1 ခုန်ဒီခမ် အာဆာလုဝ်မုဝ် တွိုန် ဝီ ရွက့် အီဘိုန့် ကိူန် အီ မုး ဒူအီ အာမျုဝ် ဟဝ်။ ဒဲင် ဂွန် ခုန်ဒီခမ် ဖာရုဝ် တွိုန်၊ အန် ပီ ဝီ ဒိုဝ်း ဒူအီ မုဝ်အာပ်၊ ဒူအီ အမ်မူန်၊ ဒူအီ အေဒူမ်၊ ဒူအီ ဆီဒူန် ဘော ဒူအီ ဟေထိတ်။ ဂေ ကိူန် ဟဲ့ ဘဲန် အီဘိုန့် အန်။ 2 လွင် ဒူအီ အာမျုဝ် ဟဝ်၊ ဇဝ်ဖြာ ဟဲ့ ဒွိုမ် ဒမ် အုန် ဒီ ဂေ ဒူအီ အီဆာရေလ တဝ်း၊ “ကွဲ့ လာယ် ခတ် လာယ် ဒိုဝ်း၊ ယုဝ် ဂေ ဒီ တဲး နဝ်း ဘေ ဘျွင်၊ ဝီ ကြိုပ် ဇဝ် ပီ ကြိုပ် ဂေ။” အာဆာလုဝ်မုဝ် ယီ ရွက့် အီဘိုန့် အာမျုဝ် ဟဝ် တွိုန်၊ တူ ထူမ် ဂြုဝ်း ဇဝ်ဖြာ။ 3 အန် မိုဝ်း အီဘိုန့် အီ မုး ဂွန် ခုန်ဒီခမ် ဘူ မာယဝ်း ဝီ၊ ပီ ဝီ မိုဝ်း ပေါ အူယ် မာယဝ်း ဝီ၊ အီ ကွယ် ရိုမ် ဒူပ် ဇိူင် နာင် အန်။ န့ ဘော မုး အီဘိုန့် အန် ဂေ တီ၊ အီ တဲး နဝ်း အန် ဘ့လိူင်။ 4 အန် ဘော ကြဲ ဒီ ကတ်၊ အီဘိုန့် အန် ဂေ တွိုန် ဂေ ဘော တဲး နဝ်း အန် ဘ့လိူင်၊ ဝီ ကြိုပ် ဇဝ် ဘဲန် ကာဒင် ဘဲန် ကာဒင်။ နဝ်း အန် အာဝ် ဟူ ဝီ ဒူပ် ဇဝ်ဖြာ ပီ အာဒါဝိတ် အီ မုး ဂုန့် အန် ဟဲ့ ဒွိုမ် ဒူပ်။ 5 အန် ဘော ဝီ ဒူပ် နာင် အေဆာထာရိတ် အီ မုး နာင် ကာနမ် ပီ ကြိုပ် ဂေ ဒီ မိူင် ဆီဒူန်။ အန် ကြိုပ် ဘော ဇဝ် မူလွက့် အီ မွှိုမ် ယုဝ် မွှိုမ် ကာအိး ကာဆဝ်၊ အီ မုး ဇဝ် ကာနမ် ပီ ကြိုပ် ဂေ ဒူအီ အမ်မူန် တွိုန်။ 6 ပီ ဘူင် အန် တီ ဟဲ့ ဘဲန် မှာပ် ပီ တူ အိုင် ဇဝ်ဖြာ။ အန် အာဝ် ဟူ ဒူပ် မီ ဇဝ်ဖြာ အူ ကာဒင် ပီ အာဒါဝိတ် အီ မုး ဂုန့် အန်။

