1 အာဒါဝိတ် တွိုန် ဟဲ့ ရာမ် ကာတတ် ဒီ ယမ်။ အန် ကာလာင် အုန် ဂြုဝ်း ဒီ အာဆာလုဝ်မုဝ် အီ မုး ဂွန် အန်။

2 အန် တဝ်း၊ “အာဝ် လှေန့် အုဝ် ဒီ ဘော ယမ် ပီ ဒွန် အီ ဒဲင် ကာဒါယ် နီ။ ခုဝ် န့ ပါယ် တီ တဲး မဲ မိုဝ်း ပ့လူမ်၊ တဲး မဲ ဘူင် ပီ ကာအာပ် အီမာယ် ဘူင်။ 3 တဲး မဲ ထူမ် ဂြုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် မဲ။ တဲး မဲ ဒူပ် ပီ ကာလာင် အုန် အန်။ တဲး မဲ ဒူပ် အာကျာမ် အာငျာန် ဘော ဒါရာ ပီ အုန် အန် ဇဝ်။ အန် ဇဝ် ဟဲ့ ဒွိုမ် ဒဲမ် အုန် လွင် အန် တီ ခဲင် ဘပ် ဒါရာ အာမုဝ်ဆဲ တွိုန်။ ဆေ မဲ ဘူင် ပါယ် တီ မဲ ဘော ဟာဝ် နာ မှဝ်၊ မဲ ဘော ဘူင် မျုဝ် မှဝ်၊ အာဝ် စှိုမ် မာဆေ။ 4 ပါယ် တီ ဇဝ်ဖြာ ဒီ ဘော ခမ် ကာဒိက် ဆတ်ဇာ ပီ ဒွိုမ် ဒွါ အန် ဒီ အုဝ်။ အန် ဟဲ့ ဒွိုမ် တဝ်း၊ ‘ဆေ ဂွန် မဲ ဂေ လှုက်လှာန် မဲ ဘော ဒူပ် ဆီချာ န့တေန့် ပီ လုဝ် ဝဝ့် ဂေ၊ ဆေ ဂေ ဘော ဒိုဝ်း တူတ့် ခဲ့ ကွယ် နဝ်း ဖွိုမ် ဂေ၊ ဒူပ် ဆေဆေ နာ မုး နာ မှာန် ပီ တဝ်း အုဝ် ဒွန် မျုဝ်၊ ဆေ ဂေ ဘူင် ပါယ် တီ ဂေ ဒီ ဘော ပွိုန် ဒီ အိုပ် မာန် မိူင် ပီ အိုပ် မဲ ဆေဆေ။’

5 မဲ မိူဝ် ဟဲ့ နပ် လွင် ပီ ဘူင် အာယောဖ အီ မုး ဂွန် နာင် စေရူယာ တွိုန်။ အန် ဟဲ့ ငဝ်း ဒါ ဘုဝ် အုဝ် အာ ဝီ အီ အိုပ် ဒါ ဆိုက် ဒူအီ အီဆာရေလ။ အန် ဟဲ့ ငဝ်း အာဘာနာ အီ မုး ဂွန် အာနေရ ဘော အာမာဆာ အီ မုး ဂွန် အာယေဆာ။ ဒေါ တူ ကာဂုဝ်း အေ၊ အန် ဟဲ့ ဝီ ဘူင် ဝျီ့ ဒီ ဂါယ် ပဲ့ ဟဲ့ ဘူင် ဂါယ် ဒေါ လာယ် ကာဂုဝ်း အေ။ အန် ဟဲ့ ငဝ်း ဝဲန် ပါယ် တီ တဲး န့ ဘဲန် မှာပ် ဒီ အန်။ န့ ပီ ဆဲ့ အီ ရိတ် ဒီ ညွယ် အန်၊ ဘော ခူဒိန့် ပီ စှိုပ် အန်၊ န့ ဘဲ နှာမ် ဒူအီ တူ မိုဝ်း မှာပ်။ 6 တဲး မဲ ဘူင် ဒီ အန် ခဲ့ မိုဝ်း မဲ အာငျာန်။ မဲ ယီ လုဝ် ဘူင် ကွဲ့ တဲး အန် ကတ် ယမ် ဒါခိုယ်။

