တး ဇမ်၊ ဒါ အီ အိုပ် ဂေ ဘော ခြိုပ်ခြဝ် ဒီ အာတ့် အာအေလီယာ။ ဂေ ဘော ဒွင်ဘာန် အန် တဝ်း၊ “အိုယ် မဲ ဒါ အီ ပီ တိုယ် ဇဝ်ဖြာ၊ အုဝ် မှာန့်၊ ကွဲ့ တဲး ယေ ယမ်။ ဘော အုဝ်၊ ဘော ဂေ ဒူအီ အီ ဒူပ် အုဝ် ဖန် ဂိုဝ် ဝီ နီ၊ တဲး မဲ ကာဝေ။ 14 ငဝ် ဟဲ့ စုဝ်း တး ခဲင် ဂါင်ဟြာဝ်၊ ဟဲ့ ကာဆိုမ် အာ ဖိုင် တွိုန်၊ ဘော ဒူအီ အိုပ် ဂေ ဟဲ့ ကာဆိုမ် တူတ့်။ ဒေါ တီ နီ အုဝ် မှာန့်၊ တဲး ယေ လွတ် ယမ်။”

15 ဒေါ အန် တီ အာမူ အာမာတ် ဇဝ်ဖြာ ဘော ကာလာင် ဒီ အာအေလီယာ တဝ်း၊ “တဲး မဲ လူင် ဒူပ် ဂေ၊ အာဝ် လုဝ် ယုဝ် ဂေ။” အာအေလီယာ ဘော လူင် ဒူပ် ဂေ တွိုန်၊ ဟာဝ် ဒူင် ကွယ် ခုန်ဒီခမ်။ 16 အန် ဘော ကာလာင် တဝ်း၊ “ဇဝ်ဖြာ တဝ်း ဒီ မဲ၊ တဲး မဲ ဟဲ့ စ်ု ဒီဘဲ မဲ၊ တဲး ဂေ ဟာဝ် ဒီမွှတ် ဒီ ဇဝ် ဘာလဆေဘုဝ် ဒီ မိူင် အေခြူန် တွိုန်။ ကူပ် ထာင် မဲ၊ မိူင် အီဆာရေလ နီ အာဝ် မိုဝ်း ဇဝ်ဖြာ အီ ပွိုန် ဒီမွှတ်၊ မဲ ဟဲ့ ဘူင် ဇိုဝ် တီ။ ကူပ် န့ ပါယ် တီ မဲ တူ ပွိုန် ယိတ့် ဒူင် အိတ် မဲ။ မဲ တူ ပွိုန် လူင်။ မဲ ဒီ ကာဒုး ဒီ ယမ် အာခ်ု မှာန်။”

17 ပါယ် တီ ခုန်ဒီခမ် တွိုန် ဘော ယမ်။ န့ ဘော မှာန် ခဲ့ ပီ တဝ်း ဇဝ်ဖြာ ဒီ အာအေလီယာ။ ကူပ် တူ မိုဝ်း ခုန်ဒီခမ် အာဟာဇီယာ ဂွန် အီမာယ်၊ အာယုဝ်ရမ် ဘော ဝီ ဘဲန် ခုန်ဒီခမ်။ အာယေဟုဝ်ရမ် အီ မုး ဂွန် အာယောဆာဖာတ် ဟဲ့ ဘဲန် ခုန်ဒီခမ် ခဲင် မိူင် ယူဒါ အာဒါ အာ ဆီနမ်။ ဒေါ အန် တီ အာယုဝ်ရမ် ဟဲ့ ဘဲန် ခုန်ဒီခမ် အီ အိုပ် မိူင် အီဆာရေလ။

18 လွင် ပဲ့ ဟဲ့ ဘူင် အာဟာဇီယာ အီ ဆီ ဂိတ် ဂေ တွိုန်၊ ဟဲ့ ဒဲမ် အုန် ခဲင် ဘပ် လွင် ခုန်ဒီခမ် ခဲင် မိူင် အီဆာရေလ။