1 ဒေါ ဆီ ကွယ် အာယေရုဝ်ဘုဝ် ခူပ် ကာစှူင့် လှူ၊ ဒေါ တဝ်း အန် ဒီ ဒုဝ့် ပီ ဒီ လှူ၊ န့ မိုဝ်း ဒူအီ ပီ တိုယ် ဇဝ်ဖြာ အူ ဝီ။ အန် တး မိူင် ယူဒါ၊ တး ဇမ် ဒီ မိူင် ဘေဒါအေန်။ 2 ဒူအီ ဝီ တီ ကာလာင် လွင် ကာစှူင့် လှူ၊ ကာလာင် ဂြုဝ်း ပီ ကာလာင် ဇဝ်ဖြာ ဒီ အန်။ အန် တဝ်း၊ “အိုယ် ကာစှူင့်၊ အိုယ် ကာစှူင့်၊ ဇဝ်ဖြာ ဟဲ့ တဝ်း၊ ‘တဲး ဘေ ဘ်ု ဒီ ယွတ်၊ န့ ဒီ မိုဝ်း ဂွန် အူ ဝီ၊ အန် ဒီ ဂွိုတ် တး ခဲင် လှုက်လှာန် အာဒါဝိတ်။ ဂေ ဒီ တဲး အန် စိူဝ် အာယုဝ်ဆီယာ။ ဝီ တီ၊ အန် ဒီ ဝီ ဒိုဝ်း ဂေ အီ လှူ ဒီ ကာစှူင့် နီ၊ ဝီ ဒုဝ့် ဂေ ဒဲင် ကာစှူင့် နီ။ ဂေ ဒီ ဘော ဒိုဝ်း ကာအာင် ဒူအီ ယမ်၊ ဝီ ဒုဝ့် နာ ဒဲင်။’” 3 ဆီငဲ အန် တီ အန် ဘော ကာလာင် ဒီ ဂေ လွင် လက်ဆာနာ ပီ ဒီ ဒွါ ဇဝ်ဖြာ၊ တဲး ဂေ နပ်၊ ဂြုဝ်း အန် ဟဲ့ မှာန်။ အန် တဝ်း၊ “ဇဝ်ဖြာ ဟဲ့ တဝ်း၊ ‘ကာစှူင့် လှူ နီ အန် ဒီ ကာလာတ့် လိုဝ်။ ကာဝှါင် အီ ကွယ် နာ ဒဲင်၊ အန် မိူဝ် ဒီ စုဝ်း။’”

4 အာယေရုဝ်ဘုဝ် ဘော ယိုဝ် ဂြုဝ်း ပီ ကာလာင် ဒူအီ ပီ တိုယ် ဇဝ်ဖြာ လွင် ကာစှူင့် အီ ကွယ် ဒီ မိူင် ဘေဒါအေန် တွိုန်၊ အန် ဘော ဆူင့် ဒဲ အန် ကာရူယ် ကာစှူင့် တွိုန် တဝ်း၊ “မှေတ့် အန်။” ဟဲ့ ဟွတ့်၊ ဒဲ အန် ဘော ဟျီ့ အူ ဇေန့်။ အာဝ် ဟူ ပွိုန် ဝီ ဒိုဝ်း ဝိဝ်။ 5 ကာစှူင့် တွိုန် ဘော ကာလာတ့် လိုဝ်။ ကာဝှါင် အီ ကွယ် ဒဲင် ကာစှူင့် ဘော စုဝ်း အူ ဇေန့်။ ပါယ် တီ န့ ဘော ဘဲန် ခဲ့ ပီ တဝ်း ဒူအီ ပီ တိုယ် ဇဝ်ဖြာ၊ ပီ စ်ု ဇဝ်ဖြာ အန် ကာလာင်။