7 န့ ယီ မုး ဂွန် အာဘာစီ အီ မုး ဒူအီ ဂီလေအာတ် ဂေ တွိုန်၊ တဲး မဲ ဂေဇူ ဂေ၊ တဲး ဂေ ပွိုန် ဒီ လိုပ် ခဲင် ဖိုင် ဂေ အီ ဟူမ် ဒီ ရိုမ် ဒူပ် မဲ။ ခုဝ်၊ ဒေါ ကာဒုး အုဝ် ဒီ တဝ် ဒီ အာဘာဆာလူမ် အီ မုး အီကတ် မဲ တွိုန်၊ ဂေ တီ ဟဲ့ ဘူင် ဂေဇူ ဒီ အုဝ်။

8 ဘော အာဆီမီ အီ မုး ဂွန် အာဂီရာ၊ အီ ကွယ် ရဝ် ဘာဟူရိမ်၊ အီ မုး ဒူအီ အာမျုဝ် အာဘေန်ယာမ် တွိုန်၊ အန် ဆီ ကွယ် ဒူပ် မဲ။ အန် ဟဲ့ ဒွိုမ် ဒိူင်၊ ဟဲ့ အေး ကာဆဝ် အုဝ် ဒေါ ဟာဝ် အုဝ် ဒီ မိူင် မာဟာနာအိမ် တွိုန်။ ဒေါ ဝီ တး အုဝ်၊ အန် ဘ်ု ဒီ ရွုး အုဝ် ဒီ ဘ့လဲင် ယောဒါန် တွိုန်။ အုဝ် မိူဝ် ဟဲ့ ဒိူင် တဲး ဘော ဇဝ်ဖြာ ထူမ်။ အုဝ် ဟဲ့ တဝ်း ဒီ အန်၊ ‘အုဝ် တူ တဲး မဲ ယမ် ဒီ မာပွါ့ လာင်။’ 9 မာလဲ၊ ဝီ တီ မဲ ကွဲ့ တဝ်း၊ အန် တူ မိုဝ်း မှာပ်။ ခုဝ်၊ မဲ ဟဲ့ မိုဝ်း အာငျာန်။ မဲ ဒီ ဘော နပ်၊ န့ လုဝ် ဘူင် ပါယ် မှဝ် ဒီ အန်။ ဟိုက် ဂိန့် အန် ပီ ဘော ဘုဝ်း လုယ်၊ တဲး မဲ ငဝ်း ယမ် အန်၊ တဲး အန် လူင် မိူင် မာရာန။” ခဲ့ တီ အာဒါဝိတ် ဟဲ့ ဒွါ အာကျာမ် အာငျာန် ဒီ အာဆာလုဝ်မုဝ်။

10 ဝါယ် အန် တီ အာဒါဝိတ် ဘော ယမ် ဒူပ် ဒါ ဒါ အန် ဂေ တွိုန်။ ဂေ ဘော ဒိပ် အန် ခဲင် မိူင် အန်။ 11 အာဒါဝိတ် ဟဲ့ အိုပ် ဘိုင် မိူင် အီဆာရေလ၊ ဟဲ့ နုဝ့် ဖွုန် ဂိုဝ် ဆီနမ်။ အန် ဟဲ့ အိုပ် ကွယ် ခဲင် မိူင် ဟေဘြုဝ် အာဒါ ဘူ ဆီနမ် ဘော အိုပ် ကွယ် ခဲင် မိူင် ယေရူဆာလဲမ် အူယ် ဂိုဝ် ဒီ အူယ် ဆီနမ်။ 12 အာဆာလုဝ်မုဝ် ဘော ဝီ အိုပ် ဘိုင် မိူင် ဝါယ် ဟဲ့ ယမ် ဂုန့် အန် အီ မုး အာဒါဝိတ်။ အန် ဘော ကွယ် ဆီချာ၊ အာဝ် မိုဝ်း အီ ဆီ ကာဘး ဒီ အန်။

