1 ပန် တီ အာဆာလုဝ်မုဝ် ဘော ဒဲ့ ခဲ့ ကွယ် ဒါ တာင် ဂေ ဒူအီ အီဆာရေလ အီ မုး ဒါ တာင် အိုပ် ခြိုဝ် ဂေ။ အန် ဒဲ့ ဘော ဂိန့် န့ဟူမ် ဂေ။ အန် စ်ု ဂေ တး ဒူင် ကွယ် အန် ခဲင် မိူင် ယေရူဆာလဲမ်၊ တဲး ဂေ ဒိုဝ်း တး ဇီဒိူက် ဇဝ်ဖြာ အီ ကွယ် ခဲင် မိူင် အာဒါဝိတ်၊ အီ မုး ဒူင် စိူဝ် ဇီအူန် တွိုန်။ 2 ဂေ ဒူအီ အီဆာရေလ ဘောကာဂ့လျီတ် ဘော တး ကာဇု ဒူင် ကွယ် ခုန်ဒီခမ် အာဆာလုဝ်မုဝ်။ ဒေါ အန် တီ န့ မုး အာခြာဝ် ဘူင် ဂေ ဘ့လွယ်၊ ဒေါ မုး မာဂျီန် မ့ဘူ၊ အီ စိူဝ် မာဂျီန် အေဆာနိမ်။

3 ဂေ ဘောကာဂ့လျီတ် ဘော တး။ ဂေ အီ မုး ဒူအီ လှူ ဒီ ဇဝ်ဖြာ ဘော စုဝ့် ဇီဒိူက် ဇဝ်ဖြာ။ 4 ဂေ ဘော ဒိုဝ်း ဇီဒိူက် ဇဝ်ဖြာ ဘော ထိုပ် ဘိက် ဘွတ် ဘော ကြုဝ်ကြာမ် အီ ဘွတ် အီ ကွယ် ခဲင် ထိုပ် ဘိက် တီ။ န့ မုး ဂေ ဒါ အီ လှူ ဒီ ဇဝ်ဖြာ ဘော ဒူအီ အာမျုဝ် အာလေဝီ အီ စုဝ့် တး ကြုဝ် တီ ဒွန် မျုဝ်။ 5 ခုန်ဒီခမ် အာဆာလုဝ်မုဝ် ဘော ဂေ ဒူအီ အီဆာရေလ အီ တး ကာဇု ဒူင် ကွယ် အန် တွိုန်၊ ဂေ ဘောကာဂ့လျီတ် တး ကွယ် နာ အာတ့် ဇီဒိူက် ဇဝ်ဖြာ တွိုန်။ ဂေ ဘော လှူ မာဘူ ဂေ မာမက် ကိူန် ကာဆဝ်၊ ကော ဟူ နပ် ဒီ တိး။

6 ဒါ အီ လှူ ဒီ ဇဝ်ဖြာ၊ ဂေ ဘော ဒိုဝ်း ဇီဒိူက် တီ၊ ဟာဝ် အုန် ခဲင် ဟူင် အီ ကွယ် နာ ခဲင် ဟုဝ် ဇဝ်ဖြာ အီ မုး ဒူင် ဘွတ် လွှိုမ် တူတ့်။ ဂေ ဘ့လေး အုန် ဇီဒိူက် တီ၊ တဲး အန် ကွယ် ခြိုမ် ဖျီင် အာရိုပ် အာမူ အာမာတ် ဇဝ်ဖြာ အီ စိူဝ် ခေရုပ် တွိုန်။ 7 အာရိုပ် ခေရုပ် အာ ကာဒင် တီ၊ ဂါယ် ဘ့လး ဖျီင် ဂါယ် နာ ဒဲင် ဇီဒိူက် တွိုန်၊ တဲး န့ ဆီဘ့လိုက် တူတ့် ဇီဒိူက် ဘော မင် ဂွတ် အန်။ 8 ဂေ ဘော ဒိူတ် လေး မင် ဂွတ် အန် အီ စဲက်။ ဆေ အီ ကွယ် နာ အာတ့် ဒူင် ဘွတ် လွှိုမ် တူတ့် နာ ခဲင် ဟုဝ်၊ ဟဲ့ ပွိုန် ယိုဝ်။ ဆေ အီ ယီ ကွယ် နာ ခဲင် ဝဲင် နာ ရေတ့် ဟုဝ်၊ အာဝ် လိုဝ်း။ န့ ယီ ကွယ် ပါယ် တီ ကော ဇမ် အာတိုဝ် နီ။

