ပန် အန် တီ ဒူအီ န့ကြိုဝ်း အာဆောလူ ဂါယ် န့ကြိုဝ်း အာဒါဝိတ်၊ ဂေ ဘော လာယ် ကာဂုဝ်း လှေန့် ကာဆဝ်။ ဒူအီ အာဒါဝိတ် ယီ မိုဝ်း ပ့လူမ် ဟဲန့် ကိူန်။ ဒူအီ န့ကြိုဝ်း အာဆောလူ ဘော ကြဲ ဒီ ဒီလှး၊ ကြဲ ဒီ ယူမ်။

2 အာဒါဝိတ် ယီ မိုဝ်း ဂွန် အီ ဂွိုတ် ဒီ မိူင် ဟေဘြုဝ် တွိုန်။ ဂွန် ဂိန့် အန် စိူဝ် အာမာနုန်။ မာ အန် မုး နာင် အေဟီနွင် အီ မုး ဒူအီ ယေစာရေလ တွိုန်။

3 ဂွန် အီမာယ် အန် ဝီ ဟာအာ၊ အန် စိူဝ် အာခီလာတ်။ မာ အန် မုး နာင် အေဖီဂေလာ၊ အီ မုး ဒူအီ မိူင် ဂါမေလ၊ အီ ဒွိုမ် မုး အီဘိုန့် အာနာဘာလ တွိုန်။ ဂွန် အီမာယ် အာဒါဝိတ် ဝီ ဟာအူယ်၊ အန် စိူဝ် အာဘာဆာလူမ်။ မာ အန် မုး နာင် မာခါ အီ မုး ဂွန် အာတာလာမ် အီ မုး ခုန်ဒီခမ် ခဲင် မိူင် ကေဆူရာ တွိုန်။

4 ဂွန် အန် ဝီ န့ ဖွုန် အန် စိူဝ် အာတောနီယာ။ အန် မုး ဂွန် နာင် ဟာကိတ်။ ဂွန် အန် ဝီ မ့ဖန်၊ အန် စိူဝ် အာဆေဖာဒီ။ အန် မုး ဂွန် နာင် အေဘီတာလ။

5 ဂွန် အီမာယ် ဝီ န့ဒဝ်၊ အန် စိူဝ် အာအီဆာလမ်။ အန် မုး ဂွန် နာင် အေကာလာ အီ မုး အီဘိုန့် အာဒါဝိတ် တွိုန်။ ဂွန် အာဒါဝိတ် ဂေ တီ၊ ဂေ ဂွိုတ် တူတ့် ခဲင် မိူင် ဟေဘြုဝ် တွိုန်။

6 ဒေါ လာယ် ကာဂုဝ်း ဒါ ဆိုက် အာဆောလူ ဂါယ် ဒူအီ အာဒါဝိတ် အီ မုး အာဘာနာ တွိုန်၊ အန် ဂျုဝ်ဂျာ ဒီ ဘူင် တဲး အန် ဝီ မိုဝ်း ပွုန် ခဲင် ဒူအီ အာဆောလူ။ 7 အာဆောလူ ယီ ဒွိုမ် မိုဝ်း အီဘိုန့် တျီ့ အူ ဝီ၊ အီ စိူဝ် နာင် ရီဇာဘာ၊ အီ မုး ဂွန် အာအေယာ။ အူ ဆီငဲ အာအီဆာဘုဝ်ဆေတ် ဘော ဒီမွှတ် အာဘာနာ တွိုန် တဝ်း၊ “ကူပ် မာဆေ မဲ ဟဲ့ ဒိုဝ်း အီဘိုန့် တျီ့ ဂုန့် အုဝ်။း”

