ဝါယ် တီ အာဒါဝိတ် ဘော ဝီ ဒီမွှတ် ဇဝ်ဖြာ တဝ်း၊ “အုဝ် ဒီ ပွိုန် ဝီ ဝေန့် ခဲင် မိူင် ယူဒါ အူ မိူင်။း” ဇဝ်ဖြာ ဝီ ကာလာင် ဒီ အန် တဝ်း၊ “တဲး မဲ ဝေန့်။” အာဒါဝိတ် ဝီ ဒီမွှတ် တဝ်း၊ “မဲ ဒီ တဲး အုဝ် ဝေန့် ဒီ မိူင် မှဝ်။း” အန် ဇဝ် မိူဝ် ဝီ တဝ်း၊ “တဲး မဲ ဟာဝ် ဝေန့် ခဲင် မိူင် ဟေဘြုဝ် တွိုန်။”

2 အာဒါဝိတ် ဘော ဝေန့်၊ တဲး ဘော အီဘိုန့် အန် အာ ဝီ တွိုန် ဒူပ် အန်။ အီ မုး နာင် အေဟီနွင်၊ အန် မုး ဒူအီ မိူင် ယေစာရေလ။ ဘော နာင် အေဖီဂေလာ အီ ဒွိုမ် မုး အီဘိုန့် အာနာဘာလ တွိုန်၊ အီ မုး ဒူအီ မိူင် ဂါမေလ တွိုန်။ 3 ဘော ဂေ အီ မုး ဒူအီ အန် ဘော အီ မုး န့ဟူမ် အန်၊ ဂေ ဒွန် အီ ဟာဝ် ဒူပ် အန်၊ တဲး ဂေ ဝီ ကွယ် ဒီ မိူင် ဟေဘြုဝ် တီ။ 4 ပန် တီ ဒူအီ အာယူဒါ ဂေ ဘော တး ဒါင် အာဒါဝိတ် တဲး အန် ဘဲန် ခုန်ဒီခမ် အီ အိုပ် မိူင် ယူဒါ။

န့ ဘော မိုဝ်း အီ ဟဝ် ကာလာင် ဒီ အာဒါဝိတ် လွင် ဒူအီ ခဲင် မိူင် ယာဘေတ် အီ ကွယ် ခဲင် ကာဒါယ် မိူင် ဂီလေအာတ်၊ ဂေ ဟဲ့ ဟွတ့် ဒိပ် အာဆောလူ။ 5 အာဒါဝိတ် မိူဝ် ဘော စ်ု ဒါလာမ် အန် ဟာဝ် ဒီ မိူင် ယာဘေတ် အီ ကွယ် ခဲင် ကာဒါယ် မိူင် ဂီလေအာတ် တွိုန်၊ တဲး ဂေ တဝ်း၊ “တဲး ဇဝ်ဖြာ မွင့်ကာရာ တဲး ဒီ ဘေ ကူပ် ဟဲ့ ကာဝေ ဘေ ဒါ ကာညာ ဘေ အီ မုး အာဆောလူ တွိုန်၊ ကူပ် ဟဲ့ ဒိုဝ်း ဒိပ် ဘေ ဒုဝ် ယမ် အန်။ 6 တဲး ဇဝ်ဖြာ ဝီ ဘူင် နာ မွှိုမ် အီ ကာဆိူဝ် ဒီ ဘေ။ အုဝ် မိူဝ် ဒီ ဝီ ဝျီ့ ဒွါ ဂေဇူ တီ ဒီ ဘေ ကူပ် ဟဲ့ ဘူင် ဘေ ပါယ် တီ။ 7 ဒေါ တီ နီ၊ တဲး ဘေ ဝီ မိုဝ်း ပ့လူမ်။ ကွဲ့ တဲး ဘေ မိုဝ်း နဝ်း ဒီတဲတ်။ ခုဝ်၊ အာဆောလူ အီ မုး ဒါ ကာညာ ဘေ ဟဲ့ ဟွတ့် ယမ်။ ဂေ ဒူအီ အာမျုဝ် ယူဒါ ယီ ဟဲ့ ဝီ ကာဖြူမ် ဒီ ဒါင် အုဝ် ဘဲန် ခုန်ဒီခမ် ဂေ။”

