1 အာဆာလုဝ်မုဝ် ဟဲ့ ဟွတ့် ဘူင် ဟုဝ် ဇဝ်ဖြာ ဘော ဟုဝ် အန်၊ ဟဲ့ ဟွတ့် တူတ့် ဒွန် မျုဝ် ခဲ့ ပီ ဆီ ဘူင် အန်။ 2 ဝါယ် အန် တီ ဇဝ်ဖြာ ပီ ဝီ တး ကာပ့လုး ဒီ အာဆာလုဝ်မုဝ် ပေါ အူ ဇေန့်။ န့ ပီ ဒေါ ကာပ့လုး အန် ဒီ မိူင် ဂီပွင် တွိုန်။

3 ဇဝ်ဖြာ ဝီ တဝ်း ဒီ အန်၊ “အုဝ် ဟဲ့ ယိုဝ် ဂြုဝ်း ဆာခိုဝ် ပဲ့ ဟဲ့ မှာန့် မဲ ဒီ အုဝ်။ အုဝ် ဒီ တဲး ဟုဝ် ပီ ဆမ် မဲ တီ ဘဲန် ဟုဝ် ဘွတ်။ အုဝ် ဒီ ကွယ် ဒီ တီ ဆေဆေ။ အာဆေ ဘော တး ဒီ တီ၊ အုဝ် ဒီ ဘော ယွတ် အန်၊ ရွက့် ကာဝေ အန် ဆေဆေ။

4 န့ ယီ မုး မဲ၊ ဆေ နဝ်း မဲ ဘော ဆိူဝ်၊ ဆေ အုဝ် ဘော ယိုဝ် ပီ ဘူင် မဲ ဟဲ့ ဘွတ် ပီ ပီ ဘူင် အာဒါဝိတ် အီ မုး ဂုန့် မဲ၊ ဆေ မဲ ဘော ထူမ် ပဲ့ ဟဲ့ ကာလာင် အုန် အုဝ် ဒီ မဲ ဘော ဒူပ် ဒါရာ အာကျာမ် အာငျာန် အုဝ်၊ 5 အုဝ် ဒီ တဲး ဂေ လှုက်လှာန် မဲ အိုပ် မိူင် အီဆာရေလ ဆေဆေ။ အုဝ် ဟဲ့ ဒွိုမ် တဝ်း ဒီ ဂုန့် မဲ၊ ‘လှုက်လှာန် မဲ ဒီ ပွိုန် ဒီ အိုပ် မိူင် အီဆာရေလ ဆေဆေ။’

6 ဆေ မဲ ဘော လှုက်လှာန် မဲ တူ ဝီ ဒူပ် အုဝ်၊ ဝီ ဝး န့တေန့် အုဝ်၊ အာဝ် ဟူ ဒူပ် ဒါရာ ဂေ အာကျာမ် အာငျာန် အုဝ်၊ ဆေ ဂေ ဝီ ဝဲန် အုဝ်၊ ဝီ ဒူပ် ဇဝ် ပေါ ကာဒင် ဘော ကြိုပ် ဂေ၊ ဆေ ဂေ ဘူင် ပါယ် တီ၊ 7 အုဝ် ဒီ ဘော ဝဲန် ဂေ ဒူအီ အီဆာရေလ၊ တူ တဲး ဂေ ကွယ် ခဲင် မိူင် ပီ ဒွါ အုဝ် ဒီ ဂေ။ ဘော ဟုဝ် တီ ပဲ့ ဟဲ့ တဲး အုဝ် ဘဲန် ဟုဝ် ဘွတ်၊ အုဝ် ဒီ ဝဲန်။ အီ မုး ဒူအီ အီဆာရေလ၊ ဂေ ဒီ ဘဲန် ပီ နဲန ပီ ကာညး ဂေ ဒူအီ ဟဝ်။ 8 ဟုဝ် အီ တာင် အီ စှိတ် ကာဆဝ် ဒေါ တီ နီ မိူဝ်၊ န့ ဒီ လိုဝ် တူတ့်။ အီ ဟဝ် အီ ကာလုဝ်း ဒူပ် န့တေန့် နီ၊ ဂေ ဒီ အာမ် ဘော နဲန တဝ်း၊ ‘ကူပ် မာဆေ ဇဝ်ဖြာ ဟဲ့ ဘူင် တဲး န့ စှိုမ် ပါယ် နီ ခဲင် မိူင် နီ၊ ဘော ခဲင် ဟုဝ် အန် နီ။း’

9 အီ ဟဝ် ပီ ဒီ ဝီ တဝ်း၊ ‘ဇဝ်ဖြာ ဟဲ့ ဒမ် မှာပ် ဒီ ဂေ။ ကူပ် ဟဲ့ ဝဲန် ဂေ ဇဝ်ဖြာ အီ မုး ဇဝ်ဖြာ အီ ဒိုဝ်း လေး ဒါ ဒါ ဂေ ခဲင် မိူင် အဲဂိုပ် တွိုန်။ ဂေ ဟဲ့ ဝီ ဘိုင် ကြိုပ် ဇဝ် ပေါ အူ ကာဒင်။’” ခဲ့ တီ၊ ဇဝ်ဖြာ ကာလာင် ဒီ အာဆာလုဝ်မုဝ်။