8 ပန် တီ အာဘာနာ ဘော ရူ ကာဆဝ် ကူပ် ကာလာင် အာအီဆာဘုဝ်ဆေတ် ဂြုဝ်း တီ။ အန် ဝီ တဝ်း၊ “မဲ ထာင် အုဝ် နီ မုး မာဆုဝ် အီ တး ဘ့လာက် ဒူအီ အာယူဒါ။း ကော ဇမ် ဆီငဲ အာတိုဝ် နီ အုဝ် ဟဲ့ ဒူပ် ဆီချာ ဂုန့် မဲ အာဆောလူ ဂေ ဂိုက် အန်။ အုဝ် ကော ဟူ အာပ် ဘေ ဒီ အာဒါဝိတ် ခေါ အူ ဝီ။ ဒေါ တီ နီ မဲ ယီ ဟြေတ့် ဒီ ကာယွင့် အုဝ် ကူပ် အီဘိုန့် တီ။ 9 ခုဝ်၊ တဲး ဇဝ်ဖြာ ဒမ် မှာပ် ကာဆဝ် ဒီ အုဝ်၊ ဆေ အုဝ် တူ ဟာဝ် စွယ် အာဒါဝိတ်။ အုဝ် ဒီ ဘူင် တဲး န့ ဘဲန် တူတ့် ဒွန် မျုဝ် ပီ ဒွိုမ် ဒွါ ဇဝ်ဖြာ ကာဒိက် ဆတ်ဇာ ဒီ အာဒါဝိတ်။ 10 အုဝ် ဒီ ဘူင် ကွဲ့ ဟူ တဲး ဒူအီ အာဆောလူ အိုပ် မိူင် အီဆာရေလ၊ တဲး အာဒါဝိတ် ဝီ အိုပ် ဘော မိူင် ယူဒါ ဘော မိူင် အီဆာရေလ၊ တဲး န့ စုး ဒီ မိူင် ဒါန် ကော ဇမ် ဒီ မိူင် ဘီရာဆေဘာ။” 11 အာဘာနာ ဟဲ့ ဟွတ့် ကာလာင် ဂြုဝ်း တီ၊ အာအီဆာဘုဝ်ဆေတ် ဘော ဝီ ယုဝ်၊ အာဝ် ဟူ ယ ဝီ ကာလာင် ဂြုဝ်း မာဆေ ဒီ အာဘာနာ။

12 ဝါယ် တီ၊ အာဘာနာ ဘော စ်ု ဒါလာမ် အန် ဟာဝ် ဒူင် ကွယ် အာဒါဝိတ် ဒီ မိူင် ဟေဘြုဝ် တွိုန်၊ တဲး အန် တဝ်း၊ “မဲ ဟဲ့ နပ် အာဆေ မုး ဒါ တာင် အီ အိုပ် မိူင် နီ။ တဲး ယာယ် လာယ် ဘဲန် အူ ဂိုက်။ ဟဲ့ ဟွတ့်၊ အုဝ် ဒီ ဝီ စွယ် ဒူအီ အီဆာရေလ ဘောကာဂ့လျီတ် ဝီ ကာထုဝ့် တး ဘ့လာက် မဲ။”

13 အာဒါဝိတ် မိူဝ် ဝီ တဝ်း၊ “ဟဲ့ မုး၊ အုဝ် ဒီ လာယ် ဘဲန် အူ ဂိုက် ဒီ မဲ။ မာလဲ၊ အုဝ် မိုဝ်း ပီ ဆီ မှာန့် ဒီ မဲ အူ မျုဝ်။ အီ မုး ဂွန် အာဆောလူ အီ စိူဝ် နာင် မီခါလ တွိုန်၊ ဆေ မဲ တူ တိုယ် တး အန် ဒီ အာတ့်၊ မဲ မိူဝ် တူ ပွိုန် ဒီ ဝီ တး ယိုဝ် အုဝ်။” 14 ဟဲ့ ဟွတ့်၊ အာဒါဝိတ် ဘော ဝီ စ်ု ဒါလာမ် အန် ဟာဝ် ဒီ အာအီဆာဘုဝ်ဆေတ် အီ မုး ဂွန် အာဆောလူ တွိုန်၊ တဲး အန် တဝ်း၊ “ဒိုဝ်း နာင် မီခါလ အီ မုး အီဘိုန့် ပဲ့ ဟဲ့ ဒွိုမ် စိုဝ်း အုဝ် တာ ဟုန် လခါနာ ဒူအီ ဖီလီထီ ဂေ အူ မာယဝ်း ဝီ တွိုန်၊ တဲး အန် ဝီ တး ဒူင် ကွယ် အုဝ်။”

