1 န့ ယီ မုး ဟုဝ် ဒူင် ကွယ် အာဆာလုဝ်မုဝ် တွိုန် န့ ကော နုဝ့် ဂိုဝ် ဒီ အူယ် ဆီနမ်၊ အန် ဟဲ့ ဘူင် တဲး န့ ကော ဟွတ့် တူတ့်။ 2 အန် ဘူင် ဟုဝ် အန်၊ ဒိုဝ်း ဟေ ခဲင် ပြဲ လေဘာနုန် တွိုန်။ နာ တူင့် ဟုဝ် အန် တီ အူ မာယဝ်း ကာနိး။ နာ ကာဝဝ်း အန် ဖန် ဂိုဝ် ကာနိး။ နာ စာ အန် အူယ် ဂိုဝ် ကာနိး။ ရွင့် ဟုဝ် အန် ဘော ဒိုဝ်း ဟေ အာရိတ်၊ ဆမ် ဖွုန် မ့ပြဲင်။ အန် ဘော ဒိုဝ်း ဟေ အာရိတ် ဘူင် မာနက်၊ ဘ့လေး ဒဲင် ရွင့် တွိုန်။ 3 အန် ဒိုဝ်း ဘဲန် ဟေ အာရိတ်၊ တပ် နာ ဒဲင် ရွင့် ဂေ တွိုန် အီ မုး ဖွုန် ဂိုဝ် ဒီ ဖန် ညွင့်။ ရွင့် အူ မ့ပြဲင် ပီ ဝီ မိုဝ်း ဂိုဝ် ဒီ ဖန် ညွင့်။ 4 အန် ဘော ဘူင် ကာဒဝ် ပါတဲင် အူယ် မ့ပြဲင်၊ တဲး ဂေ လာယ် ကာဆိူဝ်၊ တဲး န့ ဘဲန် ခြွင့် ဘဲန် ခြွင့်။ 5 ဘော မာ မာလုဝ်း မိုဝ်း ဖွုန် ကာတုဝ့်။ နာ အာတ့် ဟုဝ် တွိုန်၊ န့ ဘော မိုဝ်း မာလုဝ်း အူယ် ထာပ် အီ လာယ် ကာဆိူဝ် ဒီ ကာဒဝ် ပါတဲင် တွိုန်။

6 နာ အာတ့် ဟုဝ် အန် ဝီ ဆမ် ရွင့်၊ တဲး န့ ဘဲန် ဂြး။ နာ တူင့် အန် ဖန် ဂိုဝ် ကာနိး။ နာ တျီမ် အန် အူယ် ဂိုဝ် ကာနိး။ နာ အာတ့် ဟုဝ် တွိုန်၊ န့ ပီ ဝီ မိုဝ်း ဂြး ခဲင်၊ အီ မိုဝ်း ဘော ရွင့် ဘော အီ တပ် အန်။

7 အန် ဝီ ဘူင် ဟူင် ဒူင် ကွယ် မာလာင် အန်။ န့ မုး ဘော ဒူင် ဆုင်ဖျာတ် အန် ဒါရာ။ အန် ဒိုဝ်း ဘဲန် ဟေ အာရိတ်၊ ဝီ ဒ ဒီ ဘိူန် အန်၊ စုး နာ နီ ကော ဇမ် နာ ဒွယ်။ 8 အီ မုး ဟုဝ် ဒူင် ကွယ် အန်၊ ဘော ဂြး အန် ဘော ကာတု တွိုန်၊ အန် ဘူင် တဲး ဂေ လာယ် ပီ။ အန် ဝီ ဘူင် ဟုဝ် ပေါ အူ ကာတု အာဒါ ဂွန် အီဘိုန့် ခုန်ဒီခမ် ဖာရုဝ် ပီ ဒိုဝ်း အာဆာလုဝ်မုဝ် ဘဲန် အီဘိုန့် အန်။ ဘော ဟုဝ် တီ အန် ဘူင် တဲး န့ ပီ ကာတု ဟဝ်။