13 ဝါယ် တီ၊ အာတောနီယာ အီ မုး ဂွန် နာင် ဟာကိတ် တွိုန်၊ အန် ဝီ တး ဒူင် ကွယ် နာင် ဘေတ်ဆေဘာ အီ မုး မာ အာဆာလုဝ်မုဝ် တွိုန်။ နာင် ဘေတ်ဆေဘာ ဒီမွှတ် အန် တဝ်း၊ “မဲ ဟဲ့ တး ဒါခိုယ်။း” အန် ဝီ တဝ်း၊ “အုဝ် ဟဲ့ တး ဒါခိုယ်။”

14 အန် ပီ ဝီ တဝ်း၊ “အုဝ် မိုဝ်း ပီ ဆီ ကာလာင် ဒီ မဲ။” ပန် တီ နာင် တွိုန် ဝီ တဝ်း၊ “တဲး မဲ ကာလာင်။ အာဝ် လိူက်။”

15 အန် ဘော တဝ်း၊ “မဲ ဟဲ့ နပ် လွင် အုဝ် ဆော ဟွတ့် အိုပ် မာန် မိူင် နီ။ ဒူအီ အီဆာရေလ ဘောကာဂ့လျီတ် ဟဲ့ ဖြူမ် ဒီ တး ဒူပ် အုဝ်၊ တဲး အုဝ် ဘဲန် အီ အိုပ် ဘိုင် တူတ့် မာန် မိူင်။ မာလဲ၊ မာန် မိူင် ပဲ့ ဟဲ့ ဝီ ဘ့လိူင်၊ ပဲ့ ဟဲ့ ဝီ မုး ဝါ အုဝ်၊ အီ ဝီ အိုပ်။ ခုဝ်၊ ဇဝ်ဖြာ ဆီ တဲး န့ ဘဲန် ပါယ် တီ။ 16 ဒေါ တီ နီ၊ အုဝ် ဆီ မှာန့် အူ မျုဝ် ဒီ မဲ။ မဲ ကွဲ့ ဝဲန် ဂြုဝ်း ပီ မှာန့် အုဝ်။” နာင် တွိုန် ဝီ တဝ်း၊ “တဲး မဲ ကာလာင်။”

17 အန် ဘော တဝ်း၊ “အုဝ် မှာန့်၊ တဲး မဲ ကာလာင် ဒီ ခုန်ဒီခမ် အာဆာလုဝ်မုဝ်၊ တဲး အုဝ် ဒိုဝ်း နာင် အေဖီဆာက် အီ တး မိူင် ဆူနိမ် တွိုန်၊ တဲး အန် ဘဲန် အီဘိုန့် အုဝ်။ ကွဲ့ တဲး ခုန်ဒီခမ် ဝဲန် ဂြုဝ်း မဲ တီ။”

18 နာင် ဘေတ်ဆေဘာ ဝီ တဝ်း၊ “ဟဲ့ မုး။ အုဝ် ဒီ ကာလာင် ဒီ ခုန်ဒီခမ် ဒါင် မဲ။”

19 နာင် ဘေတ်ဆေဘာ ဘော ဟာဝ် ဇမ် ဒူင် ကွယ် ခုန်ဒီခမ် အာဆာလုဝ်မုဝ် တွိုန်၊ တဲး အန် ပွိုန် ဒီ ကာလာင် ဒီ အန် ဒါင် အာတောနီယာ တွိုန်။ ဂွန် အန် အီ မုး ခုန်ဒီခမ် ဘော ယိတ့် ဟာဝ် ရွုး မာ အန်။ အန် ဟဲ့ ဟွတ့် မုတ် ဂိုပ် ဘော ဝီ တုတ့် ဒဲင် မာလာင် အန်။ အန် ဘော စ်ု ဂေ ဟာဝ် ဒိုဝ်း မာလာင် ပေါ အူ ဘူင့်၊ တဲး မာ အန် တုတ့်။ မာ အန် ဘော တုတ့် ဘ့လာက် အာအး အန်။ 20 ပန် တီ အန် ဘော ကာလာင် တဝ်း၊ “အုဝ် ဆီ မှာန့် အာရေ တူ တာင် ဒီ မဲ။ မဲ ကွဲ့ ဝဲန် ဂြုဝ်း မာ မဲ။” ခုန်ဒီခမ် တွိုန် ဝီ တဝ်း၊ “တဲး မဲ မှာန့်၊ အုဝ် တူ ဝဲန် ဂြုဝ်း မဲ၊ မာ။”

