1 အာရေဘူမ် တွိုန် ဘော ဟာဝ် ဒီ မိူင် ဆေခေမ်။ ဘော ဂေ ဒူအီ အီဆာရေလ ဟဲ့ ဟာဝ် ဒီ မိူင် ဆေခေမ်၊ တဲး ဂေ ပွိုန် ဒီ စုဝ့် အန် ဘဲန် ခုန်ဒီခမ်။ 2 ဒေါ အန် တီ အာယေရုဝ်ဘုဝ်၊ အီ မုး ဂွန် အာနေဘတ် တွိုန် ယီ ဆီ ကွယ် ခဲင် မိူင် အဲဂိုပ် ဆိန့် တဝ် အန် ဒီ အာဆာလုဝ်မုဝ်။ အန် ဘော ဝီ နပ် လွင် အာရေဘူမ်၊ အန် ဘော ဝီ ဝေန့်။ 3 ဂေ ဟဲ့ ဒဲ့ တး အန်။ ပန် တီ အာယေရုဝ်ဘုဝ် ဘော ဒူအီ အီဆာရေလ ဘော ကာဖြူမ် ဒီ တး ဒူင် ကွယ် အာရေဘူမ်၊ ဝီ တဝ်း ဒီ အန်၊ 4 “ဂုန့် မဲ ဟဲ့ တဲး န့ ညှာပ် ကာဆဝ် ဒီ ယေ။ ယေ ဝီ မှာန့် ဒီ မဲ၊ ကွဲ့ တဲး န့ ညှာပ် ခဲ့ တီ ဒီ ယေ။ ဆေ မဲ ဘူင် ပါယ် တီ၊ ယေ ဒီ ဘဲန် ဒဲစေန့် မဲ၊ တဲး မဲ အိုပ် ယေ။” 5 အန် ဝီ တဝ်း ဒီ ဂေ၊ “တဲး ဘေ ဝီ ဝေန့်။ ပေါ အူယ် ဆီငဲ၊ ဘေ ဝီ တး။” ဒူအီ ဂေ တွိုန် ဘော ဝီ ဝေန့်။

6 ပန် တီ ခုန်ဒီခမ် အာရေဘူမ် ဘော ကာမွုန် ဒီ ဂေ ဒူအီ ကတ် အီ ဒွိုမ် ကွယ် ရိုမ် ဒူပ် အာဆာလုဝ်မုဝ် အာတ့် ယမ် အန်။ အန် ဒီမွှတ် ဂေ တဝ်း၊ “ဘေ ဒီ တဲး အာကျာမ် အာငျာန် မာဆေ ဒီ အုဝ်၊ တဲး အုဝ် ပွိုန် ဒီ ကာလာင် ဒီ ဒူအီ အီဆာရေလ တွိုန်။း” 7 ဂေ ဝီ တဝ်း ဒီ အန်၊ “ဆေ မဲ ခမ် ဒီ ဘဲန် ဒါ အီ စွယ် ဂေ အာတိုဝ် နီ၊ ဆေ မဲ ဖြူမ် ပီ မှာန့် ဂေ၊ ကာလာင် ဂြုဝ်း စှိတ် ဂြုဝ်း မွှိုမ် ဒီ ဂေ၊ ဂေ ဒီ ဝီ ဘဲန် ဒဲစေန့် မဲ ဆေဆေ။”

8 အန် ယီ တူ ဒူပ် အာကျာမ် အာငျာန် ပီ ကာလာင် ဒူအီ ကတ် ဂေ တွိုန်။ အန် ဝီ ဆင်ချာင် ကာမွုန် ဒီ ဂေ ဒူအီ နှိုမ်၊ အီ မုး ဂိုက် အန်၊ အီ ကွယ် ရိုမ် ဒူပ် အန်၊ စွယ် အန်။ 9 အန် ဝီ တဝ်း၊ “ဘေ ဒီ တဲး အာကျာမ် အာငျာန် ပါယ် မှဝ်၊ တဲး အုဝ် ပွိုန် ဒီ ကာလာင် ဒီ ဂေ ဒူအီ အီဆာရေလ တွိုန်။း ဂေ ဟဲ့ တဝ်း ဒီ အုဝ်၊ ‘ကွဲ့ တဲး န့ ညှာပ် ခဲ့ ပီ စ်ု ဂုန့် မဲ ယေ ဘူင်။’”

