1 ဝါယ် တီ န့ မိုဝ်း နာင် ဟောခမ် အီ အိုပ် မိူင် ဆေဘာ၊ အန် ဘော ယိုဝ် လွင် အာဆာလုဝ်မုဝ် ဟဲ့ မိုဝ်း ဆာရေ ဘော ပွုန် ပီ ဒွါ ဇဝ်ဖြာ ဒီ အန်။ အန် ဘော တး ဒူင် ကွယ် အာဆာလုဝ်မုဝ် ဘော ဒီမွှတ် လွင် အီ ညှာပ် အီ ခိုက်ခမ်၊ တဲး အန် ထေဝ် အာငျာန် အာဆာလုဝ်မုဝ်။ 2 အန် ဘော ဒိုဝ်း ဒူအီ ကိူန် ဒူပ် အန်။ ဘော မ့ပြွင့် ကာဟာတ့် အီ ဒါင် န့ကြိုဝ်း အုး ငှုန် ဘော ခြိဝ် ဘော ဆဲန့် အီ ငဝ်း တာင် ကာဆဝ် ဂေ ဒိုဝ်း တး ဇမ် မိူင် ယေရူဆာလဲမ် ဒူင် ကွယ် အာဆာလုဝ်မုဝ် တွိုန်။ နာင် တွိုန် ဘော ကာလာင် ဒီ အာဆာလုဝ်မုဝ် လွင် ပီ ကာဖာ အန် ဘဲန် မျုဝ် ဘဲန် မျုဝ်။ 3 အာဆာလုဝ်မုဝ် ဘော နပ် ဒီ ကာလာင် လွင် ပီ ဒီမွှတ် အန် တီ ဒွန် မျုဝ်။ အာဝ် မိုဝ်း ခေါ အူ မျုဝ် ပီ တူ နပ် အာဆာလုဝ်မုဝ် ဒီ ကာလာင်။ 4 နာင် ဟောခမ် အီ တး မိူင် ဆေဘာ တွိုန် အန် ဘော ယိုဝ် ပီ ပါယ် အာငျာန် အာဆာလုဝ်မုဝ် ဘော ယိုဝ် ဘော ဟုဝ် ပဲ့ ဟဲ့ ဘူင် အန် တွိုန်၊ 5 အန် ဘော ယိုဝ် ပီ ဒီ ဟူမ် ပီ ဘ့လေး ဂေ ခဲင် ဟုဝ် အန်၊ ဘော ပီ ပါယ် အာမူ အာမာတ် အန် ဒီ တုတ့် ဒီ ကွယ်။ အန် ဘော ယိုဝ် ဒဲစေန့် အန် အီ စှိုပ် ခြိုင် စှိတ်၊ အီ လိုမ်လာ ဂေ ဒူအီ ဟူမ် ရိုမ် ဘော ဂေ အီ ဒွါ ပီ ဒီ ဒျီင် ဒီ အန်။ အန် ဘော ယိုဝ် ဘော န့တဲင် အီ ဟုဝ့် ဒီ ဟုဝ် ဇဝ်ဖြာ တွိုန်။ န့ တဲး အန် အာမ် ကာဆဝ်။

