1 အာဟီရမ် အီ မုး ခုန်ဒီခမ် အီ အိုပ် မိူင် ထူရုဝ် အန် ဘော ယိုဝ် လွင် ဂေ ဟဲ့ ဖဝ်း နာမန် ဒီ ဂိန့် အာဆာလုဝ်မုဝ်၊ တဲး အန် ဘဲန် ခုန်ဒီခမ် အီ ပ့လု အာဒါဝိတ်။ ဒေါ အန် တီ အန် ဘော စ်ု ဒဲစေန့် အန် ဟာဝ် ဒူင် ကွယ် အာဆာလုဝ်မုဝ် တွိုန် ကူပ် ဟဲ့ ဒွိုမ် ဘဲန် အာဟီရမ် ဂါယ် အာဒါဝိတ် အူ ဂိုက်။ 2 ပန် တီ အာဆာလုဝ်မုဝ် ဝီ စ်ု ဂေ ဟာဝ် ကာလာင် ဒီ ခုန်ဒီခမ် အာဟီရမ် တဝ်း၊

3 “မဲ ခုန်ဒီခမ် ဟဲ့ နပ် လွင် ဂုန့် အုဝ် အာဒါဝိတ်။ အန် ဟဲ့ ကာဂုဝ်း ကိူန် ဒီ ရန်ဆူ အန် ဒွန် ပ့လုဝ့်။ ခုဝ်၊ အာတ့် ဇမ် အာခြာဝ် ဒေါ တဲး ဇဝ်ဖြာ အန် အွင် ရန်ဆူ အန်၊ အန် တူ ပွိုန် ဆမ် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် အန်။ 4 ဒေါ တီ နီ၊ ဇဝ်ဖြာ အီ ဘော မုး ဇဝ်ဖြာ ပီ ကြိုပ် အုဝ်၊ အန် ဟဲ့ တဲး မာန် မိူင် အုဝ် ဒါခိုယ် ဒွန် ပ့လုဝ့်။ အာဝ် မိုဝ်း အီ ဒီ ဘဲန် ရန်ဆူ ဒီ အုဝ်။ ဘော အီ တူ မုး၊ အီ တူ မွှိုမ် အာဝ် မိုဝ်း မာဆေ ပီ ဒီ ကာတုန့် အုဝ်။ 5 ခုဝ်၊ အုဝ် ဟဲ့ တဝ်း ဒီ ဆမ် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်။ ဇဝ်ဖြာ ဟဲ့ ကာလာင် ဒီ ဂုန့် အုဝ် အီ မုး အာဒါဝိတ် တဝ်း၊ ‘ဂွန် အီမာယ် မဲ၊ ဝီ ပီ ဒီ တဲး အုဝ် အန် အိုပ် မိူင်၊ တဲး အန် ပ့လု မဲ၊ အန် ဒီ ဆမ် ဟုဝ် ဒီ အုဝ်။’

6 ခုဝ် န့ ပါယ် တီ အုဝ် မှာန့်၊ တဲး မဲ စ်ု ဒူအီ မဲ၊ ဟာဝ် ဂ်ု ဟေ အာရိတ် အီ ကွယ် ဒီ နွန် လေဘာနုန်၊ တဲး ဒီ အုဝ်။ ဘော ဒူအီ အုဝ် ဒီ ဟာဝ် စွယ် ဒူအီ မဲ။ အုဝ် ဒီ ဒွါ ငဝ်း အန်၊ ရုး အန်၊ ခဲ့ မှာန့် မဲ ခုန်ဒီခမ်။ မဲ ခုန်ဒီခမ် ဘော နပ်၊ ခဲင် ဒူအီ အုဝ် ဂေ နီ၊ အာဝ် မိုဝ်း အီ နပ် ဒီ ဂ်ု ဒီ ဒဲပ် ဟေ၊ အီ ပီ ဒူအီ မိူင် ဆီဒူန် အီ နပ် ဆီချာ ဒီ ဂ်ု ဒီ ဒဲပ် ဟေ။”