10 ဝါယ် အန် တီ န့ ဘော နုဝ့် အာ ဂိုဝ် ဆီနမ်၊ အာဆာလုဝ်မုဝ် ဟဲ့ ဆမ် ဟုဝ် အာ ကာတု။ န့ မုး ဟုဝ် ဇဝ်ဖြာ အူ ကာတု ဘော ဟုဝ် ဒူင် ကွယ် အန် အူ ကာတု။ 11 အာဟီရမ် အီ မုး ခုန်ဒီခမ် ခဲင် မိူင် ထူရုဝ် တွိုန်၊ အန် မိူဝ် ဟဲ့ ဒွါ ဟေ အာရိတ် ဘော ဟေ န့ကေ ဘော ခြိဝ် ခဲ့ ပီ လုဝ် အန်။ ခုဝ် အန် တီ၊ အာဆာလုဝ်မုဝ် ဘော ဒိုဝ်း မိူင် အာ ဂိုဝ် မိူင် အီ ကွယ် ခဲင် ကာဒါယ် မိူင် ဂါလီလေ၊ ဒွါ ဒီ ခုန်ဒီခမ် အာဟီရမ် တွိုန်။ 12 အာဟီရမ် ဘော လေး ဒီ မိူင် ထူရုဝ် တး ယွတ် မိူင် ပီ ဒွါ အာဆာလုဝ်မုဝ် ဒီ အန် တွိုန်၊ အာဝ် လဝ့် နဝ်း အန်။

13 အန် ဝီ တဝ်း၊ “အိုယ် မဲ ဝါ၊ မိူင် ပီ ဒွါ မဲ ဒီ အုဝ်၊ ယုဝ် န့ မုး မိူင် ပါယ် မှဝ်။း” မိူင် ဂေ တီ၊ အန် ဝီ တဲး ဂေ စိူဝ် ကာဒါယ် ကာဘူလ။ ကော ဇမ် အာတိုဝ် နီ၊ ဂေ တဝ်း ပါယ် တီ။

14 အာဟီရမ် တွိုန် ဘော ဒွါ ခြိဝ် ဒီ အာဆာလုဝ်မုဝ် အူ မာယဝ်း ဒီ အာ ဂိုဝ် ထာလေန်။^a

15 ဒေါ ဆမ် အာဆာလုဝ်မုဝ် ဟုဝ် ဇဝ်ဖြာ ဘော ဟုဝ် အန် ဘော ဒီ ခူပ် ဒူင် ကွယ် အန်၊ အန် ဘော ဂဲပ် ဒူအီ၊ တဲး ဂေ ဘူင် ဂါန် အန်။ ဂေ ဒူအီ ပီ ဂဲပ် အန်၊ ဂေ ဘော လုဝ် ဘူင် ရဲင် မိူင် ယေရူဆာလဲမ်။ ဘော မိူင် ဟာစော၊ မိူင် မီကီတော ဘော မိူင် ကေစာ ဂေ လုဝ် ဆမ်။ 16 အီ မုး မိူင် ကေစာ တီ၊ ခုန်ဒီခမ် ဖာရုဝ် အီ အိုပ် မိူင် အဲဂိုပ်၊ အန် ဟဲ့ ဒွိုမ် ကာဂုဝ်း ဘော ဒုဝ့် ဝဲန် မိူင် တီ။ အန် ဘော ငဝ်း ဒူအီ ကာနန့် အီ ကွယ် ခဲင် မိူင် တီ၊ ဝီ ဒိုဝ်း မိူင် တီ၊ ဝီ အာပ် တဲး န့ ဘဲန် လက်ဆွင် ဒွါ ဒီ ဂွန် အီဘိုန့် အန် အီ မုး အီဘိုန့် အာဆာလုဝ်မုဝ် တွိုန်။ 17 ကူပ် န့ ပါယ် တီ အာဆာလုဝ်မုဝ် ပွိုန် ဒီ ဒဲ မိူင် ကေစာ။ ဘော မိူင် ဘေတ်ဟုဝ်ရုန် အီ ကွယ် နာ တေတ့်၊ 18 ဘော မိူင် ဘာလာတ်၊ မိူင် ထာမာ အီ ကွယ် ခဲင် ပြဲ ကာဟဝ်း အီ မုး ကာဒါယ် ပီ အိုပ် အာဆာလုဝ်မုဝ်၊ 19 ဘော မိူင် ဒူင် အုန် အာဆာလုဝ်မုဝ် ကြုဝ်ကြာမ် အန်၊ မိူင် ဒူင် ကွယ် ဂေ အီ ယွတ် လိုမ်လာ လက်လဝ် ဂေ မ့ပြွင့် အန် ဘော ဒွန် မျုဝ် ပဲ့ ဟဲ့ ဆမ် အာဆာလုဝ်မုဝ် ခဲင် မိူင် ယေရူဆာလဲမ် ဘော ပီ ဘူင် အန် ဒဲင် နွန် လေဘာနုန် ဘော ခဲင် မိူင် အန် ဒွန် ပ့လုဝ့်၊ ဂေ ဒူအီ ပီ ဂဲပ် အန် တွိုန်၊ ဂေ လုဝ် ဘူင် တူတ့် ဒွန် မျုဝ်။