9 နာ ခဲင် ဇီဒိူက် တီ န့ မိုဝ်း မီ မာဝ် အာ ဒီဖ့လ ပီ ဒွိုမ် ဟပ် အုန် အာမုဝ်ဆဲ ဒေါ ကွယ် အန် ဒဲင် နွန် ဟုဝ်ရေပ် တွိုန်။^a ဒေါ အန် တီ ဇဝ်ဖြာ ဟဲ့ ဒွါ ကာဒိက် ဆတ်ဇာ ဒီ ဒူအီ အီဆာရေလ ဝါယ် လေး ဂေ ခဲင် မိူင် အဲဂိုပ် တွိုန်။ ဒဲင် တီ ဂေ တူ အုန် မာဆေ ခဲင် ဇီဒိူက် တီ။

10 ပန် တီ ဒူအီ အီ လှူ ဒီ ဇဝ်ဖြာ ဘော လေး ဒီ ဟုဝ် ဇဝ်ဖြာ၊ န့ ဝီ မိုဝ်း န့အု အီ တး တဲး ကော နုဝ့် ခဲင် ဟုဝ် တွိုန်။ 11 ဂေ ဒူအီ လှူ ဒီ ဇဝ်ဖြာ တူ ပွိုန် ဘူင် ပီ လုဝ် ဘူင် ဂေ ကူပ် န့အု တွိုန်။ န့ မုး အာဖုင် ဒင်ခုဝ် ဇဝ်ဖြာ အီ ဟဲ့ နုဝ့် ခဲင် ဟုဝ် ဇဝ်ဖြာ တီ။

12 အာဆာလုဝ်မုဝ် ဘော တဝ်း၊ “ဇဝ်ဖြာ ဟဲ့ တဝ်း၊ အန် ဒီ ကွယ် ခဲင် န့အု ဟေတ့်။ 13 ဒေါ တီ နီ၊ အုဝ် ဟဲ့ ဘူင် အာခ်ု မှာန် ဟုဝ် ဒီ မဲ ဇဝ်ဖြာ။ န့ ဟဲ့ တာင်၊ ဟဲ့ စှိတ်၊ တဲး မဲ ပွိုန် ဒီ ကွယ် ဆေဆေ။”

14 ပန် တီ ခုန်ဒီခမ် ဘော ဝီ မာငး ယွတ် ဂေ ဒူအီ ကိူန် အီ မုး ဒူအီ အီဆာရေလ၊ အီ ဟဲ့ စွင့် ခူပ် အန်။ အန် ဘော မွင့်ကာရာ တဲး ဒီ ဂေ။ ဟဲ့ ဟွတ့်၊ အန် ဘော ဆာခိုဝ်။

15 အန် တဝ်း၊ “အုဝ် အိူပ် မဲ ဇဝ်ဖြာ၊ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ မဲ ဟဲ့ တဲး န့ ဟွတ့် တူတ့် ဒွန် မျုဝ် ပဲ့ ဟဲ့ ဒွါ မဲ ကာဒိက် ဆတ်ဇာ ဒီ အာဒါဝိတ် အီ မုး ဂုန့် အုဝ်။ မဲ ဟဲ့ ဒွိုမ် တဝ်း၊ 16 ‘ဆိန့် ဒေါ ဒိုဝ်း လေး အုဝ် ဒူအီ အီဆာရေလ ခဲင် မိူင် အဲဂိုပ် တွိုန်၊ အုဝ် တူ ဒွိုမ် ရဝ်း မိူင်၊ တူ ဒွိုမ် ရဝ်း ခြိုဝ်၊ တဲး ဂေ ဘူင် ဟုဝ် ဒီ အုဝ်၊ တဲး အုဝ် ပွိုန် ဒီ ကွယ်။ အုဝ် ယီ ဟဲ့ ရဝ်း အာဒါဝိတ်၊ တဲး အန် အိုပ် ဒူအီ အီဆာရေလ အီ မုး အာမျုဝ် ဒူအီ ပီ အိုပ် အုဝ်။’

17 ပန် တီ ဂုန့် အုဝ် ဟဲ့ ခြာမ် ဒီ ဆမ် ဟုဝ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ 18 မဲ ဇဝ် ယီ ဝီ တဝ်း ဒီ ဂုန့် အုဝ်၊ ‘မဲ ဟဲ့ ခြာမ် ဒီ ဆမ် ဟုဝ် တဲး အုဝ် ပွိုန် ဒီ ကွယ် နာ ခဲင်။ ပီ ခြာမ် မဲ တီ ဟဲ့ မုး၊ ဟဲ့ မွှိုမ်။ 19 မဲ ယီ တူ ပွိုန် ဆမ် ဟုဝ် တီ။ ဂွန် အီမာယ် မဲ အီ ဒီ ဆမ် ဟုဝ်၊ တဲး အုဝ် ကွယ် နာ ခဲင်။’