6 အန် ဝီ တဝ်း ဒီ ခုန်ဒီခမ်၊ “ဒေါ ကွယ် အုဝ် မိူင် အုဝ်၊ ဂြုဝ်း ပဲ့ ဟဲ့ ယိုဝ် အုဝ် လွင် ပဲ့ ဟဲ့ ဘူင် မဲ ဘော လွင် အာငျာန် မဲ ဒွန် မျုဝ်၊ န့ ဟဲ့ မုး ဟဲ့ မှာန်။ 7 မာလဲ၊ ဆေ အုဝ် တူ တး ဇမ် တဲး အုဝ် ယိုဝ် ဒီ ငါယ် အုဝ်၊ အုဝ် တူ ညှိုမ် ဂြုဝ်း တီ။ ပီ ခဲ အီ ဒီ အုဝ် အာဝ် မုး ခေါ အူ ကာတဲ။ အာငျာန် မဲ ဘော ကြုဝ်ကြာမ် မဲ ဒွန် မျုဝ် ဟဲ့ လွှိုမ် ပဲ့ ဟဲ့ ယိုဝ် အုဝ် လွင် အန် တီ။ 8 ဂေ ဒူအီ အီ ဒူပ် မဲ ဘော ဂေ အာမူ အာမာတ် မဲ အီ ကွယ် ရိုမ် ဒူပ် မဲ၊ အီ ဟဲ့ ပွိုန် ဒီ ထူမ် အာငျာန် မဲ၊ ဂေ ဒွန် အီ ဟဲ့ ဒါခိုယ် အာခ်ု မှာန်။ 9 အုဝ် အိူပ် ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ အီ ဟဲ့ အိုင် မဲ၊ ဟဲ့ တဲး မဲ အိုပ် ဒူအီ အီဆာရေလ။ ကူပ် ရွက့် ဇဝ်ဖြာ ဒူအီ အီဆာရေလ ဆေဆေ၊ အန် ဟဲ့ တဲး မဲ ဘဲန် ခုန်ဒီခမ်၊ တဲး မဲ ဆုင်ဖျာတ် အာမူ ဂေ၊ တဲး န့ မုး၊ တဲး န့ မှာန် ဒွန် မျုဝ်။”

10 ဟဲ့ ဟွတ့် ကာလာင် ဂြုဝ်း တီ၊ နာင် ဟောခမ် တွိုန် ဘော ဒိုဝ်း ခြိဝ် အူ မာယဝ်း ဒီ အာ ဂိုဝ် ထာလေန်^a ဘော န့ကြိုဝ်း အုး ငှုန် ကိူန်၊ ဘော ဆဲန့် အီ ငဝ်း တာင် တွိုန်၊ အာပ် ဒွါ ဒီ ခုန်ဒီခမ်။ ဝါယ် တီ၊ အာဆေ ဘော ဒိုဝ်း ဒွါ န့ကြိုဝ်း အုး ငှုန် ဘဲန် မျုဝ် ဘဲန် မျုဝ်၊ န့ တူ ဒါန် ပီ ဒိုဝ်း နာင် ဟောခမ် အီ အိုပ် မိူင် ဆေဘာ၊ ဒွါ ဒီ အာဆာလုဝ်မုဝ် တွိုန်။

11 န့ ဘော မိုဝ်း ရိုဝ် ဆင်ဖုဝ် အာဟီရမ် အီ ဟာဝ် ဒီ မိူင် အုဝ်ဖီ တွိုန်၊ ဒိုဝ်း တး ခြိဝ် ဘော ဟေ နမ်ဆာ ဂေ ဆဲန့် အီ ဘွတ် ကာဆဝ်။ 12 ခုန်ဒီခမ် ဘော ဒိုဝ်း ဟေ နမ်ဆာ တီ၊ ဘူင် ဘဲန် ရွင့် ခဲင် ဟုဝ် ဇဝ်ဖြာ ဘော ခဲင် ဟုဝ် အန်။ အန် ဘူင် ဘော ဒိင် ဘဲန် မျုဝ် ဘဲန် မျုဝ်၊ ဒွါ ဒီ ဂေ အီ တဝ်း မှုဝ်။ ဝါယ် တီ ကော ဇမ် အာတိုဝ် နီ၊ အာဝ် ဟူ မိုဝ်း ဟေ နမ်ဆာ အီ ကိူန် ခဲ့ တီ။

13 ခုန်ဒီခမ် အာဆာလုဝ်မုဝ် ဘော တဲး နာင် ဟောခမ် မှာန့် ခဲ့ ဆီ မှာန့် အန်၊ ဝီ ဒွါ တူတ့် ဒီ အန်။ ဟဲ့ ဟွတ့်၊ နာင် ဟောခမ် ဂေ အီ ဒူပ် အန်၊ ဂေ ဘော ဝီ ဝိဝ် မိူင် ဒူင် ကွယ် ဂေ။

