1 အာဆာလုဝ်မုဝ် ဟဲ့ ဘဲန် ခုန်ဒီခမ် အာဒါ ဖွုန် ဆီနမ်၊ န့ ဘော ဇမ် မာဂျီန် ဇီဖ အီ မုး မာဂျီန် ဟာအာ။ ဒေါ အန် တီ အာဆာလုဝ်မုဝ် စုး ဒီ ဆမ် ဟုဝ် ဇဝ်ဖြာ။ ဆီနမ် အန် တီ ဟဲ့ ပွိုန် ဖွုန် မာယဝ်း ဒီ ဒါ ဂိုဝ် ဆီနမ် ဝါယ် လေး ဂေ ဒူအီ အီဆာရေလ ခဲင် မိူင် အဲဂိုပ် တွိုန်။

2 ဟုဝ် ဇဝ်ဖြာ ပီ တဝ်း အာဆာလုဝ်မုဝ် ဒီ ဆမ်၊ န့ တာင် ခဲ့ နီ။ နာ တူင့် အန် ဒဝ် ဂိုဝ် ကာနိး။ နာ တျီမ် အန် အာ ဂိုဝ် ကာနိး။ နာ စာ အန် အူယ် ဂိုဝ် ကာနိး။ 3 ဟူင် အီ ကွယ် ဘာင် မာလုဝ်း ဟုဝ် အန် တွိုန် နာ တျီမ် အန်၊ န့ ကာရမ် နာ တျီမ် ဟုဝ် ဇဝ်ဖြာ၊ ဟဲ့ ဘဲန် အာ ဂိုဝ် ကာနိး။ နာ တူင့် အန် ယီ မုး ဂိုဝ် ကာနိး။ 4 ဒီ ရဲင် ဟုဝ် တွိုန်၊ အန် ဘူင် ကာဒဝ် ပါတဲင် ကာချီ့ အီ မိုဝ်း ရာင် ဘုဝ်း နာ ခဲင်။ 5 နာ ရေတ့် ရဲင် အန် ဘူင် ဟူင် ဘဲန် ဟူင် ဘဲန် ဟူင်၊ တဲး န့ ကော ရူပ် ဟုဝ် အူယ် ဘ့လာက်၊ ဝီ ဘဲန် အူယ် ခြွင့်။ 6 ခြွင့် ခြိုမ် ဟဲ့ ဝဝ်း ဖန် ကာနိး။ ခြွင့် ဒီ ကာတဲ ဟဲ့ ဝဝ်း ဒဝ် ကာနိး။ ခြွင့် ဒဲင် ဟဲ့ ဝဝ်း ဘူ ကာနိး။ ဘ့လာက် နာ ရေတ့် အန် တဲး ရဲင် ဟူင် စှူစှိုင်၊ ကွဲ့ တဲး နွန် ဟူင် လိုပ် ခဲင် ရဲင် ဟုဝ် ဇဝ်ဖြာ။

7 ဆိန့် အာတ့် ဒိုဝ်း တး ဂေ မာဝ် ပဲ့ ဟဲ့ ဒဝ်း ဂေ တွိုန်၊ ဂေ ဟဲ့ ဂဝ် ခဲ့ ဆီချာ အန်။ ခုဝ်၊ တူ ယိုဝ် ဂြန့် ပွါ့၊ ဂြန့် မိုယ် ဂေ။ ဘော ဂြန့် ခြိုင် ဟိန် အီ ဆီနန် အာဝ် ဟူ မိုဝ်း ဒေါ ဆမ် ဂေ ဟုဝ် တွိုန်။

8 မာလုဝ်း အီ လိုပ် ခဲင် ဟူင် ခြိုမ် တွိုန်၊ အန် ကွယ် ဘ့လာက် အာအး ဟုဝ် ဇဝ်ဖြာ တွိုန်။ န့ ဘော မိုဝ်း န့တဲင် အီ ဟုဝ့် ဒီ ခြွင့် ကာတဲ ဘော ဝီ ဟုဝ့် ဒီ ဟူင် ခြွင့် ဒဲင်။ 9 အာဆာလုဝ်မုဝ် ဘူင် ဟုဝ် ဇဝ်ဖြာ တီ၊ တဲး န့ ကော ဟွတ့် တူတ့်။ အန် ဘော ဒိုဝ်း မာနက် ဂေ ဘဲန်၊ တာ ဟေ အာရိတ်၊ ဝီ တပ် ဟုဝ် ဇဝ်ဖြာ တွိုန်။ 10 ဟူင် ဂေ တွိုန် အန် ဘူင် တဲး ဂေ ကွယ် ရူပ် ဟုဝ် ဇဝ်ဖြာ။ နာ စာ အန် အူ ခြွင့် ဖန် ကာနိး။ ဒွန် ဟူင် ဟဲ့ ကာရမ် မုး အူ မျုဝ်။ အန် တာ ဘော ဟေ အာရိတ် အီ ဘဲန် နွန် ဟူင်။ ဂေ ဂါယ် အုန် နွန် တီ ဒီ ရဲင် ဟုဝ် ဇဝ်ဖြာ။