21 နာင် တွိုန် ဘော တဝ်း၊ “အုဝ် မှာန့်၊ တဲး မဲ ဒွါ နာင် အေဖီဆာက် အီ တး မိူင် ဆူနိမ် တွိုန်၊ တဲး အန် ဘဲန် အီဘိုန့် အီကတ် မဲ အီ စိူဝ် အာတောနီယာ။”

22 ခုန်ဒီခမ် အာဆာလုဝ်မုဝ် ဝီ တဝ်း ဒီ အန်၊ “န့ ပါယ် မှဝ်၊ ပီ မှာန့် မဲ နာင် အေဖီဆာက် အီ တး မိူင် ဆူနိမ် တီ ဒါင် အာတောနီယာ။း အန် မုး အီကတ် အုဝ်။ မဲ ပီ တူ မှာန့် ဘော မာန် မိူင် ဂေ နီ တဲး ဒီ အန်။ မှာန့် ဘော ဒါ အီ လှူ ဒီ ဇဝ်ဖြာ အာဘာထာ၊ ဘော အာယောဖ အီ မုး ဂွန် နာင် စေရူယာ တွိုန် ဒွါ ဒီ အန်။”

23 ခုန်ဒီခမ် အာဆာလုဝ်မုဝ် ဘော ဒိူင် တဲး ဘော ဇဝ်ဖြာ ထူမ်။ အန် တဝ်း၊ “တဲး ဇဝ်ဖြာ ဒမ် မှာပ် ကာဆဝ် ဒီ အုဝ်၊ ဆေ အုဝ် တူ ဝီ ငဝ်း အာဆာက် အန် ကူပ် မှာန့် အန် ဇိုဝ် တီ။ 24 ဒေါ တီ နီ၊ ဇဝ်ဖြာ ဟဲ့ တဲး အုဝ် အိုပ် ဆီချာ မာန် မိူင် ဂုန့် အုဝ် အီ မုး အာဒါဝိတ်။ ဇဝ်ဖြာ ဟဲ့ စုး ဒီ ဘူင် ဒီ အုဝ်၊ တဲး န့ ဘဲန် ပီ ဒွါ အန် ကာဒိက် ဆတ်ဇာ လွင် လှုက်လှာန် အုဝ် ဒီ လာယ် ဒီ ဒါမ် ဘဲန် ခုန်ဒီခမ်။ ခုဝ်၊ အာတောနီယာ လုဝ် ယမ် အာတိုဝ် နီ။” 25 အန် ဟဲ့ ဟွတ့် ကာလာင် ဂြုဝ်း တီ၊ အန် ဘော စ်ု အာဘီနာယာ၊ အီ မုး ဂွန် အာယေဟောယာဒါ၊ တဲး အန် ဟာဝ် ငဝ်း ယမ် အာတောနီယာ။

26 အီ မုး ဒါ အီ လှူ ဒီ ဇဝ်ဖြာ အီ စိူဝ် အာဘာထာ တွိုန်၊ ခုန်ဒီခမ် ဘော တဝ်း ဒီ အန်၊ “မဲ ဟာဝ် ဒီ မိူင် အာနာထူတ် ဒီ ဒူင် နာ ဒူင် ရန့် မဲ တွိုန်။ ဟဲ့ ကာအာပ် အုဝ် ငဝ်း ယမ် မဲ။ မာလဲ၊ ဒေါ တီ နီ အုဝ် ညှမ် တဲး မဲ ယမ် ကူပ် ယဲတ့် မဲ ဒီ အာတ့် ဂုန့် အုဝ် ဒေါ ဒိုဝ်း တး ဘေ ဇီဒိူက် ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ်။ မဲ မိူဝ် ဟဲ့ ခမ် ဒုက် ဘဲန် မျုဝ် ဘဲန် မျုဝ် ပီ ဒွိုမ် ခမ် ဂုန့် အုဝ်။” 27 ပါယ် တီ အာဆာလုဝ်မုဝ် အာဝ် ဟူ တဲး အန် ဘဲန် ဒါ အီ လှူ ဒီ ဇဝ်ဖြာ။ န့ ဘော ဘဲန် ပီ ဒွိုမ် ကာလာင် ဇဝ်ဖြာ လွင် ခြိုဝ် အာအေလီ အီ ဒွိုမ် ကွယ် ဒီ မိူင် ဆီလုဝ် တွိုန်။