14 အာဒါ အူ ဆီနမ် ခုန်ဒီခမ် အာဆာလုဝ်မုဝ် ဘော ပွိုန် ခြိဝ် အာဒါ ဒဝ် မာယဝ်း ဒီ ဒဝ် ဂိုဝ် ဒီ ဒဝ် ထာလေန်။^b 15 ဒဲင် တီ၊ ပီ ဝီ မိုဝ်း ခြိဝ် စိုင် ပီ လုဝ် ဒွါ ဂေ ဒူအီ အီ ကာစိုဝ်း ကာယွင့် ဘော ဂေ ခုန်ဒီခမ် အာမျုဝ် အာရာပ် ဘော ဂေ ဒါ တာင် အီ အိုပ် မိူင် ဟဝ်။

16 ခုန်ဒီခမ် အာဆာလုဝ်မုဝ် ဘော ဒိုဝ်း ခြိဝ် တီ၊ ဘူင် မင် ဂွင့် အာ မာယဝ်း ဘူင့် အာဒါ ဒါ ဆိုက် အန်။ အူ ဘူင့်၊ အန် တာ ခြိဝ် ဒဝ် မာယဝ်း ဘေခါ။^c 17 ဘော မင် ဂွင့် အီ ဒီတဲတ် အန် ဝီ ဘူင် အူယ် မာယဝ်း ဘူင့်။ အူ ဘူင့်၊ အန် တာ ခြိဝ် အူယ် မီနာ။^d ခုန်ဒီခမ် အုန် ကြုဝ် တီ ခဲင် ဟုဝ် အန် အီ စိူဝ် ပြဲ လေဘာနုန် တွိုန်။

18 ခုန်ဒီခမ် ဝီ ဘူင် ဘော မာလာင်။ အန် ဒိုဝ်း ပ့လဲ့ မာဆာင်၊ ဟပ် တဲး န့ စှိတ်။ အန် ဒိုဝ်း ခြိဝ် လှိုပ် နာ ရေတ့်။ 19 မာလာင် အန် တီ၊ န့ မိုဝ်း န့တဲင် ဒဝ် ဘ့လဝ့်။ ဒီ ဂိန့် အန် နာ ပန်၊ န့ ကာလင်။ ဒီ အာ ဘ့လာက် ဒူင် ဒီ တုတ့် တွိုန်၊ န့ ဝီ မိုဝ်း ဒူင် ဘ့လေး ဒဲ အန်။ န့ ဘော မိုဝ်း ရာင် မာခြင်ဆီ အာ ဒုဝ် အီ စွင့် နာ ခူပ် အန်။ 20 န့ ဝီ မိုဝ်း ရာင် မာခြင်ဆီ ဂိုဝ် ဒီ အာ ဒုဝ် အီ စွင့် ဒီ န့တဲင် ဒွန် ဘ့လဝ့် ဘော အာ ဘ့လာက်။ ခဲင် မိူင် ဒွန် မိူင်၊ န့ တူ ဒွိုမ် မိုဝ်း အီ ပီ မာလာင် တီ။ 21 ဆီလယ့် ပီ ဒျီင် ခုန်ဒီခမ် အာဆာလုဝ်မုဝ် ဘော ဆီလယ့် ပီ ဘ့လေး အုန် အန် ခဲင် ဟုဝ် အန်၊ အီ စိူဝ် ပြဲ လေဘာနုန် တွိုန်၊ န့ မုး တူတ့် ခြိဝ်။ အာဝ် မိုဝ်း အီ မုး ရွိုန်။ ခုဝ်၊ ဒေါ မုး စုဝ် အာဆာလုဝ်မုဝ်၊ ရွိုန် တူ ငဝ်း တာင်။ 22 အာဆာလုဝ်မုဝ် ဘော မိုဝ်း ရိုဝ် ဆင်ဖုဝ် အီ ကွယ် ဒီ ဘာင် အိုမ် နမ်မုက်ဆာရာ။ ဘော ရိုဝ် ဆင်ဖုဝ် အာဟီရမ် တွိုန် ကွယ် ဒီ တီ။ အူယ် ဆီနမ် အူ ဇေန့်၊ ဂေ ဒိုဝ်း တး ခြိဝ် ဂေ ရွိုန်၊ ဘော ပ့လဲ့ မာဆာင် ဘော မာဝှါ ဘော မာပြ။