7 အန် ဘော ဘူင် ကာစှူင့် ဒဲင် နွန် အီ ကွယ် ခူပ် မိူင် ယေရူဆာလဲမ် နာ လေး ဆီငဲ၊ တဲး အန် ကြိုပ် ဇဝ် ခေမူဆာ အီ မုး ဇဝ် ကာနမ် ပီ ကြိုပ် ဒူအီ မုဝ်အာပ်၊ အီ မွှိုမ် ကာအိး ကာဆဝ်။ အန် ဘူင် ပေါ အူ ကာစှူင့် အာဒါ ဇဝ် မူလွက့် အီ မုး ဇဝ် ကာနမ် ပီ ကြိုပ် ဒူအီ အမ်မူန်၊ အီ မွှိုမ် ကာအိး ကာဆဝ်။ 8 ဘော အီဘိုန့် အန် ဂေ အီ မုး ဒူအီ အာမျုဝ် ဟဝ် တွိုန်၊ အန် ဘူင် တဲး ဂေ လှူ ဆီနမ် အုး ငှုန် အီ ဒုဝ့် ဒီ ငဝ်၊ တဲး ဂေ လှူ ဘော ဒုဝ် ဆတ်ဒါဝါ ဘဲန် မျုဝ် ဘဲန် မျုဝ် ဒီ ဇဝ် ကာနမ် ဂေ တွိုန်။

9-10 ဇဝ်ဖြာ အီ ဟဲ့ ကာပ့လုး ဒီ အာဆာလုဝ်မုဝ် အာဒါ အာ ဇေန့်၊ အန် ဘော ရူ ဒီ အာဆာလုဝ်မုဝ် ကူပ် ဟဲ့ ဘ့လိူင် နဝ်း အန်၊ အာဝ် ဟူ ဒူပ် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ ဇဝ်ဖြာ ဟဲ့ ဟွတ့် ကာလာင် ဒီ အန်၊ ကွဲ့ ကြိုပ် ဇဝ် ကာနမ် ပီ ကြိုပ် ဒူအီ ဟဝ်။ အန် ယီ တူ ထူမ် ဂြုဝ်း ဇဝ်ဖြာ တီ။ 11 ခုဝ်၊ ဇဝ်ဖြာ ဝီ တဝ်း ဒီ အန်၊ “ကူပ် ဟဲ့ ဘူင် မဲ ပါယ် တီ၊ ကူပ် အာဝ် ဟူ ဒူပ် မဲ ပီ ကာဆဲန့် အာယ်၊ ကူပ် တူ ဒူပ် မဲ ဒါရာ ပီ ဒမ် အုန် အုဝ် ဒီ မဲ၊ အုဝ် ဒီ ဒိုဝ်း မာန် မိူင် မဲ နီ၊ ဝီ ဒွါ ဒီ ဒဲစေန့် မဲ အူ ဝီ။ အုဝ် ဒီ ဘူင် ပါယ် တီ အာခ်ု မှာန်၊ တဲး အီ ဟဝ် အိုပ် မိူင် တီ။ 12 မာလဲ၊ ကူပ် လှုဝ်း အုဝ် ဂုန့် မဲ အီ မုး အာဒါဝိတ်၊ စုဝ် မဲ နီ အုဝ် တူ ဘူင်။ စုဝ် ဂွန် မဲ၊ အုဝ် ဒီ ဘူင် ပီ တဝ်း အုဝ် နီ။ 13 အုဝ် ယီ တူ ဒိုဝ်း တူတ့် မာန် မိူင် မဲ တီ။ ကူပ် ကာဝေ အုဝ် အာဒါဝိတ် အီ မုး ဒဲစေန့် အုဝ်၊ ကူပ် ကာဝေ အုဝ် ဘော မိူင် ယေရူဆာလဲမ် အီ မုး မိူင် ပဲ့ ဟဲ့ ရဝ်း အုဝ်၊ အုဝ် ဒီ တဲး ဂွန် မဲ အိုပ် အူ ခြိုဝ်။” ခဲ့ တီ ပီ ကာလာင် ဇဝ်ဖြာ ဒီ အာဆာလုဝ်မုဝ်။

