1 ဝါယ် ဟဲ့ ဟွတ့် ယမ် အာဆောလူ တွိုန်၊ အာဒါဝိတ် ဘော ဝီ လေး ခဲင် ဒူင် ပဲ့ ဟဲ့ ပဲ အန် ဒီ ဒူအီ အာမာလေက် ဂေ တွိုန်၊ ဝီ တး ကွယ် ခဲင် မိူင် ဇီကာလာတ် အာဒါ အာ ဆီငဲ။ 2 န့ ဘော ဇမ် ဆီငဲ ဟာအူယ်၊ န့ မိုဝ်း ဒူအီ အူ ဝီ အီ တး ဇမ် ဒူင် ကွယ် အာဒါဝိတ်။ အန် ဘော မုတ် ဂိုပ် ဒီ ကာဒါယ် ဘော ကြိုပ် အာဒါဝိတ်။ ခြိုင် ပီ တာ အန် ဟဲ့ ကာယာတ့်၊ ဘော ကာပုး ဟဲ့ ကွယ် ဒဲင် ဂိန့် အန်။ ဒူအီ ဝီ တီ ဟဲ့ တး ဒူင် ကွယ် ဒါ ဆိုက် အာဆောလူ။

3 အာဒါဝိတ် ဘော ဒီမွှတ် အန် တဝ်း၊ “မဲ တး နာ မှဝ်။း” ဒူအီ တွိုန် ဝီ တဝ်း၊ “အုဝ် ဟဲ့ တဝ် လေး ခဲင် ဒူင် ချ ဒူအီ အီဆာရေလ။”

4 အာဒါဝိတ် ဝီ တဝ်း၊ “န့ ဘော ပါယ် မှဝ်၊ တဲး မဲ ကာလာင် ဒီ အုဝ်။” ဟဲ့ ဟွတ့်၊ ဒူအီ တွိုန် ဝီ တဝ်း၊ “ဂေ ဒါ ဆိုက် ဟဲ့ တဝ် ဒူင် ကာဂုဝ်း တီ။ ဒူအီ ဟဲ့ ယမ် ကိူန် ကာဆဝ်။ ဘော အာဆောလူ ဘော ဂွန် အီမာယ် အန် အီ စိူဝ် အာယုဝ်နာထာန် ဟဲ့ ယမ်။”

5 အာဒါဝိတ် ဒီမွှတ် ကာညူမ် အီ ဟဲ့ တး ဒီ အန် တဝ်း၊ “မှဝ် မဲ ပါယ် ဒီ နပ်၊ အာဆောလူ ဂါယ် ဂွန် အန် အီ စိူဝ် အာယုဝ်နာထာန် ဟဲ့ ယမ်။း”

6 ဒူအီ တွိုန် ဝီ တဝ်း၊ “ဒေါ တာ ဇမ် အုဝ် ဒီ နွန် ဂီလပေါ တွိုန်၊ အာဆောလူ ဟဲ့ ဝီ န့ကြွုန် ဘ့လာ လျီး အန်။ ဒါ ဆိုက် အီ ပဝ့် လက်လဝ် ဘော ဒါ ဆိုက် အီ ပဝ့် မင်ပြွင့်၊ ဂေ ဟဲ့ ခုင်ခြး ကာဆဝ်၊ ဟဲ့ ရိန် ဒီ ခြပ် အန်။ 7 အန် ဘော ဝီ မာငး ဝိဝ် နာ ပန်၊ အန် ဘော ယိုဝ် အုဝ်၊ ဘော ဒဲ့ အုဝ်။ အုဝ် ဝီ ယဝ်း ဂြုဝ်း အန် တဝ်း၊ ‘န့ မုး အုဝ်။’

8 အန် ဝီ ဒီမွှတ် အုဝ် တဝ်း၊ ‘မဲ မုး အာဆေ။း’ အုဝ် မိူဝ် ဝီ ကာလာင် တဝ်း၊ ‘အုဝ် မုး ဒူအီ အာမာလေက်။’

9 အန် ပီ ဝီ တဝ်း ဒီ အုဝ်၊ ‘တဲး မဲ တး ပွါ အုဝ်၊ တဲး အုဝ် ယမ်။ အုဝ် ဟဲ့ ဆဝ် ကာဆဝ်။ ဖွိုမ် အုဝ် ယီ ညှမ် တူတ့်။’ 10 အန် ဟဲ့ ဟွတ့် တဝ်း ပါယ် တီ အုဝ် ဘော ပွါ တဲး အန် ယမ်။ ခုဝ်၊ အုဝ် ဟဲ့ နပ်၊ အန် ဟဲ့ ဟွတ့် ကေး၊ အာဝ် ဟူ လွတ် ယမ်။ အုဝ် ဘော ဘုတ် ဒိုဝ်း မင်ဂိုမ် ပီ စှိုပ် အန် ဒီ ဂိန့် အန် ဘော ကန်ဒဲ အန်၊ ဝီ တး ဒူင် ကွယ် မဲ နီ။”

