1 ခုန်ဒီခမ် အာဒါဝိတ် တွိုန် ဟဲ့ ကတ် ကာဆဝ်။ အာဆာက် အန် မိူဝ် ဟဲ့ ကိူန်။ ဂေ ပ့လိုက် ဟိုပ် ဒီ အန် မိူဝ်၊ အာဝ် ဟူ ဆီအုန့်။ 2 ခုဝ် အန် တီ၊ ဒဲစေန့် အန် ဘော တဝ်း ဒီ အန်၊ “တဲး အေ ဟြေတ့် ဒီဘျာ စှိတ် အီ ဆီ နှိုမ် ခေါ အူ ဝီ၊ ဒွါ ဒီ မဲ ခုန်ဒီခမ်၊ တဲး အန် ကွယ် ရိုမ် ဒူပ် မဲ၊ ယွတ် လိုမ်လာ မဲ၊ တဲး အန် အိတ် ဒူပ် မဲ၊ တဲး န့ ဆီအုန့် ဒီ မဲ။”

3 ပန် တီ ဂေ ဘော ဟြေတ့် ဒီဘျာ အီ စှိတ် ခဲင် မိူင် အီဆာရေလ တွိုန် ဒွန် ပ့လုဝ့်။ ဂေ ဘော ယိုဝ် နာင် အေဖီဆာက်၊ အန် မုး ဒူအီ တး မိူင် ဆူနိမ်။ ဂေ ဘော တိုယ် ဟာဝ် အန် ဒူင် ကွယ် ခုန်ဒီခမ်။ 4 နာင် တွိုန် ယီ စှိတ် ကာဆဝ်။ အန် ဘော လိုမ်လာ ခုန်ဒီခမ်။ ခုန်ဒီခမ် ယီ တူ အိတ် ရိုမ်၊ ကွယ် ရိုမ် ဒူပ် အန်။

5 ဝါယ် တီ၊ န့ မိုဝ်း အာတောနီယာ အီ မုး ဂွန် နာင် ဟာကိတ် တွိုန်။ အန် စုဝ့် ဒုဝ် ဘြိမ် အန် တဝ်း၊ “အုဝ် အီ ဒီ ဘဲန် ခုန်ဒီခမ်။” ခုဝ်၊ အန် တဲး အီ မ့ပြာယ် ရဲန် မင်ပြွင့် ဂေ လက်လဝ် ဘော ဒူအီ ဖန် ဂိုဝ် ဝီ၊ တဲး ဂေ ဟာဝ် ယဲတ့် ဒီ အာတ့် အန်။ 6 ဂုန့် အန် ယီ တူ ဒွိုမ် ခြဲ အန်၊ တဲး အန် ဘူင် အီ လဝ့် နဝ်း အန်၊ တူ ဒွိုမ် တဝ်း၊ “မှဝ် န့ ပါယ် ပီ ဘူင် မဲ ပါယ် တီ။း” အာတောနီယာ ဟဲ့ စှိတ် ကာဆဝ်။ အန် ဟဲ့ ဂွိုတ် ဒါမ် အာဘာဆာလူမ်။

7 အန် ဘော ဆင်ချာင် ဒီ အာယောဖ အီ မုး ဂွန် နာင် စေရူယာ။ အန် ဘော ဆင်ချာင် ဘော ဒီ ဒါ အီ လှူ ဒီ ဇဝ်ဖြာ အီ စိူဝ် အာဘာထာ တွိုန်၊ တဲး ဂါယ် ကွယ် ဘ့လာက် အန်။ ဟဲ့ ဟွတ့်၊ ဂါယ် စွယ် အန်။

8 န့ ယီ မုး ဒါ အီ လှူ ဒီ ဇဝ်ဖြာ အီ စိူဝ် အာဇာဒူက် ဘော အာဘီနာယာ အီ မုး ဂွန် အာယေဟောယာဒါ တွိုန်၊ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာနာထာန် ဘော အာဆီမီ ဂါယ် အာရေအီ ဘော ဒါ ဘုဝ် အီ မိုဝ်း ပ့လူမ် တာင်၊ ဂေ ဘောကာဂ့လျီတ် ကွယ် ရိုမ် ဒူပ် အာဒါဝိတ်၊ တူ ဟာဝ် ဘ့လာက် အာတောနီယာ။

