1 အာဆာလုဝ်မုဝ် တွိုန် ဘော လာယ် ဘဲန် အူ ဂိုက် ဒီ ခုန်ဒီခမ် ဖာရုဝ် ခဲင် မိူင် အဲဂိုပ် တွိုန်။ အန် ဘော ဒိုဝ်း ဂွန် အီဘိုန့် ခုန်ဒီခမ် ဖာရုဝ်၊ တဲး အန် ဘဲန် အီဘိုန့် အန်။ အန် ဘော တဲး နာင် တီ ကွယ် ခဲင် မိူင် အာဒါဝိတ် တွိုန်။ အန် ဘော ဆမ် ဟုဝ် ဇဝ်ဖြာ ဘော ရဲင် မိူင် ယေရူဆာလဲမ်၊ တဲး န့ ကော ဟွတ့် တူတ့်။ 2 ကူပ် န့ ညှမ် မိုဝ်း ဟုဝ် ဇဝ်ဖြာ၊ ဒူအီ ဂေ တွိုန် ဆီ လှူ ပီ ဒီ လှူ ဂေ ဒူင် ကွယ် နာ ကွာ ဘဲန် ပ့လုဝ့် ဘဲန် ပ့လုဝ့်။ 3 အာဆာလုဝ်မုဝ် ယီ ရွက့် ကာဆဝ် ဇဝ်ဖြာ။ အန် ဘူင် ဒူပ် ဒါရာ ပီ ဒွိုမ် ဘူင် ဒူပ် ဂုန့် အန် အီ မုး အာဒါဝိတ် တွိုန်။ မာလဲ၊ အန် ဘော ဒိုဝ်း ဒုဝ် ဆတ်ဒါဝါ ဘော ဆီနမ် အုး ငှုန် အီ ဒုဝ့် ဒီ ငဝ်၊ လှူ ဒီ ကာစှူင့် လှူ အီ ကွယ် ဒူင် စာ ဘဲန် ပ့လုဝ့် ဘဲန် ပ့လုဝ့်။

4 ခုန်ဒီခမ် ဘော ဟာဝ် ဒီ မိူင် ကီပွင်၊ တဲး အန် ပွိုန် ဒီ လှူ ဒီ တီ။ ခုဝ်၊ ကာစှူင့် လှူ အီ ကွယ် ဒူင် စာ ဒီ တီ အာရေ အန် ဟဲ့ တာင် လွှိုမ် ဒူင် စာ ဘဲန် ပ့လုဝ့် ဘဲန် ပ့လုဝ့်။ အန် ဘော ဒိုဝ်း ပီ ဒီ လှူ အီ ဒုဝ့် ဒီ ငဝ်၊ လှူ ဒဲင် ကာစှူင့် လှူ တီ အူ ဟြဲန့် ဇေန့်။ 5 ဒေါ ကွယ် အာဆာလုဝ်မုဝ် ဒီ မိူင် ကီပွင် တွိုန်၊ ဇဝ်ဖြာ ဘော ကာပ့လုး ဒီ အန် ဒေါ အိတ် အန် ခဲင် မှိုဝ်။ အန် ဘော အိတ် မ့ဘာဝ်။ ဇဝ်ဖြာ ဘော တဝ်း ဒီ အန်၊ “တဲး မဲ မှာန့် ဒီ အုဝ် ခဲ့ ပီ ဆီ မှာန့် မဲ။”