10 ဂိုက် အန် ဝီ တဝ်း ဒီ အန်၊ “မဲ ဝီ ကာလာင် ဒီ ဂေ တဝ်း၊ ‘ဂုန့် အုဝ် ဟဲ့ တဲး ဂါန် ဘေ စန် ကာဆဝ်။ ဘေ ဝီ မှာန့်၊ တဲး အန် န့စိုဝ်။ အုဝ် ယီ တဝ်း ဒီ ဘေ၊ န့ ပီ ကာနူ ဝဲတ် အုဝ် ဆီ တာင် လွှိုမ် ညွယ် ဂုန့် အုဝ်။ 11 ဂုန့် အုဝ် ဟဲ့ စ်ု ကာဆဝ် ဘေ။ အုဝ် ဒီ ဝီ စ်ု ဘေ တဲး န့ ကာဆဝ် လွှိုမ် တီ။ ဂုန့် အုဝ် ဟဲ့ တာ မ့ဖျီ့၊ ဆီဘျြီ့ ဘေ။ အုဝ် ယီ ဒီ ဝီ တာ မာ မဲင်ငဝ်၊ တဲး ဂေ ဒွက် ဘေ ဆေ ဘေ ဟီ ကြာန်။’”

12 ဟဲ့ ဟွတ့်၊ ဘော ပွိုန် အူယ် ဆီငဲ၊ အာယေရုဝ်ဘုဝ် ဘော ဂေ ဒူအီ အီဆာရေလ တွိုန် ဘော ဝီ တး ဒူင် ကွယ် ခုန်ဒီခမ် အာရေဘူမ် တွိုန်၊ ဒူပ် ခဲ့ ပီ စ်ု အန်။ 13 ခုန်ဒီခမ် ဘော ကာလာင် ဂြုဝ်း ကာဆဝ် ဒီ ဂေ၊ ဝဲန် အာကျာမ် အာငျာန် ပီ ကာလာင် ဒူအီ ကတ် ဂေ တွိုန်။ 14 အန် ဝီ ဒူပ် အာကျာမ် အာငျာန် ပီ ကာလာင် ဒူအီ နှိုမ် ဂေ တွိုန်။ အန် တဝ်း၊ “ဂုန့် အုဝ် ဟဲ့ တဲး န့ ညှာပ် ကာဆဝ် ဒီ ဘေ။ အုဝ် ယီ ဝီ တဲး န့ ညှာပ် လွှိုမ် တီ။ ဂုန့် အုဝ် တာ မ့ဖျီ့ ဆီဘျြီ့ ဘေ၊ အုဝ် ယီ ဒီ ဝီ တာ မာ မဲင်ငဝ် တဲး ဂေ ဒွက် ဘေ၊ ဆေ ဘေ ဟီ ကြာန်။”

15 ခုန်ဒီခမ် တူ ထူမ် ဂြုဝ်း ဒါ တာင် ဂေ တွိုန်။ ခုဝ်၊ ဇဝ်ဖြာ ဒီ တဲး န့ ဘဲန် ပီ ဒွိုမ် ကာလာင် အန် ဒီ အာဟီယာ အီ ကွယ် မိူင် ဆီလုဝ်၊ တဲး အန် ဝီ ကာလာင် ဒီ အာယေရုဝ်ဘုဝ် အီ မုး ဂွန် အာနေဘတ်။

16 ဒူအီ အီဆာရေလ ဂေ တွိုန် ဂေ ဘော နပ်၊ ခုန်ဒီခမ် တူ ထူမ် တူ ဒူပ် ဂြုဝ်း ဂေ။ ဂေ ဝီ ကာလာင် ဒီ ခုန်ဒီခမ် တဝ်း၊ “ယေ နီ၊ ယေ တူ ဘာ့ ဒီ အာဒါဝိတ်။ ယေ တူ မုး ခြိုဝ် ဂွန် အာယေဆေ။ အိုယ် ဘေ ဒူအီ အီဆာရေလ၊ ဟာဝ် အေ၊ ဝီ ဝေန့် ဒူင် ကွယ် ထိုပ် ဘိက် အေ။ အိုယ် ဘေ ဒူအီ အာဒါဝိတ်၊ တဲး ဘေ ယွတ် လိုမ်လာ အာမျုဝ် ဘေ။” ဂေ ဟဲ့ ဟွတ့် တဝ်း ပါယ် တီ ဂေ ဒူအီ အီဆာရေလ ဘော ဝေန့် ဒူင် ကွယ် ထိုပ် ဘိက် ဂေ။ 17 န့ ယီ မုး ဒူအီ အီဆာရေလ အီ ကွယ် ခဲင် မိူင် ယူဒါ တွိုန်၊ အာရေဘူမ် ဆီ အိုပ် ဂေ။