14 ဝါယ် အန် တီ ဇဝ်ဖြာ တဲး န့ မိုဝ်း ရန်ဆူ အာဆာလုဝ်မုဝ်။ န့ မုး အာဟာဒါတ် အီ မုး ခြိုဝ် ဂေ ခုန်ဒီခမ် အီ အိုပ် မိူင် အေဒူမ် တွိုန်။ အန် ဘော တး ကာဂုဝ်း ဒီ အာဆာလုဝ်မုဝ်။ 15 အာတ့် နီ အာဒါဝိတ် ဟဲ့ ဒွိုမ် ကာဂုဝ်း ဒီ ဒူအီ အေဒူမ် တီ။ ဒေါ အန် တီ န့ မုး အာယောဖ အီ အိုပ် ဒါ ဆိုက် အာဒါဝိတ်။ အန် ဟဲ့ တဝ်း ဒီ ဟာဝ် ဒိပ် ဒူအီ ယမ်။ အန် ယီ ဝီ ဟာဝ် ငဝ်း ဂေ အီမာယ် အာမျုဝ် အေဒူမ်၊ တဲး ဂေ ဘောကာဂ့လျီတ် ယမ်။ 16 အာယောဖ ဘော ဒူအီ အီဆာရေလ ဂေ ကွယ် ဒီ မိူင် အေဒူမ် အာဒါ ဒဝ် မာဂျီန်၊ တဲး ဂေ ပွိုန် ဒီ ငဝ်း ယမ် တူတ့် အီမာယ် အီ ကွယ် ခဲင် မိူင် အေဒူမ် တွိုန်။ 17 ဒေါ အန် တီ အာဟာဒါတ် တွိုန် ယီ ဆီ မုး ဂွန် ဒီရွယ်။ အန် ဟဲ့ တဝ် ဟာဝ် ဒူပ် ဂေ ဒဲစေန့် ဂုန့် အန် မင် အီ၊ တဲး ဂေ ဇမ် မိူင် အဲဂိုပ်။ 18 ဂေ ဟဲ့ လေး ဒီ မိူင် မီဒီအာန်၊ ဟာဝ် ဇမ် ဒီ မိူင် ဖာရာန်။ ဘော ဒူအီ မိူင် ဖာရာန် တီ၊ ဂေ ဘော ဝီ ဒဲ့ မင် အီ ဒူပ် ဂေ။ ဟဲ့ ဟွတ့်၊ ဂေ ဘော ဟာဝ် ဇမ် ဒီ မိူင် အဲဂိုပ် အီ မုး ဒူင် ကွယ် ခုန်ဒီခမ် ဖာရုဝ်။ ခုန်ဒီခမ် တွိုန် ဘော ယွတ် ကာင်၊ ဒွါ ဒီ ဂေ။ အန် ဘော ဒွါ ပီ ဒီ ဟူမ် ပီ ဒီ တာ၊ ဘော ကာဒါယ် ဒူင် ဒီ ရန့်။

19 ခုန်ဒီခမ် ဖာရုဝ် တွိုန် ဘော အိုင် အာဟာဒါတ်။ ခုဝ်၊ အန် ဘော ဒိုဝ်း ဝါ အီဘိုန့် အန်၊ ဝီ ဒွါ ဒီ အာဟာဒါတ်၊ တဲး ဂါယ် ခတ်၊ လာယ် ဒိုဝ်း။ အန် မုး ဝါ နာင် ဟောခမ် အီ စိူဝ် ထေဘာနိတ်။ 20 ဝါယ် အန် တီ အာဟာဒါတ် ဂါယ် နာင် ထေဘာနိတ် ဘော မိုဝ်း ဂွန် အီမာယ် အူ ဝီ အီ စိူဝ် အာကေနူပါတ်။ နာင် ထေဘာနိတ် ဘော တဲး အန် ကွယ် ခဲင် ဟုဝ် ခုန်ဒီခမ် ဖာရုဝ်။ အာကေနူပါတ် ဘော ကွယ် ခဲင် ဟုဝ် ခုန်ဒီခမ် ဖာရုဝ်၊ ဘဲန် ဂိုက် ဂွန် ခုန်ဒီခမ် ဂေ တွိုန်။

21 ဝါယ် အန် တီ ဒေါ ကွယ် အာဟာဒါတ် ခဲင် မိူင် အဲဂိုပ်၊ အန် ဘော ယိုဝ် လွင် အာဒါဝိတ် ဘော လွင် ဒါ ဘုဝ် အာယောဖ၊ ဂါယ် ဟဲ့ ဟွတ့် ယမ်။ အန် ဘော ဝီ မှာန့် ဒီ ခုန်ဒီခမ် ဖာရုဝ် တဝ်း၊ “အုဝ် မှာန့်၊ တဲး မဲ ခ့ဝါင် အုဝ် ဝေန့် ခဲင် မိူင် ဒူင် ကွယ် ဘြိမ် အုဝ်။”