6 အာဆာလုဝ်မုဝ် ဘော တဝ်း၊ “မဲ ဇဝ်ဖြာ ဟဲ့ ဂေဇူ ကိူန် ကာဆဝ် ဒီ ဒဲစေန့် မဲ အီ မုး ဂုန့် အုဝ် အာဒါဝိတ် ကူပ် ဒူပ် ဆီချာ အန် ဒီ မဲ ဇဝ်။ အန် မိူဝ် မိုဝ်း နဝ်း ဒူပ် ဒါရာ ဘော နဝ်း ဆိူဝ် နဝ်း မှာန်။ မဲ ဇဝ်ဖြာ ဟဲ့ ရွက့် ကာဝေ အီ မုး ဂုန့် အုဝ်၊ ဝီ ဒွါ ဂွန် အီမာယ် ဒီ အန်၊ တဲး အန် ပွိုန် ဒီ အိုပ် မိူင် ကော ဇမ် အာတိုဝ် နီ။ 7 ဒေါ တီ နီ၊ မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ မဲ ဇဝ် ဟဲ့ တဲး အုဝ် ပွိုန် ဒီ ဘဲန် ခုန်ဒီခမ် ကာဒါင် ဂုန့် အုဝ် အီ မုး အာဒါဝိတ်။ မာလဲ၊ အုဝ် ယီ ဆီ မုး ဂွန်၊ အုဝ် ယုဝ် အုဝ် တူ ပဲ ဒီ အိုပ် ဆီချာ။ 8 အုဝ် ယီ ကွယ် ကာတဲ ဒူအီ ပဲ့ ဟဲ့ ရဝ်း မဲ ဇဝ်၊ အီ မုး ခြိုဝ် ဒူအီ တာင်၊ အီ ကိူန် ကာဆဝ်၊ ကော ဟူ နပ် ဒီ တိး။ 9 ခုဝ် အန် တီ အုဝ် မှာန့်၊ တဲး အုဝ် ဒဲစေန့် မဲ နီ မိုဝ်း အာငျာန် ခဲင် နဝ်း အုဝ်။ တဲး အုဝ် နပ် ဒီ ဆုင်ဖျာတ် အာမူ ဒူအီ အီ မုး ဒူအီ ပဲ့ ဟဲ့ ရဝ်း မဲ။ တဲး အုဝ် နပ် ဒီ ကာယဝ်း လွင် အီ မွှိုမ် ဘော အီ တူ မွှိုမ်။ ဆေ မဲ ဇဝ်ဖြာ တူ စွယ်၊ အာဝ် မိုဝ်း အာဆေ အီ ဒီ ပဲ ဒီ အိုပ် ဒူအီ ကိူန် ဂေ တီ အီ မုး ဒူအီ အာမျုဝ် မဲ။”

10 ဂြုဝ်း ပီ မှာန့် အာဆာလုဝ်မုဝ် တွိုန် န့ လဝ့် ကာဆဝ် နဝ်း ဇဝ်ဖြာ။ 11 ဇဝ်ဖြာ ဝီ တဝ်း ဒီ အန်၊ “မဲ ဟဲ့ မှာန့် မီ ခဲ့ တီ။ မဲ တူ မှာန့် တဲး အာဆာက် မဲ တူင့်၊ တူ မှာန့် ကြုဝ်ကြာမ် ကိူန်၊ တူ မှာန့် တဲး မဲ ပဲ ရန်ဆူ မဲ။ မဲ ယီ မှာန့် မီ အာငျာန် ဘွတ်၊ တဲး မဲ ပွိုန် ဒီ ဆုင်ဖျာတ် နာ မှာန်။ 12 ခုဝ် အန် တီ အုဝ် ဒီ တဲး ခဲ့ ပီ မှာန့် မဲ တီ။ အုဝ် ဒီ တဲး နဝ်း ဖွိုမ် အီ ဇဲ့ဇုင် ဒီ မဲ၊ တဲး မဲ လွှက့် လှဲမ်၊ မိုဝ်း အာငျာန် ဘွတ်။ ဘော အာတ့် မဲ ဘော ဝါယ် မဲ အာဝ် မိုဝ်း အီ ပီ မဲ ခေါ အူ ဝီ။ 13 ဒဲင် တီ အုဝ် ဒီ ဘော တဲး ဘော ပီ တူ မှာန့် မဲ။ ဘော ကြုဝ်ကြာမ် ဘော ဆာရေ အုဝ် ဒီ ဒွါ ဒီ မဲ၊ ကွဲ့ တဲး န့ မိုဝ်း ခုန်ဒီခမ် အီ ပီ မဲ ဒေါ မုး စုဝ် မဲ နီ။ 14 ဆေ မဲ ဘော ဘူင် ပီ အိုင် အုဝ်၊ ဘူင် ဒူပ် တူတ့် ဒါရာ အုဝ်၊ တဲး န့ ပီ ပဲ့ ဟဲ့ ဘူင် ဂုန့် မဲ အီ မုး အာဒါဝိတ် တွိုန်၊ အုဝ် ဒီ ဘော တဲး အာဆာက် မဲ တူင့်။” 15 ဝါယ် အန် တီ အာဆာလုဝ်မုဝ် ဘော ဝီ န့ဆိုဝ်း။ အန် ဘော နပ် န့ မုး အန် အိတ် မ့ဘာဝ်။ ပန် တီ အန် ဘော ဝီ ဟာဝ် ဒီ မိူင် ယေရူဆာလဲမ်။ အန် ဘော ဟာဝ် ဒူင် ကွယ် ဇီဒိူက် ဇဝ်ဖြာ ဘော လှူ ပီ လှူ အီ ဒုဝ့် ဒီ ငဝ်။ အန် ဘော လှူ ပီ လှူ အီ ကွယ် ကာဇု ဟူမ် ရိုမ်။ အန် ဘော ဘူင် ဘ့လွယ် ဟျီင် ဒဲစေန့် အန် ဘောကာဂ့လျီတ်။