28 န့ ယီ မုး အာယောဖ တွိုန်၊ ဘော အန် ဟဲ့ ဒူပ် အာတောနီယာ၊ ယီ တူ ဒူပ် အာဘာဆာလူမ် တွိုန်။ ဒေါ ယိုဝ် အန် လွင် အာတောနီယာ ဂါယ် အာဘာထာ၊ အန် ဘော တဝ် ဟာဝ် ဒီ ထိုပ် ဘိက် ဘွတ်။ အန် ဘော ပါ ကာတူတ့် ဘတ့် အီ ကွယ် ဒီ ကာစှူင့် လှူ တွိုန်။ 29 အီ ဟဝ် ဘော ကာလာင် ဒီ အာဆာလုဝ်မုဝ် လွင် အာယောဖ ဟဲ့ တဝ် ဟာဝ် ဒီ ထိုပ် ဘိက် ဘွတ်၊ ကွယ် ဒီ ကာစှူင့် လှူ တွိုန်။ အာဆာလုဝ်မုဝ် ဘော စ်ု အာဘီနာယာ အီ မုး ဂွန် အာယေဟောယာဒါ တွိုန် တဝ်း၊ “တဲး မဲ ဟာဝ် ငဝ်း ဝဲန် အန်။”

30 အာဘီနာယာ တွိုန် ဘော ဟာဝ် ဇမ် ဒီ ထိုပ် ဘိက် တွိုန် ဘော တဝ်း ဒီ အာယောဖ၊ “ခုန်ဒီခမ် စ်ု မဲ၊ တဲး မဲ လေး တး နာ ရေတ့်။” အန် ဝီ တဝ်း၊ “အုဝ် တူ လေး၊ တဲး အုဝ် ယမ် ဒီ နီ။” ဟဲ့ ဟွတ့်၊ အာဘီနာယာ ဝီ ဝေန့် ကာလာင် ဒီ ခုန်ဒီခမ် တဝ်း၊ “အာယောဖ ကာလာင် ပါယ် နီ ဒီ အုဝ်။”

31 ခုန်ဒီခမ် ဝီ တဝ်း၊ “ဘူင် ဒူပ် ပီ တဝ်း အန်။ ငဝ်း ယမ် အန်။ ဟဲ့ ဟွတ့်၊ မဲ ဝီ ဒိပ် အန်။ တဲး မဲ ငဝ်း ဝဲန် ဒူအီ အီ ဟဲ့ ငဝ်း အာဆာက် အီ ဒေါ တူ မိုဝ်း ဒီခုဝ်။ ပါယ် တီ ဘော အုဝ် ဘော ခြိုဝ် ဂုန့် အုဝ် အာဝ် ဟူ လုဝ် ခမ် မှာပ် အန်။ 32 ဇဝ်ဖြာ ဒီ ဝီ တဲး အန် ခမ် မှာပ် အန်။ အန် ဟဲ့ ငဝ်း ယမ် အာ ဝီ တွိုန်၊ တူ တဲး ဂုန့် အုဝ် နပ် လွင် အန် တီ။ အီ မုး ဂွန် အီမာယ် အာနေရ တွိုန်၊ အီ စိူဝ် အာဘာနာ၊ အီ မုး ဒါ ဘုဝ် အီ အိုပ် ဒါ ဆိုက် အီဆာရေလ ဘော ဂွန် အာယေဆာ အီ စိူဝ် အာမာဆာ၊ အီ မုး ဒါ ဘုဝ် အီ အိုပ် ဒါ ဆိုက် ဒူအီ အာယူဒါ၊ ဂါယ် အာ ဝီ တီ ဟဲ့ မုး ဒူအီ မွှိုမ် လွှိုမ် အန်။ 33 တဲး အာယောဖ ဘော လှုက်လှာန် အန် လုဝ် ခမ် မှာပ် ဇိုဝ် တီ ဆေဆေ။ အီ မုး အာဒါဝိတ် ဂေ ဂွန် အန် ဘော လှုက်လှာန် အန်၊ တဲး ဂေ ပွိုန် နာ ဘွတ် နာ မွှိုမ် ဆေဆေ၊ တဲး ဂေ ဘော အိုပ် ဘိုင် မိူင် တီ ဆေဆေ။”