9 အန် ဘူင် ဟွတ့် တူတ့် ဒွန် ကာတု၊ တာ မာဝ် အီ ငဝ်း ကာဆဝ်။ စုး ဒီ ဘိူန် အန်၊ ကော ဇမ် မာနက် အန်၊ ဂေ တာ မာဝ် ပဲ့ ဟဲ့ ဆွာ့ ဂေ တာ လေက်လိုဝ်၊ တဲး န့ တာင် ခဲ့ ပီ လုဝ် ဂေ။ ဂေ ဘော ဒဝ်း ဒွန် ဘ့လာက်၊ ဘော နာ ရေတ့်၊ နာ ခဲင်။ ဂေ ဘော တာ မာဝ် တီ ဒွန် ပ့လုဝ့်၊ ကော ဇမ် ရဲင် ဝဲင်။ 10 အီ မုး ဒင် အန်၊ ဂေ ဒိုဝ်း တူတ့် မာဝ် အီ ငဝ်း ကာဆဝ်၊ အီ မုး မာဝ် တာင် အီ တူင့် ဒါ ကာနိး ဘော ဂိုဝ် ကာနိး။ 11 နာ ဒဲင် ဂေ ဘော တာ မာဝ် အီ ငဝ်း တာင် ပဲ့ ဟဲ့ ဒဝ်း ဂေ။ ဟဲ့ ဟွတ့်၊ ဂေ ဘော တာ ဟေ အာရိတ်။ 12 ဝဲင် တာင် တွိုန်၊ အန် ဘော မိုဝ်း ရဲင် ပီ ဘူင် ဂေ တာ တူတ့် မာဝ် ပဲ့ ဟဲ့ ဒဝ်း ဂေ တွိုန်။ ရဲင် တီ မိုဝ်း အူယ် မ့ပြဲင်။ အူ မ့ပြဲင် မုး ဟေ အာရိတ်။ ဂေ ဘူင် ဝဲင် တီ၊ တဲး န့ ပီ ဝဲင် ရေတ့် ဂါယ် ဝဲင် ခဲင် အီ မိုဝ်း ဒီ ဟုဝ် ဇဝ်ဖြာ။

13 ခုန်ဒီခမ် အာဆာလုဝ်မုဝ် ဘော စ်ု ဂေ ဟာဝ် မိူင် ထူရုဝ်၊ ဝီ ဒဲ့ အာဟူရမ် တး။ 14 အာဟူရမ် တွိုန် အန် မုး ဂွန် ယာ ဆီပြး၊ ဒူအီ ခဲင် ခြိုဝ် အာနာပ်ထာလီ။ ဂုန့် အန် မုး ဒူအီ အာမျုဝ် ထူရုဝ် အီ နပ် ဒီ ဇိုမ် ဘွင့် ဒေန့်။ အာဟူရမ် တီ မုး ဒူအီ အီ လှဲဝ် ဒီ ဘူင် ဘဲန် မျုဝ် ဘဲန် မျုဝ်။ အန် ဘော တး ဒူင် ကွယ် ခုန်ဒီခမ် အာဆာလုဝ်မုဝ် တွိုန်။ ဂေ မိူဝ် တဲး အန် ဘူင်၊ တဲး န့ ကော ဟွတ့် တူတ့်။

15 အန် ဘော လှုဝ် ရွင့် ဘွင့် အာ ညွင့်။ နာ စာ အန် ဂိုဝ် ဒီ ဒါ ကာနိး။ ရွင့် လဲပ် အန် ဂိုဝ် ဒီ အာ ကာနိး။ 16 အန် ဝီ လှုဝ် ဂိန့် ရွင့် အာ ဘူင့်၊ ဘ့လေး ဒဲင် ရွင့် ဂါယ် တွိုန်။ ဂိန့် ရွင့် တီ န့ စာ အူ ဘူင့် ဖန် ကာနိး။