11 အူ ဆီငဲ ဇဝ်ဖြာ ဝီ ကာလာင် ဂြုဝ်း ဒီ အာဆာလုဝ်မုဝ်။ 12 အန် တဝ်း၊ “မဲ ဆမ် ဟုဝ် အုဝ် ဒေါ တီ နီ။ ဆေ မဲ ဘော ဒူပ် ခဲ့ ပီ ကာလာင် အုဝ်၊ မဲ ဘော ဘူင် ပီ စ်ု အုဝ် မဲ ဘူင်၊ မဲ ဘော ဒူပ် ဒါရာ အုဝ် ဒွန် ညွင့်၊ ဆေ မဲ ဘော ဘူင် ပါယ် တီ ဘော အုဝ် ဒီ ဘူင် တူတ့် ပီ ဒွါ အုဝ် ကာဒိက် ဆတ်ဇာ ဒီ ဂုန့် မဲ အာဒါဝိတ်။ 13 အုဝ် မိူဝ် ဒီ ကွယ် ရိုမ် ဒူပ် ဒူအီ အီဆာရေလ ဆေဆေ။ အုဝ် မိူဝ် တူ ဘ့လေး ဝဲန် ဂေ ဒေါ မှဝ်။ ဂေ မုး ဒူအီ ပီ ရွက့် အုဝ်။”

14 ပါယ် တီ အာဆာလုဝ်မုဝ် ဘူင် ဟုဝ် ဇဝ်ဖြာ၊ တဲး န့ ကော ဟွတ့် တူတ့်။ 15 အန် ဘူင် ရဲင် အီ ကွယ် နာ ခဲင်၊ တာ ဟေ အာရိတ်။ စုး ဒီ ဘိူန် အန် ကော ဇမ် မာနက် အန်၊ အန် တာ တူတ့် ဘဲန်။ ဘဲန် ဒ အန် ဝီ မုး တူတ့် ဟေ န့ကေ။

16 ခဲင် ဟုဝ် တွိုန်၊ အန် ဂွင့် နာ ပန်၊ တဲး တူင့် အန် ဂါယ် တျီမ် အန် အာ ဂိုဝ် ကာနိး အူ မျုဝ်။ စုး ဒီ ဘိူန်၊ ကော ဇမ် ကာဘိုယ် အန်၊ အန် တာ တူတ့် ဘဲန် ဟေ အာရိတ်။ အန် တဲး ဒူင် တီ ဝီ ဘဲန် ဒူင် ဘွတ် လွှိုမ် တူတ့်။ 17 ဟုဝ် အီ ကွယ် နာ အာတ့် ဟူင် တွိုန်၊ ဟဲ့ တူင့် ဖွုန် ဂိုဝ် ကာနိး။ 18 နာ ခဲင် ဟုဝ် တွိုန် မုး တူတ့် ဟေ အာရိတ်။ ဂေ ဘော ဒွက်၊ တဲး န့ မိုဝ်း ရာင် ကာပဝ် ဘော ရာင် ဘုဝ်း ဘြး။ အန် ဘူင် ဒွန် မျုဝ်၊ မုး တူတ့် ဟေ အာရိတ်၊ ကွဲ့ တဲး န့ ဆီ လိုဝ်း မာဝ်။ 19 အန် ဘူင် ဟူင် အီ ကွယ် နာ ခဲင် ဟုဝ် တွိုန်၊ တဲး အန် ပွိုန် ဒီ ဘ့လေး ဇီဒိူက် အီ မိုဝ်း ဒီ အုန် ဂြုဝ်း ပီ ကာဆဲန့် ဇဝ်ဖြာ။ 20 ဟူင် တီ နာ တူင့် အန် အာ ဂိုဝ် ကာနိး၊ နာ တျီမ် အန် အာ ဂိုဝ် ကာနိး ဘော နာ စာ အန် အာ ဂိုဝ် ကာနိး။ နာ ခဲင် ဟူင် တီ၊ အန် ဘော ပိတ် တူတ့် ခြိဝ် ဇဲတ်။ ဘော ဒီ ကာစှူင့် လှူ ပီ ဘူင် ဂေ တာ ဟေ အာရိတ် တွိုန်၊ အန် ဘော ပိတ် တူတ့် ခြိဝ်။ 21 အာဆာလုဝ်မုဝ် ဘော ဒိုဝ်း ခြိဝ် ဇဲတ်၊ ပိတ် တူတ့် ခဲင် ဟုဝ် တီ။ အန် ဘော ဒိုဝ်း ဝန် ခြိဝ် ဆိန့် နာ အာတ့် ဟူင် ဘွတ် အီ ဟဲ့ ဟွတ့် ပိတ် ခြိဝ်။ 22 ပါယ် တီ အန် ဟဲ့ ပိတ် တူတ့် ခြိဝ် ဇဲတ်။ ဘော နာ ခဲင် ဟုဝ် ဘော ကာစှူင့် လှူ အီ ကွယ် ခဲင် ဟူင် ဘွတ် တွိုန်၊ အန် ဟဲ့ ပိတ် တူတ့် တာ ခြိဝ် ဇဲတ်။

