1 မိူင် အာရာမ် ဂါယ် မိူင် အီဆာရေလ အာဝ် ဟူ လာယ် ကာဂုဝ်း အာဒါ အူယ် ဆီနမ်။ 2 ဒေါ ဒီ နုဝ့် အူယ် ဆီနမ် တွိုန်၊ အာယောဆာဖာတ် အီ မုး ခုန်ဒီခမ် အီ အိုပ် မိူင် ယူဒါ ဘော ဟာဝ် ဒူင် ကွယ် ခုန်ဒီခမ် အီဆာရေလ။

3 ခုန်ဒီခမ် အီဆာရေလ ဘော ကာလာင် ဒီ ဂေ ဒူအီ အန် ဘော ဒီဘဲ အန် ဂေ တွိုန် တဝ်း၊ “ဘေ နပ် လွင် မိူင် ရာမူတ် ခဲင် ကာဒါယ် မိူင် ဂီလေအာတ် တွိုန်၊ န့ မုး မိူင် အေ။ အေ ယီ တူ ဒိုဝ်း ဝိဝ် ဒီ ခုန်ဒီခမ် အာရာမ်။ အေ ကွယ် နှိမ် နှိမ် ပါယ် တီ။” 4 ခုန်ဒီခမ် အီဆာရေလ တွိုန်၊ အန် ဝီ ကာမွုန် ဒီ အာယောဆာဖာတ်။ အန် တဝ်း၊ “မဲ ဆီ ဟာဝ် ဒီ မိူင် ရာမူတ် ခဲင် ကာဒါယ် မိူင် ဂီလေအာတ် တွိုန် ဒူပ် အုဝ်၊ ကာဂုဝ်း ဒီ ဂေ။း” 5 အာယောဆာဖာတ် ဝီ တဝ်း၊ “အိုဝ်၊ အာဝ် လိူက်။ အုဝ် ဟဲ့ ဘဲန် ပီ မဲ။ ဒူအီ အုဝ် မိူဝ် ဟဲ့ ပီ ဒူအီ မဲ။ မ့ပြွင့် အုဝ် ဟဲ့ ပီ မ့ပြွင့် မဲ။” အာယောဆာဖာတ် ပီ ဝီ တဝ်း၊ “န့ ယီ လုဝ် ဒီမွှတ် ဇဝ်ဖြာ ဒီ အာတ့်။”

6 ခုန်ဒီခမ် အီဆာရေလ တွိုန် ဘော ဒဲ့ ဒီ ကာမွုန် ဒီ ဂေ ဒူအီ ဘျာန် ဂြုဝ်း ဇဝ်ဖြာ ကာဘက် ဖွုန် မာယဝ်း ဝီ။ အန် ဘော ဒီမွှတ် ဂေ တဝ်း၊ “န့ မွှိုမ် အာဝ် မွှိုမ် တဲး ယေ ဟာဝ် ဒီ မိူင် ရာမူတ် တွိုန်။း” ဂေ ဝီ ကာဖြူမ် ဒီ တဝ်း ဒီ အန်၊ “တဲး မဲ ဟာဝ်။ ဇဝ်ဖြာ ဒီ ဒွါ မိူင် တီ ဒီ မဲ ဇဝ်။”

7 အာယောဆာဖာတ် ဝီ တဝ်း၊ “န့ ဆီ မိုဝ်း ဒူအီ ဘျာန် ဂြုဝ်း ဇဝ်ဖြာ ပေါ န့ ပွါ၊ တဲး အေ ပွိုန် ဒီမွှတ်။း”