20 မဲ ဇဝ်ဖြာ ဟဲ့ ဟွတ့် ဘူင် ခဲ့ ပီ တဝ်း မဲ တီ။ အုဝ် ဟဲ့ ပ့လု အာဒါဝိတ် အီ မုး ဂုန့် အုဝ်၊ ဝီ အိုပ် မိူင် အီဆာရေလ၊ တဲး န့ ဒူပ် ခဲ့ ပီ တဝ်း မဲ ဇဝ်ဖြာ။ အုဝ် မိူဝ် ဟဲ့ ဆမ် ဟုဝ်၊ တဲး မဲ ဇဝ်ဖြာ ကွယ် နာ ခဲင်။ မဲ မုး ဇဝ်ဖြာ ပီ ကြိုပ် ဒူအီ အီဆာရေလ။ 21 ခဲင် ဟုဝ် မဲ တီ၊ အုဝ် ဟဲ့ ဘူင် ဘော ဒူင် ဒီ အုန် ဇီဒိူက် အီ မုး ဇီဒိူက် ပီ အုန် ယေ ကာဒိက် ဆတ်ဇာ ပီ ဒွါ မဲ ဇဝ် ဒီ ဒါ ဒါ ယေ ဒေါ လေး ဂေ ခဲင် မိူင် အဲဂိုပ် တွိုန်။”

22 အာဆာလုဝ်မုဝ် ဟဲ့ ဟွတ့် ကာလာင် ဂြုဝ်း တီ၊ အန် ဘော တး စွင့် ခူပ် ကာစှူင့် လှူ ဒီ ဇဝ်ဖြာ၊ တဲး ဂေ ဒူအီ ကိူန် ဘော ယိုဝ်။ အန် ဘော ဆူင့် ဒဲ အန် ဟုဝ့် နာ ဒဲင် ဘော ဆာခိုဝ်။

23 အန် တဝ်း၊ “အိုယ် မဲ ဇဝ်ဖြာ၊ မဲ မုး ဇဝ်ဖြာ အီ အိုပ် ဒူအီ အီဆာရေလ။ ဘော ခဲင် ဂါင်ဟြာဝ် ဘော ဒဲင် ကာဒါယ် အာဝ် မိုဝ်း ဇဝ်ဖြာ ပေါ အူ ကာဒင် အီ ခမ် ကာဒိက် ဆတ်ဇာ ပီ ဒွါ အန်၊ အီ မိုဝ်း နဝ်း ရွက့် ကာဝေ ဒူအီ အီ ဒူပ် ဆီချာ အန်။ 24 အီ မုး ဂုန့် အုဝ် အီ စိူဝ် အာဒါဝိတ်၊ မဲ ဇဝ်ဖြာ ဟဲ့ ကာဆဲန့် ဒီ အန်၊ ဟဲ့ ဝီ ဘူင် တဲး န့ ဇေ့ဇုင် တူတ့် ပီ အာတိုဝ် နီ။

25 အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ ဒေါ တီ နီ အုဝ် မှာန့်၊ တဲး န့ ဘော ဘဲန် ပီ ဒွိုမ် ကာလာင် မဲ ဒီ ဂုန့် အုဝ်။ မဲ ဟဲ့ တဝ်း၊ ‘ဆေ လှုက်လှာန် မဲ ဘော ဘူင် နာ ဘွတ် နာ မွှိုမ် ဒီ အုဝ်၊ တဲး န့ ပီ မဲ ဟဲ့ ဘူင် နာ ဘွတ် နာ မွှိုမ် ဒီ အုဝ်၊ အုဝ် ဒီ တဲး ဂေ အိုပ် မိူင် အီဆာရေလ ဆေဆေ၊ အာဝ် ကာဒတ် ဒေါ မှဝ်။’ အုဝ် မှာန့်၊ တဲး မဲ ဘော ဘူင် ဒူပ် ဂြုဝ်း မဲ တီ။ 26 မဲ ဇဝ်ဖြာ အီ မုး ဇဝ်ဖြာ အီ အိုပ် ဒူအီ အီဆာရေလ၊ အုဝ် ဝီ မှာန့် ပေါ အူ မျုဝ်။ မဲ ဟဲ့ ဒွိုမ် တဝ်း ဒီ ဂုန့် အုဝ်၊

