1 ဒေါ အန် တီ ဂွန် အီမာယ် အာယေရုဝ်ဘုဝ် အီ စိူဝ် အာဖီယ ဝီ မိုဝ်း ဆဝ်။ 2 အာယေရုဝ်ဘုဝ် ဝီ တဝ်း ဒီ အီဘိုန့် အန်၊ “တဲး မဲ မ့ပြာယ် အာရိုပ် မဲ၊ တဲး န့ ဘ့လိူင်၊ ကွဲ့ တဲး အီ နပ် မဲ မုး အီဘိုန့် အာယေရုဝ်ဘုဝ်။ တဲး မဲ ဟာဝ် ဒီ မိူင် ဆီလုဝ် တွိုန်။ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟီယာ၊ အန် ကွယ် ဒီ တီ။ အန် ဟဲ့ ဒွိုမ် ဘျ လွင် အုဝ် ဒီ ပွိုန် ဒီ အိုပ် ဒူအီ အီဆာရေလ။ 3 တဲး မဲ ဒိုဝ်း ဒီ ဂူင့် ခါမုန် ဂိုဝ် ဘူင့် ဘော ခါမုန် အီ ဒီခ့လဲပ် ကာလဝ့် ဘော ကာပဝ် ငါမ် မာဖျီန်၊ တဲး မဲ ဟာဝ် ဒူင် ကွယ် အန်။ အန် ဒီ ကာလာင် လွင် ဂွန် တီ န့ ပါယ် မှဝ်။” 4 အီဘိုန့် အာယေရုဝ်ဘုဝ် တွိုန် ဘော ဘူင် ဒူပ် ပီ တဝ်း အီမာယ် အန် တီ။ အန် ဘော ဟာဝ် ဒီ မိူင် ဆီလုဝ် ဘော ဟာဝ် ဇမ် ဒူင် ကွယ် ကာင် အာဟီယာ တွိုန်။

ဒေါ အန် တီ အာဟီယာ ဟဲ့ ကတ် ကာဆဝ်။ ငါယ် အန် ဟဲ့ မုဝ်၊ အာဝ် ဟူ လိုဝ်း ဆီချာ။ 5 ဇဝ်ဖြာ ဝီ တဝ်း ဒီ အာဟီယာ၊ “ဘ်ု မဲ ယွတ်၊ အီဘိုန့် အာယေရုဝ်ဘုဝ် ဒီ တး ဒီမွှတ် လွင် ဂွန် အီမာယ် အန် အီ ဟဲ့ ဆဝ်။ မဲ လုဝ် ကာလာင် ပါယ် နီ ပါယ် နီ ဒီ အန်။ ပါယ် ဒီ တး အန်၊ အန် ဟဲ့ မ့ပြာယ် အာရိုပ် အန်၊ တဲး အန် ပီ အီဘိုန့် ပေါ အူ ဝီ။”