8 အန် ဟဲ့ ဟွတ့် တဝ်း ပါယ် တီ ခုန်ဒီခမ် အီဆာရေလ ဝီ တဝ်း ဒီ အာယောဆာဖာတ်၊ “န့ မိုဝ်း အီမာယ် အူ ဝီ။ အန် စိူဝ် အာမီခါယာ အီ မုး ဂွန် အာမီလ တွိုန်၊ အန် ဟဲ့ ပွိုန် ဒီမွှတ် ဒီ ဇဝ်ဖြာ။ မာလဲ အုဝ် ဇွင့် အန်။ ခုဝ်၊ အန် ကာလာင် မီ လွင် နာ တူ မွှိုမ် ဒီ အုဝ်။ အန် တူ ကာလာင် လွင် နာ မွှိုမ် ဒီ အုဝ်။” အာယောဆာဖာတ် ပီ ဝီ တဝ်း၊ “မဲ ခုန်ဒီခမ်၊ မဲ ကွဲ့ ကာလာင် ဂြုဝ်း ပါယ် တီ။”

9 ဝါယ် အန် တီ ခုန်ဒီခမ် အီဆာရေလ တွိုန် ဝီ ဒဲ့ ဒါ အီ အိုပ် ဒါ ဆိုက် အူ ဝီ၊ တဝ်း ဒီ အန်၊ “မဲ ဟာဝ် ဒဲ့ အာမီခါယာ အီ မုး ဂွန် အာမီလ တွိုန်၊ တဲး အန် တး ခြန် ခြန်။”

10 ဒေါ အန် တီ ခုန်ဒီခမ် အီဆာရေလ ဘော ခုန်ဒီခမ် ယူဒါ တွိုန် ဂါယ် ဘော စှိုပ် ခြိုင် ခုန်ဒီခမ် ဘော တုတ့် ဒီ ကွယ် ဒဲင် မာလာင် ရာင် ဆေ ရာင် အန်။ ဂေ ကွယ် ပါယ် တီ ကာဆိူဝ် ဒူင် ဂ့လင် ဘာင် မာလုဝ်း မိူင် ဆာမာရီ တွိုန်။ ခဲ့ ကွယ် ဒူအီ ဘျာန် ဂြုဝ်း ဇဝ်ဖြာ တွိုန် ဘော ကာလာင် နာ အာတ့် ဂါယ် တွိုန်။ 11 အီ မုး အာဇေဒေကီ ဂွန် အာခေနာနာ တွိုန်၊ အန် ဘော ဘူင် ဒိုဝ်း ဟိန် ဘတ့် ဘူင် ဘဲန် နိုင် အန်၊ ဘော ကာလာင် ဂြုဝ်း တဝ်း၊ “ဇဝ်ဖြာ ဟဲ့ ကာလာင် တဝ်း၊ ‘မဲ ခုန်ဒီခမ် ဒီ ဒိုဝ်း နိုင် ဘတ့် နီ၊ ဘ့လုး ဂေ ဒူအီ အာရာမ်၊ တဲး ဂေ ကော စှိုမ် တူတ့်။’”

12 ခဲ့ ကွယ် ဂေ ဒွန် အီ ဒူအီ ဘျာန် ဂြုဝ်း ဇဝ်ဖြာ တွိုန်၊ ဂေ ဘော ကာဖြူမ် ဒီ တဝ်း၊ “မဲ ခုန်ဒီခမ်၊ တဲး မဲ ရဲန် ဆိုက် မဲ၊ ဟာဝ် ဒီ မိူင် ရာမူတ် ခဲင် ကာဒါယ် မိူင် ဂီလေအာတ်၊ တဲး မဲ ပဲ ဂေ။ ဇဝ်ဖြာ ဒီ အာပ် ဒွါ ဂေ ဒီ မဲ။”

13 ဂေ ဒါလာမ် ပီ စ်ု ခုန်ဒီခမ် ဟာဝ် ဒဲ့ အာမီခါယာ တွိုန် ဝီ ကာလာင် တဝ်း၊ “ဒူအီ အီ ဘျာန် ဂြုဝ်း ဇဝ်ဖြာ ဂေ နီ ဂေ ကာလာင် မီ ဂြုဝ်း မွှိုမ် ဒီ ခုန်ဒီခမ်။ မဲ မိူဝ် ဝီ လုဝ် ကာလာင် ဂြုဝ်း မွှိုမ် တဲး န့ ပီ ပီ တဝ်း ဂေ။”