27 ‘မဲ ထာင်၊ အုဝ် ဒီ ကွယ် ဒဲင် ကာဒါယ် နီ။း’ အုဝ် ယီ နပ်၊ ဂါင်ဟြာဝ် အီ စာ ကာဆဝ်၊ န့ တူ ဂ့လိုမ် တဲး န့ ဘဲန် ဒူင် ကွယ် မဲ ဇဝ်။ ဟုဝ် ပဲ့ ဟဲ့ ဆမ် အုဝ်၊ န့ ဝဲ တူ ဂ့လိုမ်၊ တဲး မဲ ပွိုန် ဒီ ကွယ်။ 28 မဲ ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်၊ အုဝ် ယီ မှာန့် တဲး မဲ ထူမ် ဂြုဝ်း ပီ ဆာခိုဝ်၊ ပီ မှာန့် အုဝ် ဒီ မဲ အာတိုဝ် နီ။ 29 အုဝ် မှာန့် မဲ ဇဝ်၊ တဲး မဲ ယွတ် ဟုဝ် မဲ နီ ဒွင် ဝန် ဒွင် ခိူန် ဆေဆေ။ န့ မုး ဒူင် တီ၊ ပဲ့ ဟဲ့ တဝ်း မဲ ဇဝ်၊ ‘အုဝ် ဒီ ကွယ် ဒီ တီ ဆေဆေ။’ ခုဝ်၊ အုဝ် မှာန့်၊ တဲး မဲ ထူမ် ဂြုဝ်း ပီ ဆာခိုဝ် အုဝ် နီ။ 30 မဲ ဇဝ် ပီ ဘော ကွယ် ခဲင် ဂါင်ဟြာဝ်၊ မှာန့်၊ တဲး မဲ ယိုဝ် ဂြုဝ်း အုဝ် အီ မုး ဒဲစေန့် မဲ၊ တဲး မဲ ယိုဝ် ဘော ဂြုဝ်း ဂေ ဒူအီ အီဆာရေလ အီ မုး ဒူအီ အာမျုဝ် မဲ။ ဆေ ဂေ ဘော ဆာခိုဝ်၊ တဲး မဲ ဇဝ် ထူမ် ဂြုဝ်း ဂေ၊ တဲး မဲ ဘော ဂဝ်း ဝဲန် ဘော မှာပ် ဂေ။

31 ဆေ န့ ဘော မိုဝ်း ဒူအီ အီ ဟဲ့ ကာလုတ့် ဒီ ဂိုက် အန် အီ ကွယ် ကာတတ် အန်၊ ဆေ အန် ဒီ ကာဒုး ဒီ ခမ် ဂြုဝ်း ဆမ်ဒိူင်၊ ဆေ အန် ဘော လုဝ် တး ဒိူင် ဒီ အာတ့် ကာစှူင့် လှူ ခဲင် ဟုဝ် မဲ ဇဝ် နီ၊ 32 တဲး မဲ ဇဝ် အီ ကွယ် ဂါင်ဟြာဝ် ဘော ယိုဝ် ဂြုဝ်း တီ၊ တဲး မဲ ဆုင်ဖျာတ် အာမူ ယေ ဘောကာဂ့လျီတ်။ ဂေ အီ မိုဝ်း မှာပ်၊ တဲး ဂေ ခမ် မှာပ် ဂေ။ ဂေ အီ တူ မိုဝ်း မှာပ်၊ တဲး မဲ တဲး ဒွန် အီ နပ် လွင် တူ မိုဝ်း ဂေ မှာပ်။

33 ဂေ ဒူအီ အီဆာရေလ အီ မုး ဒူအီ ပီ အိုပ် မဲ၊ ဆေ ဂေ ဒီ စှိုမ် ဒီ ရန်ဆူ ဂေ ကူပ် ဟဲ့ ဘူင် ဂေ ပီ တူ အိုင် မဲ၊ ဆေ ဂေ ဘော ဝီ တး ခဲင် ဟုဝ် နီ၊ ဆာခိုဝ် မှာန့် ဒီ မဲ ဇဝ်၊ 34 တဲး ဂြုဝ်း ဂေ ဝီ လိုဝ်း ဒီ မဲ ခဲင် ဂါင်ဟြာဝ်၊ တဲး မဲ ဝီ ဂဝ်း ဝဲန် မှာပ် ဂေ။ တဲး မဲ ဝီ ယဲတ့် ဂေ၊ တဲး ဂေ ဝီ ဇမ် ခဲင် မိူင် ပဲ့ ဟဲ့ အာပ် မဲ ဇဝ် ဒီ ဒါ ဒါ ဂေ တွိုန်။