6 အာဟီယာ ဟဲ့ ယိုဝ် ဂြန့် ဆိန့် တး ဇမ် အီဘိုန့် တီ ဘာင် မာလုဝ်း။ အန် တဝ်း၊ “အိုယ် အီဘိုန့် အာယေရုဝ်ဘုဝ်၊ တး လိုပ် လိုပ်။ မှဝ် န့ ပါယ် ပီ ညိုင်ရာင် မဲ ဒီ ဘဲန် အီဘိုန့် ပေါ အူ ဝီ။း ဇဝ်ဖြာ ဟဲ့ စ်ု အုဝ် ကာလာင် လွင် အီ ဒုက် အီ ညှာပ် ဒီ နဝ်း မဲ တီ။ 7 မဲ ဟာဝ် ကာလာင် ဒီ အာယေရုဝ်ဘုဝ် တဝ်း၊ ‘ဇဝ်ဖြာ အီ မုး ဇဝ်ဖြာ အီ အိုပ် ဒူအီ အီဆာရေလ၊ အန် တဝ်း၊ “အုဝ် ဟဲ့ ရဝ်း မဲ၊ ဟဲ့ တဲး မဲ ဘဲန် အီ အိုပ် ဒူအီ အီဆာရေလ အီ မုး ဒူအီ အာမျုဝ် အုဝ်။’ 8 အုဝ် ပီ ဘော ဒိုဝ်း မာန် မိူင် အာဒါဝိတ်၊ ဒွါ ဒီ မဲ မိူဝ်၊ မဲ တူ ပီ ဒဲစေန့် အုဝ် အီ စိူဝ် အာဒါဝိတ်၊ အီ ဟဲ့ ဒူပ် ဒါရာ အုဝ် ဒွန် မျုဝ် ဘော ဘူင် ဆီချာ အီ ဘွတ် အီ မွှိုမ် ပီ အိုင် အုဝ်။ 9 မဲ ဟဲ့ ဘူင် မှာပ် လွှိုမ် ဂေ အီ ကွယ် ဆိန့် အာတ့် ကွယ် မဲ။ မဲ ဟဲ့ ဝဲန် အုဝ်၊ ဝီ ဘူင် အာရိုပ်၊ တဝ်း န့ မုး ဇဝ်ဖြာ ပေါ အူ ကာဒင် အီ မုး အာရိုပ် ပီ လှုဝ် အီ တာ ခြိဝ်။ ပီ ဘူင် မဲ တီ ဟဲ့ တဲး အုဝ် ဘဲန် နဝ်း ရူ။ 10 ခုဝ်၊ အုဝ် ဒီ ဒမ် မှာပ် ဒီ အာယေရုဝ်ဘုဝ်။ အုဝ် ဒီ ဝဲန် တူတ့် ခဲ့ ကွယ် အီမာယ် ခဲင် လှုက်လှာန် အာယေရုဝ်ဘုဝ် ဒွန် ဝီ။ ဘော ဂေ အီမာယ် ပဲ့ ဟဲ့ မှေတ့် ဘေ၊ တဲး ဂေ ဘဲန် မှာယ် ဘေ ဘော ဂေ အီ တူ ဒွိုမ် မိုဝ်း ဒါ ကာညာ အီ အိုပ် ဂေ၊ အုဝ် ဒီ ဝဲန် တူတ့် ဂေ ခဲင် မိူင် အီဆာရေလ။ အုဝ် ဒီ ဒိုဝ်း ဝဲန် လှုက်လှာန် အာယေရုဝ်ဘုဝ်၊ တဲး န့ ကော ပီ အီ ဂိတ် ဝဲန် မ့ပိုမ် အျီင် မက်၊ တဲး န့ ကော တူတ့် တူတ့်။ 11 လှုက်လှာန် အာယေရုဝ်ဘုဝ် အီ ယမ် ခဲင် မိူင် ဂေ မာဆုဝ် အီ ဒီ ဟူမ်။ ဂေ အီ ယမ် နာ ရေတ့် မိူင်၊ မာဆိမ် အီ ဒီ တး ဟူမ်။” ဇဝ်ဖြာ ဟဲ့ ကာလာင် ပါယ် တီ။

12 ခုဝ်၊ တဲး မဲ ဝီ ဝေန့် ဒီ ကာင် မဲ။ ဆေ မဲ ဟီ ဝေန့် ဇမ် ခဲင် မိူင်၊ ဂွန် မဲ တီ အန် ဒီ ယမ် အူ ဇေန့်။ 13 ဒူအီ အီဆာရေလ ဘောကာဂ့လျီတ်၊ ဂေ ဒီ ကာဖြူမ် ဒီ ယာမ် ဘော ဒိပ် အန်။ ခဲ့ ကွယ် လှုက်လှာန် အာယေရုဝ်ဘုဝ် တွိုန်၊ အန် အူ ဝီ တီ အီ ပွိုန် ဒီ ဒိပ်။ ခုဝ်၊ ခဲင် လှုက်လှာန် အာယေရုဝ်ဘုဝ် တွိုန်၊ န့ မုး အန် အူ ဝီ အီ ဟဲ့ ဘူင် နာ ဘွတ် နာ မွှိုမ် အီ လဝ့် နဝ်း ဇဝ်ဖြာ အီ မုး ဇဝ်ဖြာ အီ အိုပ် ဒူအီ အီဆာရေလ။

14 ကူပ် န့ ပါယ် တီ ဇဝ်ဖြာ ဘော တဲး န့ မိုဝ်း ခုန်ဒီခမ် ပေါ အူ ကာဒင် အီ ဒီ အိုပ် ဒူအီ အီဆာရေလ။ အန် ဒီ ပွိုန် ဒီ ဝဲန် လှုက်လှာန် အာယေရုဝ်ဘုဝ် ဒေါ အန် တီ။ ဟဲ့ ဘဲန် ပါယ် တီ ဒေါ တီ နီ အူ ဇေန့်။