14 အာမီခါယာ ယီ တဝ်း၊ “အုဝ် တဝ်း အာခ်ု ဒီ မဲ၊ အုဝ် ဒီ ကာလာင် မီ ခဲ့ ပီ တဝ်း ဇဝ်ဖြာ။”

15 အန် ဘော ဟာဝ် ဇမ် ဒူင် ကွယ် ခုန်ဒီခမ် တွိုန်၊ ခုန်ဒီခမ် ဝီ တဝ်း ဒီ အန်၊ “အိုယ် အာမီခါယာ၊ ဆေ ဒါ ဆိုက် အေ ဟာဝ် ဒီ မိူင် ရာမူတ် အီ ကွယ် ခဲင် ကာဒါယ် မိူင် ဂီလေအာတ် တွိုန်၊ န့ နှဲန် ဒီ မွှိုမ် အာဝ် မွှိုမ်။း” အာမီခါယာ တွိုန် ဝီ တဝ်း၊ “ဟဲ့ ပွိုန် ဟာဝ်၊ မဲ ဒီ ပဲ ဂေ။ ဇဝ်ဖြာ ဒီ ဒွါ ဂေ ဒီ မဲ၊ မဲ ခုန်ဒီခမ် တာင်။”

16 ပန် တီ ခုန်ဒီခမ် ဝီ တဝ်း ဒီ အန်၊ “အုဝ် ဟဲ့ ဒွိုမ် တဲး မဲ ခမ် ကာဒိက် ဆတ်ဇာ ဒီ အာတ့် ဇဝ်ဖြာ၊ တဲး မဲ ကာလာင် ဂြုဝ်း အီ မှာန် အာခါခ်ု ဒီ အုဝ်။ ဘော ဒေါ တီ နီ အုဝ် ဆီ တဲး မဲ ကာလာင် မီ ဂြုဝ်း ဇဝ်ဖြာ။”

17 အန် ဝီ တဝ်း။ “အုဝ် ဟဲ့ ယိုဝ် ဂေ ဒူအီ အီဆာရေလ ဘောကာဂ့လျီတ် အီ ကွယ် ဒီ နွန် တီ။ ဂေ ဟဲ့ လာယ် ကာယဝ်း တူတ့်၊ ဟဲ့ နှဲန် မာဘူ အီ တူ မိုဝ်း ဒါ ကာညာ အီ ယွတ် မဲန် ဂေ။” ဇဝ်ဖြာ ဝီ တဝ်း၊ “ဂေ ဒူအီ အီ တူ မိုဝ်း ဒါ ကာညာ နီ၊ တဲး ဂေ ဝီ ဝေန့် ဒီ ကာင် ဒွန် အီ။”

18 ပန် တီ ခုန်ဒီခမ် အီဆာရေလ ဝီ ကာလာင် ဒီ ခုန်ဒီခမ် အာယောဆာဖာတ် တဝ်း၊ “အုဝ် ယဲ့ ဟဲ့ ကာလာင် ဒီ မဲ၊ အန် တွိုန်၊ အန် တူ ကာလာင် ဂြုဝ်း နာ မွှိုမ် လွင် အုဝ်။ အန် ကာလာင် မီ နာ တူ မွှိုမ်။”