9 အာတောနီယာ တွိုန် ဘော လှူ မက် အာလူင့် ဂေ မာဘူ။ အန် ဘော ငဝ်း ဒုဝ် ဂေ တီ ခူပ် မာဝ် စောဟဲလိက် အီ ကွယ် ကာတတ် ဒူင် စိူဝ် အေရုဝ်ကေ။ အန် ဘော ဘာင် ဝါ အန် ဘောကာဂ့လျီတ် အီ မုး ဂွန် ခုန်ဒီခမ် အာဒါဝိတ်။ အန် ဘာင် ဘော ဒူအီ အာယူဒါ အီ မုး အာမူ အာမာတ် ခုန်ဒီခမ် တွိုန်။ 10 အန် ယီ တူ ဒဲ့ တူ ဘာင် ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာနာထာန်၊ အာဘီနာယာ ဘော ဒါ ဘုဝ် တွိုန်။ အန် မိူဝ် တူ ဘာင် ဝါ အန် အီ စိူဝ် အာဆာလုဝ်မုဝ် တွိုန်။

11 ပန် တီ အာနာထာန် တွိုန် ဘော ကာလာင် ဒီ နာင် ဘေတ်ဆေဘာ အီ မုး မာ အာဆာလုဝ်မုဝ် တွိုန်။ အန် ဒီမွှတ် တဝ်း၊ “မဲ နာင် ဟဲ့ ယိုဝ် လွင် အာတောနီယာ အီ မုး ဂွန် နာင် ဟာကိတ် တွိုန်။း အန် ဟဲ့ ပြာ ဒီ ဘဲန် ခုန်ဒီခမ်၊ တူ တဲး ခုန်ဒီခမ် အာဒါဝိတ် နပ်။ 12 ကူပ် န့ ပါယ် တီ ဒေါ တီ နီ အုဝ် ဒီ တဲး အာကျာမ် အာငျာန် ဒီ မဲ၊ တဲး န့ ချွတ် အာဆာက် မဲ ဘော အာဆာက် အာဆာလုဝ်မုဝ် အီ မုး ဂွန် မဲ။ 13 တဲး မဲ ဝီ လိုပ် ဟာဝ် ဒူင် ကွယ် ခုန်ဒီခမ် အာဒါဝိတ်၊ ဝီ တဝ်း၊ ‘အိုယ် မဲ ခုန်ဒီခမ် အီ အိုပ် အုဝ်၊ မဲ ဟဲ့ ဒွိုမ် ကာဆဲန့် ဒီ အုဝ် တဝ်း၊ “ဂွန် မဲ အီ စိူဝ် အာဆာလုဝ်မုဝ် အီ ဒီ ဘဲန် ခုန်ဒီခမ် ပ့လု အုဝ်။ အန် ဒီ အိုပ် မိူင် ဝါယ် အုဝ်။” မဲ ဟဲ့ ဟွတ့် ကာလာင် အုန် ပါယ် တီ အာဝ် မုး။း ဆေ န့ ပါယ် တီ မှဝ် န့ ပါယ် အာတောနီယာ ဆော ဝီ ပွိုန် ဒီ အိုပ် ဘိုင် မိူင်။း’ 14 ဒေါ ဆီငျာ ကာလာင် မဲ ဂြုဝ်း တီ ဒီ ခုန်ဒီခမ်၊ အုဝ် ဒီ ဝီ လိုပ် တး စွယ် မဲ ကာလာင် ဂြုဝ်း။”

15 အန် ဟဲ့ ဟွတ့် ကာလာင် ဂြုဝ်း တီ၊ နာင် ဘေတ်ဆေဘာ တွိုန် ဘော လိုပ် ဟာဝ် ခဲင် အိတ် ဒူင် ကွယ် ခုန်ဒီခမ် အီ ဟဲ့ ကတ် ကာဆဝ်။ နာင် အေဖီဆာက် အီ တး မိူင် ဆူနိမ် တွိုန် ဘော ယွတ် လိုမ်လာ အန်။ 16 နာင် ဘေတ်ဆေဘာ ဘော ခြိုပ်ခြဝ် ကြိုပ် ခုန်ဒီခမ်။ ဟဲ့ ဟွတ့်၊ ခုန်ဒီခမ် ဘော ဒီမွှတ် အန် တဝ်း၊ “မာဆေ ပီ လုဝ် မဲ။း”