15 ဇဝ်ဖြာ ဒီ ဘော ဒမ် မှာပ် ဒီ ဒူအီ အီဆာရေလ၊ တဲး န့ ကော ပီ ကာဘာင် ဂုဝ်�လင် အီ ရ်ု ခဲင် အိုမ်။ အန် ဒီ ဘော ဒိုဝ်း လေး ဒူအီ အီဆာရေလ ခဲင် မိူင် ပဲ့ ဟဲ့ အာပ် အန် ဒီ ဒါ ဒါ ဂေ။ မိူင် တီ မုး မိူင် အီ ဘွတ် အီ မွှိုမ်။ အန် ဘော တဲး ဂေ ဟာဝ် ကွယ် နာ တ ဘ့လဲင် အိုမ် တာင် တွိုန်။ အန် ဒီ ဘူင် ပါယ် တီ ကူပ် ဘူင် ဂေ ကန်ထွန် ပီ လှူ ဘေ ဒီ နာင် ကာနမ် အေဆူရာ။ အာတီ တဲး ဇဝ်ဖြာ ရူ ဒီ ဂေ။ 16 အန် ဇဝ် ဒီ ဝဲန် ဒူအီ အီဆာရေလ ကူပ် မှာပ် ပဲ့ ဟဲ့ ဘူင် အာယေရုဝ်ဘုဝ် ဘော ကူပ် မှာပ် ပဲ့ ဟဲ့ ကာဆုး အန် ဂေ ဒူအီ အီဆာရေလ ဘူင်။” ခဲ့ တီ အာဟီယာ ကာလာင် ဒီ အီဘိုန့် အာယေရုဝ်ဘုဝ်။

17 ပန် တီ နာင် တွိုန် ဘော ဝီ ဝေန့် ဇမ် ဒီ မိူင် ဒီရာစာ။ အန် ဘော တး ဇမ် ဘာင် မာလုဝ်း ဟုဝ် အန်၊ ဂွန် အန် တွိုန် ဘော ယမ် အူ ဇေန့်။ 18 ဂေ ဒူအီ အီဆာရေလ ဘောကာဂ့လျီတ် ဘော ကာဖြူမ် ဒီ က့လိုဝ် ဘော ယာမ်၊ ဘော ဒိုဝ်း ဟာဝ် ဒိပ် အန်၊ တဲး န့ ပီ ပီ တဝ်း ဇဝ်ဖြာ ဒီ ဒဲစေန့် အန် အီ မုး ဒူအီ ဘျာန် ဂြုဝ်း ဇဝ်ဖြာ အီ စိူဝ် အာဟီယာ တွိုန်။

19 လွင် ပဲ့ ဟဲ့ ဘူင် အာယေရုဝ်ဘုဝ် ဒေါ မုး စုဝ် အန် အီ ညှမ် ဒွိုမ် ကာလာင်၊ လွင် ကာဂုဝ်း အန် ဒီ ရန်ဆူ အန် ဘော လွင် ပီ အိုပ် အန် မိူင် ဂေ တွိုန်၊ န့ ဟဲ့ ဒဲမ် အုန် ခဲင် ဘပ် ပီ ဒဲမ် ဂေ လွင် ခုန်ဒီခမ် ဂေ အီ အိုပ် မိူင် အီဆာရေလ။

20 အာယေရုဝ်ဘုဝ် ဟဲ့ အိုပ် ဘိုင် မိူင် အာဒါ အာ ဂိုဝ် ဒီ အာ ဆီနမ်၊ အန် ဘော ယမ် ဒူပ် ဒါ ဒါ အန် ဂေ တွိုန်။ အာနာဒါပ် အီ မုး ဂွန် အီမာယ် အာယေရုဝ်ဘုဝ် ဘော ဝီ ပ့လု ဂုန့် အန်၊ ဝီ ဘဲန် ခုန်ဒီခမ်။