8 ဒေါ အန် တီ န့ ယီ မုး အာဘာနာ အီ မုး ဂွန် အာနေရ။ အန် ဟဲ့ ဒွိုမ် မုး ဒါ တာင် အီ အိုပ် ဒါ ဆိုက် အာဆောလူ။ အန် ဟဲ့ ဒိုဝ်း အာအီဆာဘုဝ်ဆေတ် အီ မုး ဂွန် အီမာယ် အာဆောလူ တွိုန်၊ တိုယ် အန် ဟာဝ် ဒီ မိူင် မာဟာနာအိမ်။ 9 ဂေ ဟဲ့ စုဝ့် တဲး အန် ဘဲန် ခုန်ဒီခမ် အီ အိုပ် ခဲင် မိူင် ဂီလေအာတ်။ ဘော ဒူအီ ခဲင် မိူင် အာဆူရာ ဂါယ် မိူင် ယေစာရေလ ဘော ဂေ ဒူအီ အာအေဖာရိမ်၊ ဒူအီ အာဘေန်ယာမ် ဘော ဒူအီ အီဆာရေလ၊ တဲး အန် အိုပ် တူတ့် ဒူအီ ဇိုဝ် တီ။

10 အာအီဆာဘုဝ်ဆေတ် အီ မုး ဂွန် အာဆောလူ တီ၊ ဒေါ အိုပ် အန် မိူင် အီဆာရေလ၊ အာဆာက် အန် ဟဲ့ ပွိုန် ဖွုန် ဂိုဝ် ဆီနမ်။ အန် ဘော အိုပ် မိူင် အာဒါ အာ ဆီနမ်။

11 ဂေ ဒူအီ အာမျုဝ် ယူဒါ ယီ ဒူပ် အာဒါဝိတ်။ ဒေါ ကွယ် အာဒါဝိတ် ဒီ မိူင် ဟေဘြုဝ် တွိုန်၊ အန် ဘော အိုပ် ဒူအီ အာယူဒါ အာဒါ ဘူ ဆီနမ် ဒီ ဒဝ် မာဂျီန်။

12 ပန် တီ အာဘာနာ၊ အီ မုး ဂွန် အာနေရ တွိုန်၊ အန် ဘော ယဲတ့် ဂေ ဒါ ဆိုက် အာအီဆာဘုဝ်ဆေတ် အီ မုး ဂွန် အာဆောလူ တွိုန်၊ ဝီ လေး ခဲင် မိူင် မာဟာနာအိမ်၊ ဝီ ဟာဝ် ဒီ မိူင် ကီပွင်။ 13 အာယောဖ အီ မုး ဂွန် နာင် စေရူယာ၊ အန် ယီ ယဲတ့် ဂေ ဒါ ဆိုက် အာဒါဝိတ်။ အန် ဘော လေး ဟာဝ်၊ တဲး ဂေ လာယ် ကာတုန့် ခူပ် အိုမ် ဒိုင် ကီပွင် တွိုန်။ ဂေ ဘော ကွယ် အူ ဘ့လာက် အူ ဖိုင် ဒီ အိုမ် ဒိုင် တွိုန်။

14 အာဘာနာ တွိုန် ကာလာင် ဒီ အာယောဖ တဝ်း၊ “တဲး ဒူအီ ဒီရွယ် လာယ် ကာဂုဝ်း၊ တဲး အာယ် ယွတ်။” အာယောဖ ဝီ တဝ်း၊ “အိုဝ်၊ တဲး ဂေ ဘူင် ပါယ် တီ။”