17 အန် ဘော ဒိုဝ်း ဘွင့်၊ ဘူင် ကာဘဲး အီ ကွယ် ဒီ ဂိန့် ရွင့်။ ဘော ဝန် ဘွင့် အန် ဟွယ် ဒီ ကာဘဲး တွိုန်၊ တဲး န့ ဘဲန် ဘူ ညွင့် အာဒါ ရွင့် အူ ညွင့် ဘော ဘူ ညွင့် အာဒါ ရွင့် ပေါ အူ ညွင့်။ 18 ဟဲ့ ဟွတ့်၊ အန် ဝီ ဘူင် ရာင် ဘ့လေ မာစက်၊ ဝီ ဟွယ် ဒီ ကာဘဲး တွိုန်၊ တဲး န့ ကွယ် အာ မ့ပြဲင်။ ရွင့် ဘော အာ ညွင့် အန် ဘူင် တဲး န့ မုး အူ မျုဝ်။ 19 ဒီ ဂိန့် ရွင့် အီ ကွယ် ဒဲင် ဂြး တွိုန်၊ အန် ဘူင် ဂိန့် တဲး န့ ပီ ရာင် ဘုဝ်း ခမ်ဆွန် အီ တူင့် ဖွုန် ကာနိး။ 20 ဘ့လေ မာစက် ပဲ့ ဟဲ့ ဟွယ် အန် ဒီ ကာဘဲး ဟဲ့ ဝီ ကွယ် ရူပ် ဂိန့် ရွင့် ဘဲန် မ့ပြဲင် ဘဲန် မ့ပြဲင်။ ဟဲ့ မိုဝ်း အာဒါ အာ မာယဝ်း ဘူင့်။ ဂေ ဘော ကွယ် ကာဆိူဝ် ဒူင် မိုဝ်း ရာင် ဘုဝ်း။ 21 အန် ဒိုဝ်း ရွင့် ဂါယ် တွိုန်၊ ဆမ် အုန် ဒီ ဟုဝ် အီ ကွယ် ဒီ အာတ့် မာလုဝ်း ဟုဝ် ဇဝ်ဖြာ။ ရွင့် ဘ့လာက် အာအး၊ အန် တဲး စိူဝ် ယာခိန်။ ရွင့် ဘ့လာက် အာဂ၊ အန် တဲး စိူဝ် ဘုဝ်အာပ်။ 22 ဂိန့် ရွင့် ဂါယ် တီ ပီ ရာင် ဘုဝ်း ခမ်ဆွန်။ ပါယ် တီ ပီ ဘူင် အန် ဒီ ရွင့် ဂါယ် တီ၊ ဟဲ့ ဟွတ့် တူတ့် ဒွန် မျုဝ်။

23 အန် ဝီ တာ ဘွင့်၊ ဝီ ဘူင် ဘော မ့ပါန် တာင် အီ ကာလင်၊ တဲး န့ ပီ အိုမ် ဒိုင်။ ကာဝဝ်း အန် ဂိုဝ် ကာနိး။ နာ လိုက် အန် ဖန် ကာနိး။ ဆေ ဂဝ် ရူပ် အန်၊ န့ လုဝ် ဝန် အီ တူင့် အူယ် ဂိုဝ် ကာနိး။ 24 ဒီ ဘာင် အန်၊ န့ မိုဝ်း အာရိုပ် ဘ့လေ ကာပဝ် အီ ကွယ် ရူပ် အန်။ အူ ကာနိး ဂေ ဘ့လေး ရာင် ဘ့လေ ကာပဝ် ဂိုဝ် ဘူင့်၊ တဲး န့ ကော ရူပ် မ့ပါန် တွိုန်။ ဒေါ လှုဝ် ဂေ မ့ပါန် တီ၊ ဂေ ဘော လှုဝ် ဘော အာရိုပ် ဘ့လေ ကာပဝ် တီ အူ ဆိ၊ တဲး ဂေ ဘဲန် အာ မ့ပြဲင်။

25 မ့ပါန် တွိုန် ဂေ ပီ ဝီ ဘ့လေး ဒဲင် ရာင် မာမက် ဂိုဝ် ဒီ အာ ဒုဝ်။ မာမက် တွိုန် အူယ် ဒုဝ် မာငး နာ လေး ဆီငဲ၊ အူယ် ဒုဝ် မာငး နာ ဂေတ့် ဆီငဲ၊ အူယ် ဒုဝ် မာငး နာ တေတ့် ပေါ အူယ် ဒုဝ် မာငး နာ ကွာ။ ဂေ ဝီ ဘ့လေး မ့ပါန် တွိုန် ဒဲင် မာမက် ဂေ တီ။ ဆီပူင့် မာမက် ဂေ တီ ဂေ တဲး န့ လိုပ် တူတ့် နာ ခဲင်။ 26 ဒီ ဘာင် မ့ပါန် အိုမ် တီ အန် ဟေတ့် အူ ကာဘာ ဒဲ။ န့ဂူင် ပီ ဘုဝ်း ခမ်ဆွန်။ န့ ဘော ပီ ဘာင် ဆီလယ့်။ န့ ပွိုန် ဟပ် အိုမ် အာ ဟြဲန့် ပါ့။^a