17 အန် ဘော တဝ်း၊ “အိုယ် မဲ ဒါ ကာညာ အီ အိုပ် အုဝ်၊ မဲ ဟဲ့ ဒွိုမ် ဂါဝ် ပွုန် ဇဝ်ဖြာ အီ မုး ဇဝ်ဖြာ ပီ ကြိုပ် မဲ။ မဲ ဟဲ့ ဒွိုမ် ဒိူင် တဲး ဇဝ်ဖြာ ထူမ်။ မဲ ဟဲ့ ကာဆဲန့် ဒီ အုဝ် အီ မုး ဒဲစေန့် မဲ။ မဲ ဟဲ့ တဝ်း၊ ‘ဂွန် မဲ အီ စိူဝ် အာဆာလုဝ်မုဝ် အီ ဒီ ဘဲန် ခုန်ဒီခမ် ပ့လု အုဝ်။ အန် ဒီ အိုပ် မိူင် ဝါယ် အုဝ်။’ 18 မဲ ယွတ်၊ ဒေါ တီ နီ၊ အာတောနီယာ တွိုန် ဟဲ့ ဝီ ဘဲန် ခုန်ဒီခမ်။ မဲ ခုန်ဒီခမ် အီ မုး ဒါ ကာညာ အီ အိုပ် အုဝ်၊ မဲ ယီ တူ နပ် လွင် အန် တီ။ 19 အန် ဟဲ့ လှူ မာမက် ဂေ မာဘူ။ အန် ဘော ဒဲ့ ဘော ဘာင် ခဲ့ ကွယ် ဂွန် မဲ ခုန်ဒီခမ်။ ဘော ဒါ အီ လှူ ဒီ ဇဝ်ဖြာ အီ စိူဝ် အာဘာထာ၊ ဘော အာယောဖ အီ အိုပ် ဒါ ဆိုက် မဲ တွိုန်၊ အန် ဟဲ့ ဘာင်။ အီ မုး အာဆာလုဝ်မုဝ်၊ အန် ယီ တူ ဒဲ့၊ တူ ဘာင်။ 20 အိုယ် မဲ ခုန်ဒီခမ် အီ အိုပ် အုဝ်၊ ဂေ ဒူအီ အီဆာရေလ ဘောကာဂ့လျီတ် ဘ်ု ဒီ ယွတ်၊ ယုဝ် မဲ ဒီ တဲး အာဆေ အိုပ် မိူင် တီ ဝါယ် မဲ ခုန်ဒီခမ် နီ။ 21 ဆေ မဲ တူ ကာလာင် အုန် ဆီချာ၊ ဆေ မဲ ခုန်ဒီခမ် ဟီ ယမ် ပီ ဒါ ဒါ မဲ ဂေ တွိုန်၊ ဘော အုဝ် ဘော ဂွန် အုဝ် အီ စိူဝ် အာဆာလုဝ်မုဝ်၊ ယာယ် ဒီ ကာဒုး ဒီ ခမ် ဒုက် ကာဆဝ်။”

22 ဒေါ ကာလာင် အန် ဂြုဝ်း တီ ဒီ ခုန်ဒီခမ်၊ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာနာထာန် ဘော လိုပ် တး။ 23 အီ ဟဝ် ဘော ကာလာင် ဒီ ခုန်ဒီခမ် တဝ်း၊ “ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာနာထာန် ဟဲ့ တး။” ဟဲ့ ဟွတ့်၊ အာနာထာန် ဘော တး ဇမ် ဒူင် ကွယ် ခုန်ဒီခမ်။ အန် ဘော ကြိုပ် ဂိုပ် ဒီ အာတ့် ခုန်ဒီခမ် တဝ်း၊ 24 “အိုယ် မဲ ခုန်ဒီခမ်၊ မဲ မုး ဒါ ကာညာ အီ အိုပ် အုဝ်။ ကာလာင် ဒီ အုဝ်၊ န့ မုး မဲ အီ ဟဲ့ တဝ်း၊ ‘အာတောနီယာ အီ ဒီ ဘဲန် ခုန်ဒီခမ် ပ့လု အုဝ်။ အန် ဒီ အိုပ် မိူင် ဝါယ် အုဝ်။း’ န့ မှာန်၊ မဲ ဟဲ့ မိုဝ်း ဒီ တဝ်း ပါယ် တီ။း 25 အာတိုဝ် နီ အာတောနီယာ ဟဲ့ လူင်၊ ဟဲ့ လှူ ကိူန် မက် အာလူင့် အီ ဂ့လန့်။ ဘော မာဘူ အန် ငဝ်း ကိူန်။ အန် ဟဲ့ ဒဲ့ ဟဲ့ ဘာင် ခဲ့ ကွယ် ဂွန် မဲ ဘော ဒါ ဘုဝ် အီ အိုပ် ဒါ ဆိုက် ဘော ဒါ အီ လှူ ဒီ ဇဝ်ဖြာ အီ စိူဝ် အာဘာထာ တွိုန်။ ဂေ တီ ဟဲ့ ကာဖြူမ် ဒီ ဟူမ် ဒီ ဒျီင် ကွယ် ရိုမ် ဒူပ် အန်။ ဂေ ဒတ် တဝ်း၊ ‘တဲး အာဆာက် အာတောနီယာ ကွယ် ဆေဆေ။’