15 ပန် တီ ဒူအီ အာမျုဝ် အာဘေန်ယာမ် ဂိုဝ် ဒီ အာ ဝီ၊ အီ မုး ဒူအီ အာအီဆာဘုဝ်ဆေတ် ဘော ဒူအီ အာဒါဝိတ် ဂိုဝ် ဒီ အာ ဝီ၊ ဂေ ဘော တး လာယ် ညိူဝ်။ 16 အူ ဝီ ဒုဝ် အူ ဝီ၊ ဂေ ဘော လာယ် ပါ ဂိန့် ဘော လာယ် ဆတ် တာ အာတိုမ်။ ဂေ ဘောကာဂ့လျီတ် ဘော ကေး ယမ် ဒီ တီ။ ကူပ် န့ ပါယ် တီ ဒူင် တီ ဂေ ဘော တဲး အန် စိူဝ် ဟေလကာဟိတ်ဇူရိမ်၊ အီ မုး ခဲင် ကာဒါယ် ကီပွင် တွိုန်။

17 ဆီငဲ တီ ဂေ ဘော ကာဂုဝ်း ကာဆဝ်။ အာဘာနာ ဘော ဒူအီ အီဆာရေလ ဘော စှိုမ် ဒီ ဒူအီ အာဒါဝိတ်။

18 ဒေါ အန် တီ ဂွန် အီမာယ် နာင် စေရူယာ ဘော အူယ် ဝီ ဟဲ့ ကာဂုဝ်း။ ဂေ စိူဝ်၊ အာယောဖ၊ အာဖီဆေ ဘော အာဆာဟေလ။ ပ့လဝ် အာဆာဟေလ တွိုန် ဟဲ့ ခြန်၊ ကော နှဲန် မာဇ အီ ကွယ် ခဲင် ပြဲ။ 19 အာဆာဟေလ တွိုန် ဘော ခုင်ခြး ဟာဝ် ဒူပ် အာဘာနာ တွိုန်။ ဒေါ ဟာဝ် အန်၊ အန် မိူဝ် တူ ဝး နာ အာဂ နာ အာအး။ အန် ဟာဝ် ဆိူဝ် ဒူပ် အာဘာနာ။ 20 အာဘာနာ ဘော ဝီ ယွတ် ဝိဝ် နာ ပန်။ အန် ဘော ဝီ ဒီမွှတ် တဝ်း၊ “အိုယ် အာဆာဟေလ၊ န့ မုး မဲ။း” အန် ဘော ဝီ တဝ်း၊ “အိုဝ် ဟဲ့ မုး အုဝ်။” 21 အာဘာနာ ဝီ တဝ်း၊ “မာငး ယွတ်၊ နာ ဂ နာ အး မဲ။ မှေတ့် ဒူအီ ဒီရွယ် ဂေ တီ ခေါ အူ ဝီ၊ ဒိုဝ်း ဟာဝ် ခြိုင် ကာဂုဝ်း အန် တီ။” အန် ဟဲ့ ဟွတ့် တဝ်း ပါယ် တီ အာဆာဟေလ တွိုန် ယီ တူ ထူမ်၊ နဲ့ အီ ဒူပ် ဒီ ပန် အန်။ 22 ပန် တီ အာဘာနာ ဘော ဝီ တဝ်း ဒီ အာဆာဟေလ၊ “တဲး မဲ စူ ဒူပ် အုဝ်။ ဆေ မဲ တူ စူ ဒေါ တီ နီ၊ အုဝ် ဒီ ဆတ် မဲ ဒိုက် ဒီ ကာဒါယ်။ ဆေ အုဝ် ယီ ငဝ်း မဲ၊ အုဝ် ဒီ တဝ်း မာဆေ ဒီ အီကတ် မဲ အီ မုး အာယောဖ တွိုန်။

23 အန် တူ ထူမ်၊ နဲ့ အီ ဟာဝ်။ အာဘာနာ တွိုန် ဘော ဒိုဝ်း ဂ့လွင့် လျီး အန်၊ ဘ့လုး ဝတ့် အန်၊ တဲး ကော လှုး နာ ကာတူ အန်။ အန် ဘော ကေး ယမ် ဒီ တီ။ ဂေ ဒူအီ အီ တး ဇမ် ဒူင် ယမ် အာဆာဟေလ တွိုန်၊ ဂေ ဘော ဂိူတ် ယွတ်။