35 ဆေ ဂ့လာယ် တူ စုဝ်း ကူပ် ဟဲ့ ဘူင် ဂေ မှာပ်၊ ဆေ ဂေ ဘော ဝီ မာငး၊ ယွတ် ဘ့လာက် ကွယ် ဟုဝ် နီ၊ ဆေ ဂေ ဝီ လှုဝ်း လွင် လုဝ် ခမ် ဂေ ဒုက် ကူပ် မှာပ် ဂေ၊ ဆေ ဂေ ဘော ဝဲန် မှာပ် ဂေ၊ ဝီ ဆာခိုဝ် ဒီ မဲ၊ 36 တဲး မဲ ဇဝ် ဘော ထူမ် ဂြုဝ်း ပီ ဆာခိုဝ် ဂေ ခဲင် ဂါင်ဟြာဝ်၊ တဲး မဲ ဂဝ်း ဝဲန် မှာပ် ဂေ အီ မုး ဒူအီ အီဆာရေလ ဒူအီ ပီ အိုပ် မဲ ဇဝ်။ တဲး မဲ ဇဝ် ဝီ မာနုဝ် န့တေန့် ဘွတ် န့တေန့် မွှိုမ်၊ တဲး ဂေ ဝီ ဒူပ်။ ဘော ဂ့လာယ်၊ တဲး န့ ဝီ စုဝ်း ဒဲင် ကာဒါယ် ပဲ့ ဟဲ့ အာပ် မဲ ဇဝ် ဒီ ဂေ။

37 ခဲင် မိူင် ယေ တီ၊ ဆေ န့ ဘော မိုဝ်း လဲင် စုဝ်း၊ တဲး ဒူအီ ဘော အေတ့် ပီ ဒီ ဟူမ်၊ ဆေ ဘော မိုဝ်း ခုန် ဂျီတ် တး ဘုတ်၊ တဲး ဟေ ဂေ ဘ့လေ ကော ယမ်၊ ဆေ ဘော မိုဝ်း မာဝ ဂေ မာအာဇူင့် ဟူမ် ပီ ဆမ် ဂေ၊ ဆေ ဘော မိုဝ်း ရန်ဆူ အီ ပဲ မာန် မိူင် ဂေ တီ၊ ဆေ ဘော မိုဝ်း ဆဝ် မျုဝ် မှဝ် အာဝ် တဝ်း၊ 38 ဆေ ဒူအီ အူ ဝီ ခဲင် ဒူအီ အီဆာရေလ ဘော ဆာခိုဝ် ဒီ မဲ ဇဝ် ကူပ် ဟဲ့ ကာဒုး အန် ဒီ ခမ် ဒုက် ဇိုဝ် တီ၊ ဆေ အန် ဘော ဝီ မာငး နာ ကွယ် ဟုဝ် နီ၊ ဝီ ဆာခိုဝ် မှာန့် မျုဝ် မှဝ် ဒီ မဲ ဇဝ်၊ 39 တဲး ဂြုဝ်း ဂေ လိုဝ်း ဒီ မဲ ဇဝ် ခဲင် ဂါင်ဟြာဝ်၊ တဲး မဲ ထူမ်။ မဲ ဇဝ် နပ် တူတ့် ပီ ပါယ် နဝ်း ဖွိုမ် ယေ။ မှာန့် မဲ ဇဝ်၊ တဲး မဲ ဘူင် ဒီ ယေ ဒွန် အီ ခဲ့ ပီ ပါယ် ခဲင် နဝ်း ယေ။ ခုဝ်၊ န့ မိုဝ်း မီ မဲ ဇဝ် အီ နပ် တူတ့် ပီ ပါယ် နဝ်း ဖွိုမ် ဒူအီ ဒွန် မျုဝ်။ 40 တဲး မဲ ဘူင် ပါယ် တီ။ တဲး ဂေ ရုဝ်ဆေ မဲ ဇဝ် ဒေါ ဆီ ကွယ် ဂေ ခဲင် မိူင် ပီ အာပ် မဲ ဒီ ဒါ ဒါ ယေ တီ။

41-42 ဒဲင် နီ၊ န့ ဒီ ဘော မိုဝ်း ဒူအီ အာမျုဝ် ဟဝ် အီ တူ မုး ဒူအီ အီဆာရေလ၊ ဂေ အီ တး တူင့်၊ ဂေ ဒီ ယိုဝ် လွင် ပီ ပါယ် အာဖုင် ဒင်ခုဝ် မဲ ဇဝ်၊ န့ တာင် ကာဆဝ်၊ ဂေ ဒီ ဘော ယိုဝ် ပီ ဘူင် မဲ ဇဝ် ဟဲ့ ကျ ကာဆဝ်။ ဆေ ဂေ ဒူအီ တီ ဘော တး မိူင် တူင့်၊ ဝီ မာငး ဘ့လာက် ကွယ် ဟုဝ် နီ၊ ဆာခိုဝ် ဒီ မဲ ဇဝ်၊ 43 တဲး မဲ ဇဝ် ထူမ် ဂြုဝ်း ဂေ ခဲင် ဂါင်ဟြာဝ်၊ အီ မုး ဒူင် ကွယ် မဲ။ တဲး မဲ ဘူင် ဒူပ် ခဲ့ ပီ ဆာခိုဝ် မှာန့် ဂေ ဒူအီ အာမျုဝ် ဟဝ် တီ၊ တဲး ဒူအီ ဘော ကာဒါယ် နီ ကော နပ် လွင် မဲ ဇဝ်၊ တဲး ဂေ ဘော ရုဝ်ဆေ မဲ၊ တဲး န့ ပီ ဂေ ဒူအီ အီဆာရေလ ဟဲ့ ရုဝ်ဆေ မဲ ဇဝ်၊ တဲး ဂေ ဘော နပ် ဟုဝ် ပဲ့ ဟဲ့ ဆမ် အုဝ် တီ၊ န့ မုး ဟုဝ် မဲ ဇဝ်။