15 အာအီဆာဘုဝ်ဆေတ် တွိုန် ဘော စ်ု အီဘိုန့် တွိုန်၊ တဲး အန် ဝဲန် အီမာယ် အန် အီ စိူဝ် အာဖာလ အီ မုး ဂွန် အာလေဆာ တွိုန်။ 16 ဒေါ ဟာဝ် နာင် မီခါလ၊ အီမာယ် အန် မိူဝ် ဟာဝ် ဒူပ် အန် ဘော ယာမ် ဘော ဟာဝ် ဒူပ် ဒီ ပန် အန်၊ တဲး ကော ဇမ် မိူင် ဘာဟူရိမ်။ ပန် တီ အာဘာနာ တွိုန် ဝီ တဝ်း ဒီ အန်၊ “တဲး မဲ ဝေန့်။” ဟဲ့ ဟွတ့် အန် ဘော ဝီ ဝေန့်။

17 အာဘာနာ ဘော ကာမွုန် ဆင်ချာင် ဒီ ဂေ အီ မုး ဒါ တာင် ဒူအီ အီဆာရေလ။ အန် တဝ်း၊ “ဆိန့် အာတ့် နီ ဘေ မိုဝ်း နဝ်း ဆီ စုဝ့် မျုက် အာဒါဝိတ်၊ တဲး အန် ဘဲန် ခုန်ဒီခမ် ဘေ။ 18 ဒေါ တီ နီ၊ တဲး ဘေ ဘူင်။ ဇဝ်ဖြာ ဟဲ့ ဒွိုမ် ကာလာင် ဒီ အာဒါဝိတ်၊ ‘အာဒါဝိတ် မုး ဒဲစေန့် အုဝ်။ အုဝ် ဒီ တဲး အန် ပဲ ဂေ ဒူအီ ဖီလီထီ ဘော ဂေ အီ မုး ရန်ဆူ ဒူအီ အီဆာရေလ ဒွန် မျုဝ်၊ ကွဲ့ တဲး ဂေ ဒူအီ အီဆာရေလ ကာဒုး အီ ညှာပ်။’”

19 ပန် တီ အာဘာနာ ဘော ဟာဝ် ကာလာင် ဒီ ဒူအီ အာဘေန်ယာမ်။ ဟဲ့ ဟွတ့်၊ အန် ဘော ဟာဝ် မိူင် ဟေဘြုဝ်၊ ကာလာင် ဒီ အာဒါဝိတ် ခဲ့ ပီ လုဝ် ဂေ ဒူအီ အီဆာရေလ ဘော ဂေ ဒူအီ အာဘေန်ယာမ် ဘောကာဂ့လျီတ်။ 20 အန် ဟဲ့ တဲး ဒူအီ အာ ဂိုဝ် ဝီ ဒူပ် အန်၊ တး ဇမ် ဒူင် ကွယ် အာဒါဝိတ် ဒီ မိူင် ဟေဘြုဝ် တွိုန်။ အာဒါဝိတ် ဘော ဘူင် ဘ့လွယ် ဟျီင် အာဘာနာ ဂေ ဒူအီ အန်။ 21 အာဘာနာ ဘော တဝ်း ဒီ အာဒါဝိတ်၊ “တဲး အုဝ် ဟာဝ် အူ ဇေန့်၊ စ်ု ဂေ ဒူအီ အီဆာရေလ ဘောကာဂ့လျီတ် တး ကာဇု ကာဒိုမ် ဒူင် ကွယ် မဲ ခုန်ဒီခမ် အီ အိုပ် အုဝ်။ တဲး ဂေ ကာဆဲန့် ဒီ မဲ၊ တဲး မဲ ပွိုန် ဒီ အိုပ် ခဲ့ ပီ အိုင် မဲ။” အာဒါဝိတ် ဘော စ်ု အန် ဟာဝ်။ ဟဲ့ ဟွတ့် အန် ဘော ဟာဝ် ဒါခိုယ် ဒါခိုယ်။