26 အီ မုး အုဝ် ဘော အာဇာဒူက် အီ လှူ ဒီ ဇဝ်ဖြာ ဘော အာဘီနာယာ အီ မုး ဂွန် အာယေဟောယာဒါ ဘော အာဆာလုဝ်မုဝ် အန် ယီ တူ ဒဲ့၊ တူ ဘာင်။ 27 မဲ ခုန်ဒီခမ်၊ မဲ မုး ဒါ ကာညာ အီ အိုပ် အုဝ်၊ တဲး မဲ ကာလာင် ဒီ အုဝ်၊ အာဆေ အီ ဒီ ဘဲန် ခုန်ဒီခမ် အီ ဒီ ပ့လု မဲ။း ဟဲ့ မှာန်၊ န့ မုး မဲ၊ အီ ဟဲ့ တဲး အန် ဘူင် ပါယ် တီ ကွဲ့ တဲး ယေ နပ်။း”

28 ပန် တီ ခုန်ဒီခမ် အာဒါဝိတ် ဝီ တဝ်း၊ “ဒဲ့ နာင် ဘေတ်ဆေဘာ တး။” ဟဲ့ ဟွတ့်၊ နာင် တွိုန် ဝီ တး ဒူင် ကွယ် ခုန်ဒီခမ်။ ဝီ ကွယ် နာ အာတ့် အန်။ 29 ခုန်ဒီခမ် ဘော ဝီ ဒိူင် တဝ်း၊ “ဇဝ်ဖြာ ဟဲ့ နပ်၊ အုဝ် တူ ကာလုဝ်။ အန် ဇဝ် ဟဲ့ ချွတ် အာဆာက် အုဝ်၊ တဲး အုဝ် လွတ် ခဲင် ဒုက် ဒွန် မျုဝ်။ 30 အာတိုဝ် နီ၊ အုဝ် ဒီ ဘူင် ခဲ့ ပီ ဒွိုမ် ဒိူင် အုဝ်၊ တဲး ဘော ဇဝ်ဖြာ ထူမ် အီ မုး ဇဝ်ဖြာ ပီ ကြိုပ် ဒူအီ အီဆာရေလ။ အုဝ် ဟဲ့ ဒွိုမ် တဝ်း၊ ‘ဂွန် မဲ အီ စိူဝ် အာဆာလုဝ်မုဝ် အီ ဒီ ပွိုန် ဒီ ဘဲန် ခုန်ဒီခမ် ပ့လု အုဝ်။ အန် ဒီ အိုပ် မိူင် ဝါယ် အုဝ်။’ အုဝ် ဒီ ဘူင် တဲး န့ ပါယ် တီ အာတိုဝ် နီ။”

31 နာင် ဘေတ်ဆေဘာ ဘော မုတ် ဂိုပ် ဒီ အာတ့် ခုန်ဒီခမ်။ အန် ဝီ တဝ်း၊ “တဲး မဲ ခုန်ဒီခမ် အီ အိုပ် အုဝ် ကွယ် ဆေဆေ။”