11 ပန် တီ အာဒါဝိတ် ဝီ ကာယာတ့် ဆီတုဝ် အန်။ ခဲ့ ကွယ် ဂေ အီ ကွယ် ဒူပ် အန် မိူဝ် ကာဖြူမ် ဒီ ဘူင် ပါယ် တီ။ 12 ဂေ ဘော ကာဖြူမ် ဒီ ယာမ် ဘော က့လိုဝ် ဘော ယိူန် ပီ ဒီ ဟူမ် တဲး ကော ဇမ် ဘာ ဒီ အပ်။ ဂေ က့လိုဝ် ကူပ် ယမ် အာဆောလူ ဂါယ် ဂွန် အန် အီ စိူဝ် အာယုဝ်နာထာန်၊ ဘော ဂေ ဒါ ဆိုက် ဇဝ်ဖြာ။ ဂေ ဘော က့လိုဝ် ကူပ် တူ ပဲ ဂေ ဒူအီ အီဆာရေလ ရန်ဆူ ဂေ။ ဂေ ဟဲ့ ယမ် ဒီ ဘ့လာ ပွါ့ လာင်။

13 အာဒါဝိတ် ဒီမွှတ် ဒူအီ တွိုန်။ တဝ်း၊ “မဲ တး နာ မှဝ်။း” ဒူအီ တွိုန် ဝီ တဝ်း၊ “အုဝ် မုး ဒူအီ အာမျုဝ် ဟဝ်၊ ဒူအီ အာမျုဝ် အာမာလေက် တွိုန်။”

14 အာဒါဝိတ် ဝီ တဝ်း ဒီ အန်၊ “န့ ပါယ် မှဝ်၊ ပီ ယ ဘူင် မဲ ဒီ ဒူအီ ပဲ့ ဟဲ့ ဖဝ်း ဇဝ်ဖြာ နာမန် ဒီ ဂိန့် အန်၊ တဲး အန် ယမ်။း”

15-16 အာဒါဝိတ် ဝီ ဒဲ့ ဒူအီ အန် အူ ဝီ တဝ်း၊ “ဟာဝ် ငဝ်း ယမ် အန်။” ဟဲ့ ဟွတ့်၊ ဂေ ဝီ ငဝ်း ယမ် အန်။ ခုဝ်၊ အာဒါဝိတ် ဟဲ့ ဟွတ့် တဝ်း ဒီ အန်၊ “တဲး မဲ ဝီ ခမ် မှာပ် မဲ။ မူတ့် မဲ ဟဲ့ ကာလာင် မှာပ် မဲ ဒေါ တဝ်း မဲ၊ ‘အုဝ် ဟဲ့ ဘူင် ဒီ ဒူအီ ပဲ့ ဟဲ့ ဖဝ်း ဇဝ်ဖြာ နာမန် ဒီ ဂိန့် အန်၊ တဲး အန် ယမ်။’”

17 အာဒါဝိတ် ဘော တဝ်း မှုဝ် အီ က့လိုဝ် ကူပ် ယမ် အာဆောလူ ဂါယ် ဂွန် အန် အီ စိူဝ် အာယုဝ်နာထာန် တွိုန်။ 18 အန် မာနုဝ် တဲး အီ နုဝ် မှုဝ် လွင် အ။ ဂေ ဝီ ဒဲမ် အုန် မှုဝ် တီ ခဲင် ဘပ် အီ စိူဝ် အာယာဆာ။ မှုဝ် တီ န့ တဝ်း၊

19 “ဘေ ဒူအီ အီဆာရေလ အိုယ်၊ ဂေ အီ မိုဝ်း အာဖုင် ဘော ဆာရေ ကာတဲ ဘေ ဟဲ့ ခမ် ဒီ ယမ် ဒဲင် နွန် ဒူင် ကွယ် ဘေ။ ဒါ ဆိုက် အီ မိုဝ်း ပ့လူမ် တာင်၊ ဂေ ဟဲ့ ဟွတ့် ကေး ယမ် တူတ့်။