44 ဆေ မဲ ဇဝ် စ်ု ဒူအီ မဲ ဟာဝ် ကာဂုဝ်း ဒီ ရန်ဆူ ဂေ၊ မဲ ဘော စ်ု ဂေ ဟာဝ် နာ မှဝ်၊ ဆေ ဂေ ဘော မာငး ယွတ် မိူင် ပဲ့ ဟဲ့ ရဝ်း မဲ၊ ဆေ ဂေ ဘော ဝီ မာငး ယွတ် ဘော ဟုဝ် နီ ပဲ့ ဟဲ့ ဆမ် အုဝ် အာဒါ မဲ ဇဝ်၊ ဆေ ဂေ ဘော ဆာခိုဝ် ဒီ မဲ ဇဝ်၊ 45 တဲး မဲ ဇဝ် အီ ကွယ် ဂါင်ဟြာဝ် ဝီ ယိုဝ် ဂြုဝ်း ပီ ဆာခိုဝ် ဂေ တီ။

46 ခုဝ်၊ န့ မိူဝ် တူ မိုဝ်း ဒူအီ ခေါ အူ ဝီ၊ အီ တူ နပ် ဒီ ဘူင် မှာပ်။ ဆေ ဂေ ဘော ဘူင် နာ တူ မွှိုမ် ဒီ မဲ ဇဝ်၊ ဆေ မဲ ဇဝ် ဘော ရူ ဒီ ဂေ ဘော တဲး ရန်ဆူ ဂေ ပဲ ဂေ၊ ဆေ ရန်ဆူ ဂေ ပီ ဘော ဒိုဝ်း ဟာဝ် ဂေ မိူင် တူင့်၊ မိူင် ကာတတ်၊ 47 ဒေါ ကွယ် ဂေ ခဲင် မိူင် အီ ဟဝ်၊ ဆေ ဂေ ဘော ဝီ ကာဖာ လှုဝ်း လွင် ပဲ့ ဟဲ့ ဘူင် လုတ့် ဂေ၊ ဘော ဝီ ကာလာင် မှာပ် ဂေ တဝ်း၊ ‘ယေ ဟဲ့ ဟွတ့် ဘူင် မိူက်၊ ဟဲ့ ဘူင် အီ တူ ဘွတ် တူ မွှိုမ်၊ ဟဲ့ ဘူင် နာ စီစိဝ်။’ 48 ဆေ ဂေ ဘော ဘျွင် အာခ်ု မှာန် နဝ်း ဂေ၊ ဝီ မှာန့် ဒီ မဲ ဇဝ်၊ ဝီ မာငး ယွတ် မိူင် ပဲ့ ဟဲ့ အာပ် မဲ ဇဝ် ဒီ ဒါ ဒါ ဂေ တွိုန်၊ မာငး ယွတ် ဘော ဟုဝ် ပီ ဆမ် အုဝ် အာဒါ မဲ နီ၊ 49 မဲ ဇဝ် အီ ကွယ် ဂါင်ဟြာဝ်၊ မှာန့်၊ တဲး မဲ ထူမ် ဂြုဝ်း ပီ ဆာခိုဝ် ပီ မှာန့် ဂေ တီ၊ တဲး မဲ စွယ် ဂေ။ 50 အုဝ် ဘော မှာန့်၊ တဲး မဲ ဇဝ် ဂဝ်း ဝဲန် မှာပ် ပဲ့ ဟဲ့ ဘူင် ကာလိုပ် ဂေ ဒီ မဲ ဇဝ် တီ။ မှာန့်၊ တဲး မဲ ဇဝ် ဘော တဲး ရန်ဆူ အီ ဒိုဝ်း ဟာဝ် ဂေ တွိုန်၊ ဝီ ကာဝေ ဂေ။ 51 ခုဝ်၊ ဂေ မုး ဒူအီ ပီ အိုပ် မဲ ဇဝ်။ ဂေ ဟဲ့ ပီ ခါဂုန် မဲ၊ ပဲ့ ဟဲ့ ဒိုဝ်း လေး မဲ ဇဝ် ခဲင် မိူင် အဲဂိုပ်။ န့ ဘော ပီ မဲ ဇဝ် ဟဲ့ ခမ် ဒီ ဒိုဝ်း လေး ဂေ ခဲင် န့ကိုဝ် ငဝ် ဒူင် စိုမ် ဂေ ဒီ ဟိန်။