22 ခုန်ဒီခမ် ဖာရုဝ် ဝီ တဝ်း ဒီ အန်၊ “ဒေါ ကွယ် မဲ ဒူပ် အုဝ် ဒီ နီ၊ မာဆေ ပီ ဆီ လုဝ် မဲ။း မှဝ် န့ ပါယ် ပီ ဝီ ဆီ ဝေန့် မဲ ဒူင် ကွယ် မိူင် ဘြိမ် မဲ။း” အန် ဝီ တဝ်း၊ “အာဝ် ဟူ လုဝ် မာဆေ။ အုဝ် ယီ မှာန့်၊ တဲး မဲ ခ့ဝါင် တဲး အုဝ် ဝေန့်၊ ခဲ့ တီ။”

23 ပန် တီ ဇဝ်ဖြာ ပီ ဝီ ဒဲ့ ပေါ အူ ဝီ၊ တဲး အန် ဘဲန် ရန်ဆူ အာဆာလုဝ်မုဝ်။ အန် ဝီ ဒဲ့ အီ စိူဝ် အာရေဇူန်၊ အီ မုး ဂွန် အာလေဒ။ အန် ဟဲ့ ဒွိုမ် တဝ် ဒါ ကာညာ အန် အီ မုး ခုန်ဒီခမ် အာဟာဒေစာ အီ အိုပ် မိူင် စောဖ။ 24 အာရေဇူန် တီ အန် ဒွိုမ် ဒဲ့ ကာဇု ဒူအီ တဲး ဂေ ဒူပ် အန်။ အန် ဘဲန် ဒါ အီ အိုပ် ဖိုင် ဂေ ဒါ ဇူန် တီ။ ဒေါ ကာဂုဝ်း အာဒါဝိတ် ဒီ ဒူအီ စောဖ တွိုန် ဘော အန် ဘော အီ ဒူပ် အန်၊ ဂေ ဟာဝ် ဒီ မိူင် ဒါမာခူ ဘော ကွယ် ဒီ တီ၊ ဘဲန် ဒါ တာင် အိုပ် မိူင် ဒါမာခူ တီ။ 25 ဒေါ ကွယ် အာဆာလုဝ်မုဝ် အာရေဇူန် တီ ဟဲ့ ဘဲန် ရန်ဆူ ဒူအီ အီဆာရေလ၊ တဲး ဘော အန် ဘော အာဟာဒါတ် ဒွါ ဒုက် ဒီ အာဆာလုဝ်မုဝ် ဒေါ မုး စုဝ် အန်။ အာရေဇူန် ယီ အိုပ် မိူင် တာင် အီ မုး မိူင် အာရာမ်။

26 န့ မုး အာယေရုဝ်ဘုဝ် အီ မုး ဂွန် အာနေဘတ် အီ မုး ဒူအီ အာမျုဝ် အာအေဖာရိမ် အီ ကွယ် ဒီ မိူင် စေရတ။ အန် မုး ဒဲစေန့် အာဆာလုဝ်မုဝ်။ မာ အန် မုး ယာ ဆီပြး အီ စိူဝ် နာင် ဇေရေဒါ။ ဘော အန် ဝီ ရူ ဒီ ခုန်ဒီခမ်။

27 လွင် ရူ အန် ဒီ ခုန်ဒီခမ် န့ ပါယ် နီ။ ဒေါ ဘူင် အာဆာလုဝ်မုဝ် ဒီ ခူပ် ဒူင် ကွယ် အန် တွိုန်၊ အန် ဘော မ့ပြာယ် ဒူင် ဟဲ့ လှုး ဒီ ရဲင် မိူင် အာဒါဝိတ်၊ အီ မုး ဂုန့် အန်။ 28 အာယေရုဝ်ဘုဝ် ဘဲန် ဒါ ဆိုက် အီ မိုဝ်း ပ့လူမ် တာင်။ အန် ယီ ဆီ နှိုမ်။ အာဆာလုဝ်မုဝ် ဘော ယွတ် ဂါန် ပီ ဘူင် အန်၊ အန် ဘော ဝီ တဲး အန် ဘဲန် ဒါ အီ အိုပ် ဂေ ဒူအီ အီ ဘူင် ဂါန် အန်၊ အီ မုး အာမျုဝ် အာယုဝ်။