23 နာ ဒဲင် ဟူင် ဘွတ် တွိုန် အန် ဒိုဝ်း ဟေ နာမန်၊ ဘူင် အာရိုပ် အာမူ အာမာတ် ဇဝ်ဖြာ အီ စိူဝ် ခေရုပ်။ အန် ဘူင် အာရိုပ် ဇိုဝ် တီ အာဒါ အာ ကာဒင် အီ စာ ဂိုဝ် ကာနိး။ 24 ဖျီင် အာရိုပ် တီ အူ ဘ့လာက်၊ န့ တူင့် ဖန် ကာနိး၊ တဲး ဘော အာ ဘ့လာက် ကာဝဝ်း ဂိုဝ် ကာနိး။ 25 အာရိုပ် ပေါ အူ ကာဒင် တွိုန် ဟဲ့ ကာဝဝ်း ဂိုဝ် ကာနိး။ ခုဝ်၊ အာရိုပ် အာ ကာဒင် တီ ဘော တာင် အန် ဘော ပီ ပါယ် အန် ဟဲ့ မုး အူ မျုဝ်။ 26 ဘော အာ ကာဒင် ဟဲ့ စာ ဂိုဝ် ကာနိး။ 27 အန် ဒိုဝ်း အာရိုပ် ဂါယ် တွိုန်၊ ဘ့လေး အုန် ခဲင် ဟူင် ဘွတ် အီ ကွယ် ခဲင် ဟုဝ် ဇဝ်ဖြာ။ ဖျီင် ဂါယ် တွိုန် ဟဲ့ မ့ဘ့လး ဘော အာ ကာဒင်။ ကာဒဲ့ ဖျီင် အူ ကာဒင် ဇမ် ရဲင် အူ ဘ့လာက်။ ကာဒဲ့ ဖျီင် ပေါ အူ ကာဒင် ပီ ဝီ ဇမ် ရဲင် ပေါ အူ ဘ့လာက်။ ဖျီင် ဂါယ် အူ ကာဒင် အူ ဘ့လာက် တး လာယ် ဇမ် ဒီ ကာတဲ ဟုဝ် တွိုန်။ 28 အာရိုပ် အာမူ အာမာတ် ဇဝ်ဖြာ အာ ကာဒင် တီ၊ အန် ဘော ဒိုဝ်း ခြိဝ် ဇဲတ် ပိတ် တူတ့်။

29 ဒီ ရဲင် ဟုဝ် တွိုန် ဘော နာ ရေတ့် ဘော နာ ခဲင် ကော ရူပ် အန် ဘူင် ရာင် အာမူ အာမာတ် ဇဝ်ဖြာ အီ စိူဝ် ခေရုပ်။ ဘော ရာင် ဟေ စိုက် ဘော ရာင် ဘုဝ်း ဘြး အန် ဘူင်။ 30 ပီ ဒ အန် ဒီ ဘိူန် ခဲင် ဟုဝ် တွိုန် ဘော ဟူင် နာ ရေတ့် ဘော ဟူင် နာ ခဲင်၊ အန် ပိတ် တူတ့် ခြိဝ် ဇဲတ်။