6 ခုန်ဒီခမ် အာယေရုဝ်ဘုဝ် ဝီ ကာလာင် ဒီ ဒူအီ ပီ တိုယ် ဇဝ်ဖြာ တွိုန် တဝ်း၊ “မှာန့် မဲ၊ ဆာခိုဝ် ဒါင် အုဝ် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ တဲး ဒဲ အုဝ် ဝီ ကဲန်။” ဒူအီ ပီ တိုယ် ဇဝ်ဖြာ တွိုန်၊ အန် ဘော ဆာခိုဝ် မှာန့် ဒီ ဇဝ်ဖြာ။ ဟဲ့ ဟွတ့်၊ ဒဲ ခုန်ဒီခမ် ဝီ ကဲန် ပီ ဘြိမ်။

7 ပန် တီ ခုန်ဒီခမ် ဝီ တဝ်း ဒီ ဒူအီ ပီ တိုယ် ဇဝ်ဖြာ တွိုန်၊ “ဟာဝ် မဲ ဝေန့်၊ ဟူမ် ဘူမ် ခဲင် ကာင် အုဝ်။ အုဝ် ဆီ ဒွါ ဘော လက်ဆွင် ဒီ မဲ။”

8 ဒူအီ ပီ တိုယ် ဇဝ်ဖြာ တွိုန် ယီ တဝ်း၊ “ဆေ မဲ ပီ ဘော ဒွါ ကြုဝ် မဲ အူ ကာတဲ ဒီ အုဝ် မိူဝ်၊ အုဝ် တူ ပွိုန် ဝေန့် ဒူပ် မဲ။ ခါမုန် ဂေ အိုမ် မိူဝ်၊ အုဝ် တူ ပွိုန် ဟူမ်၊ တူ ပွိုန် ဒျီင် ဒီ နီ။ 9 ဇဝ်ဖြာ ဟဲ့ တဝ်း ဒီ အုဝ်၊ ‘အာဝ် လုဝ် ဟူမ် ခါမုန်။ အာဝ် လုဝ် ဒျီင် အိုမ်။ အာဝ် လုဝ် ဝီ ဝေန့် ဒူပ် န့တေန့် ဘြိမ် မဲ။’” 10 အန် ဟဲ့ ဟွတ့် ကာလာင် ဂြုဝ်း တီ၊ အန် ဘော ဝီ ဝေန့် ပေါ အူ န့တေန့်။ အန် အာဝ် ဟူ ဒူပ် န့တေန့် အီ တး မိူင် ဘေဒါအေန် တွိုန်။

11 ပန် တီ န့ ဝီ မိုဝ်း ဒူအီ ဘျာန် ဂြုဝ်း ဇဝ်ဖြာ အူ ဝီ၊ အီ ဟဲ့ ရာမ် ကတ်။ အန် ကွယ် ခဲင် မိူင် ဘေဒါအေန် တွိုန်။ ဂွန် အီမာယ် အန် ဂေ တး ကာလာင် ဒီ အန် လွင် ပဲ့ ဟဲ့ ဘူင် ဒူအီ ပီ တိုယ် ဇဝ်ဖြာ တွိုန် ဘော ပီ တဝ်း အန် ဒီ ခုန်ဒီခမ်။ 12 ဂုန့် ဂေ ဒီမွှတ် ဂေ တဝ်း၊ “အန် ဝဝ့် န့တေန့် မှဝ်။း” ကူပ် ယိုဝ် ဂေ န့တေန့် ဝဝ့် အန်၊ ဂေ ဝီ ခဲ ဒီ ဂုန့် ဂေ။ 13 အန် ပီ ဝီ တဝ်း ဒီ ဂွန် ဂေ တွိုန်၊ “ခြိုင် ကွပ် မာလာ၊ ဒွါ ဒီ အုဝ်။” ဂေ ဘော ခြိုင် ကွပ် မာလာ တွိုန်၊ တဲး အန် ပဝ့်။ 14 အန် ဘော ပဝ့် ဟာဝ် ဒူပ် ဒူအီ ပီ တိုယ် ဇဝ်ဖြာ တွိုန်၊ ဘော ဟာဝ် ယိုဝ် ဒူအီ တွိုန် ဒေါ ကွယ် အန် ခြိုမ် ဟေ ထေရေပ်။ အန် ဘော ဒီမွှတ် တဝ်း၊ “မဲ မုး ဒူအီ ပီ တိုယ် ဇဝ်ဖြာ၊ အီ တး မိူင် ယူဒါ။း” ဒူအီ တွိုန် ဝီ တဝ်း၊ “ဟဲ့ မုး အုဝ်။”