32 ခုန်ဒီခမ် ဝီ တဝ်း၊ “ဒဲ့ အာဇာဒူက် အီ မုး ဒါ အီ လှူ ဒီ ဇဝ်ဖြာ ဘော အာနာထာန် အီ မုး ဒါ အီ ဘျာန် ဂြုဝ်း ဇဝ်ဖြာ ဘော အာဘီနာယာ အီ မုး ဂွန် အာယေဟောယာဒါ တွိုန်၊ တဲး ဂေ တး။” ဂေ တွိုန် ဘော လိုပ် တး ဇမ် ဒီ အာတ့် ခုန်ဒီခမ်။ 33 ခုန်ဒီခမ် ဝီ တဝ်း ဒီ ဂေ၊ “တဲး ဘေ ဒဲ့ ခဲ့ ကွယ် ဒူအီ အီ ဒူပ် အုဝ်။ တဲး ဘေ ဒဲ့ ဘော ဂွန် အုဝ်၊ အီ စိူဝ် အာဆာလုဝ်မုဝ်၊ တဲး အန် ပဝ့် မာလုဝ် အုဝ်၊ ဟာဝ် ဒီ တုဝ်း အိုမ် အီ စိူဝ် ဂီဟူန်။ 34 ဘေ ဟီ ဇမ် ဒူင် တီ၊ အာဇာဒူက် အီ မုး ဒါ အီ လှူ ဒီ ဇဝ်ဖြာ ဘော အာနာထာန် အီ ဘျာန် ဂြုဝ်း ဇဝ်ဖြာ၊ ဂါယ် လုဝ် ဖဝ်း နာမန် ဒီ ဂိန့် အန်၊ တဲး အန် ဘဲန် ခုန်ဒီခမ် အီ အိုပ် မိူင် အီဆာရေလ။ ဟဲ့ ဟွတ့်၊ ဘေ လုဝ် ဘုတ် ဝဝ် ဘော ဒတ် တာင် တဝ်း၊ ‘တဲး ခုန်ဒီခမ် အာဆာလုဝ်မုဝ် ကွယ် ဆေဆေ။’ 35 ဝါယ် တီ ဘေ လုဝ် ဝီ ကာဖြူမ် ဒီ တး ဒူပ် အန်၊ တဲး အန် တး တုတ့် ဒဲင် မာလာင် အုဝ်၊ တဲး အန် ဝီ အိုပ် မိူင် ကာဒါင် အုဝ်။ အုဝ် ဟဲ့ တဲး အန် အိုပ် ဒူအီ အီဆာရေလ ဘော ဒူအီ အာယူဒါ။”

36 အာဘီနာယာ အီ မုး ဂွန် အာယေဟောယာဒါ တွိုန်၊ အန် ဝီ တဝ်း၊ “တဲး န့ ဘဲန် ပါယ် တီ။ ဇဝ်ဖြာ အီ မုး ဇဝ်ဖြာ ပီ ကြိုပ် မဲ ဒါ ကာညာ အုဝ်၊ တဲး ဘော အန် ဖြူမ် ပီ တဝ်း မဲ တီ။ 37 ဇဝ်ဖြာ ဟဲ့ ကွယ် ရိုမ် ဒူပ် မဲ ခုန်ဒီခမ် ပါယ် မှဝ်၊ တဲး အန် ဝီ ကွယ် ရိုမ် ဒူပ် အာဆာလုဝ်မုဝ် ပါယ် တီ။ ဒေါ အိုပ် အန် မိူင် အေ တဲး အန် မိုဝ်း အာဖုင် ဒင်ခုဝ် တာင် လွှိုမ် အာဖုင် ဒင်ခုဝ် မဲ ခုန်ဒီခမ် အာဒါဝိတ်။” 38 ပန် တီ အာဇာဒူက် အီ မုး ဒါ အီ လှူ ဒီ ဇဝ်ဖြာ ဘော အာနာထာန် အီ ဘျာန် ဂြုဝ်း ဇဝ်ဖြာ ဘော အာဘီနာယာ အီ မုး ဂွန် အာယေဟောယာဒါ ဘော ဂေ ဒူအီ ခေရေဆီ ဂေ ဒူအီ ဘေလဆီ ဂေ ဘော ကာဖြူမ် ဒီ ဟာဝ် တဲး အာဆာလုဝ်မုဝ် ပဝ့် မာလုဝ် ခုန်ဒီခမ် အာဒါဝိတ်၊ တဲး အန် ဟာဝ် ဒီ တုဝ်း အိုမ် ဂီဟူန် တွိုန်။ 39 အာဇာဒူက် အီ မုး ဒါ အီ လှူ ဒီ ဇဝ်ဖြာ၊ အန် ဘော ဒိုဝ်း လေး ကာပဝ် နာမန် ခဲင် ထိုပ် ဘိက် ဘွတ် တွိုန်၊ ဘော ဖဝ်း နာမန် တီ ဒီ ဂိန့် အာဆာလုဝ်မုဝ်၊ တဲး အန် ဘဲန် ခုန်ဒီခမ်။ ဟဲ့ ဟွတ့်၊ ဂေ ဘော ဘုတ် နိုင် ပဲ။ ဒူအီ ဂေ တွိုန် ဘောကာဂ့လျီတ် ဘော ကာဖြူမ် ဒီ ဒတ် တဝ်း၊ “တဲး ခုန်ဒီခမ် အာဆာလုဝ်မုဝ် နီ ကွယ် ဆေဆေ။” 40 ခဲ့ ကွယ် ဒူအီ ဘောကာဂ့လျီတ်၊ ဂေ ဘော ကာဖြူမ် ဒီ ဝီ ဒူပ် တး အန်။ ဂေ ဘော ဘုတ် ဝဝ် ဘော ခူယ် ကာဆဝ်။ ဂေ ဘော ဘျုဝ်၊ တဲး ကာဒါယ် ကော ဒီယေန့် ကူပ် ဆီနန် ဆီနိူင် ဂေ။