29 ဒေါ အန် တီ အူ ဇေန့် အာယေရုဝ်ဘုဝ် တွိုန် ဘော လေး ခဲင် မိူင် ယေရူဆာလဲမ်။ ဒေါ ဟာဝ် အန် ဒူပ် န့တေန့်၊ အန် ကာတုန့် အာဟီယာ၊ အီ မုး ဒူအီ ဘျာန် ဂြုဝ်း ဇဝ်ဖြာ၊ အီ ကွယ် ဒီ မိူင် ဆီလုဝ်။ အာဟီယာ ဟဲ့ စှိုပ် ဆီတုဝ် ကာမာယ်။ ဒေါ လာယ် ကာတုန့် ဂါယ် တီ၊ အာဝ် မိုဝ်း အီ ဟဝ် ယိုဝ်။ 30 အာဟီယာ ဘော ဝီ ဒိုဝ်း ဆီတုဝ် ပီ တာ အန် တွိုန်၊ ဝီ ကာယာတ့်၊ တဲး န့ ဘဲန် ဂိုဝ် ဒီ အာ ပွတ်။ 31 ဟဲ့ ဟွတ့်၊ အန် ဝီ တဝ်း ဒီ အာယေရုဝ်ဘုဝ်၊ “ဒိုဝ်း ဂိုဝ် ပွတ် နီ။ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ တဝ်း၊ ‘အုဝ် ဒီ ကာယဝ်း ဒူအီ ပီ အိုပ် အာဆာလုဝ်မုဝ်၊ တဲး မဲ ဝီ အိုပ် အာဒါ ဂိုဝ် ခြိုဝ်။ 32 မာလဲ၊ ကူပ် လှုဝ်း အုဝ် အာဒါဝိတ် ဘော မိူင် ယေရူဆာလဲမ် ပဲ့ ဟဲ့ ရဝ်း အုဝ် ခဲင် ဒူအီ အီဆာရေလ ဘောကာဂ့လျီတ်၊ အာဆာလုဝ်မုဝ် ဒီ ပွိုန် ဒီ အိုပ် အူ ခြိုဝ်။ 33 အုဝ် ဒီ ဒိုဝ်း လေး ခြိုဝ် ဂိုဝ် မျုဝ် တီ။ ခုဝ်၊ ဂေ ဟဲ့ ဝဲန် အုဝ်၊ ဝီ ဘိုင် နာင် ကာနမ် အေဆာထာရိတ် ဒီ မိူင် ဆီဒူန်၊ ဘော ဇဝ် ခေမုက် ပီ ကြိုပ် ဂေ ဒူအီ မုဝ်အာပ်၊ ဘော ဇဝ် မူလွက့် ပီ ကြိုပ် ဂေ ဒူအီ အမ်မူန်။ ဂေ အာဝ် ဟူ ဝီ ဒူပ် အုဝ်၊ အာဝ် ဟူ ဘူင် နာ ဘွတ် နာ မွှိုမ်၊ အာဝ် ဟူ ဒူပ် ဒါရာ အုဝ် ပီ ဒွိုမ် ဒူပ် အာဒါဝိတ် အီ မုး ဂုန့် အာဆာလုဝ်မုဝ်။