22 ဒေါ အန် တီ အာယောဖ ဘော ဂေ ဒါ ဆိုက် အာဒါဝိတ် ဟဲ့ ဝီ တး ဒူင် ခုင်ခြး ဂေ ရန်ဆူ တွိုန်။ ဂေ ဘော ဂူင့် ကြုဝ်ကြာမ် ကိူန် ပဲ့ ဟဲ့ ဖာတ် တး ဂေ ဒီ ရန်ဆူ။ ဒေါ အန် တီ အာဘာနာ အာဝ် ဟူ ကွယ် ဒူပ် အာဒါဝိတ် ဒီ မိူင် ဟေဘြုဝ်။ ခုဝ်၊ အာဒါဝိတ် ဟဲ့ ဟွတ့် တဲး အန် ဟာဝ် ဒါခိုယ် ဒါခိုယ်။ 23 ဒေါ တး အာယောဖ ဂေ ဒါ ဆိုက် အန်၊ အီ ဟဝ် ဟဲ့ ကာလာင် ဒီ အာယောဖ တဝ်း၊ “အာဘာနာ အီ မုး ဂွန် အာနေရ တွိုန်၊ အန် ဟဲ့ ဟွတ့် တး ဒူင် ကွယ် ခုန်ဒီခမ် အာဒါဝိတ်။ အာဒါဝိတ် ယီ ဝီ ဘ့လေး တဲး အန် ဟာဝ် ဒါခိုယ် ဒါခိုယ်။”

24 ခုဝ်၊ အာယောဖ ဝီ လိုပ် တး ဒူင် ကွယ် ခုန်ဒီခမ် တဝ်း၊ “မဲ ခုန်ဒီခမ် ဟဲ့ ဘူင် မာဆေ။း မဲ ယွတ်၊ အာဘာနာ တွိုန် ဟဲ့ တး ဇမ် ဒူင် ကွယ် မဲ။ ကူပ် န့ ပါယ် မှဝ် မဲ ဝီ တဲး အန် ပွိုန် ဒီ လွတ် ဟာဝ်။း 25 မဲ နပ်၊ အာဘာနာ အီ မုး ဂွန် အာနေရ တီ၊ အန် တး တဲး အန် ပွိုန် ဒီ ကာလုဝ် မဲ၊ တဲး အန် ဘော နပ် ဒူင် လိုပ် ဒူင် လေး မဲ၊ တဲး အန် ဘော နပ် ခဲ့ ပီ ခြာမ် မဲ ဒီ ဘူင် ဒွန် မျုဝ်။”