20 ကွဲ့ ကာလာင် လွင် အန် တီ ခဲင် မိူင် ဂါထ။ ကွဲ့ ခဲ ဒူပ် န့တေန့် မိူင် အာဆာခေလူန်၊ ယုဝ် ဂွန် အီဘိုန့် ဒူအီ ဖီလီထီ ဂေ ဝီ ဘဲန် နဝ်း ဒါခိုယ် ကာဆဝ်။ ယုဝ် ဂွန် အီမာယ် ဂေ အီ တူ ဆွာ့ ဝဲန် ဟုန် လခါနာ ဂေ ဝီ ဘဲန် နဝ်း ဇွန်ဇူမ် ကာဆဝ် ဒီ ဂေ။

21 အိုယ် ဘေ နွန် ဂီလပေါ၊ ကွဲ့ တဲး ဂ့လာယ် ဘော အိုမ် ဒီငါန် စုဝ်း ဒဲင် ဘေ။ ပီ ဆမ် အီ ခဲင် မာန် ဘော ခဲင် ဒူင် နာ၊ ကွဲ့ တဲး န့ မိုဝ်း ဘ့လေ အီ မွှိုမ် လှူ။ ခုဝ်၊ ခြိုင် မင် ဂွင့် ပီ တာ ဂေ ဒါ ဆိုက် အီ မိုဝ်း ပ့လူမ် ဟဲ့ ဝီ ချဝ့် ဒီ တီ။ ဘော မင် ဂွင့် ပီ တာ အာဆောလူ အာဝ် ဟူ မိုဝ်း အီ လိုမ်လာ ဖဝ်း နာမန်။

22 ဘ့လာ အ အာယုဝ်နာထာန် ဟဲ့ ဒွိုမ် လဝ့် ဆေဆေ။ ဘော အာဆောလူ တူ ဆတ် ဒီလူယ် ဒီလာယ် ဘ့လာ လျီး အန်။ ဒွန် ဇေန့် ဒွန် ဇေန့် ဂါယ် ဟဲ့ ပဲ ဂေ ရန်ဆူ အီ မိုဝ်း ပ့လူမ် မိုဝ်း ဟဲန့်။

23 ဒေါ အိမ် ဂါယ် အာဆောလူ ဂါယ် အာယုဝ်နာထာန် ဟဲ့ မွှိုမ် ရွက့်၊ ဟဲ့ လဝ့် နဝ်း အီ ဟဝ်။ ဂါယ် ဘော ယမ်၊ ဂါယ် မိူဝ် တူ လာယ် ကာဂဝ်း။ ဂါယ် မိူဝ် ဟဲ့ ခြန် လွှိုမ် မာဂ့လာင်။ ဘော ပ့လူမ် ဂါယ် ဟဲ့ လွှိုမ် ပ့လူမ် မာခြင်ဆီ။

24 အိုယ် ဘေ အီ မုး ဂွန် အီဘိုန့် ဒူအီ အီဆာရေလ၊ တဲး ဘေ ကာဖြူမ် ဒီ ယာမ် ကူပ် အာဆောလူ။ အန် ဟဲ့ ဒွါ ဘေ တာ ခြိုင် စှိတ်၊ ခြိုင် ရေန့် ဂဲ။ ဟဲ့ ဒွါ ဘော ခြိဝ်၊ တဲး န့ ဒိုက် ဒီ ခြိုင် ပီ တာ ဘေ တီ။

25 ဒါ ဆိုက် အီ မိုဝ်း ပ့လူမ် တာင်၊ ဂေ ဟဲ့ ယမ် တူတ့် ဒူင် ကာဂုဝ်း ဂေ ဒီ ရန်ဆူ တွိုန်။ အာယုဝ်နာထာန် ဟဲ့ ကာဒုး ဒီ ယမ် ဒီ ဒူင် စာ တွိုန်။

26 အိုယ် မဲ အီကတ် အုဝ်၊ အီ မုး အာယုဝ်နာထာန်၊ အုဝ် ဟဲ့ မိုဝ်း နဝ်း က့လိုဝ် ကာဆဝ် ကူပ် မဲ။ မဲ ဟဲ့ မုး အီ လဝ့် ကာဆဝ် နဝ်း အုဝ်။ နဝ်း ရွက့် မဲ ဒီ အုဝ် ဟဲ့ မွှိုမ် လွှိုမ် နဝ်း ရွက့် အီဘိုန့် ဒီ အုဝ်။

27 ဒါ ဆိုက် အီ မိုဝ်း ပ့လူမ် တာင်၊ ဂေ ဟဲ့ ဟွတ့် ယမ်။ ဘော ခြိုင် ကာဂုဝ်း ဟဲ့ ဟွတ့် စှိုမ် တူတ့်။” ခဲ့ တီ အာဒါဝိတ် တဝ်း မှုဝ် ကူပ် က့လိုဝ် အန်။