1 အာယေရုဝ်ဘုဝ် အီ မုး ဂွန် အာနေဘတ် ဟဲ့ ဘဲန် ခုန်ဒီခမ် အီ အိုပ် မိူင် အီဆာရေလ အာဒါ ဂိုဝ် ဒီ ဒါ ဆီနမ်။ ဆီနမ် အန် တီ အာဖီယ ဘော စုး ဒီ အိုပ် ဘိုင် မိူင် ယူဒါ။ အန် အိုပ် ကွယ် ခဲင် မိူင် ယေရူဆာလဲမ် အာဒါ အူယ် ဆီနမ်။ 2 မာ အန် မုး ဂွန် အာဘီဆာလူမ် အီ စိူဝ် နာင် မာခါ။

3 ဘော အာဖီယ ဘူင် မှာပ် ပီ ဂုန့် အန်။ နဝ်း အန် တူ ဒူပ် ဆီချာ ဇဝ်ဖြာ အီ မုး ဇဝ်ဖြာ ပီ ကြိုပ် အန်။ အာဝ် ပီ နဝ်း အာဒါဝိတ် အီ မုး ဒါ အန်။ 4 ကူပ် လှုဝ်း ဇဝ်ဖြာ အာဒါဝိတ်၊ အန် တဲး လှုက်လှာန် အန် ပ့လု အာဒါဝိတ်၊ တဲး မိူင် ယေရူဆာလဲမ် ကွယ် ဆီချာ။ န့ ပီ အန် တဲး န့ မိုဝ်း ငဝ် ရာင် အီ ဘ့လာင်၊ တဲး န့ ကွယ် ခဲင် မိူင် ယေရူဆာလဲမ် ဆေဆေ။ 5 ဆေဆေ အာဒါဝိတ် ဟဲ့ ဘူင် နာ ဘွတ် နာ မွှိုမ် ပီ အိုင် ဇဝ်ဖြာ။ အန် တူ ဝး ခေါ အူ မျုဝ် ခဲ့ ပီ ကာလာင် ဇဝ်ဖြာ ဒီ အန်။ န့ ယီ မိုဝ်း ပဲ့ ဟဲ့ ဘူင် အန် ဒီ အာအူရီယာ အီ မုး ဒူအီ ဟေထိတ် တွိုန်။ အူ မျုဝ် တီ အန် ဟဲ့ ကာလိုပ်။ 6 အာဖီယ အီ မုး ဂွန် အာရေဘူမ် တွိုန်၊ အန် တဲး ဒါ ဆိုက် အန် ဝီ လာယ် ကာဂုဝ်း ဒီ အာယေရုဝ်ဘုဝ် ဒေါ မုး စုဝ် အန်။ 7 လွင် ပဲ့ ဟဲ့ ဘူင် အာဖီယ အီ ညှမ် ဒွိုမ် ကာလာင်၊ ဘော လွင် ပဲ့ ဟဲ့ ဘူင် အန် ဒွန် မျုဝ် န့ ဟဲ့ ဒဲမ် အုန် ခဲင် ဘပ် ခုန်ဒီခမ် ယူဒါ။ အာဖီယ ဂါယ် အာယေရုဝ်ဘုဝ် ဟဲ့ လာယ် ကာဂုဝ်း ပါယ် တီ။ 8 အာဖီယ ဘော ယမ် ဒူပ် ဒါ ဒါ အန်။ ဂေ ဘော ဒိုဝ်း ဒိပ် အန် ခဲင် မိူင် အာဒါဝိတ် တွိုန်။ အာဆာ အီ မုး ဂွန် အာဖီယ ဘော ဝီ ပ့လု ဂုန့် အန်၊ ဘဲန် ခုန်ဒီခမ်။

9 ဒေါ ဘဲန် အာယေရုဝ်ဘုဝ် ခုန်ဒီခမ် အီ အိုပ် မိူင် အီဆာရေလ အာဒါ အာ ဂိုဝ် ဆီနမ်၊ အာဆာ ဝီ အိုပ် ဘိုင် မိူင် ယူဒါ။

10 အာဆာ တွိုန် အိုပ် ခဲင် မိူင် ယေရူဆာလဲမ် အာဒါ ဖွုန် ဂိုဝ် ဒီ အူ ဆီနမ်။ ယာ အန် မုး နာင် မာခါ၊ အီ မုး ဂွန် အာဘီဆာလူမ် တွိုန်။