20 ခဲ့ ကွယ် ဂေ ဒူအီ အာမျုဝ် ဟဝ် အီ တူ မုး ဒူအီ အီဆာရေလ အာဆာလုဝ်မုဝ် ဝီ တဲး ဂေ ဘဲန် မှာယ် အန်၊ ကော ဇမ် အာတိုဝ် နီ။ န့ မုး ဒူအီ အာမုဝ်ရိတ်၊ ဒူအီ ဟေထိတ်၊ ဒူအီ ဖေရေဆိတ်၊ ဂေ ဒူအီ ဟီဝိတ် ဘော ဒူအီ ယေဘူဆိတ်။ 21 န့ မုး ဂေ လှုက်လှာန် ဒူအီ အီ ဆီ ဂိတ် ခဲင် မိူင် တီ ပီ တူ ပွိုန် ဒီ ငဝ်း ဒူအီ အီဆာရေလ ဒေါ မွိုန်၊ ဂေ ဘောကာဂ့လျီတ် ဝီ ဘဲန် မှာယ် အာဆာလုဝ်မုဝ်။ 22 အီ မုး ဒူအီ အီဆာရေလ အာဆာလုဝ်မုဝ် တူ တဲး ဂေ ဘဲန် မှာယ် အီ ဟဝ်။ အန် တဲး ဂေ ဘဲန် ဒါ ဆိုက်၊ တဲး ဂေ ဘဲန် ဒဲစေန့် အန်၊ ဘဲန် အာမူ အာမာတ် အန် အီ အိုပ် ဒါ ဆိုက် အန် အီ အိုပ် ဖိုင် ဂေ အီ ပဝ့် လက်လဝ် အန် ဘော အီ ပဝ့် မ့ပြွင့် အန်။ 23 အီ မုး အာမူ အာမာတ် အီ တာင် အီ အိုပ် ဂါန် ပီ လုဝ် ဘူင် ဒွန် မျုဝ် ဂေ ကွယ် ဖန် မာယဝ်း ဒီ ဖန် ဂိုဝ် ဝီ။

24 အီ မုး ဂွန် အီဘိုန့် ခုန်ဒီခမ် ဖာရုဝ် တွိုန်၊ အန် ဘော လေး ခဲင် မိူင် အာဒါဝိတ်၊ ဝီ ဟာဝ် ကွယ် ခဲင် ဟုဝ် ပီ ဘူင် အာဆာလုဝ်မုဝ် ဒွါ ဒီ အန်။ ဟုဝ် နာင် တီ အာဆာလုဝ်မုဝ် ဘော ဘူင် ခူပ် ဟုဝ် အန်။

25 အူ ဆီနမ် အူယ် ဇေန့်၊ အာဆာလုဝ်မုဝ် ရဲန် ပီ ဒီ လှူ အန် အီ ဒုဝ့် ဒီ ငဝ်၊ ဘော ပီ လှူ အီ ကွယ် ကာဇု ဟူမ် ရိုမ်။ အန် လှူ ဇိုဝ် တီ ဒဲင် ကာစှူင့် လှူ ပီ ဘူင် အန် တွိုန်။ အန် ဘော ဒိုဝ်း ဆီနမ် အုး ငှုန်၊ ဒုဝ့် ဒဲင် ကာစှူင့် အန်၊ တဲး န့ လဝ့် နဝ်း ဇဝ်ဖြာ။ ပါယ် တီ အန် ပွိုန် ဒီ ဘူင် တူတ့် ဒွန် မျုဝ် ပီ ကာအာပ် ဘူင် ခဲင် ဟုဝ် ဇဝ်ဖြာ။

26 အာဆာလုဝ်မုဝ် ဘော ဘူင် ရိုဝ် ဆင်ဖုဝ် ဒီ မိူင် အေစာယူန်ကာဘာ အီ ကွယ် ကာတတ် မိူင် အေလာတ် ဒီ ခူပ် ဒီနှူင် ရေန့် ခဲင် ကာဒါယ် မိူင် အေဒူမ် တွိုန်။

27 ခုန်ဒီခမ် အာဟီရမ် တွိုန် ဘော စ်ု ဒူအီ အန် အီ နပ် ဒီ ပဝ့် ရိုဝ်၊ အီ နပ် ပီ ပါယ် အိုမ် တာင်၊ တဲး ဂေ ပဝ့် ရိုဝ် ဆင်ဖုဝ် ဒူပ် ဒူအီ အာဆာလုဝ်မုဝ် ဂေ တွိုန်။

28 ဂေ ဘော ဟာဝ် ဒီ မိူင် အုဝ်ဖီ၊ ဂေ ဘော ဒိုဝ်း တး ခြိဝ် ဖွုန် မာယဝ်း ဒီ အာ ဂိုဝ် ထာလေန်၊ တး အာပ် ဒီ အာဆာလုဝ်မုဝ်။^b