27 ဟဲ့ ဟွတ့် အန် ပီ ဝီ ဘူင် ကာစှူင့် ပီ ဘ့လေး မ့ပါန် အိုမ်။ အန် တာ ဘွင့်၊ ဘူင် ကာစှူင့် ဂိုဝ် ဘူင့်။ နာ တာင် အန် ဘော နာ ကာဝဝ်း ဖွုန် ကာနိး။ စာ အန် အူယ် ကာနိး။ 28 ပီ ပါယ် အာရိုပ် ကာစှူင့် တီ၊ န့ မိုဝ်း ဘ့လ ဒီ ဘြေတ့် အန် ဘော ဘာင် အန်၊ တဲး န့ မိုဝ်း ပ့လူမ်။ 29 ဒီ ကာတဲ ဘ့လ တွိုန်၊ န့ ပီ ဝီ မိုဝ်း ရာင် မာခြင်ဆီ၊ ရာင် မာမက် ဘော ရာင် အာမူ အာမာတ် ဇဝ်ဖြာ အီ စိူဝ် ခေရုပ်။ ဘော နာ ဒဲင် ဘာင် တွိုန်၊ န့ ပီ ဝီ မိုဝ်း အာရိုပ် ဇိုဝ် တီ။ ဘော နာ ဒဲင် ဘော နာ ခြိုမ် မာခြင်ဆီ ဂေ မာမက်၊ န့ ပီ ဝီ မိုဝ်း ဘော ဝန် ရာင် ဘုဝ်း ဟွယ် လူင်။ 30 ဒီ ကာစှူင့် ဒွန် ဘူင့်၊ ပီ ဝီ မိုဝ်း ကာလေန့် ဘွင့် ဖွုန် ဘူင့် ဘော နွန် အန် အာ ညွင့်။ နာ ဒဲင် ကာစှူင့် တီ၊ န့ မိုဝ်း မ့ပါန် အိုမ်။ န့ ပီ ဝီ မိုဝ်း အီ ဘိုမ် အန် ဒီ ကာတုဝ့် ဖွုန် ပ့လုဝ့်။ နာ ရေတ့် အီ ဘိုမ် အန် တီ၊ န့ ပီ ဝီ မိုဝ်း ဝန် ဘုဝ်း၊ ဟွယ် ဒွန် ဘ့လာက်။ 31 ခဲင် အီ ဘိုမ် အန် တွိုန် ပီ ဝီ မိုဝ်း ကာဒဝ် ကာလင်။ လာယ် ကာယာန် အန် အူ ကာနိး။ ဘော တာင် အန် အူ ကာနိး ဒီ အူ ကာဆာန်။ ခူပ် ဘာင် အန်၊ န့ ဝီ မိုဝ်း ဘော ရာင် ဘုဝ်း။ ဘြေတ့် အန် ယီ တူ ကာလင်။ န့ ကွယ် ဖွုန် ကာတုဝ့်။ 32 ကာလေန့် ဖွုန် ဘူင့် ဝီ ကွယ် ခြိုမ် ကာစှူင့်၊ တဲး နွန် အန် ဝီ ဒိုက် ဒီ ကာစှူင့်။ ကာလေန့် တီ ဟဲ့ စာ အူ ကာနိး ဒီ အူ ကာဆာန်။ 33 ပီ ပါယ် အာရိုပ် အန်၊ န့ ပီ ကာလေန့် လက်လဝ်။ ဒူင် ကာဘတ် နွန် အန် ဘော ဘ့လဝ့် အန် ဘော ခူပ် အန်။ န့ မုး တူတ့် ပီ လှုဝ် ဒီလူယ်။ 34 ဒီ ကာစှူင့် တီ ဒွန် ဘူင့်၊ န့ ပီ ဝီ မိုဝ်း မင် ပါ အန် ဖွုန် ဘူင့်။ ဂေ ဟဲ့ လှုဝ် အူ ဆိ၊ တဲး န့ ကာဒိုက် ဒီ ကာစှူင့်။ 35 အီ ဘိုမ် အီ ကွယ် ဒဲင် ကာစှူင့် တွိုန်၊ အန် ကုက် ယိတ့် အူ ကာဆာန်၊ ဟဲ့ ဒိုက် ဒီ ကာစှူင့်။ ဘော ဘြေတ့် အန်၊ ဂေ ဟဲ့ လှုဝ် ကာဒိုက်၊ ဟဲ့ မုး အူ မျုဝ်။ 36 ဂေ ဝီ ဘူင် ရာင် အာမူ အာမာတ် ဇဝ်ဖြာ အီ စိူဝ် ခေရုပ် ဘော ရာင် မာခြင်ဆီ ဘော ရာင် ဟေ စိုက်၊ ဝီ ဘ့လေး ဒီ ဘြေတ့် အန်။ ဘော ရာင် ဝန် ဘုဝ်း ဂေ ဝီ ဒိုက် ဒွန် ပ့လုဝ့် ဒူင် ဆီ မိုဝ်း။ 37 ပါယ် တီ အာဟူရမ် ဟဲ့ လှုဝ် ဘူင် ကာစှူင့် ဂိုဝ် ဘူင့်၊ တဲး အာရိုပ် ဂေ မုး အူ မျုဝ်။