52 မှာန့်၊ တဲး မဲ ဇဝ် ယွတ် ယိုဝ် ပီ ဆာခိုဝ် မှာန့် အုဝ် ဘော ပီ ဆာခိုဝ် ဂေ ဒူအီ အီဆာရေလ အီ မုး ဒူအီ ပီ အိုပ် မဲ ဇဝ်၊ တဲး မဲ ထူမ် ဂြုဝ်း ပီ ဆာခိုဝ် ယေ နီ ဒွန် ဇေန့်။ 53 ခုဝ်၊ မဲ ဇဝ် ဟဲ့ ကာယဝ်း ဂေ ဒီ ဒူအီ ဒဲင် ကာဒါယ် နီ ဒွန် ခြိုဝ်၊ တဲး ဂေ ပီ ခါဂုန် မဲ ဇဝ်၊ တဲး န့ ပီ ပီ ကာလာင် မဲ ဒီ အာမုဝ်ဆဲ ဒေါ ဒိုဝ်း လေး မဲ ဒါ ဒါ ယေ ခဲင် မိူင် အဲဂိုပ် တွိုန်။” ခဲ့ တီ အာဆာလုဝ်မုဝ် ဆာခိုဝ်။

54 အာဆာလုဝ်မုဝ် ဟဲ့ ဟွတ့် ဆာခိုဝ် ဒီ ဇဝ်ဖြာ ပါယ် တီ အန် ဝီ ယိတ့် ဒူင် ဟဲ့ ခြိုပ်ခြဝ် အန် ခူပ် ကာစှူင့် လှူ ဒီ ဇဝ်ဖြာ၊ ဒူင် ပဲ့ ဟဲ့ စုဝ့် ဆူင့် အန် ဒဲ အန် တွိုန်။ 55 အန် ဝီ ယိတ့် စွင့် ဒတ် တာင်၊ မွင့်ကာရာ တဲး ဒီ ဂေ ဒူအီ အီဆာရေလ။

56 အန် တဝ်း၊ “အုဝ် အိူပ် မဲ ဇဝ်ဖြာ။ န့ မုး ဒူအီ အီဆာရေလ အီ မုး ဒူအီ ပီ အိုပ် မဲ။ မဲ ဟဲ့ တဲး ဂေ ကွယ် ဒါခိုယ် ဂတ် ဂျီတ်။ မဲ ဟဲ့ ဘူင် ခဲ့ ပီ ဒွါ မဲ ကာဒိက် ဆတ်ဇာ တွိုန်။ ဂြုဝ်း ပီ ကာလာင် အုန် မဲ ဇဝ် ဒီ အာမုဝ်ဆဲ အီ မုး ဒဲစေန့် မဲ၊ န့ တူ လိုဝ် ခေါ အူ ဒဲ။ 57 မဲ ဇဝ်ဖြာ အီ မုး ဇဝ်ဖြာ ပီ ကြိုပ် ယေ၊ တဲး မဲ ကွယ် ရိုမ် ဒူပ် ယေ၊ တဲး န့ ပီ မဲ ဇဝ် ဟဲ့ ကွယ် ရိုမ် ဒူပ် ဒါ ဒါ ယေ ဒေါ မွိုန်။ မဲ ဇဝ်၊ ကွဲ့ ဘ့လေး ဝဲန် ယေ ဒေါ မှဝ်။ 58 မှာန့် မဲ ဇဝ် မ့ပြာယ် နဝ်း ယေ၊ တဲး ယေ လှုဝ်း မဲ ဇဝ်၊ တဲး ယေ ဒူပ် န့တေန့် မဲ ဇဝ်၊ ဘော ဒူပ် ဆီချာ ဒါရာ မဲ ဇဝ်၊ ဘော ဒူပ် အာကျာမ် အာငျာန် ပီ ဒွါ မဲ ဒီ ဒါ ဒါ ယေ တွိုန်။ 59 ဂြုဝ်း ပီ ဆာခိုဝ် အုဝ် နီ တဲး မဲ ဇဝ် အီ မုး ဇဝ်ဖြာ ပီ ကြိုပ် အုဝ် လှုဝ်း ဒွန် မှိုဝ် ဒွန် ညှာ၊ တဲး မဲ ဇဝ် ထူမ် ဘော လွင် ဒဲစေန့် မဲ ဘော လွင် ဂေ ဒူအီ မဲ အီ မုး ဒူအီ အီဆာရေလ၊ တဲး မဲ စွယ် ဘော ဒွါ ခဲ့ ပီ လုဝ် ယေ ဒွန် ဆီငဲ။ 60 တဲး ဂေ ဒူအီ ဒဲင် ကာဒါယ် ကော နပ် လွင် မဲ ဇဝ်ဖြာ၊ မဲ မုး ဇဝ်ဖြာ အာခါခ်ု။ အာဝ် မိုဝ်း ဇဝ်ဖြာ ပေါ အူ ကာဒင်။ 61 ဘော ဘေ ဒူအီ အီဆာရေလ၊ တဲး နဝ်း ဘေ ဒူပ် မီ ဇဝ်ဖြာ။ တဲး ဘေ ပွိုန် ဒီ ဒူပ် အာကျာမ် အာငျာန် အန် ဇဝ် ဘော ဒူပ် ဆီချာ ဒါရာ အန် ဇဝ် ဆေဆေ၊ တဲး န့ ပီ ဆီငဲ အာတိုဝ် နီ။”