24 ပန် တီ အာယောဖ ဂါယ် အာဖီဆေ တွိုန်၊ ဝီ ခုင်ခြး ဒူပ် အာဘာနာ တွိုန်။ ဂါယ် ဘော တး ဇမ် ဒီ နွန် အမ်မာ အီ ကွယ် နာ အာတ့် မိူင် ကီအာ ဒူပ် န့တေန့် အီ ဟာဝ် ခဲင် ပြဲ ကီပွင် တွိုန်။ ဆီငဲ မိူဝ် ဟဲ့ ဂေတ့်။ 25 ဒူအီ အာမျုဝ် အာဘေန်ယာမ် တွိုန်၊ ဂေ ဘော ကာဇု နာ ပန် အာဘာနာ ဘော ဘဲန် အူ ဖိုင်၊ ဂိူတ် ကွယ် ကာဒဲ့ နွန် တွိုန်။

26 ပန် တီ အာဘာနာ ဘော ဒဲ့ အာယောဖ တဝ်း၊ “မဲ ဆီ တဲး မာပွါ့ ဂေ လျီး ငဝ်း ဆေဆေ။း န့ ဒီ တဲး အာယ် လာယ် ဇွင့် ဆေဆေ။ တဲး မဲ စ်ု ဒူအီ မဲ၊ တဲး ဂေ စူ ခုင်ခြး ဒူပ် ဝေါဝဲ ဂေ ဒေါ တီ နီ။”

27 အာယောဖ ဝီ တဝ်း၊ “ဟဲ့ မုး ဟဲ့ မှာန်၊ ဆေ မဲ တူ ကာလာင် ဂြုဝ်း ဒီ ဒူအီ ဂေ နီ၊ ဂေ ဒီ ဘော ခုင်ခြး ဒီ ပန် ဘီနွင် ဂေ၊ တဲး ကော ဇမ် ပါ ခဲညှာ။”

28 ပန် တီ အာယောဖ တွိုန်၊ ဘော ဘုတ် ဝဝ်။ ခဲ့ ကွယ် ဒူအီ ဂေ တွိုန် အာဝ် ဟူ ခုင်ခြး ဒူပ် ဒူအီ အီဆာရေလ ပွါ၊ အာဝ် ဟူ ကာဂုဝ်း ပွါ။

29 အာဘာနာ ဂေ ဒူအီ အန်၊ ဂေ ဘော ကာလုဝ်း ဟာဝ် ဂ့လင် အာရာဖ တွိုန် ဒွင် ခိူန်၊ ဘော ကာလုဝ်း အိုမ် ဘ့လဲင် ယောဒါန်၊ ဘော ကာလုဝ်း ဟာဝ် ဒီ ကာတဲ မိူင် ဘီဆာလူန်၊ ကော ဝီ ဇမ် ဒီ မိူင် မာဟာနာအိမ်။

30 အာယောဖ ဘော ဝီ လေး ဒူင် ခုင်ခြး အန် အာဘာနာ တွိုန်၊ ဝီ တး ဇမ် ဒူင် ကွယ် အန်။ ဒေါ ဝီ ဒဲ့ အန် ဒါ ဆိုက် အာဒါဝိတ်၊ တဲး ဂေ တး ကာဇု၊ န့ လုတ် ဂိုဝ် ဒီ ဒိမ် ဝီ။ ဘော အာဆာဟေလ တွိုန် အာဝ် ဟူ ကွယ်။ 31 ဂေ ဒါ ဆိုက် အာဒါဝိတ် ယီ ဟဲ့ ငဝ်း ယမ် ဒူအီ အာဘေန်ယာမ် အီ မုး ဒါ ဆိုက် အာဘာနာ အာဒါ အူယ် မာယဝ်း ဒီ ဒဝ် ဂိုဝ် ဝီ။ 32 ဂေ ဘော ဒိုဝ်း ဒုဝ် ယမ် အာဆာဟေလ တွိုန်၊ ဟာဝ် အုန် ခဲင် ဘာရေဝ် ဂုန့် အန်၊ အီ ကွယ် ခဲင် မိူင် ဘေတ်လဲမ် တွိုန်။ အာယောဖ ဂေ ဒူအီ အန်၊ ဂေ ဘော ဟာဝ် ဇမ် မိူင် ဟေဘြုဝ် ဒေါ ဟဲ့ ဘ့လာင် ပြဲ။