18 ဝါယ် တီ ခုန်ဒီခမ် အာရေဘူမ် ဘော စ်ု အာတောရမ် အီ မုး ဒါ တာင် ဂဲပ် ရွိုန် စိုင် တဲး အန် ဟာဝ် ဒူင် ကွယ် ဂေ ဒူအီ အီဆာရေလ။ ဂေ ယီ ကာဖြူမ် ဒီ ဒိုဝ်း မာဝ် ဝိုန့်၊ တဲး အန် ကော ယမ်။ ခုန်ဒီခမ် အာရေဘူမ် ဘော ပီခြန် ဒီ ပဝ့် လက်လဝ် အန်၊ ဝီ တဝ် ဝေန့် ခဲင် မိူင် ယေရူဆာလဲမ်။ 19 ပါယ် တီ ဒူအီ အီဆာရေလ တူ ကာလဝ့် ဒီ အာမျုဝ် အာဒါဝိတ် ကော ဇမ် အာတိုဝ် နီ။

20 ဂေ ဒူအီ အီဆာရေလ ဘော ယိုဝ် အာယေရုဝ်ဘုဝ် ဟဲ့ ဝီ တး၊ ဂေ ဘော ကာဖြူမ် ဒီ ဟာဝ် ဘာင် အန်၊ တဲး အန် တး ဒူင် ကွယ် ဒူအီ ကိူန် ဂေ တွိုန်။ ဂေ ဘော တဲး အန် ဘဲန် ခုန်ဒီခမ် အီ အိုပ် ဒူအီ အီဆာရေလ။ န့ ယီ မိုဝ်း မီ ဒူအီ အာယူဒါ အီ ဒူပ် အာဒါဝိတ်။

21 အာရေဘူမ် တွိုန် ဟဲ့ ဟွတ့် ဝီ တး ဇမ် ခဲင် မိူင် ယေရူဆာလဲမ်၊ ဂေ ဝီ ရဝ်း အီ ဒီ ဘဲန် ဒါ ဆိုက် ခဲင် ခြိုဝ် ယူဒါ ဂါယ် ခြိုဝ် အာဘေန်ယာမ် အာဒါ အူ ဆဲန့် ဒီ ဒါ မှိုန့် ဝီ၊ တဲး ဂေ ဟာဝ် ကာဂုဝ်း ဒီ ဒူအီ အီဆာရေလ၊ တဲး ဂေ ဝီ ပွိုန် ဝိဝ် မာန် မိူင်၊ တဲး အာရေဘူမ် အီ မုး ဂွန် အာဆာလုဝ်မုဝ် တွိုန်၊ ဝီ ပွိုန် ဒီ အိုပ်။

22 ဇဝ်ဖြာ ဝီ ကာလာင် ဂြုဝ်း ဒီ ဒူအီ ပီ တိုယ် အန် အီ စိူဝ် အာဆေမာယာ။ အန် တဝ်း၊ 23 “တဲး မဲ ကာလာင် ဒီ အာရေဘူမ် အီ မုး ဂွန် အာဆာလုဝ်မုဝ်၊ အီ မုး ခုန်ဒီခမ် ဒူအီ အာယူဒါ ဂါယ် ဒူအီ အာဘေန်ယာမ် အီ ဆီ ဂိတ် တွိုန်။ 24 တဲး မဲ တဝ်း၊ ‘ဇဝ်ဖြာ ဟဲ့ တဝ်း၊ အာဝ် လုဝ် ဟာဝ် ကာဂုဝ်း ဒီ ဒူအီ အီဆာရေလ အီ မုး ဘီနွင် ဘေ တီ။ တဲး ဘေ ဝီ ဝေန့် ဒီ ကာင် ဘေ ဒွန် အီ။ န့ မုး အုဝ် အီ ဟဲ့ ဘူင် ပါယ် တီ။’” ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ ဂေ ဘော ထူမ်၊ အာဝ် ဟူ ဘဲန် ဟာဝ် ကာဂုဝ်း။ ဂေ ဘော ဝီ ဝေန့် ဒီ ကာင် ဂေ။

25 ဝါယ် အန် တီ အာယေရုဝ်ဘုဝ် ဘော ဘူင် တဲး မိူင် ဆေခေမ် အီ ကွယ် ကာတဲ နွန် အာအေဖာရိမ် မိုဝ်း ရဲင်။ အန် ဘော ဟာဝ် ကွယ် ဒီ တီ။ ဝါယ် အန် တီ အန် ဘော ဝီ ဟာဝ် ဆမ် ဘဲန် မျုဝ် ဘဲန် မျုဝ် ခဲင် မိူင် ပေနူအေန်။

