1 ခုန်ဒီခမ် အာဆာလုဝ်မုဝ် ဘော အိုပ် ဘိုင် မိူင် အီဆာရေလ ဘော မိူင်။ 2 အီ ဘဲန် အာမူ အာမာတ် အန်၊ ဂေ စိူဝ် အာဇာရီယာ အီ မုး ဂွန် ဒါ အီ လှူ ဒီ ဇဝ်ဖြာ အီ စိူဝ် အာဇာဒူက်။

3 အာအေလီဟုဝ်ရိပ် ဘော အာဟီယာ အီ မုး ဂွန် အာဆီဆ တွိုန်။ ဂါယ် ဘဲန် ဒါ အီ စွယ် ဒါ စာရေ ဒဲမ် ပဲ့။ အာယောဆာဖာတ် အီ မုး ဂွန် အာဟီလုတ် တွိုန်၊ အန် ဘဲန် ဒါ စာရေ။

4 အာဘီနာယာ အီ မုး ဂွန် အာယေဟောယာဒါ။ အန် ဟဲ့ ဘဲန် ဒါ ဘုဝ် အီ အိုပ် ဒါ ဆိုက်။ အာဇာဒူက် ဂါယ် အာဘာထာ ဘဲန် ဒါ အီ လှူ ဒီ ဇဝ်ဖြာ။

5 အာဇာရီယာ အီ မုး ဂွန် အာနာထာန်၊ အန် ဘဲန် ဒါ အီ အိုပ် ဂေ ဒါ တာင် အိုပ် မိူင် ဘဲန် မိူင် ဘဲန် မိူင်။ အာဇာဘုတ် အီ မုး ဂွန် အာနာထာန် တွိုန်၊ အန် ဘဲန် ဒါ တာင် လွှိုမ် တူတ့် ဂေ အာမူ အာမာတ် ခုန်ဒီခမ်။ အန် မုး ဂိုက် ခုန်ဒီခမ်။

6 အာဟီဆာ ဘဲန် ဒါ အီ အိုပ် ခဲင် ဟုဝ် ခုန်ဒီခမ်။ အာတုဝ်နီရမ် အီ မုး ဂွန် အာဘာတ၊ အန် ဘဲန် ဒါ တာင် ဒူအီ ဂဲပ် ခွန် ဂေ စိုင်။

7 အာဆာလုဝ်မုဝ် ဘော ဒါင် ဒါ တာင် ဂိုဝ် ဒီ အာ ဝီ၊ တဲး ဂေ အိုပ် မိူင် ဘဲန် မိူင် ဘဲန် မိူင်၊ တဲး ဂေ လာယ် ကာပ့လု ဒွါ ပီ ဒီ ဟူမ် ဒီ ခုန်ဒီခမ် ဘော ဒီ ဂေ အီ ကွယ် ခဲင် ဟုဝ် အန်။ အူ ဆီနမ်၊ ဒါ တာင် ဂိုဝ် ဒီ အာ ဝီ တီ လုဝ် ဒွါ ခဲ့ ပီ လုဝ် ခုန်ဒီခမ်၊ အူ ဝီ အူ မာဂျီန်။ 8 ဒူအီ ဂေ တီ၊ ဂေ စိူဝ် ပါယ် နီ။

အာဘီဟူရာ အီ ကွယ် ဒီ နွန် အာအေဖာရိမ်၊

9 အာဘိန်ဒေကာ အီ အိုပ် မိူင် မာကတ်၊ မိူင် ဆာဘာဘိမ်၊ မိူင် ဘေတ်ဆေမေတ် ဘော မိူင် အေလူန်ဘေတ်ဟာ။

10 အာဘိန်ဟာဆိတ် အီ အိုပ် မိူင် အာရူဘူတ် ဘော မိူင် စုဝ်ခုဝ် ဂါယ် ဒူင် အီ စိူဝ် ဟေဖာ ပေါ ပ့လုဝ့်။

11 ဘေန်အာဖီနာဒါပ် အီ အိုပ် မိူင် နာဖူတ်ဒေါရာ အန် လာယ် နာင် တာဖာက် အီ မုး ဂွန် အာဆာလုဝ်မုဝ်။