15 အန် ဘော ဘာင် ဒူအီ တွိုန် တဝ်း၊ “ဟာဝ် ဝေန့် ဒူပ် အုဝ်။ ဝေန့် ဟူမ် ခါမုန် ခဲင် ကာင် အုဝ်။”

16 ဒူအီ ပီ တိုယ် ဇဝ်ဖြာ တွိုန် ဝီ တဝ်း၊ “အုဝ် တူ ပွိုန် ဝေန့် ဒူပ် မဲ။ အုဝ် တူ ပွိုန် ဝေန့် လိုပ် ခဲင် ကာင် မဲ။ အုဝ် တူ ပွိုန် ဟူမ် ခါမုန်။ အုဝ် တူ ပွိုန် ဒျီင် အိုမ် ဒီ နီ။

17 ဇဝ်ဖြာ ဟဲ့ ကာလာင် ဒီ အုဝ် တဝ်း၊ ‘မဲ တူ ပွိုန် ဟူမ် ခါမုန်၊ တူ ပွိုန် ဒျီင် အိုမ်။ မဲ တူ ပွိုန် ဝီ ဝေန့် ဒူပ် န့တေန့် ဘြိမ် မဲ။’”

18 အန် ဝီ တဝ်း ဒီ ဒူအီ ပီ တိုယ် ဇဝ်ဖြာ တွိုန်၊ “အုဝ် မိူဝ် မုး ဒူအီ ဘျာန် ဂြုဝ်း ဇဝ်ဖြာ ပီ မဲ။ အာမူ အာမာတ် ဇဝ်ဖြာ ဟဲ့ ကာလာင် ဂြုဝ်း ဇဝ်ဖြာ ဒီ အုဝ် တဝ်း၊ ‘တဲး မဲ ဒဲ့ အန် တး ဟူမ် ခါမုန်၊ ဒျီင် အိုမ် ဒီ ကာင် မဲ။’” အန် ယီ ကာလုဝ် ဒီ ဒူအီ ပီ တိုယ် ဇဝ်ဖြာ တွိုန်။ 19 ခုဝ်၊ ဒူအီ ပီ တိုယ် ဇဝ်ဖြာ တွိုန် ဘော ဝေန့် ဟူမ် ခါမုန်၊ ဒျီင် အိုမ် ဒီ ကာင် အန်။

20 ဒေါ ဆီ တုတ့် ဟူမ် ဂါယ်၊ ဇဝ်ဖြာ ဝီ ကာလာင် ဒီ ဒူအီ ဘျာန် ဂြုဝ်း ဇဝ်ဖြာ အီ ဟဲ့ ဒဲ့ တဲး အန် ဝေန့်။ 21 အန် ဘော ဒတ် ဒီ ဒူအီ ပီ တိုယ် ဇဝ်ဖြာ အီ တး မိူင် ယူဒါ တွိုန် တဝ်း၊ “ဇဝ်ဖြာ တဝ်း၊ မဲ တူ ထူမ် ဂြုဝ်း ဇဝ်ဖြာ၊ မဲ တူ ထူမ် ပီ တဝ်း ဇဝ်ဖြာ ဒီ မဲ။ အန် မုး ဇဝ်ဖြာ ပီ ကြိုပ် မဲ။ 22 မဲ ဟဲ့ ဝေန့်၊ ဟူမ် ခါမုန်၊ ဒျီင် အိုမ်။ အုဝ် ယီ တဝ်း ဒီ မဲ၊ ‘ကွဲ့ ဟူမ် ခါမုန်။ ကွဲ့ ဒျီင် အိုမ်။’ ခုဝ် အန် တီ၊ မဲ တူ ယမ် ဒူင် မိုဝ်း ဘာရေဝ် ဒါ ဒါ မဲ ဂေ တွိုန်။ ဂေ တူ ပွိုန် ဒီ ဒိပ် ဒုဝ် မဲ ခဲင် ဘာရေဝ် တီ။”