26 အာယောဖ ဟဲ့ ဟွတ့် တဝ်း ပါယ် တီ၊ အန် ဘော လေး ဒူင် ကွယ် အာဒါဝိတ် ဘော ဝီ စ်ု ဒါလာမ် အန် ဟာဝ် ဒူပ် အာဘာနာ တွိုန်။ ဂေ ဘော ဒဲ့ တး အန် ဒီ အိုမ် ခိုမ် ဆီရာ တွိုန်။ မာလဲ၊ အာဒါဝိတ် တူ နပ် လွင် အန် တီ။ 27 အာဘာနာ ဘော ဝီ တး ဇမ် ဒီ မိူင် ဟေဘြုဝ် တွိုန်။ အာယောဖ ဘော ဒဲ့ အန် တး ဒီ မာလုဝ်း မိူင်၊ ညိုင်ရာင် တဝ်း ဒီ ကာမွုန် ကွဲ့ တဲး အီ ထူမ်။ ဟဲ့ ဟွတ့်၊ အန် ဘော ဆတ် ဝတ့် အာဘာနာ၊ တဲး အန် ကော ယမ် ဒီ တီ။ အန် ဝီ ဘူင် ပါယ် တီ တဲး အန် ဝျီ့ ပီ ဘူင် အာဘာနာ ဒေါ ဟဲ့ ငဝ်း အန် အာဆာဟေလ အီ မုး ဝါ အာယောဖ။

28 ဝါယ် တီ ဒေါ ဝီ နပ် အာဒါဝိတ် လွင် အန် တွိုန်၊ အန် ဘော ကာလာင် တဝ်း၊ “ဘော အုဝ်၊ ဘော ဒူအီ ခဲင် မာန် မိူင် အုဝ် တူ မိုဝ်း မှာပ် မာဆေ ဒီ အာတ့် ဇဝ်ဖြာ။ အာဝ် ဘာ ယေ ဒေါ ငဝ်း အာယောဖ ဒီ အာဘာနာ အီ မုး ဂွန် အာနေရ တွိုန်။ 29 တဲး အာယောဖ ခမ် တူတ့် မှာပ် အန် တီ၊ ဘော ဘီနွင် ဝေါဝဲ အန် ဂေ ဘောကာဂ့လျီတ်၊ တဲး န့ မိုဝ်း အီ ဆဝ် ဆေဆေ။ တဲး ဂေ မိုဝ်း ဒိမ်၊ မိုဝ်း ဆဝ် ဒု၊ တဲး ဂေ ဘော လုဝ် ဟာဝ် ဂူင့် န့ကြွုန်။ တဲး န့ မိုဝ်း အီ ယမ် ဒီ ဘ့လာ လျီး ဘော အေတ့် ပီ ဒီ ဟူမ်။”

30 အာယောဖ ဂါယ် ဝါ အန် အာဖီဆေ ဟဲ့ ငဝ်း ယမ် အာဘာနာ တွိုန် ခုဝ်၊ အာဘာနာ ဟဲ့ ငဝ်း ယမ် ဝါ ဂါယ် ဒေါ ကာဂုဝ်း ဂေ ဒီ မိူင် ကီပွင် တွိုန်။

31 အာဒါဝိတ် မိူဝ် စ်ု အာယောဖ ဘော ဂေ ဒူအီ အီ ကွယ် ဒူပ် အန်။ အန် တဝ်း၊ “ဘေ လုဝ် ကာယာတ့် ခြိုင် ပီ တာ ဘေ၊ ဝီ ဒိုဝ်း စှိုပ် ခြိုင် စာန်၊ ဝီ ယာမ် တာင်၊ ဟာဝ် နာ အာတ့် ကာလယ့် အာဘာနာ။ အီ မုး အာဒါဝိတ်၊ အန် ဘော ဒူပ် ကာလယ့် အာဘာနာ တီ။ 32 ဂေ ဘော ဒိုဝ်း ဒုဝ် ယမ် အာဘာနာ ဘော ဒိပ် အန် ခဲင် မိူင် ဟေဘြုဝ် တွိုန်။ ခုန်ဒီခမ် အာဒါဝိတ် ဘော ယာမ် တာင် ခူပ် ဘာရေဝ် အာဘာနာ။ ဒူအီ ဂေ တွိုန် ဘောကာဂ့လျီတ် မိူဝ် ဘော ကာဖြူမ် ဒီ ယာမ် ပါယ် တီ။