11 ခုန်ဒီခမ် အာဆာ ဝီ ဘူင် နာ ဘွတ် နာ မွှိုမ် ပီ အိုင် ဇဝ်ဖြာ တဲး န့ ပီ ပီ ဘူင် အာဒါဝိတ် အီ မုး ဒါ အန်။ 12 အန် ဘော ဟုဝ် ဝဲန် ဂေ အီမာယ် အီ လာယ် လာယ်၊ လာယ် လုတ့် တွိုန်၊ တဲး ဂေ လေး တ မိူင် အန်။ အန် ဘော ပျာတ့် ဝဲန် အာရိုပ် ပဲ့ ဟဲ့ ဘူင် ဂုန့် ဂေ ဒါ အန်။ 13 ဘော နာင် မာခါ၊ အီ မုး ယာ အန်၊ အာဆာ အာဝ် ဟူ တဲး အန် ဘဲန် နာင် ဟောခမ် ကူပ် ဘူင် အန် ကန်ထွန် ဒီ ကြိုပ် နာင် ကာနမ် အေဆူရာ အီ မွှိုမ် ကာအိး။ အာဆာ ဘော ဂ်ု ကန်ထွန် တဲး န့ ကေး၊ ဘော ဒုဝ့် ဝဲန် ခဲင် ငဝ် ခူပ် ဘ့လဲင် ခီဒါရူန် တွိုန်။ 14 အန် ယီ တူ ပျာတ့် ဝဲန် တူတ့် ကာစှူင့် အီ ကွယ် ဒူင် စာ ဂေ တွိုန်။ မာလဲ၊ နဝ်း အာဆာ ယီ လှုဝ်း ဇဝ်ဖြာ ဆေဆေ ဘော စုဝ် အန်။ 15 ဘော ကြုဝ်ကြာမ် ပဲ့ ဟဲ့ ဒွိုမ် လှူ ဂုန့် အန် အီ မုး ခြိုင် တာ ရွိုန် ဂေ ခြိဝ်၊ အန် ဝီ ဟာဝ် အုန် ခဲင် ဟုဝ် ဇဝ်ဖြာ။

16 အာဆာ ဂါယ် အာဘာဆာ အီ မုး ခုန်ဒီခမ် ခဲင် မိူင် အီဆာရေလ တွိုန်၊ ဂါယ် လာယ် ကာဂုဝ်း ဒေါ စုဝ် ဂါယ် ဘော စုဝ်။

17 အာဘာဆာ အီ အိုပ် ဒူအီ အီဆာရေလ၊ အန် ဟာဝ် ကာဂုဝ်း ဒီ မိူင် ယူဒါ။ အန် ဘော ဆမ် ရဲင် ဒီ မိူင် ရာမာ၊ တူ တဲး န့ မိုဝ်း ခေါ အူ ဝီ အီ ပွိုန် ဒီ လိုပ် ဒီ လေး ဒူင် ကွယ် အာဆာ အီ မုး ခုန်ဒီခမ် ဒူအီ အာယူဒါ တွိုန်။

18 ပန် တီ အာဆာ ဘော ဒိုဝ်း ရွိုန် ဂေ ခြိဝ် အန် အီ ဆီ ဂိတ်၊ ပီ အုန် အန် ခဲင် ဟုဝ် ဇဝ်ဖြာ ဘော ခဲင် ဟုဝ် အန် တွိုန်။ အန် ဝီ အာပ် ဒွါ တူတ့် ဒီ အာမူ အာမာတ် အန်၊ တဲး ဂေ ဟာဝ် ဒွါ ဒီ အာဘေန်ဟာဒါတ် အီ မုး ခုန်ဒီခမ် အာရာမ်၊ အီ ကွယ် ဒီ မိူင် ဒါမာခူ။ အာဘေန်ဟာဒါတ် မုး ဂွန် အာဒါဘီမူန်။ အာဒါဘီမူန် ဝီ မုး ဂွန် အာရေစုန်။ 19 အန် ဝီ စ်ု အာမူ အာမာတ် အန် တဝ်း၊ “တဲး အာယ် လာယ် ဘဲန် အူ ဂိုက်၊ တဲး န့ ပီ ဒေါ မုး စုဝ် ဂုန့် အုဝ် ဂါယ် ဂုန့် မဲ။ ဘော ဂါယ် ဟဲ့ ဘဲန် အူ ဂိုက်။ အုဝ် ဟဲ့ ဒိုဝ်း ရွိုန် ဂေ ခြိဝ်၊ ဒွါ ဒီ မဲ။ အုဝ် မှာန့်၊ ကွဲ့ တဲး မဲ ဘဲန် ဂိုက် အာဘာဆာ အီ မုး ခုန်ဒီခမ် ဒူအီ အီဆာရေလ တွိုန်၊ တဲး အန် ကာဒုး ဒီ လေး တဝ် ဒူင် ကွယ် အုဝ်။”