12 အာဘာနာ အီ မုး ဂွန် အာဟီလုတ် အန် အိုပ် မိူင် ထာနက်၊ မိူင် မီကီတော၊ မိူင် ဘေတ်ဆဲအန် ဘော မိူင် အီ ကွယ် ခူပ် မိူင် စာတာန နာ တေတ့် မိူင် ယေစာရေလ တွိုန်။ ကာဒါယ် ပီ အိုပ် အန် တီ၊ န့ စုး ဒီ မိူင် ဘေတ်ဆန် ကော ဇမ် မိူင် အာဘေလမာဟာလ ဘော နာ ကွာ မိူင် ယူက်မမ်။

13 အာဘေန်ဂေဘာ အီ ကွယ် ခဲင် မိူင် ရာမူတ်ဂီလေအာတ် အန် အိုပ် ဒူင် ကွယ် ဂေ ဒူအီ အာယာအီရာ အီ မုး လှုက်လှာန် အာမာနာဆေ အီ ကွယ် ခဲင် မိူင် ဂီလေအာတ်။ အန် ဘော အိုပ် မိူင် အာကောဖ ခဲင် ကာဒါယ် မိူင် ဘာဆန် အီ မိုဝ်း မိူင် ဒဝ် ဂိုဝ် မိူင် အီ မိုဝ်း ရဲင် ဘော ဆဲ မာလုဝ်း ပီ ဘူင် ဂေ တာ ဘွင့်။

14 အာဟီနာဒပ် အီ မုး ဂွန် အာအီတော အန် အိုပ် မိူင် မာဟာနာအိမ်။

15 အာဟီမာတ် အီ အိုပ် မိူင် နာပ်ထာလီ အန် ဟဲ့ ဒိုဝ်း နာင် ဘာဆာမာတ် အီ မုး ဂွန် အာဆာလုဝ်မုဝ်၊ တဲး အန် ဘဲန် အီဘိုန့် အန်။

16 အာဘာနာ အီ မုး ဂွန် အာဟူဆေ အန် အိုပ် မိူင် အာဆေန် ဘော မိူင် အာလူတ်။

17 အာယောဆာဖာတ် အီ မုး ဂွန် အာရူဘာ။ အန် အိုပ် မိူင် အီဆာခါ။

18 အာဆီမီ အီ မုး ဂွန် အာအေလာ အိုပ် မိူင် အာဘေန်ယာမ်။

19 အာကေဘာ အီ မုး ဂွန် အာအူရီ အန် အိုပ် မိူင် ဂီလေအာတ်။ မိူင် တီ မုး မိူင် ပီ အိုပ် ခုန်ဒီခမ် အာဆီဟူန် အီ မုး အာမျုဝ် အာမုဝ်ရိတ်။ အန် အိုပ် ဘော မိူင် ဘာဆန် ပီ အိုပ် ခုန်ဒီခမ် အာအောခ။ အန် အူ ဝီ မုး ဒါ ကာညာ အီ ပွိုန် ဒီ အိုပ် မိူင် တီ။

20 ဒေါ အန် တီ ဒူအီ အာယူဒါ ဘော ဒူအီ အီဆာရေလ ဂေ ကိူန် ကာဆဝ် ကော ဟူ နပ် ဒီ တိး၊ ကော နှဲန် ကာဟာတ့် ဘာင် အိုမ် နမ်မုက်ဆာရာ။ ဂေ ဘော ကွယ် ဒါခိုယ်၊ ဟူမ် ဒါခိုယ်။ 21 အာဆာလုဝ်မုဝ် ဘော အိုပ် ဘိုင် ခဲ့ ကွယ် မိူင် ဂေ တွိုန်။ စုး ဒီ ဘ့လဲင် အိုမ် တာင် တွိုန်၊ ကော ဇမ် မိူင် ဖီလီထီ ဘော ကာအုန် ကာဒါယ် မိူင် အဲဂိုပ်၊ အန် အိုပ် တူတ့်။ ဂေ ဒူအီ ခဲင် မိူင် ဂေ တီ၊ ဂေ တး အာပ် လက်ဆွင် ဒီ အာဆာလုဝ်မုဝ် တဲး ကော နုဝ် ဘော စုဝ် အန်။