21 န့ ယီ မုး ဂွန် အာဆာလုဝ်မုဝ် တွိုန် အီ စိူဝ် အာရေဘူမ်၊ အန် အိုပ် မိူင် ယူဒါ။ ဒေါ ဘဲန် အန် ခုန်ဒီခမ်၊ အာဆာက် အန် ဟဲ့ နုဝ့် ဖွုန် ဂိုဝ် ဒီ အူ ဆီနမ်။ အန် ဘော အိုပ် ဘိုင် မိူင်၊ ကွယ် ခဲင် မိူင် ယေရူဆာလဲမ် ဂိုဝ် ဒီ ဘူ ဆီနမ်။ န့ မုး မိူင် ပီ ရဝ်း ဇဝ်ဖြာ ခဲင် ကာဒါယ် မိူင် ဒူအီ အီဆာရေလ၊ တဲး အန် ကွယ် ဒီ တီ။ မာ အာရေဘူမ် စိူဝ် နာင် နာမာ အီ မုး အာမျုဝ် အမ်မူန်။ 22 ဒူအီ အာယူဒါ၊ ဂေ ဘူင် နာ တူ မွှိုမ် ပီ တူ အိုင် ဇဝ်ဖြာ၊ ဘူင် မှာပ် ကိူန် လွှိုမ် ဒေါ မုး စုဝ် ဒါ ဒါ ဂေ၊ တဲး ဇဝ်ဖြာ ရူ ဒီ ဂေ လွှိုမ် ပီ ဒွိုမ် ရူ အန် ဒီ ဒါ ဒါ ဂေ တွိုန်။ 23 ဂေ ဘော ဘူင် ကာစှူင့် ဒီ ဒူင် စာ ဘော ကြိုပ် ခဲ့ အိုင် ဂေ။ ဂေ ဘူင် ကန်ထွန်၊ ကြိုပ် နာင် ကာနမ် အေဆူရာ ဒဲင် နွန် စာ ဒွန် ပ့လုဝ့် ဘော ဒီ ဒင် ဟေ တာင် ဒွန် ကာဒင်။ 24 န့ ဘော မိုဝ်း ဂေ အီမာယ် အီ လာယ် လုတ့် ပီ ဂေ ခဲင် မိူင် ဆုဝ်ဒူမ် တွိုန်။ ဂေ မိူဝ် ကွယ် ခဲင် မိူင် ယူဒါ တီ။ ဂေ ဘူင် အီ မွှိုမ် ကာအိး ဒွန် မျုဝ် ပဲ့ ဟဲ့ ဘူင် ဂေ ဒူအီ အာမျုဝ် ဟဝ်၊ အီ ဟဲ့ ကွယ် ခဲင် မိူင် ကာနန့် ပဲ့ ဟဲ့ ဟုဝ် ဝဲန် ဇဝ်ဖြာ အာတ့် တး လိုပ် ဒူအီ အီဆာရေလ ခဲင် မိူင် ဂေ တွိုန်။

25 ခုန်ဒီခမ် အာရေဘူမ် ဟဲ့ အိုပ် မိူင် အန် အာဒါ ဖန် ဆီနမ်၊ ခုန်ဒီခမ် အာဆီဆက် အီ အိုပ် မိူင် အဲဂိုပ် ဘော တး ကာဂုဝ်း ဒီ မိူင် ယေရူဆာလဲမ်။ 26 အန် ဘော ဒိုဝ်း ဟာဝ် တူတ့် ကြုဝ်ကြာမ် ဒွန် မျုဝ် ခဲင် ဟုဝ် ဇဝ်ဖြာ ဘော ကြုဝ်ကြာမ် ခဲင် ဟုဝ် ခုန်ဒီခမ်။ အီ မုး မင် ဂွင့် ခြိဝ် ပဲ့ ဟဲ့ ဘူင် အာဆာလုဝ်မုဝ် တွိုန်၊ အန် ဘော ဒိုဝ်း ဟာဝ် တူတ့်။ 27 ခုန်ဒီခမ် အာရေဘူမ် ဝီ ဘူင် မင် ဂွင့် ဘွင့်၊ တဲး န့ ကာဒါင် မင် ဂွင့် ခြိဝ်၊ ဝီ အာပ် ဒီ ဒါ တာင် အီ အိုပ် ဒါ ဆိုက် ဂေ အီ ဘ်ု ဘာင် မာလုဝ်း ဟုဝ် အန်။ 28 ဒွန် ဇေန့် ဒေါ ဟာဝ် ခုန်ဒီခမ် ဒီ ဟုဝ် ဇဝ်ဖြာ၊ ဂေ အီ ဘ်ု ဟုဝ် အန် တွိုန်၊ ဂေ ဒိုဝ်း ဂူင့် မင် ဂွင့် တီ။ ဟဲ့ ဟွတ့်၊ ဂေ ပီ ဝီ အုန် ဒူင် ကွယ် ဂေ တွိုန်။

29 လွင် ပီ ဘူင် အာရေဘူမ် အီ ညှမ် ဒွိုမ် ကာလာင်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် ဒူအီ အာယူဒါ။ 30 အာရေဘူမ် ဂါယ် အာယေရုဝ်ဘုဝ် တွိုန်၊ ဂါယ် ကာဂုဝ်း ဆေဆေ။ 31 ပန် တီ အာရေဘူမ် ဘော ယမ် ဒူပ် ဒါ ဒါ အန်။ ဂေ ဘော ဒိပ် အန် ဒူပ် ဒါ ဒါ အန် ခဲင် မိူင် အာဒါဝိတ် တွိုန်။ မာ အန် စိူဝ် နာင် နာမာ၊ အီ မုး ဒူအီ အာမျုဝ် အမ်မူန်။ ဂွန် အီမာယ် အန် အီ စိူဝ် အာဖီယ ဘော ဝီ ပ့လု ဂုန့် အန်၊ ဘဲန် ခုန်ဒီခမ်။