38 အန် ဘူင် ဘော မ့ပါန် ဘွင့် တာင် ဂိုဝ် ဘူင့် အီ ပွိုန် ဘ့လေး ဒဲင် ကာစှူင့် ဂိုဝ် ဘူင့် တွိုန်။ မ့ပါန် ဒွန် ဘူင့် န့ ကာဝဝ်း ဖွုန် ကာနိး။ ပွိုန် ဟပ် အိုမ် ဖွုန် ဂိုဝ် ပါ့။^b 39 အန် ဒိုဝ်း ကာစှူင့် ဂေ တွိုန်၊ အုန် ခဲင် ဟုဝ် ဇဝ်ဖြာ၊ နာ ကွာ ဖန် ဘူင့်၊ နာ တေတ့် ဖန် ဘူင့်။ အီ မုး မ့ပါန် တာင် တွိုန်၊ အန် ဘ့လေး အုန် ခဲင် ဟုဝ် နာ တေတ့်၊ ဒီ ကာတုဝ့် အီ ကွယ် နာ လေး ဆီငဲ။ 40 အာဟူရမ် ဘော ဘူင် ကာလုဝ့်၊ မင် ဆူက် ဘော ဆီလယ့်။ ပါယ် တီ အန် ဘူင် ဟွတ့် တူတ့် အီ ကွယ် ခဲင် ဟုဝ် ဇဝ်ဖြာ ပီ စ်ု အာဆာလုဝ်မုဝ် အန် ဘူင်။

န့ မိုဝ်း ဘော ဂိန့် ရွင့် အီ ပီ ဘုဝ်း ခမ်ဆွန်၊

41 ဘော ရွင့် အာ ညွင့်၊ ဘော ကာဘဲး အီ ဆီဘ့လိုက် ဂိန့် ရွင့် တွိုန်။

42 အန် ဘူင် ဘော ဘ့လေ မာစက် ဖွုန် မာယဝ်း ဘူင့် အာဒါ ကာဘဲး အာ ဘူင့် တွိုန်။ န့ မုး မာစက် အာ မ့ပြဲင် အာဒါ ကာဘဲး အီ ဆီဘ့လိုက် ဂိန့် ရွင့် တွိုန်။

43 အန် ဘူင် ဘော ကာစှူင့် ဂိုဝ် ဘူင့် ဘော မ့ပါန် ပီ ဘ့လေး အန် ဒဲင် ကာစှူင့် တွိုန် 44 ဘော မ့ပါန် တာင် အီ ပီ အိုမ် ဒိုင် အူ ဘူင့်။ အန် ဘော ဘူင် ဘော ရာင် မာမက် ဂိုဝ် ဒီ အာ ဒုဝ်၊ အီ ဘိုမ် မ့ပါန် တာင် တွိုန် ဘော ကာလုဝ့် ဂေ မင် ဆူက် ဘော ဆီလယ့် ဂေ တွိုန်။