19 အာမီခါယာ တွိုန် ဝီ တဝ်း၊ “ကူပ် န့ ပါယ် နီ၊ တဲး မဲ ဝီ ထူမ် ဂြုဝ်း ဇဝ်ဖြာ။ အုဝ် ဟဲ့ ဒွိုမ် ယိုဝ် ဇဝ်ဖြာ ကွယ် ဒဲင် မာလာင် အန်။ အာမူ အာမာတ် အန် ဂေ ဟဲ့ ကွယ် ဘ့လာက် အာဂ ဘော ဘ့လာက် အာအး အန် ဇဝ် ဒွန် ဘ့လာက်။ 20 ဇဝ်ဖြာ မိူဝ် တဝ်း၊ ‘အာဆေ အီ ဒီ ကာဆုး ခုန်ဒီခမ် အာဟပ်၊ တဲး အန် ဟာဝ် ကာဂုဝ်း ဒီ မိူင် ရာမူတ် ခဲင် ကာဒါယ် မိူင် ဂီလေအာတ် တွိုန်၊ တဲး အန် ယမ် ဒီ တီ။း’ ဂေ အာမူ အာမာတ် ဇဝ်ဖြာ တွိုန် ဘော တဝ်း အူ ဝီ အူ မျုဝ်။ 21 ပန် တီ န့ မိုဝ်း အူ ကာဒင် တး ဇမ် ဒီ အာတ့် ဇဝ်ဖြာ၊ အန် တဝ်း၊ ‘အုဝ် အီ ဒီ ကာဆုး အန်။’ 22 ဇဝ်ဖြာ ဝီ ဒီမွှတ် အန် တဝ်း၊ ‘မဲ ဒီ ဘူင် ပါယ် မှဝ်။း’ အန် ဝီ တဝ်း၊ ‘အုဝ် ဒီ စ်ု ကာနမ် ဆီမာ ကာလုဝ် ကာဆုး ဂေ ဒူအီ ဘျာန် ဂြုဝ်း ဇဝ်ဖြာ၊ တဲး ဂေ ဝီ ကာလာင် မီ ဂြုဝ်း တူ မှာန်။’ ဇဝ်ဖြာ ဝီ တဝ်း၊ ‘တဲး မဲ ဟာဝ် ဘူင် ပါယ် တီ။ ပီ ဒီ ဘူင် မဲ ဇိုဝ် တီ ဒီ အွင်။’

23 ခုဝ် အန် တီ၊ ဇဝ်ဖြာ မိူဝ် ဟဲ့ စ်ု ကာနမ် ဆီမာ ကာလုဝ်၊ တဲး အန် ဝီ ကာလုဝ် ဂေ ဒူအီ အီ ဘျာန် ဂြုဝ်း ဇဝ်ဖြာ။ ဇဝ်ဖြာ ဟဲ့ ဟွတ့် ဆုင်ဖျာတ် တဲး မဲ ဇမ် ဒုက်။”

24 ဟဲ့ ဟွတ့်၊ န့ မိုဝ်း အာဇေဒေကီ အီ မုး ဂွန် အာခေနာနာ တွိုန်။ အန် ဘော တး ကာတတ် အာမီခါယာ တွိုန်၊ ကာထ နာ အန် တဝ်း၊ “နဝ်း ဖွိုမ် ဇဝ်ဖြာ ဟာဝ် နာ မှဝ် ဒေါ လေး အန် ဒီ အုဝ်၊ ဝီ ဟာဝ် ကာလာင် ဒီ မဲ။း”

25 အာမီခါယာ တွိုန် ဝီ ကာလာင် ဒီ အန် တဝ်း၊ “မဲ ဒီ နပ် လွင် အန် တီ ဆီငဲ ဒီ ဟာဝ် ချြီင် မဲ ခဲင် ဟူင် အိတ် အီ ကွယ် နာ ခဲင် တွိုန်။”