22 ပီ ဒီ ဟူမ် အာဆာလုဝ်မုဝ် ဂေ ဒူအီ အန်၊ အာဒါ အူ ဆီငဲ န့ တူတ့် ကာပဲ့ ခဝ်ချုင် အီ ကာမုန် ဆီချာ အူယ် ဂိုဝ် ကောရ၊^a ကာပဲ့ ခဝ်ချုင် အီ တူ ကာလာတ့် ဆီချာ ဒဝ် ဂိုဝ် ကောရ။^b 23 ဂေ ဟူမ် ဘော မာမက် အီ ဂ့လန့် ဆီချာ၊ ဂိုဝ် ဒုဝ်၊ မာမက် ပီ ဘ့လေး ဂေ တဲး န့ ဟူမ် ပေတ့် ပေါ အာ ဂိုဝ် ဒုဝ်၊ မာဘူ ဂေ မာပဲ ပေါ အူ မာယဝ်း ဒုဝ်။ ဒဲင် တီ၊ ပီ ဝီ မိုဝ်း ဘော မာဇ၊ မင်ဂျီး ဂေ မာဘွုး ဘော မာအျီန် ပီ ဟျီင် ဂေ။ 24 အာဆာလုဝ်မုဝ် ဘော အိုပ် မိူင် ကိူန်။ စုး ဒီ ဘ့လဲင် အိုမ် တာင် ဒီ မိူင် ထီဖာဆာ ဘော ဟာဝ် နာ ဂေတ့် ဆီငဲ ကော ဇမ် မိူင် ဂါဆာ အန် ဟဲ့ အိုပ် တူတ့်။ ဂေ အီ ကွယ် ရူပ် အန် အာဝ် မိုဝ်း အာဆေ အီ ကာဂုဝ်း ဒီ အန်။ 25 စုး ဒီ မိူင် ဒါန်၊ ကော ဇမ် မိူင် ဘီရာဆေဘာ တွိုန်၊ ဂေ ဒူအီ အာယူဒါ ဘော ဒူအီ အီဆာရေလ ဂေ ဘော ကွယ် ဒါခိုယ် ဒေါ မုး စုဝ် ဘာန် အာဆာလုဝ်မုဝ် တွိုန်။ ဂေ ဒွန် အီ ကွယ် ဆီချာ ခြိုမ် ဟေ မာငုန် ဘော ဟေ ဒီပူ အန်။ 26 အာဆာလုဝ်မုဝ် မိုဝ်း ဒူင် ကွယ် မင်ပြွင့် အီ လာက် လက်လဝ် အာဒါ ဖွုန် မှိုန့် ပ့လုဝ့်။ အန် မိုဝ်း ဘော ဒူအီ အီ ပဝ့် မင်ပြွင့် အူ မှိုန့် ဒီ အာ ဟြဲန့် ဝီ။

27 အာဆာလုဝ်မုဝ် ဟဲ့ ဘ့လေး ဒါ တာင် အိုပ် မိူင် ခဲင် မိူင် ဘဲန် မိူင် ဘဲန် မိူင် ပီ အိုပ် အန်၊ တဲး ဂေ ကွယ် အူ ဝီ အူ မိူင်။ ဂေ ဒါ တာင် တီ ဂေ ဒိုဝ်း ပီ ဒီ ဟူမ်၊ တိုယ် ဒီ ခုန်ဒီခမ်၊ တဲး ဘော အာဆာလုဝ်မုဝ် ဘော ဂေ အီ ကွယ် ရိုမ် ဒူပ် အန် ပွိုန် ဒီ ဟူမ်။ ဂေ ဘူင် ပါယ် တီ အူ ဝီ အူ မာဂျီန်။ ကွဲ့ တဲး န့ လုတ်၊ ကွဲ့ တဲး န့ ရမ်။