34 အာဆာလုဝ်မုဝ် ဟဲ့ ဟွတ့် တဝ်း ပါယ် တီ အာဘီနာယာ အီ မုး ဂွန် အာယေဟောယာဒါ တွိုန်၊ အန် ဘော ဝီ ဟာဝ် ငဝ်း အာယောဖ တဲး အန် ယမ်။ ဂေ ဘော ဒိပ် အန် ဒီ ကာဒါယ် ဒူင် ကွယ် ဘြိမ် အန် ခဲင် ပြဲ ကာဟဝ်း။ 35 ခုန်ဒီခမ် ဘော တဲး အာဘီနာယာ အီ မုး ဂွန် အာယေဟောယာဒါ တွိုန် ဝီ ကာဒါင် ဘဲန် ဒါ ဘုဝ် အီ အိုပ် ဒါ ဆိုက် အန်။ အီ မုး ဒါ အီ လှူ ဒီ ဇဝ်ဖြာ အီ စိူဝ် အာဇာဒူက် တွိုန်၊ ခုန်ဒီခမ် ဘော တဲး အန် ဝီ ပ့လု အာဘာထာ။

36 ပန် တီ ခုန်ဒီခမ် ဘော စ်ု ဂေ ဒဲ့ အာဆီမီ တွိုန် ဘော တဝ်း ဒီ အန်၊ “တဲး မဲ ဆမ် ကာင် မဲ ခဲင် မိူင် ယေရူဆာလဲမ်၊ တဲး မဲ ကွယ် ဒီ တီ။ အာဝ် ပွိုန် လေး။ အာဝ် ပွိုန် ဟာဝ် နာ မှဝ်။ 37 မဲ ဟီ လေး ဟာဝ် နာ တ ဘ့လဲင် ခီဒါရူန် တွိုန်၊ မဲ ဒီ ဝီ ခမ် မှာပ် မဲ။ တဲး မဲ ဆာဒိက်၊ တဲး မဲ နုဝ်။ မဲ ဒီ ယမ် အာခ်ု မှာန်။”

38 အာဆီမီ ဝီ တဝ်း ဒီ ခုန်ဒီခမ်၊ “ဂြုဝ်း ပီ ကာလာင် မဲ တီ ဟဲ့ မုး ဟဲ့ မှာန်။ အုဝ် မိူဝ် ဒီ ဘူင် ဒူပ် ခဲ့ ပီ တဝ်း မဲ တီ။” ပန် တီ အာဆီမီ ဘော ကွယ် လှေန့် ခဲင် မိူင် ယေရူဆာလဲမ် တွိုန်။