31 ဒူင် ဒီ လိုပ် ဟူင် ဘွတ် လွှိုမ် တူတ့်၊ အန် ဒိုဝ်း ဟေ နာမန် အာ ဘ့လ ဘူင် မာလုဝ်း အန်။ အီ မုး မာ မာလုဝ်း၊ တာင် အန် ဟဲ့ လိုပ် ခဲင် ရဲင် ဖန် ဘုန် အူ ဘုန်။ 32 အန် ဘူင် မာလုဝ်း တီ၊ တာ ဟေ နာမန် အာ ဘ့လ တွိုန်။ အန် ဘော ဘ့လုဝ်း ဘူင် ရာင် ခေရုပ်၊ ရာင် ဟေ စိုက် ဘော ရာင် ဘုဝ်း ဘြး။ ဟဲ့ ဟွတ့်၊ အန် ဝီ ဒိုဝ်း ခြိဝ် ဇဲတ် ပိတ် ဒီ ရာင် တွိုန် ဒွန် မျုဝ်။ 33 ဒူင် ဒီ လိုပ် ဟုဝ် ဇဝ်ဖြာ မိူဝ်၊ အန် ဒိုဝ်း ဟေ နာမန် ဘူင် မာလုဝ်း။ တာင် အန် ဟဲ့ လိုပ် ခဲင် ရဲင် ဖွုန် ဘုန် အူ ဘုန်။ 34 အီ မုး ဘ့လ မာလုဝ်း၊ အန် ဒိုဝ်း ဘဲန် ဟေ န့ကေ တဲး န့ မိုဝ်း အာ ဘ့လာက်။ အူ ဘ့လာက် ဝီ မိုဝ်း ဘဲန် အာ ဘ့လ၊ တဲး န့ ပွိုန် ကာဘက်၊ ပွိုန် ဒီဂပ်။ ပေါ ဘ့လာက် မိူဝ် မိုဝ်း ဘဲန် အာ ဘ့လ၊ တဲး န့ ပွိုန် ကာဘက်၊ ပွိုန် ဒီဂပ်။ 35 ဒီ မာလုဝ်း ဂေ တီ၊ အန် ဘ့လုဝ်း ဘူင် ရာင် အာမူ အာမာတ် ဇဝ်ဖြာ အီ စိူဝ် ခေရုပ်၊ ဘော ရာင် ဟေ စိုက် ဘော ရာင် ဘုဝ်း ဘြး။ အန် ဘော ပိတ် ခြိဝ် ဇဲတ်၊ ဘော ဒွက် ဒူပ် ပီ ပါယ် အာရိုပ် အန်။

36 အန် ဘော ဘူင် ဝဲင် ခဲင်၊ အီ ကွယ် ခူပ် ဟုဝ် ဇဝ်ဖြာ၊ ဒိုဝ်း မာဝ် ပဲ့ ဟဲ့ ဒဝ်း ဂေ၊ ဘူင် တဲး န့ ဘဲန် ရဲင် အူယ် မ့ပြဲင်။ ဟဲ့ ဟွတ့်၊ အန် ဘော ဒိုဝ်း ဟေ အာရိတ် ဘူင် ပေါ အူ မ့ပြဲင်။ 37 ဒေါ ဆီနမ် န့ ဖွုန် ဟဲ့ ဇမ် မာဂျီန် ဇီဖ၊ ဂေ စုး ဒီ ဆမ် စေန့် ရွင့်။ 38 ဘော ဇမ် ဆီနမ် ဂိုဝ် ဒီ လှေး၊ မာဂျီန် န့ဒါ၊ အီ စိူဝ် မာဂျီန် ဘူလ၊ ဟုဝ် ဇဝ်ဖြာ တွိုန် ဘော ဟွတ့် တူတ့် ဒွန် မျုဝ်။ ဂေ ဟဲ့ ဘူင် ဒူပ် တူတ့် ခဲ့ ပီ စ်ု အာဆာလုဝ်မုဝ် တွိုန်။ အာဒါ ဘူ ဆီနမ် ဂေ ဟဲ့ ဘူင် ဂါန်၊ တဲး ဟုဝ် ဇဝ်ဖြာ ကော ဟွတ့် တူတ့်။