26 ပန် တီ ခုန်ဒီခမ် အီဆာရေလ တွိုန် ဝီ ကာလာင် တဝ်း၊ “တဲး ဘေ မှေတ့် အာမီခါယာ ဒွါ ဟာဝ် အန် ဒူင် ကွယ် အာမူန် အီ အိုပ် မိူင် နီ ဘော ဒီ အာယုဝ်အာတ် အီ မုး ဂွန် ခုန်ဒီခမ်။ တဲး ဘေ ကာလာင် ဒီ ဒါ ကာညာ တဝ်း၊ 27 ‘ခုန်ဒီခမ် ဟဲ့ ဒမ် တဝ်း၊ ဒိုဝ်း ဒူအီ ဝီ နီ ခြွင့် အန် ခဲင် ကာပိုမ်၊ တဲး အန် ဟူမ် မီ ခါမုန် ဂါယ် အိုမ်၊ တဲး အန် ယိုဝ် ပီ ပါယ် ဒီ ဒုက်၊ တဲး ကော ဇမ် ပန် ဒီ ဝီ တး ဒါခိုယ် အုဝ်။’”

28 အာမီခါယာ ပီ ဝီ တဝ်း၊ “ဆေ မဲ ဇဝ် ဟီ ပွိုန် ဒီ ဝီ တး ဒါခိုယ် တီ၊ ဂြုဝ်း ပဲ့ ဟဲ့ ကာလာင် အုဝ် တူ မုး ဂြုဝ်း ဇဝ်ဖြာ။” အန် ဟဲ့ ဟွတ့် ကာလာင်၊ အန် ဝီ တဝ်း၊ “အိုယ် ဘေ ဒူအီ ဘောကာဂ့လျီတ် တဲး ဘေ ထူမ် ဂြုဝ်း တီ။”

29 ပန် တီ ခုန်ဒီခမ် အီဆာရေလ ဂါယ် ခုန်ဒီခမ် အာယောဆာဖာတ် အီ အိုပ် မိူင် ယူဒါ တွိုန်၊ ဂါယ် ဘော ကာဖြူမ် ဒီ ရဲန် ဆိုက် ဂါယ်၊ ဟာဝ် ဒီ မိူင် ရာမူတ် ခဲင် ကာဒါယ် မိူင် ဂီလေအာတ် တွိုန်။

30 ခုန်ဒီခမ် အီဆာရေလ ကာလာင် ဒီ ခုန်ဒီခမ် အာယောဆာဖာတ်။ အန် တဝ်း၊ “အုဝ် ဒီ တာ ခြိုင် ကာပျာတ့်၊ ဟာဝ် ကာဂုဝ်း ဒီ ရန်ဆူ တီ။ အီ မုး မဲ၊ တဲး မဲ စှိုပ် ခြိုင် ခုန်ဒီခမ် မဲ။” ဟဲ့ ဟွတ့်၊ ခုန်ဒီခမ် အီဆာရေလ ဘော ကာပ့လု ခြိုင် အန်၊ ဘော ဟာဝ် ကာဂုဝ်း ဒီ ရန်ဆူ အူ ဇေန့်။

31 ခုန်ဒီခမ် အီ အိုပ် မိူင် အာရာမ် ယီ ကာလာင် အုန် ဒီ ဒါ ဘုဝ် အန် အူယ် ဂိုဝ် ဒီ အာ ဝီ အီ အိုပ် ဒါ ဆိုက် အီ ပဝ့် လက်လဝ် ဂေ တွိုန်။ အန် တဝ်း၊ “အာဝ် လုဝ် ကာဂုဝ်း ဒီ ဂေ ဒါ တာင် ဘော ဒီ ဂေ ဒါ ဆိုက်။ ဘေ ယွတ် မီ ခုန်ဒီခမ် အီဆာရေလ တွိုန်။” 32 ပန် တီ ဒါ ဘုဝ် တာင် အီ အိုပ် ဒါ ဆိုက် အီ ပဝ့် လက်လဝ် ဂေ တွိုန်၊ အန် ဝီ ယိုဝ် အာယောဆာဖာတ် တွိုန်။ အန် ဝီ တဝ်း၊ “အီ ဒွယ် ဟဲ့ မုး ခုန်ဒီခမ် အီဆာရေလ အာခ်ု မှာန်။” ဂေ ဘော ဝီ ကာဖြူမ် ဒီ တး တဝ်း ဒီ ဝီ ကာဂုဝ်း ဒီ အန်။ အာယောဆာဖာတ် တွိုန် ဘော ကာဒုး ဒီ ဒတ် တာင်။ 33 ဒေါ အန် တီ ဂေ ဒါ ဘုဝ် အီ အိုပ် ဒါ ဆိုက် အီ ပဝ့် လက်လဝ် ဂေ တွိုန်၊ ဂေ ဘော ဝီ နပ် ဝီ ယိုဝ်၊ အာဝ် မုး ခုန်ဒီခမ် အီဆာရေလ။ ဂေ အာဝ် ဟူ ဝီ ကာဂုဝ်း ဒီ အန်။ ဂေ ဘော ဝီ ဝး အန်။