39 န့ ဟဲ့ ပွုန် ဟာဝ် အူယ် ဆီနမ်။ ဒေါ အန် တီ မှာယ် အာဆီမီ အာ ဝီ ဘော ဟာဝ် ဒူင် ကွယ် အာခိတ် အီ မုး ဂွန် အာမာခါ၊ အီ မုး ခုန်ဒီခမ် အီ အိုပ် မိူင် ဂါထ တွိုန်။ အီ ဟဝ် ဘော တဝ်း ဒီ အာဆီမီ၊ “မှာယ် မဲ၊ ဂါယ် ကွယ် ဒီ မိူင် ဂါထ။” 40 အာဆီမီ ဘော နပ် လွင် အန် တီ၊ အန် ဘော မ့ပြာယ် ကွပ် မာလာ အန်၊ ဘော ဟာဝ် ဒီ မိူင် ဂါထ အီ မုး ဒူင် ကွယ် အာခိတ်၊ တဲး အန် ဟြေတ့် မှာယ် အန် တွိုန်။ အန် ဘော ဒဲ့ တး ဂါယ်။

41 ပန် တီ အာဆာလုဝ်မုဝ် ဘော ယိုဝ် လွင် အာဆီမီ ဟဲ့ လေး နာ ရေတ့် မိူင် ယေရူဆာလဲမ်၊ ဟာဝ် ဒီ မိူင် ဂါထ၊ ဟဲ့ ဝီ တး။ 42 အန် ဘော စ်ု ဂေ ဟာဝ် ဒဲ့ အာဆီမီ ဘော တဝ်း ဒီ အန်၊ “အုဝ် ဟဲ့ တဲး မဲ ကာဆဲန့် ဒိူင် တဲး ဘော ဇဝ်ဖြာ ထူမ်။ အုဝ် ဟဲ့ ဒမ် ဆာဒိက် ဒီ မဲ တဝ်း၊ ‘ဆေ မဲ ဟီ ဟာဝ် ပေါ ပ့လုဝ့်၊ မဲ လုဝ် ယမ် ဆီငဲ အန် တီ အာခ်ု မှာန်။’ အုဝ် ဟဲ့ ဟွတ့် ကာလာင် အုန် ပါယ် တီ အာဝ် မုး။း မဲ မိူဝ် ဟဲ့ အိုဝ် တဝ်း၊ ‘ဂြုဝ်း ပီ ကာလာင် မဲ တီ၊ ဟဲ့ မုး။’ 43 ဆေ န့ ပါယ် တီ ကူပ် န့ ပါယ် မှဝ်၊ မဲ ပီ တူ နုဝ် ဆီချာ ဂြုဝ်း ပီ ကာဆဲန့် မဲ ဒီ အာတ့် ဇဝ်ဖြာ။ ဘော ဂြုဝ်း ပီ ဒမ် အုန် အုဝ် ဒီ မဲ။း”

44 ခုန်ဒီခမ် ဘော ကာလာင် ဒီ အာဆီမီ တဝ်း၊ “ခဲင် နဝ်း မဲ၊ မဲ နပ် တူတ့် ဒွန် မျုဝ် မှာပ် ပဲ့ ဟဲ့ ဒွိုမ် ဘူင် မဲ ဒီ ဂုန့် အုဝ် အီ မုး အာဒါဝိတ်။ ခုဝ်၊ ဇဝ်ဖြာ ဒီ တဲး မဲ ဝီ ခမ် မှာပ် မဲ တီ။ 45 န့ ယီ မုး အုဝ် ခုန်ဒီခမ် အာဆာလုဝ်မုဝ်၊ ဇဝ်ဖြာ ဒီ မွင့်ကာရာ တဲး ဒီ အုဝ်၊ တဲး အုဝ် ပွိုန် ဒီ အိုပ် မိူင် ပီ ဒွိုမ် အိုပ် အာဒါဝိတ်။ ဇဝ်ဖြာ ဒီ တဲး မိူင် တီ ကွယ် ဆေဆေ။”

46 ဟဲ့ ဟွတ့်၊ ခုန်ဒီခမ် ဘော ကာလာင် ဒီ အာဘီနာယာ အီ မုး ဂွန် အာယေဟောယာဒါ တွိုန်၊ တဲး အန် ဟာဝ် ငဝ်း ယမ် အာဆီမီ။ ပန် တီ အာဆာလုဝ်မုဝ် ဘော ပွိုန် ဒီ အိုပ် ဆီချာ မိူင်။ အာဝ် ဟူ မိုဝ်း အာဆေ အီ ဆီ ကာခဲန့် ဒီ အန်။