33 ခုန်ဒီခမ် ဘော က့လိုဝ် ဘော ငှဝ် ကူပ် ဟဲ့ ယမ် အာဘာနာ။ အန် တဝ်း မှုဝ် ပါယ် နီ၊ “မဲ အာဘာနာ နီ၊ မဲ ဟဲ့ ယမ် ပီ ဒူအီ မိူက် ဒီ ယမ်။ 34 ဒဲ မဲ မိူဝ် အီ တူ ဒွိုမ် ပက်၊ ပ့လဝ် မဲ မိူဝ် တူ ဒွိုမ် စှိုပ် ဝန် ဟိန်။ ခုဝ်၊ အာဝ် ကာအာပ် မဲ ယမ် ဒီ ဒဲ ဒူအီ ဟာယ် ဒူအီ မိူက်။” ဒူအီ ဂေ တွိုန် ဘော ဝီ ယာမ် ပေါ န့ ပွါ ကူပ် အန် တွိုန်။

35 ပန် တီ ခဲ့ ကွယ် ဒူအီ ဂေ တွိုန် ဘော တး ကာတတ် အာဒါဝိတ်၊ တဲး ဂေ ပွိုန် ဒီ ဒွါ ပီ ဒီ ဟူမ် ဒီ အန်၊ တဲး အန် ဟူမ် အာတ့် အပ် ပြဲ။ အာဒါဝိတ် ဘော ဒိူင် တဝ်း၊ “တဲး ဇဝ်ဖြာ ဒမ် မှာပ် ကာဆဝ် ဒီ အုဝ် ဆေ အုဝ် ဟူမ် မာဆေ အာတ့် ဂေတ့် ဆီငဲ။ န့ ဘော မုး ခါမုန်၊ ဘော မုး မျုဝ် မှဝ်၊ အုဝ် တူ ဟူမ်။”

36 ဒူအီ ဂေ တွိုန် ဘော ယိုဝ် လွင် အန် တီ၊ န့ ဘော လဝ့် နဝ်း ဂေ။ ခဲ့ ပီ ဘူင် ခုန်ဒီခမ် တွိုန်၊ ဟဲ့ လဝ့် နဝ်း ဒူအီ ဘောကာဂ့လျီတ်။ 37 ဆီငဲ တီ၊ ခဲ့ ကွယ် ဒူအီ အီဆာရေလ၊ ဂေ ဘောကာဂ့လျီတ် ဘော နပ်၊ န့ တူ မုး ခုန်ဒီခမ် အီ ဟဲ့ ငဝ်း ယမ် အာဘာနာ အီ မုး ဂွန် အာနေရ တွိုန်။

38 ခုန်ဒီခမ် မိူဝ် ကာလာင် ဒီ ဒူအီ အန် တဝ်း၊ “ဟဲ့ မှာန် အာခါခ်ု၊ ဒူအီ အီ မိုဝ်း အာရေ၊ အီ တာင် လွှိုမ် အီ ခဲင် ဒူအီ အီဆာရေလ အန် ဟဲ့ စှိုမ် အာတိုဝ် နီ။ 39 အုဝ် ဟဲ့ ခမ် ဒီ ဖဝ်း နာမန် တဲး အုဝ် ဘဲန် ခုန်ဒီခမ်၊ အုဝ် မိူဝ် တူ မိုဝ်း ပ့လူမ်။ အုဝ် ဟဲ့ ဟွတ့် ဒီလှး။ ဂေ အီ မုး ဂွန် အီမာယ် နာင် စေရူယာ တွိုန်၊ ဂေ ဟဲ့ ဝီ မိုဝ်း ပ့လူမ် လွှိုမ် အုဝ်။ တဲး ဇဝ်ဖြာ ဘူင် ဝျီ့ ဒီ ဂေ နာ တူ မွှိုမ် ပီ ဘူင် ဂေ၊ တဲး န့ ကာဒါန် ဒီ ပီ ဘူင် ဂေ။”