34 န့ ယီ မိုဝ်း ဒူအီ အူ ဝီ၊ အန် ဘော ဒိုဝ်း အ အန် လာမ် ဘန့်။ ဘ့လာ အ အန် ဘော ဟာဝ် လဝ့် ယ ဆိူဝ် ဒီ ခူပ် ဆီတုဝ် ဟိန် ခုန်ဒီခမ် အီဆာရေလ တွိုန်။ ဟဲ့ ဟွတ့်၊ ခုန်ဒီခမ် အီဆာရေလ တွိုန် ဘော တဝ်း ဒီ ဒီဘဲ အန်၊ “ဒိုဝ်း လေး အုဝ် ဒူင် ကာဂုဝ်း နီ။ အုဝ် ဟဲ့ ယိုဝ် ဆဝ် ကာဆဝ်။” 35 ဆီငဲ တီ၊ ဂေ ဘော ဝဲ ကာဂုဝ်း ကိူန်၊ ဂေ ကာဘန့် လွှိုမ် အာတ့် တီ။ ခုန်ဒီခမ် တွိုန် ဘော ကွယ် ခဲင် လက်လဝ်၊ ဟာဝ် ကွယ် ဘ့လာက် ဒီ အာတ့် ဒူအီ အာရာမ် ဂေ တွိုန်။ နှာမ် အန် ဘော လေး စွတ် ခဲင် လက်လဝ် တွိုန်။ ဘော ဇမ် ဘာ ဒီ အပ်၊ ဖွိုမ် အန် ဘော တူတ့်။ 36 ဆီငဲ ဘော ဂေတ့် တွိုန်၊ ဂေ ဘော ဒတ် ကာလာင် ကာတဲ ဂေ တွိုန် တဝ်း၊ “အိုယ် ဘေ ဒူအီ ဒွန် အီ၊ အာဆေ မိူဝ် ဝီ ဝေန့် မိူင် ဒူင် ကွယ် အန်၊ အန် ကွယ် မိူင် မှဝ် မိူဝ်၊ ဟာဝ် မိူင် တီ။”

37 ပါယ် တီ ခုန်ဒီခမ် မိူဝ် ဟဲ့ ယမ်။ ဂေ ဘော ဒိုဝ်း တး အန် မိူင် ဆာမာရီ။ ဂေ ဘော ဘ့လေး အန် ခဲင် ဘာရေဝ် ခဲင် မိူင် ဆာမာရီ တီ။ 38 ဂေ ဘော ဘာယ် လက်လဝ် တွိုန် ဒီ အိုမ် ဒိုင် ပီ ဘူင် ဒူအီ အီ ကွယ် ခဲင် မိူင် ဆာမာရီ တွိုန်။ န့ မုး ဒူင် ဒီ တး တာ ယာ မာလမ် ဒီ အိုမ်။ မာဆုဝ် ဘော လျီ့ နှာမ် ခုန်ဒီခမ် ဒီ တီ။ န့ ဘော မှာန် ခဲ့ ပီ ဒွိုမ် တဝ်း ဇဝ်ဖြာ တွိုန်။