23 ဒူအီ ပီ တိုယ် ဇဝ်ဖြာ တွိုန် ဟဲ့ ဟွတ့် ဟူမ် ခါမုန်၊ ဟဲ့ ဟွတ့် ဒျီင် အိုမ်။ ပန် တီ ဒူအီ ဘျာန် ဂြုဝ်း ဇဝ်ဖြာ တွိုန် ဘော ခြိုင် ကွပ် မာလာ အန်၊ ဒွါ ဒီ ဒူအီ ပီ တိုယ် ဇဝ်ဖြာ ပီ ဒဲ့ တး အန် တွိုန်။ 24 ဒူအီ ပီ ဒဲ့ တး အန် တွိုန် ဘော လေး ဝေန့်။ အန် ဘော ဟာဝ် ဒူပ် န့တေန့်၊ န့ ဘော မိုဝ်း မာခြင်ဆီ ကဝ့် ယမ် အန်။ အန် ဘော ကေး ယမ် ဒူပ် န့တေန့် တီ။ မာလာ ဘော မာခြင်ဆီ တွိုန် ဝီ ကွယ် ခူပ် အန်၊ ယွတ် အန်။ 25 ဂေ ဒူအီ ဟဝ် အီ ဟာဝ် ဒူပ် န့တေန့် တွိုန်၊ ဂေ ဘော ယိုဝ် ဒူအီ ယမ် ဒူပ် န့တေန့်၊ ဘော ယိုဝ် ဘော မာခြင်ဆီ ကွယ် ခူပ် အန် ဒီ တီ။ ဂေ ဘော ဝေန့် ကာလာင် ခဲင် မိူင် ဒူင် ကွယ် ဒူအီ ဘျာန် ဂြုဝ်း ဇဝ်ဖြာ အီ ဟဲ့ ရာမ် ကတ် တွိုန်။

26 ဒူအီ ဘျာန် ဂြုဝ်း ဇဝ်ဖြာ အီ ဒဲ့ တး အန် တွိုန်၊ အန် ဘော ယိုဝ် လွင် အန် တီ၊ အန် ဝီ တဝ်း၊ “အန် မုး ဒူအီ ပီ တိုယ် ဇဝ်ဖြာ၊ အီ တူ ထူမ် ပီ စ်ု ဇဝ်ဖြာ ဒီ အန်။ ခုဝ်၊ ဇဝ်ဖြာ တဲး မာခြင်ဆီ ကဝ့် ယမ် အန်၊ တဲး န့ ပီ ပီ တဝ်း ဇဝ်ဖြာ ဒီ အန်။”