41 အာတောနီယာ ဘော ဂေ အီ လာယ် ဖြူမ် ဒူပ် အန် တွိုန်၊ ဂေ ဟဲ့ ဟွတ့် ဟူမ်၊ ဟဲ့ ဟွတ့် ဒျီင်၊ ဂေ ဘော ယိုဝ် ဂြုဝ်း ဆီနန် ဆီနိူင် တွိုန်။ အာယောဖ ဘော ယိုဝ် ဟမ် ဘုတ် ဝဝ် တွိုန်။ အန် ဒီမွှတ် တဝ်း၊ “ဂြုဝ်း အီ ဆီနန် ဆီနိူင် ခဲင် မိူင် ဘော မိူင် တီ၊ န့ မုး ကူပ် မာဆေ။း”

42 ဒါ အီ လှူ ဒီ ဇဝ်ဖြာ တွိုန်၊ အီ စိူဝ် အာယုဝ်နာထာန် အီ မုး ဂွန် အာဘာထာ၊ အန် ဘော တး။ အာတောနီယာ ဘော တဝ်း ဒီ အန်၊ “တး တး၊ မဲ မုး ဒူအီ ဘွတ်။ မဲ မိူဝ် ဒီ ကာလာင် လွင် ဘွတ်။”

43 အာယုဝ်နာထာန် ဝီ တဝ်း ဒီ အာတောနီယာ၊ “အာဝ် မုး လွင် ဘွတ်။ ဒါ ကာညာ အေ အာဒါဝိတ် ဟဲ့ ဒါင် အာဆာလုဝ်မုဝ် တဲး အန် ဘဲန် ခုန်ဒီခမ်။ 44 ခုန်ဒီခမ် ဟဲ့ စ်ု အာဇာဒူက် အီ မုး ဒါ အီ လှူ ဒီ ဇဝ်ဖြာ ဘော အာနာထာန် အီ ဘျာန် ဂြုဝ်း ဇဝ်ဖြာ ဘော အာဘီနာယာ အီ မုး ဂွန် အာယေဟောယာဒါ ဘော ဒူအီ ခေရေဆီ ဂေ ဒူအီ ဘေလဆီ၊ တဲး ဂေ ဟာဝ် ဒူပ် အာဆာလုဝ်မုဝ်၊ တဲး အန် ပဝ့် မာလုဝ် ခုန်ဒီခမ် တွိုန်။