39 လွင် ပဲ့ ဟဲ့ ဘူင် ခုန်ဒီခမ် အာဟပ် အီ ဆီ ဂိတ်၊ န့ ဟဲ့ ဒဲမ် အုန် ခဲင် ဘပ် လွင် ခုန်ဒီခမ် အီ အိုပ် ဒူအီ အီဆာရေလ။ ဘော ဟုဝ် ပီ ဆမ် အန်၊ ပီ ဟဲ့ ပိတ် ပ့လဲ့ ဆာင် ဘော ရဲင် မိူင် ဂေ တွိုန် ပီ ဆမ် အန်၊ ကွဲ့ တဲး ရန်ဆူ ပွိုန် ဒီ လိုပ်၊ န့ ဟဲ့ ဒဲမ် အုန် တူတ့် ခဲင် ဘပ် တီ။ 40 ခုန်ဒီခမ် အာဟပ် တွိုန် ဟဲ့ ဟွတ့် ယမ် ဒူပ် ဂုန့် ဒါ အန် ဂေ တွိုန်၊ န့ မုး ဂွန် အီမာယ် အန် အီ စိူဝ် အာဟာဇီယာ၊ အန် ဘော ဝီ ပ့လု ဂုန့် အန်။

41 အာဟပ် ဟဲ့ ဘဲန် ခုန်ဒီခမ် ခဲင် မိူင် အီဆာရေလ အာဒါ ဖွုန် ဆီနမ်၊ 42 အာယောဆာဖာတ် အီ မုး ဂွန် အာဆာ တွိုန် ဘော ဝီ ဘဲန် ခုန်ဒီခမ် ခဲင် မိူင် ယူဒါ။ ဒေါ ဘဲန် အန် ခုန်ဒီခမ်၊ အာဆာက် အန် ဟဲ့ နုဝ့် အူယ် ဂိုဝ် ဒီ ဖန် ဆီနမ်။ အန် ကွယ် မိူင် ယေရူဆာလဲမ် အာဒါ အာ ဂိုဝ် ဒီ ဖန် ဆီနမ်။ မာ အန် စိူဝ် နာင် အေစူဖ။ အန် မုး ဂွန် အီဘိုန့် အာဆီလဝီ။ 43 အန် တွိုန် အန် တူ ဘ့လိူင် ပီ ပါယ် န့တေန့် ဂုန့် အန် အီ စိူဝ် အာဆာ တွိုန်။ အန် ဒူပ် တူတ့် ဒွန် မျုဝ်။ အန် ဘော ဘူင် အီ ဘွတ် အီ မွှိုမ်၊ တဲး န့ လဝ့် နဝ်း ဇဝ်ဖြာ။ အန် ယီ တူ ပျာတ့် ဝဲန် ဒူင် ပီ ကြိုပ် ဂေ အာရိုပ် ဒဲင် နွန် ဒွန် ပ့လုဝ့်။ ဂေ ဒူအီ ဆီ ပွိုန် ဒီ ဒုဝ့် ပီ လှူ အီ အုး ငှုန် ဘော ဒုဝ် ဆတ်ဒါဝါ ဒွန် မျုဝ် ဒီ ဇဝ် ဘာလ တွိုန်။ 44 အာယောဆာဖာတ် တွိုန် ဘော တဲး ဒါ ဆိုက် စူ ကာဂုဝ်း၊ ဘော တဲး န့ ဝီ လာယ် ဘဲန် အူ ဂိုက် ဒီ ခုန်ဒီခမ် အီဆာရေလ တွိုန်။

45 လွင် ပဲ့ ဟဲ့ ဘူင် အာယောဆာဖာတ်၊ လွင် ပဲ့ ဟဲ့ ကာဂုဝ်း အန် ဒီ အီ ဟဝ်၊ ဟဲ့ ဒဲမ် အုန် ခဲင် ဘပ် လွင် ဂေ ခုန်ဒီခမ် ဒူအီ အာယူဒါ။ 46 န့ ဘော မုး ဂေ ဒါ မာလမ် အီ လှူ ဒုဝ် ဂေ ဒီ အာရိုပ် တွိုန်၊ ဂေ အီ ဆီ ဂိတ် ဆိန့် ဒေါ မုး စုဝ် ဂုန့် အန် အီ စိူဝ် အာဆာ တွိုန်၊ အန် ဘော ငဝ်း ဝဲန် တူတ့် ဂေ တီ ခဲင် မိူင် အန်။