34 မာလဲ၊ အုဝ် တူ ဒိုဝ်း လေး ဒူအီ ဘောကာဂ့လျီတ် ဒီ အာဆာလုဝ်မုဝ်။ အုဝ် ဒီ တဲး အန် ဘဲန် ခုန်ဒီခမ် ဘော စုဝ် အန်။ အုဝ် ဘူင် ပါယ် တီ ကူပ် အာဒါဝိတ် အီ ပီ ရဝ်း အုဝ်၊ အီ မုး ဒဲစေန့် အုဝ်၊ အီ ဒူပ် ဆီချာ ဒါရာ အုဝ်။ 35 ပန် ဒီ မုး စုဝ် ဂွန် အန်၊ အုဝ် ဒီ ဒိုဝ်း မာန် မိူင်၊ ဝီ ဒွါ ဒူအီ ဂိုဝ် ခြိုဝ် ဒီ မဲ။ 36 အုဝ် ဒီ တဲး အာဆာလုဝ်မုဝ် အိုပ် အူ ခြိုဝ် တီ၊ တဲး လှုက်လှာန် အာဒါဝိတ် အိုပ် မိူင် ယေရူဆာလဲမ် ဆေဆေ။ န့ မုး မိူင် ပဲ့ ဟဲ့ ရဝ်း အုဝ်၊ ဒူင် ဒီ ကွယ် အုဝ်။ ပါယ် တီ အုဝ် ဒီ ဝီ လှုဝ်း အာဒါဝိတ် ဆေဆေ၊ တဲး န့ ပီ ဘ့လာင် ငဝ် ရာင် ပီ ဒီ ပွိုန် ယိုဝ် အုဝ် ဆေဆေ။ 37 အုဝ် ယီ ဟဲ့ ရဝ်း မဲ၊ တဲး မဲ ဘဲန် အီ အိုပ် ဒူအီ အီဆာရေလ၊ တဲး မဲ ဘူင် ခဲ့ လဝ့် နဝ်း မဲ၊ တဲး မဲ ဘဲန် ခုန်ဒီခမ် ဂေ။ 38 ဆေ မဲ ထူမ် ဂြုဝ်း ပီ ကာလာင် အုဝ် ဒီ မဲ၊ ဘူင် ဒူပ် ပီ တဝ်း အုဝ် ဒီ မဲ ဒွန် မျုဝ်၊ ဆေ မဲ ဘော ဘူင် နာ ဘွတ် နာ မွှိုမ် ပီ အိုင် အုဝ် ဘော ဒူပ် ဒါရာ အုဝ် ပီ အာဒါဝိတ် တွိုန် ဟဲ့ ဒူပ် အုဝ်၊ အုဝ် ဒီ ကွယ် ရိုမ် ဒူပ် မဲ။ အုဝ် ဒီ ဘော တဲး လှုက်လှာန် မဲ အိုပ် မိူင် တီ ဆေဆေ၊ တဲး န့ ပီ ပဲ့ ဟဲ့ ဘူင် အုဝ် ဒီ အာဒါဝိတ် တွိုန်။ အုဝ် ဒီ အာပ် တူတ့် မိူင် ဒူအီ အီဆာရေလ ဒီ မဲ။ 39 အုဝ် ဒီ ဘူင်၊ တဲး ဒူအီ အာဒါဝိတ် ဘဲန် နဝ်း လိုဝ်။ အုဝ် ယီ တူ တဲး န့ ဘဲန် ဆေဆေ။’” ခဲ့ တီ ဇဝ်ဖြာ ဟဲ့ စ်ု အာဟီယာ ကာလာင် ဒီ အာယေရုဝ်ဘုဝ် တွိုန်။

40 ကူပ် ပါယ် တီ အာဆာလုဝ်မုဝ် ဝီ ဆီ ငဝ်း အာယေရုဝ်ဘုဝ်။ အာယေရုဝ်ဘုဝ် ဘော တဝ် ဟာဝ် မိူင် အဲဂိုပ်၊ ဒူင် ကွယ် ခုန်ဒီခမ် အာဆီဆက်။ အန် ဘော ကွယ် ခဲင် မိူင် အဲဂိုပ် တီ၊ တဲး အာဆာလုဝ်မုဝ် ကော ယမ်။

41 လွင် ပီ ပါယ် ဒေါ မုး စုဝ် အာဆာလုဝ်မုဝ်၊ အီ ညှမ် ဒွိုမ် ကာလာင် ဒွန် မျုဝ်၊ ခဲ့ ပီ ဘူင် အန်၊ ဘော လွင် အာငျာန် အန်၊ ဟဲ့ ဒဲမ် အုန် တူတ့် ခဲင် ဘပ် အာဆာလုဝ်မုဝ် တွိုန်။ 42 အာဆာလုဝ်မုဝ် ကွယ် ခဲင် မိူင် ယေရူဆာလဲမ်၊ အိုပ် ဘိုင် မိူင် ဒူအီ အီဆာရေလ၊ န့ ကော နုဝ့် ဖွုန် ဂိုဝ် ဆီနမ်။ 43 အန် ဘော ယမ် ဒူပ် ဒါ ဒါ အန် ဂေ တွိုန်။ ဂေ ဘော အုန် အန် ခဲင် ဘာရေဝ်။ ဂေ ဘော ဒိပ် အန် ခဲင် မိူင် အီ မုး မိူင် ဂုန့် အန် အာဒါဝိတ်။ ဂွန် အန် အီ စိူဝ် အာရေဘူမ် ဘော ဝီ ပ့လု အန်။