16 ပန် တီ န့ မိုဝ်း ယာ မာလမ် အာ ဝီ တး ဒူင် ကွယ် ခုန်ဒီခမ် တွိုန်၊ တး ကွယ် နာ အာတ့် အန်။ 17 အီဘိုန့် အူ ဝီ ဘော တဝ်း ဒီ အန်၊ “အိုယ် မဲ ခုန်ဒီခမ်၊ ဘော အုဝ် ဘော အီဘိုန့် ဝီ နီ ယာယ် ကွယ် ဒီရိုမ် အူ ကာင်။ ဂွန် အုဝ် အီ မုး ဒဲစေန့် မဲ နီ ဘော ဂွိုတ် တး ဒေါ ကွယ် အန် ခူပ် အုဝ်။ 18 ဝါယ် ဂွန် အုဝ် ဟဲ့ ဂွိုတ်၊ ဟဲ့ ပွိုန် အူယ် ဆီငဲ၊ ဂွန် အီဘိုန့် ဝီ နီ ဘော ဝီ ဂွိုတ် ဒေါ အန် တီ။ ယာယ် ကွယ် ဒီရိုမ် အူ ကာင်၊ အာဝ် မိုဝ်း အီ ဟဝ် ခေါ အူ ဝီ။ န့ မိုဝ်း မီ ယာယ် အာ ဝီ။

19 ကာတဲ ဆွိုမ် ဟူ မွိုန်၊ ဂွန် ဝီ နီ ဘော ယမ်။ ကူပ် ဟဲ့ အိတ် ထိပ် အန် ဂွန် အန်။ 20 ကာတဲ ဆွိုမ် တီ၊ ဒေါ ပွိုန် အုဝ် ဒီ အိတ်၊ အန် ဝီ ယိတ့် ဒိုဝ်း ဂွန် အုဝ်၊ ဝီ ဟာဝ် ဘ့လေး ခူပ် အန်၊ တဲး န့ ပူ ဒီ အန်။ အန် ဝီ ဘ့လေး ဂွန် အီ ဟဲ့ ယမ် တီ ကွယ် ခူပ် အုဝ်။ 21 ဆိန့်ဝး အုဝ် ဘော ယိတ့် တဝ်း ဒီ တဲး ဂွန် အုဝ် ပူ။ ဟွတ့်၊ ဟဲ့ ဝီ ဟွတ့် ယမ်။ ပန် တီ အုဝ် ဘော ဝီ ယွတ် ဆီချာ၊ ကော နပ်၊ အာဝ် မုး ဂွန် အာရာင် အုဝ်။”