45 အာဇာဒူက် အီ မုး ဒါ အီ လှူ ဒီ ဇဝ်ဖြာ ဘော အာနာထာန် အီ ဘျာန် ဂြုဝ်း ဇဝ်ဖြာ ဟဲ့ တး ဇမ် ဒီ တုဝ်း အိုမ် ဂီဟူန်၊ ဟဲ့ ဖဝ်း နာမန် ဒီ ဂိန့် အန်၊ တဲး အန် ဘဲန် ခုန်ဒီခမ်။ ဟဲ့ ဟွတ့်၊ ဂေ ဘော ဝီ တး။ ဂေ ဘော ခူယ် ကာဆဝ်။ ဂြုဝ်း ဂေ ဆီနန် ဆီနိူင် ခဲင် မိူင် ဘော မိူင်။ ဂြုဝ်း ပီ ယိုဝ် ဘေ တွိုန် ဟဲ့ မုး ဂြုဝ်း ဂေ တီ။ 46 အာဝ် ဝန် ခဲ့ တီ။ အာဆာလုဝ်မုဝ် ဟဲ့ ဟွတ့် တုတ့် ဒဲင် မာလာင် အာဒါဝိတ်။ 47 ဂေ အာမူ အာမာတ် ခုန်ဒီခမ် ဟဲ့ ဟွတ့် ကာဖြူမ် ဒီ ဟာဝ် မွင့်ကာရာ တဲး ဒီ ခုန်ဒီခမ် အာဒါဝိတ်။ ဂေ ဘော တဝ်း၊ ‘ဇဝ်ဖြာ အီ မုး ဇဝ်ဖြာ မဲ၊ တဲး အန် အိူပ် မျုက် အာဆာလုဝ်မုဝ်၊ တဲး အန် တာင် လွှိုမ် မဲ၊ တဲး အာဖုင် ဒင်ခုဝ် အန် တာင် လွှိုမ် မဲ။’ ခုန်ဒီခမ် မိူဝ် မုတ် ဂိုပ် ဒဲင် ကာစှူင့် အိတ် အန် တဝ်း၊ 48 ‘အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အုဝ် အိူပ် မဲ ဇဝ်။ အာတိုဝ် နီ၊ မဲ ဟဲ့ ဂေဇူ အုဝ်၊ တဲး အုဝ် ယိုဝ် အီ ဒီ ပ့လု အုဝ်၊ ဘဲန် ခုန်ဒီခမ် ဝါယ် အုဝ်။’”

49 ပန် တီ ခဲ့ ကွယ် ဂေ ခဲတ့် အာတောနီယာ တွိုန် ဘော ယုဝ် ဘော ကာဖြူမ် ဒီ တဝ် ဟာဝ် အူ ဝီ အူ ဘ့လာက်။ 50 အာတောနီယာ မိူဝ် ယုဝ် အာဆာလုဝ်မုဝ်။ ခုဝ်၊ အန် ဘော ဟာဝ် ဒူင် လှူ ဂေ ဒီ ဇဝ်ဖြာ၊ ပါ ကာတူတ့် ဘတ့် အီ ကွယ် ဒီ ကာစှူင့် လှူ။^a 51 အီ ဟဝ် ဘော ကာလာင် ဒီ အာဆာလုဝ်မုဝ် တဝ်း၊ “အာတောနီယာ တွိုန် ဟဲ့ ယုဝ် မဲ ခုန်ဒီခမ်။ အန် ဟဲ့ ပါ ကာတူတ့် ဘတ့် အီ ကွယ် ဒီ ကာစှူင့် လှူ။ အန် တဝ်း၊ ‘တဲး ခုန်ဒီခမ် အာဆာလုဝ်မုဝ် ဒိူင် ကာဆဲန့် ဒီ အုဝ် အာတိုဝ် နီ၊ ကွဲ့ တဲး အန် ငဝ်း ယမ် အုဝ် ဒီ မာပွါ့ လာင်။’”

52 အာဆာလုဝ်မုဝ် ဝီ တဝ်း၊ “ဆေ အန် ဘော မုး ဒူအီ ဘွတ်၊ အုဝ် တူ ဘူင် မာဆေ ဒီ အန်။ ဆေ ဟီ ယိုဝ် မှာပ် အန်၊ အန် လုဝ် ယမ်။” 53 ခုန်ဒီခမ် အာဆာလုဝ်မုဝ် ဘော စ်ု ဒူအီ အန် ဟာဝ်၊ တဲး ဂေ ဒိုဝ်း လေး အန် ဒီ ကာစှူင့် လှူ တွိုန်။ အန် ဘော တး မုတ် ဒီ အာတ့် ခုန်ဒီခမ် အာဆာလုဝ်မုဝ်။ ဟဲ့ ဟွတ့်၊ ခုန်ဒီခမ် အာဆာလုဝ်မုဝ် ဝီ တဝ်း ဒီ အန်၊ “တဲး မဲ ဝေန့် ဒီ ကာင် မဲ။”