23 ခုန်ဒီခမ် အာဆာလုဝ်မုဝ် မိုဝ်း ကိူန် ကြုဝ်ကြာမ် ဂေ အာငျာန် လွှိုမ် ခုန်ဒီခမ် ဒွန် ကာဒင် ဒဲင် ကာဒါယ် နီ။ 24 ဒူအီ ဘော ကာဒါယ် ဘော တး ဒူင် ကွယ် အာဆာလုဝ်မုဝ်၊ ဆီ ထူမ် အာငျာန် ပီ ဒွါ ဇဝ်ဖြာ ဒီ အန်။ 25 ဒွန် ဆီနမ် ဂေ ဒူအီ အီ တး တွိုန် ဘော ဒိုဝ်း တး ခေါဆွင် အီ မုး ဆီလယ့် ခြိဝ်၊ ဆီလယ့် ရွိုန်၊ ခြိုင် တာ၊ ခြိုင် ကာဂုဝ်း ဒါ ဆိုက်၊ န့ကြိုဝ်း အုး ငှုန် ဘော မ့ပြွင့် ဂေ မာလုဝ်။ ဂေ ဒိုဝ်း တး အာပ် ကြုဝ် တီ ဒီ ခုန်ဒီခမ် အာဆာလုဝ်မုဝ်။

26 အန် ဘော ကာဇု အုန် လက်လဝ် ဘော ဒါ ဆိုက် အီ ပဝ့် မ့ပြွင့် ဂေ တွိုန်။ လက်လဝ် အန် တွိုန် မိုဝ်း အူ ဟြဲန့် ဒီ ဖွုန် မာယဝ်း လှာင်။ ဒါ ဆိုက် အန် ကွယ် အူ မှိုန့် ဒီ အာ ဟြဲန့် ဝီ။ အန် ဟဲ့ အုန် ဂေ တီ ခဲင် မိူင် အီ လုဝ် ယွတ် လိုမ်လာ ဂေ လက်လဝ် အန် ဘော ခဲင် မိူင် ယေရူဆာလဲမ်။ 27 ခုန်ဒီခမ် ဘ့လေး အုန် ကိူန် ရွိုန် ခဲင် မိူင် ယေရူဆာလဲမ်၊ တဲး န့ ကော ပီ မာဝ်။ ဘော ဟေ အာရိတ် န့ ကိူန် ကာဆဝ် တဲး န့ ကော ပီ ဟေ ဘ့လေ ဒီပူ အီ လတ့် ခဲင် ဂ့လင်။ 28 မ့ပြွင့် အီ မုး ကြုဝ် အာဆာလုဝ်မုဝ် တွိုန်၊ အန် ဒိုဝ်း တး ခဲင် မိူင် အဲဂိုပ် ဘော မိူင် ကုယ်။ ဂေ အီ စိုဝ်း အီ ယွင့် ကြုဝ် ခုန်ဒီခမ်၊ ဂေ ဒိုဝ်း တး ဒုဝ် ဂေ တီ ဘဲန် ဖိုင် ဘဲန် ဖိုင်။ 29 ဂေ ဒိုဝ်း လက်လဝ် ခဲင် မိူင် အဲဂိုပ်၊ အူ လှာင် အာဒါ ရွိုန် ဇဲတ့် ဒဝ် မာယဝ်း ဘူင့်။ ဘော မ့ပြွင့် အူ ဒုဝ် ဂေ ဒွါ ရွိုန် ဇဲတ့် အူ မာယဝ်း ဒီ ဖန် ဂိုဝ် ဘူင့်။ ဂေ ဘော ဒိုဝ်း ကြုဝ် တီ၊ ဝီ ယွင့် ဒီ ခုန်ဒီခမ် ဒွန် ကာဒင် အီ အိုပ် ဒူအီ ဟေထိတ် ဘော ဂေ ဒူအီ အာရာမ်။