47 ဒေါ အန် တီ အာဝ် ဟူ မိုဝ်း ခုန်ဒီခမ် ခဲင် မိူင် အေဒူမ် တွိုန်။ န့ မိုဝ်း မီ ဒါ တာင် အီ အိုပ် ကာဒါင် ခုန်ဒီခမ်။

48 အာယောဆာဖာတ် တွိုန် ဘော ဘူင် ရိုဝ် ဆင်ဖုဝ်၊ တဲး ဂေ ပွိုန် ဒီ ဟာဝ် ဒိုဝ်း တး ခြိဝ် ဒီ မိူင် အုဝ်ဖီ။ ဂေ ယီ တူ ပွိုန် ဟာဝ် ကူပ် ရိုဝ် တွိုန် ဟဲ့ ကာပျာတ့် ဒီ ဒူင် စိူဝ် အေစာယူန်ကာဘာ။

49 ဒေါ အန် တီ အာဟာဇီယာ အီ မုး ဂွန် ခုန်ဒီခမ် အာဟပ် တွိုန် အန် ဘော မှာန့် ဒီ အာယောဆာဖာတ်။ အန် တဝ်း၊ “တဲး ဒူအီ အုဝ် ဂေ နီ ပဝ့် ရိုဝ် ဒူပ် ဒူအီ မဲ ဇဝ်။” အာယောဆာဖာတ် ယီ တူ တဲး။

50 အာယောဆာဖာတ် တွိုန် ဘော ယမ် ဒူပ် ဂုန့် ဒါ အန်။ ဂေ ဘော ဒိပ် အန် ခဲင် မိူင် ဒါ ဒါ အန် အီ စိူဝ် မိူင် အာဒါဝိတ် တွိုန်။ အာယေဟုဝ်ရမ် အီ မုး ဂွန် အန် ဘော ဝီ ပ့လု အာယောဆာဖာတ်။

51 အာယောဆာဖာတ် ဟဲ့ ဘဲန် ခုန်ဒီခမ် အီ အိုပ် မိူင် ယူဒါ အာဒါ ဂိုဝ် ဒီ ဘူ ဆီနမ်။ ဒေါ အန် တီ အာဟာဇီယာ အီ မုး ဂွန် အာဟပ် တွိုန်၊ အန် ဟဲ့ ဝီ ဘဲန် ခုန်ဒီခမ် ခဲင် မိူင် အီဆာရေလ။ အန် ဘော အိုပ် မိူင် အီဆာရေလ အာဒါ အာ ဆီနမ်။ 52 အာဟာဇီယာ တွိုန် ဘူင် အီ တူ ဘွတ် အီ တူ မွှိုမ် ဒီ အာတ့် ဇဝ်ဖြာ။ အန် ဒူပ် ပီ ပါယ် အာဂျာင် ဂုန့် မာ အန်။ အန် ဒူပ် ဘော အာယေရုဝ်ဘုဝ် အီ မုး ဂွန် အာနေဘတ်၊ အီ ယဲတ့် ဒူအီ အီဆာရေလ၊ တဲး ဂေ ဘူင် မှာပ် ဘဲန် မျုဝ် ဘဲန် မျုဝ်။ 53 အာဟာဇီယာ ဝီ ဘူင် ဇူင် ကြိုပ် ဇဝ် ဘာလ၊ တဲး ဇဝ်ဖြာ ဝီ ရူ ဒီ အန်။ အန် ဒူပ် ပီ ပါယ် ဂုန့် အန် ဒီ ဘူင် တွိုန်။