7 ခုန်ဒီခမ် အာဟီရမ် ဘော ယိုဝ် ဂြုဝ်း အာဆာလုဝ်မုဝ် တီ၊ န့ ဘော လဝ့် ကာဆဝ် နဝ်း အန်။ အန် တဝ်း၊ “အုဝ် အိူပ် ဇဝ်ဖြာ အီ ဟဲ့ ဒွါ ဂွန် အီ မိုဝ်း အာငျာန် တီ ဒီ အာဒါဝိတ်၊ တဲး အန် အိုပ် ဒူအီ အာမျုဝ် တာင် ဂေ တီ။” 8 ဟဲ့ ဟွတ့်၊ အာဟီရမ် ဝီ စ်ု ဒူအီ အန် ဟာဝ် ဒူင် ကွယ် အာဆာလုဝ်မုဝ် ဝီ တဝ်း၊ “အုဝ် ဟဲ့ နပ် လွင် ပီ ကာလာင် တး မဲ ခုန်ဒီခမ် ဒီ အုဝ်။ အုဝ် ဒီ ဘူင် ခဲ့ ပီ လုဝ် မဲ။ အုဝ် ဒီ ဒွါ ဟေ အာရိတ် ဘော ဟေ န့ကေ ခဲ့ ပီ လုဝ် မဲ။ 9 ဒူအီ အုဝ် ဒီ ဟုဝ့် ဒိုဝ်း ဒဲင် နွန် လေဘာနုန်၊ လူင် ဇမ် ဒီ အိုမ် နမ်မုက်ဆာရာ။ ဟဲ့ ဟွတ့်၊ ဂေ ဒီ ဘူင် တဲး န့ ဘဲန် ပဲ၊ တဲး န့ လှဲ လူင် ဒူပ် အိုမ်၊ တဲး ကော ဇမ် ဒူင် ပီ ကာလာင် အုန် မဲ။ ဟီ ဇမ် ဒူင် တီ၊ ဂေ ဒီ ဝီ ဂဝ်း ဟေ တီ၊ တဲး မဲ ဘော ပွိုန် ဒီ ဒိုဝ်း။ မဲ ယီ လုဝ် ဒွါ ပီ ဒီ ဟူမ် ခဲ့ ပီ လုဝ် အုဝ် အာဒါ ဒူအီ အုဝ် အီ ကွယ် ခဲင် ဟုဝ် အုဝ်။” 10 ပန် တီ အာဟီရမ် ဘော ဒွါ ဟေ အာရိတ် ဂါယ် ဟေ န့ကေ တွိုန် ဒီ ခုန်ဒီခမ် အာဆာလုဝ်မုဝ် ခဲ့ ပီ ဆီ ပွိုန် အန်။ 11 အာဆာလုဝ်မုဝ် ဘော ဒွါ ကာပဲ့ ခဝ်ချုင် အာ မှိုန့် ကောရ။^a ဘော နာမန် ပီ ဟဲ့ ဟွတ့် ကြိတ်၊ ဟဲ့ ဟွတ့် ထာရွင် အာ ဂိုဝ် ကောရ။^b ဒွန် ဆီနမ် အာဆာလုဝ်မုဝ် ဒွါ ဒီ အာဟီရမ် ပါယ် တီ။ 12 ဇဝ်ဖြာ မိူဝ် ဒွါ အာငျာန် ဒီ အာဆာလုဝ်မုဝ်၊ တဲး န့ ပီ ပဲ့ ဟဲ့ ဒွါ အန် ကာဒိက် ဆတ်ဇာ။ အာဟီရမ် ဘော အာဆာလုဝ်မုဝ် ဂါယ် အာ ဝီ တီ အာဝ် ဟူ လာယ် ကာဂုဝ်း။ ဂါယ် လာယ် ဘဲန် အူ ဂိုက်။

13 ခုန်ဒီခမ် အာဆာလုဝ်မုဝ် ဘော စ်ု ခဲ့ ကွယ် ဒူအီ အီဆာရေလ ဒွန် ပ့လုဝ့်၊ တဲး ဂေ ဘူင် ဂါန် အန်။ ဂေ ဘောကာဂ့လျီတ် ကွယ် အူယ် မှိုန့် ဝီ။ 14 အန် ဘော စ်ု ဂေ ဟုဝ့် ဒီ နွန် လေဘာနုန် တွိုန်၊ အူ မာဂျီန် အူ မှိုန့် ဝီ။ ဂေ ဟီ ကွယ် ဒီ နွန် လေဘာနုန် အူ မာဂျီန်၊ ဂေ ပီ ဝီ တး ကွယ် ဒီ ကာင် ဂေ အာ မာဂျီန်။ အာတုဝ်နီရမ် ယီ ဘဲန် ဒါ အီ အိုပ် ဂေ ဒူအီ အီ ဘူင် ဂါန် တီ။ 15 အာဆာလုဝ်မုဝ် တွိုန် မိုဝ်း မှာယ် ဘူ မှိုန့် ဝီ အီ လုဝ် ပး ကြုဝ် ဘဲန် မျုဝ် ဘဲန် မျုဝ်။ အန် မိုဝ်း ပေါ ဒါ မှိုန့် ဝီ အီ လိုဝ် မာဝ်။ 16 ဒဲင် တီ န့ ဝီ မိုဝ်း အူယ် ဟြဲန့် ဒီ အူယ် မာယဝ်း ဝီ အီ ယဲတ့် ဂေ အီ ဘူင် ဂါန်၊ တဲး ဂေ ဘူင် ဆီချာ။ 17 ခုန်ဒီခမ် ဘော စ်ု ဂေ၊ တဲး ဂေ ဒိုဝ်း မာဝ် တာင် အီ မွှိုမ်၊ အီ တူ ဒး။ ဂေ ဘော ဒိုဝ်း လေး ကိူန် မာဝ် အီ ငဝ်း ကာဆဝ် ဒီ နွန် ဒါအာင်။ ဂေ ဝီ ဒဝ်း မာဝ် တီ၊ တဲး န့ ဘဲန် စေန့် ရွင့် ခဲင် ဟုဝ် ဇဝ်ဖြာ။ 18 ပန် တီ ဂေ အီ မုး ဒါလာက် အာဆာလုဝ်မုဝ် ဘော ဂေ အီ မုး ဒါလာက် အာဟီရမ် ဘော ဂေ ဒူအီ ကွယ် မိူင် ကေပါလာ ဂေ ဘော ကာဖြူမ် ဒီ ရဲန် ဒီ ဘူင် ဟေ ဂေ မာဝ် တဲး န့ ပွိုန် ဒီ ဆမ် ဟုဝ် ဇဝ်ဖြာ တွိုန်။