28 ဂေ ဒွန် အီ ဘော ဒိုဝ်း ဆီဂူင့်ရာ ဘော ဟျြီင် ကာဟဝ်း အာဒါ မင်ပြွင့် လက်လဝ် ဂေ မင်ပြွင့် ပဝ့်။ အာဆေ မိူဝ် လုဝ် ဒိုဝ်း တး၊ အန် ဘော တး အုန် ကြုဝ် တီ ဒီ ဒူင် ပီ လုဝ် အုန် အန်။

29 ဇဝ်ဖြာ ဘော ဒွါ အာငျာန် ကိူန် ကာဆဝ် ဒီ အာဆာလုဝ်မုဝ်။ အန် ဇဝ် တဲး အာဆာလုဝ်မုဝ် နပ် တူတ့် ဒွန် မျုဝ်။ ခဲ့ ပီ နပ် အန် န့ ကိူန် ပီ ကာဟာတ့် အီ ကွယ် ဘာင် အိုမ် နမ်မုက်ဆာရာ။ 30 အာငျာန် အာဆာလုဝ်မုဝ် တွိုန် န့ လွှိုမ် တူတ့် အာငျာန် ဒူအီ အီ ကွယ် နာ လေး ဆီငဲ။ န့ ဘော လွှိုမ် အာငျာန် ဒူအီ ခဲင် မိူင် အဲဂိုပ်။ 31 အန် မိုဝ်း အာငျာန် လွှိုမ် ဒူအီ ဘောကာဂ့လျီတ်။ အာငျာန် အန် ဘွတ် လွှိုမ် အာအေထာန် အီ မုး လှုက်လှာန် အာအေစာရာ။ န့ ဘော ဘွတ် လွှိုမ် အာဟေမာန်၊ အာကာကောလ ဘော အာဒါရာဒါ၊ ဂေ အီ မုး ဂွန် အာမာဟုဝ်။ ဂေ ဒွန် အီ ခဲင် မိူင် ဘဲန် မိူင် ဘဲန် မိူင် အီ ကွယ် ရူပ် မိူင် ပီ အိုပ် အန်၊ ဂေ ဘော နပ် လွင် အန် တီ၊ ဂေ ဘော ရုဝ်ဆေ အန်။ 32 ဂြုဝ်း မာကာထ ပီ ကာလာင် အန်၊ န့ မိုဝ်း အူယ် ဟြဲန့် ဒဲ။ မှုဝ် ပီ တဝ်း အန်၊ န့ မိုဝ်း အူ ဟြဲန့် ဒီ ဖန် ခါန်။ 33 အန် ဘော နပ် ဒီ ကာလာင် လွင် ဟေ ဘဲန် မျုဝ် ဘဲန် မျုဝ်။ ဘော ဟေ အာရိတ် အီ ကွယ် ဒဲင် နွန် လေဘာနုန် ဘော ဒဝ် ဟူဆူပ် အီ လတ့် ဒီ ရဲင် မာဝ် အန် နပ် ဒီ ကာလာင် တူတ့် လွင် အန် တီ။ အန် နပ် ဒီ ကာလာင် ဘော လွင် ဒုဝ် ဆတ်ဒါဝါ။ အီ မုး မာဆိမ်၊ ဒုဝ် အီ ကွယ် ဒဲင် ကာဒါယ် ဘော မာဂါ အီ ကွယ် ခဲင် အိုမ်၊ အန် နပ် ဒီ ကာလာင် လွင် ဒွန် ဒုဝ် ဇိုဝ် တီ။ 34 ခုန်ဒီခမ် ဒွန် မိူင် အီ ဟဲ့ ဒွိုမ် ယိုဝ် ဆာဒါင် လွင် အာငျာန် အာဆာလုဝ်မုဝ်၊ ဂေ ဒွန် အီ ဝီ တိုယ် ဒူအီ ဂေ၊ တဲး ဂေ တး ဇမ် ဒူင် ကွယ် အာဆာလုဝ်မုဝ်၊ တဲး ဂေ ထူမ် ဂြုဝ်း အန်။