45 န့ကြိုဝ်း ပီ ဒီ တာ အီ ကွယ် ခဲင် ဟုဝ် ဇဝ်ဖြာ ပီ ဘူင် အာဟူရမ် အာဒါ ခုန်ဒီခမ် အာဆာလုဝ်မုဝ် တွိုန် ဟဲ့ မုး တူတ့် ဘွင့် ဒေန့် အီ ကာလ မာဘြိဝ်။ 46 ခုန်ဒီခမ် တဲး ဂေ လှုဝ် ဘူင် ကြုဝ် တီ၊ ဒိုဝ်း ကာဒါယ် ကာပိတ်၊ ဘူင် ရာင် အန်၊ ဝီ လှုဝ် ဘွင့် နာ ခဲင်။ ဂေ ဘူင် ဂါန် တီ ဒူင် ကွယ် ဒီ ကာတဲ မိူင် ဆူခူတ် ဂါယ် မိူင် စာတာန၊ အီ ကွယ် ဒီ ခူပ် ဘ့လဲင် ယောဒါန်။ 47 အာဆာလုဝ်မုဝ် အာဝ် ဆ ကြုဝ် တီ။ ခုဝ်၊ ဟဲ့ ကိူန် ကာဆဝ်။ အန် ဘော လှုဝ် ဘူင် ပါယ် တီ။ အာဝ် မိုဝ်း အာဆေ အီ နပ် ဒီ ဆ ဘွင့် တွိုန်။

48 အာဆာလုဝ်မုဝ် ဘော ဘူင် ခြိုင် တာ အီ ကွယ် ခဲင် ဟုဝ် ဇဝ်ဖြာ တွိုန်။

န့ မုး ကာစှူင့် လှူ ပီ ဘူင် ဂေ တာ ခြိဝ် ဘော ကာစှူင့် ဒူင် ဒါင် ဂေ ခါမုန် ဒီ အာတ့် ဇဝ်ဖြာ၊ အီ ပိတ် ဂေ ခြိဝ်။

49 န့ မုး ဘော ငဝ် ရာင် ခြိဝ် ပီ ဘ့လေး ဂေ နာ အာတ့် ဒူင် ဘွတ် လွှိုမ် တူတ့်။ ဂေ ဘ့လေး နာ အး ဖန် ဘူင့်၊ နာ ဂ ဖန် ဘူင့်။ န့ မုး ဘော ဘုဝ်း ခြိဝ်၊ ငဝ် အွမ် ခြိဝ်၊ န့ ကျီပ် ခြိဝ်

50 ဘော ဆီလယ့်၊ န့ကျီပ်၊ မ့ပါန် ဘော အာဇုဝ် ဂေ ဖာန်၊ အီ မုး တူတ့် ခြိဝ် ဇဲတ်။ န့ မုး ဘော ဒူင် ဟဝ့် မာလုဝ်း အီ ကွယ် ဒီ ဟုဝ် ဆီငါ ဘွတ် လွှိုမ် တူတ့် ဘော ဒူင် ဟဝ့် မာလုဝ်း အီ ကွယ် ဒီ ဟုဝ် ဇဝ်ဖြာ တွိုန်၊ အန် ဟဲ့ ဘူင် တူတ့်၊ တာ ခြိဝ်။

51 အာဆာလုဝ်မုဝ် ဘော ဘူင် ဒွန် မျုဝ် ဇိုဝ် တီ ခဲင် ဟုဝ် ဇဝ်ဖြာ တွိုန်။ ဟဲ့ ဟွတ့် တူတ့် ဒွန် မျုဝ်၊ အန် ဘော ဒိုဝ်း ခြိုင် ခြိဝ်၊ ခြိုင် ရွိုန် ပဲ့ ဟဲ့ လှူ အာဒါဝိတ် တွိုန်။ ဟဲ့ ဟွတ့်၊ အန် ဘော ဒိုဝ်း ဟပ် တူတ့် ခဲင် ဟူင် အုန် ဂေ ခါဂုန် ခဲင် ဟုဝ် ဇဝ်ဖြာ တွိုန်။