20 ဟဲ့ ဟွတ့်၊ မှာန့် ပါယ် တီ အာဘေန်ဟာဒါတ် ဘော ထူမ် ဂြုဝ်း ပီ တဝ်း ခုန်ဒီခမ် အာဆာ တီ။ အန် ဘော စ်ု ဒါ ဘုဝ် အန် ဂေ ဒါ ဆိုက် အန် ဟာဝ် ဒီ မိူင် အီဆာရေလ တွိုန်။ ဂေ ဘော ကာဂုဝ်း ဘော ပဲ မိူင် အီယူန် ဘော မိူင် ဒါန်၊ မိူင် အာဘေန်ဘေတ်မာခါ၊ မိူင် ကီနာရေတ် ဘော မိူင် ဘော မိူင် နာပ်ထာလီ ဘော မိူင်။ 21 အာဘာဆာ ဘော ယိုဝ် လွင် အန် တီ။ အန် အာဝ် ဟူ ဒန် ဘူင် တဲး န့ ဟွတ့် ရဲင် မိူင် ရာမာ တွိုန်။ အန် ဘော ဝီ ကာဒုး ဒီ ဟာဝ် ကွယ် ဒီ မိူင် ဒီရာစာ။ 22 ပန် တီ ခုန်ဒီခမ် အာဆာ တွိုန် ဘော ဒမ် ဂြုဝ်း တဲး ဂေ ဒူအီ ခဲင် မိူင် ယူဒါ ထူမ် ဘော မိူင်၊ ကွဲ့ တဲး န့ လွတ် ခေါ အူ ဝီ၊ တဲး ဂေ ဟာဝ် ဒိုဝ်း မာဝ် ဂေ ဟေ ပဲ့ ဟဲ့ တာ အာဘာဆာ ဒီ ဆမ် ရဲင် မိူင် တွိုန်။ အန် ဘော ဒိုဝ်း ကြုဝ် ဂေ တီ၊ ဝီ ဘူင် ဘဲန် မျုဝ် ဘဲန် မျုဝ် ခဲင် မိူင် ဂီဘာ အီ ကွယ် ခဲင် ကာဒါယ် ဒူအီ အာဘေန်ယာမ် ဘော ခဲင် မိူင် မီဇာဖာ။

23 လွင် ပဲ့ ဟဲ့ ဘူင် အာဆာ အီ ညှမ် ဒွိုမ် ကာလာင်၊ လွင် ပွုန် အန်၊ ပဲ့ ဟဲ့ ဘူင် အန် ဘော လွင် မိူင် ပဲ့ ဟဲ့ မ့ပြာယ် အန်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် ယူဒါ။ အန် ဘော ရာမ် ကတ်၊ အန် ဘော မိုဝ်း ဆဝ် ဒီ ပ့လဝ် အန်။ 24 ပန် တီ အန် ဘော ယမ် ဒူပ် ဒါ ဒါ အန်။ ဂေ ဘော ဒိပ် အန် ခဲင် မိူင် အာဒါဝိတ် အီ မုး ဒါ ဒါ အန်။ ဂွန် အန် အီ စိူဝ် အာယောဆာဖာတ် ဘော ဝီ ပ့လု အန်၊ ဘဲန် ခုန်ဒီခမ်။

25 ဒေါ မုး အာဆာ ခုန်ဒီခမ် ခဲင် မိူင် ယူဒါ အာဒါ အာ ဆီနမ်၊ အာနာဒါပ် အီ မုး ဂွန် အာယေရုဝ်ဘုဝ် တွိုန်၊ အန် ဝီ ဘဲန် ခုန်ဒီခမ် အီ အိုပ် ဒူအီ အီဆာရေလ။ အန် အိုပ် ဘိုင် မိူင် အီဆာရေလ အာဒါ အာ ဆီနမ်။ 26 အန် ဘူင် နာ တူ မွှိုမ် ပီ တူ အိုင် ဇဝ်ဖြာ၊ ဘူင် ညိုင် ပီ ပါယ် ဂုန့် အန် ဒီ ဘူင်၊ ဘော ဘူင် မှာပ် ပဲ့ ဟဲ့ ကာဆုး ဂုန့် အန် တဲး ဘော ဂေ ဒူအီ အီဆာရေလ ဘူင်။