26 အန် ဘော ကာဖာ ခဲင် နဝ်း အန် တဝ်း၊ “အုဝ် ယုဝ်၊ ဒူအီ ခဲင် မာန် မိူင် အုဝ် နီ၊ ဂေ ဆီ ဝီ ဟာဝ် ဘ့လာက် အာဒါဝိတ်။ 27 ဆေ ဒူအီ ခဲင် ရဝ် ခဲင် မိူင် အုဝ် နီ ဝီ ဟာဝ် လှူ ပီ လှူ ဂေ ဒီ ဟုဝ် ဇဝ်ဖြာ ခဲင် မိူင် ယေရူဆာလဲမ်၊ ယုဝ် ဂေ ဒီ ဝီ ကာပ့လု နဝ်း ဝီ ဟာဝ် ဒူပ် ဒါ ကာညာ ဂေ အီ စိူဝ် အာရေဘူမ် အီ မုး ခုန်ဒီခမ် ဒူအီ အာယူဒါ တွိုန်။ ဂေ ဒီ ဘော ငဝ်း ယမ် အုဝ်၊ ဝီ ဟာဝ် ကွယ် ဒူပ် အာရေဘူမ် တီ။”

28 ပန် တီ ခုန်ဒီခမ် ဘော ဆင်ချာင် ဒီ အီ။ ဟဲ့ ဟွတ့်၊ အန် ဘော ဘူင် ရာင် မာမက် ခြိဝ် အာ ဒုဝ်။ အန် ဘော ကာလာင် ဒီ ဒူအီ တဝ်း၊ “အိုယ် ဘေ ဒူအီ အီဆာရေလ၊ ဆေ ဘေ လုဝ် ဟာဝ် ခဲင် မိူင် ယေရူဆာလဲမ်၊ န့ ဘဲန် ညှာပ် ဒီ ဘေ။ တဲး ဘေ ယွတ် အာရိုပ် ရာင် နီ။ န့ မုး ဇဝ်ဖြာ အီ ဟဲ့ ယဲတ့် လေး ဘေ ခဲင် မိူင် အဲဂိုပ် တွိုန်။” 29 အန် ဘော ဒိုဝ်း ရာင် မာမက် အာဒါ အူ ဒုဝ် ဟာဝ် အုန် ဒီ မိူင် ဘေဒါအေန်။ ပေါ အူ ဒုဝ် အန် ဟာဝ် အုန် ဒီ မိူင် ဒါန်။ 30 ပီ ဘူင် အန် တီ၊ န့ ယီ ဘဲန် မှာပ်။ အန် တဲး ဒူအီ ဒွန် ရဝ် ဒွန် မိူင် ဟာဝ် ကြိုပ် အာရိုပ် မာမက် တီ၊ တဲး ဂေ ဟာဝ် ကော ဇမ် ဘော မိူင် ဒါန်။

31 အန် ဘော ဘူင် ဟုဝ် ဒီ ဒူင် စာ၊ တဲး အီ ပွိုန် ဒီ ကြိုပ် ဇဝ်ဖြာ။ အန် ဘော ဒဲ့ ဒူအီ ဟဝ် အီ တူ မုး ဒူအီ ခြိုဝ် အာလေဝီ၊ တဲး ဂေ ဘဲန် ဒူအီ လှူ ဒီ ဇဝ်ဖြာ။ 32 အန် ဘော ဘူင် ဘ့လွယ် ဒေါ မုး မာဂျီန် န့ဒါ၊ ဆီငဲ ဂိုဝ် ဒီ မ့ဖန်။ န့ ပီ ဘ့လွယ် ပီ ဒွိုမ် ဘူင် ဂေ ခဲင် မိူင် ယူဒါ တွိုန်။ အန် ဘော လှူ ဒုဝ် ဆတ်ဒါဝါ ဒဲင် ကာစှူင့် လှူ၊ တဲး န့ ဘဲန် ပီ လှူ ဒီ အာရိုပ် မာမက် ပီ အုန် အန် ခဲင် မိူင် ဘေဒါအေန် တွိုန်။ ဘော ခဲင် မိူင် ဘေဒါအေန် တွိုန် ဘော ဒီ ဒူင် စာ ဘဲန် ပ့လုဝ့် ဘဲန် ပ့လုဝ့် အန် ဘ့လေး အုန် ဒူအီ လှူ ဒီ ဇဝ်ဖြာ။ 33 အန် ဘူင် ဒီ လှူ ဒီ ကာစှူင့် ပီ ဘူင် အန် ခဲင် မိူင် ဘေဒါအေန် ဒေါ မုး မာဂျီန် န့ဒါ၊ ဆီငဲ ဂိုဝ် ဒီ မ့ဖန် တွိုန်။ အန် ဒူပ် နဝ်း ဒုဝ် ဘြိမ် အန်၊ စ်ု ဂေ ဒူအီ အီဆာရေလ လှူ ဒီ ကာစှူင့် လှူ တီ၊ တဲး ဂေ ဒုဝ့် ဘော ဆီနမ် အုး ငှုန် ဒီ တီ။