22 အီဘိုန့် ပေါ အူ ဝီ တွိုန် ပီ ဝီ တဝ်း၊ “အာဝ် မုး၊ ဂွန် အီ အိမ် တီ မုး ဂွန် အုဝ်။ ဂွန် အီ ဟဲ့ ယမ် တီ မုး ဂွန် မဲ။” အီဘိုန့် လဲ့ အာတ့် တွိုန် ပီ ဝီ တဝ်း၊ “အာဝ် မုး ပါယ် တီ။ ဂွန် အီ ယမ် တီ မုး ဂွန် မဲ။ ဂွန် အီ ဆီ အိမ် တီ မုး ဂွန် အုဝ်။” ဂါယ် တွိုန် ဘော လာယ် ကာလာင် ပါယ် တီ ဒီ အာတ့် ခုန်ဒီခမ်။

23 ဟဲ့ ဟွတ့်၊ ခုန်ဒီခမ် ဘော တဝ်း ဒီ ဂါယ်၊ “အီဘိုန့် အူ ဝီ ဟဲ့ တဝ်း၊ ‘ဂွန် အီ ဆီ အိမ် တီ မုး ဂွန် အုဝ်။ ဂွန် အီ ဟဲ့ ယမ် မုး ဂွန် မဲ။’ ပေါ အူ ဝီ ပီ ဝီ တဝ်း၊ ‘အာဝ် မုး ပါယ် တီ။ ဂွန် မဲ အီ ဟဲ့ ယမ်၊ ဂွန် အုဝ် အီ ဆီ အိမ်။’”

24 ပန် တီ ခုန်ဒီခမ် ဝီ တဝ်း၊ “ဒိုဝ်း တး မာပွါ့ လာင် ဒွါ ဒီ အုဝ်။” ဂေ ဘော ဒိုဝ်း မာပွါ့ လာင် ဘ့လေး နာ အာတ့် ခုန်ဒီခမ်။ 25 ခုန်ဒီခမ် ဝီ တဝ်း၊ “ကာဒဲပ် ဂွန် အီ ဆီ အိမ် တီ၊ ဒွါ ဒီ အီဘိုန့် ဂါယ် တီ အူ ဝီ အူ ကာတဲ။” 26 ဟဲ့ ဟွတ့် တဝ်း ပါယ် တီ မာ ဂွန် အီ ဆီ အိမ် တွိုန်၊ အန် ကာဝေ ကာဆဝ် ဂွန် အန်။ အန် ဘော မှာန့် ဒီ ခုန်ဒီခမ် တဝ်း၊ “ဒိုဝ်း ဂွန် အီ ဆီ အိမ် တီ၊ ဒွါ ဒီ အီဘိုန့် ဝီ တီ။ အာဝ် လုဝ် ငဝ်း၊ တဲး အန် ယမ်။” အီဘိုန့် ပေါ အူ ဝီ တွိုန် ဝီ တဝ်း၊ “ကွဲ့ ဒွါ မီ ဒီ အုဝ်။ ကွဲ့ ဒွါ မီ ဒီ အန်။ ကာဒဲပ် ကာတဲ တီ အီ မုး။”

27 ပန် တီ ခုန်ဒီခမ် ဝီ တဝ်း၊ “ဒိုဝ်း ဂွန် အီ ဆီ အိမ် တီ၊ ဝီ ဒွါ ဒီ အီဘိုန့် ဝီ အာတ့် တွိုန်။ ကွဲ့ ငဝ်း အာဆာက် အန်။ အီဘိုန့် ဝီ တီ၊ အီ မုး မာ အာရာင် အန်။”

28 ဂေ ဒူအီ အီဆာရေလ ဘောကာဂ့လျီတ် ဘော ယိုဝ် လွင် ပီ ဆုင်ဖျာတ် ခုန်ဒီခမ် တီ။ ဂေ ဘော ရုဝ်ဆေ ခုန်ဒီခမ် ကူပ် ဟဲ့ ယိုဝ် ဂေ လွင် အန် ဟဲ့ မိုဝ်း အာငျာန် ပီ ဒွါ ဇဝ်ဖြာ၊ တဲး အန် နပ် ဒီ ဆုင်ဖျာတ် ဒါရာ။