27 န့ ယီ မုး အာဘာဆာ အီ မုး ဂွန် အာဟီယာ၊ အီ မုး ခြိုဝ် ဒူအီ အာအီဆာခါ တွိုန်၊ အန် ဘော ခြာမ် ဒီ ဝဲန် အာနာဒါပ်။ အာနာဒါပ် ဂေ ဒါ ဆိုက် အန်၊ ဂေ ဘောကာဂ့လျီတ် ဟဲ့ ကွယ် ဒီ မိူင် ဂီဘေဆူန်၊ အီ မုး မိူင် ဒူအီ ဖီလီထီ။ ဂေ ဟဲ့ တး ရူပ် မိူင် တီ၊ ဘ်ု ဒီ ကာဂုဝ်း။ ဒေါ အန် တီ အာဘာဆာ ငဝ်း ယမ် အာနာဒါပ်။ 28 ဒေါ မုး အာဆာ ခုန်ဒီခမ် အာဒါ အူယ် ဆီနမ်၊ အာဘာဆာ ဟဲ့ ငဝ်း ယမ် အာနာဒါပ် တွိုန်၊ ဘော ဝီ ပ့လု အန် ဘဲန် ခုန်ဒီခမ်။

29 အာဘာဆာ ဟဲ့ ဟွတ့် ဘဲန် ခုန်ဒီခမ်၊ အူ ဇေန့် အန် ဘော ငဝ်း ဝဲန် တူတ့် ခဲ့ ကွယ် အာမျုဝ် အာယေရုဝ်ဘုဝ်၊ တူ တဲး န့ မိုဝ်း ခေါ အူ ဝီ အီ ဆီ အိမ်။ ပါယ် တီ န့ ဘော ဘဲန် ပီ ဒွိုမ် ကာလာင် ဇဝ်ဖြာ ဒီ အာဟီယာ အီ မုး ဒူအီ အီ ကွယ် ဒီ မိူင် ဆီလုဝ် တွိုန်။ 30 ဂေ ဘောကာဂ့လျီတ် ယမ် ကူပ် မှာပ် ပီ ဘူင် အာယေရုဝ်ဘုဝ် တွိုန်။ ဘော မှာပ် ပဲ့ ဟဲ့ ကာဆုး အန် ဂေ ဒူအီ အီဆာရေလ ဘူင်။ န့ ဟဲ့ တဲး ဇဝ်ဖြာ အီ မုး ဇဝ်ဖြာ အီ အိုပ် ဒူအီ အီဆာရေလ ဝီ ဘဲန် နဝ်း ရူ ကာဆဝ်။

31 လွင် ပီ ဘူင် အာနာဒါပ် အီ ညှမ် ဒွိုမ် ကာလာင်၊ ပဲ့ ဟဲ့ ဘူင် အန် ဒွန် မျုဝ် ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။ 32 ခုန်ဒီခမ် အာဆာ ဂါယ် အာဘာဆာ အီ မုး ခုန်ဒီခမ် ဒူအီ အီဆာရေလ တွိုန် ဂါယ် လာယ် ကာဂုဝ်း ဘော စုဝ် ဂါယ်။

33 အာဆာ ဟဲ့ ဘဲန် ခုန်ဒီခမ် ခဲင် မိူင် ယူဒါ အာဒါ အူယ် ဆီနမ်။ ဒေါ အန် တီ အာဘာဆာ အီ မုး ဂွန် အာဟီယာ တွိုန် ဝီ ဘဲန် ခုန်ဒီခမ် ခဲင် မိူင် အီဆာရေလ၊ ကွယ် ဒီ မိူင် ဒီရာစာ။ အာဒါ အာ ဂိုဝ် ဒီ ဖွုန် ဆီနမ် အန် ဘော အိုပ် မိူင် တီ။

34 အန် ဘူင် နာ တူ မွှိုမ် ပီ တူ အိုင် ဇဝ်ဖြာ။ အန် ညိုင် ပီ ပါယ် အာယေရုဝ်ဘုဝ် ဒီ ဘူင် မှာပ် ဘော တဲး ဂေ အာမျုဝ် ဒူအီ အီဆာရေလ ဝီ ဘူင် မှာပ်။