62 ဝါယ် အန် တီ ခုန်ဒီခမ် ဘော ဂေ ဒူအီ အီဆာရေလ၊ ဂေ ဘော လှူ ပီ လှူ ဂေ ဒီ ဇဝ်ဖြာ။

63 အာဆာလုဝ်မုဝ် ဘော ဒိုဝ်း မက် အာ မှိုန့် ဒီ အာ ဟြဲန့် ဒုဝ် ဘော မာဘူ အူ ဆဲန် ဒီ အာ မှိုန့် ဒုဝ်၊ တဲး န့ ဘဲန် ပီ လှူ အီ ကွယ် ကာဇု ဟူမ် ရိုမ်။ ပန် တီ ခုန်ဒီခမ် ဘော ဒူအီ အီဆာရေလ ဘော ကာဖြူမ် ဒီ အိူပ် ဇဝ်ဖြာ ခဲင် ဟုဝ် တွိုန်။

64 ဆီငဲ တီ အူ ဇေန့် ခုန်ဒီခမ် ဘော ဘူင် တဲး ဝဲင် အီ ကွယ် နာ အာတ့် ဟုဝ် ဇဝ်ဖြာ ဘဲန် ဒူင် ဘွတ်။ အန် ဘော လှူ ပီ လှူ အန် ဒွန် မျုဝ်။ ခုဝ်၊ ကာစှူင့် ဘွင့် အီ ကွယ် နာ အာတ့် ဟုဝ် ဇဝ်ဖြာ တွိုန်၊ န့ ဒီတဲတ်၊ အာဝ် ပွိုန် ဘ့လေး ကြုဝ် ပီ လှူ အန် အီ ဒုဝ့် ဒီ ငဝ်၊ ဘော ငှုဝ် ဒီဂါဝ်၊ ဘော ဘျြီင် အီ လေး ဒီ ပီ ဒီ လှူ အီ ကွယ် ကာဇု ဟူမ် ရိုမ် တွိုန်။ 65 ပါယ် တီ ဘော အာဆာလုဝ်မုဝ် ဘော ဂေ ဒူအီ အီဆာရေလ၊ ဂေ ဘောကာဂ့လျီတ်၊ စုး ဒီ န့တေန့် အီ ဟာဝ် မိူင် လေဘုဝ်ဟာမာတ် ကော ဇမ် ခူပ် ဘ့လဲင် အဲဂိုပ် တွိုန်၊ ဂေ အီ မုး ဖိုင် ဒူအီ ကိူန်၊ ဂေ ကာဖြူမ် ဒီ တး တူတ့် လိုပ် ဘ့လွယ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ တီ။ ဂေ ဟဲ့ ဟွတ့် ဘူင် ဘ့လွယ် အာဒါ ဘူ ဆီငဲ၊ ဂေ ပီ ဝီ ဘူင် ပေါ ဘူ ဆီငဲ၊ တဲး န့ ကော နုဝ့် ဂိုဝ် ဒီ ဖွုန် ဆီငဲ။ 66 ဂေ ဟဲ့ ဟွတ့် ဘူင် ဘ့လွယ် တီ၊ ပါ ခဲညှာ အန် ဘော တဲး ဒူအီ ဝိဝ်။ ဂေ မိူဝ် မွင့်ကာရာ ဒွါ ဒီ ခုန်ဒီခမ်။ ဟဲ့ ဟွတ့်၊ ဂေ ဘော ဝိဝ် ဒီ ကာင် ဂေ။ နဝ်း ဂေ မိူဝ် ဟဲ့ ဒါခိုယ် ကူပ် နာ မွှိုမ် ပဲ့ ဟဲ့ ဘူင် ဇဝ်ဖြာ ဒီ အာဒါဝိတ် အီ မုး ဒဲစေန့် အန် ဘော ဒီ ဂေ ဒူအီ အာမျုဝ် အီဆာရေလ။