27 အန် ဝီ တဝ်း ဒီ ဂွန် အန်၊ “ဘေ ခြိုင် ကွပ် မာလာ ဒီ အုဝ်။” ဂေ ဘော ခြိုင် ဒွါ ဒီ အန်။ 28 အန် ဘော ဟာဝ် ယိုဝ် ဒုဝ် ဒူအီ ယမ် ကွယ် ဒူပ် န့တေန့် တွိုန်။ မာလာ ဂါယ် မာခြင်ဆီ ဆီ ကွယ် ခူပ် ဒူအီ ယမ် တီ။ မာခြင်ဆီ ယီ တူ ဟူမ် ဒူအီ ယမ်။ မာလာ မိူဝ် အန် တူ ကဝ့်။ 29 ဒူအီ ဘျာန် ဂြုဝ်း ဇဝ်ဖြာ ဘော စုဝ့် ဒူအီ ယမ် တွိုန်၊ ဘ့လေး ဒဲင် ကာတု မာလာ အန်၊ တိုယ် ဝေန့် အန် ဇမ် မိူင် အန်၊ တဲး ဂေ ပွိုန် ဒီ က့လိုဝ်၊ ပွိုန် ဒီ ယာမ် ကူပ် အန်၊ တဲး ဂေ ပွိုန် ဒီ ဒိပ် အန်။ 30 အန် ဘော ဒိုဝ်း ဒုဝ် ဒူအီ ယမ် တွိုန်၊ ဟာဝ် ဘ့လေး ခဲင် ဘာရေဝ် အန်။ အန် ဘော ယာမ် တဝ်း၊ “အိုယ် မဲ ဝါ အုဝ်။”

31 အန် ဟဲ့ ဟွတ့် ဘ့လေး ဒုဝ် ယမ် တီ ခဲင် ဘာရေဝ်၊ အန် ဝီ တဝ်း ဒီ ဂွန် အန်၊ “ဆေ အုဝ် ဟီ ယမ်၊ ဘေ လုဝ် ဒိပ် ဘော အုဝ် ခဲင် ဘာရေဝ် တီ၊ တဲး ဒုဝ် အုဝ် ကွယ် ခူပ် ဒူအီ ပီ တိုယ် ဇဝ်ဖြာ နီ။ 32 ခုဝ်၊ ဂြုဝ်း ပီ ကာလာင် ဒူအီ ပီ တိုယ် ဇဝ်ဖြာ နီ၊ န့ ဟဲ့ မှာန် တူတ့် ဒွန် မျုဝ်။ ပီ တဝ်း အန် လွင် ကာစှူင့် လှူ အီ ကွယ် ဒီ မိူင် ဘေဒါအေန် ဘော လွင် ကာစှူင့် ဘဲန် ပ့လုဝ့် ဘဲန် ပ့လုဝ့် ပီ ဘူင် ဂေ ဒီ ဒူင် စာ ဘော ခဲင် မိူင် ဆာမာရီ တွိုန်၊ န့ ဒီ ဘဲန် တူတ့် ပါယ် တီ။”

33 ဝါယ် တီ အာယေရုဝ်ဘုဝ် ဟဲ့ ယိုဝ် ပါယ် တီ၊ အန် ယီ ဘူင် ဟာဝ် နာ တူ မွှိုမ်။ အန် ပီ ဝီ ဒိုဝ်း ဒူအီ ဘဲန် မျုဝ် ဘဲန် မျုဝ်၊ တဲး ဂေ ဘဲန် ဒူအီ လှူ ဒီ ဇဝ်ဖြာ။ အာဆေ မိုဝ်း နဝ်း ဆီ ဘူင် ဇိုဝ် တီ၊ အာယေရုဝ်ဘုဝ် ဘော တဲး ဂေ ဘဲန် ဒူအီ လှူ ဒီ ဇဝ် ဒီ ဒူင် စာ ဘဲန် ပ့လုဝ့် ဘဲန် ပ့လုဝ့် ပဲ့ ဟဲ့ ဘ့လေး အုန် အန်။ 34 ကူပ် မှာပ် ပီ ဘူင် အန် တီ၊ ခဲ့ ကွယ် ဒူအီ အာမျုဝ် အန်၊ ဂေ ဝီ လုဝ် ခမ် မှာပ်၊ လုဝ် ယမ် တူတ့်၊ ကွဲ့ တဲး ဂေ ပွိုန် ဒီ ကွယ် ဒဲင် ကာဒါယ် နီ။